ཁ་སང་རྒྱ་ནག་ཀུང་ཞི་ཞིང་ཆེན་ཏུང་ཤིན་གྲོང་ཁྱེར་གྱི་རྒྱ་མི་ཞིག་གིས་ས་གནས་འཆར་ལྡན་བུ་སྐྱེས་ཁང་གི་ལས་བྱེད་ ༢ དམར་གསོད་དང་གཞན་ལས་བྱེད་ ༤ ལ་རྨས་སྐྱོན་བཟོས་ཡོད་འདུག
ཟླ་འདིའི་ཚེས་ ༢༢ ཉིན་གྱི་སྔ་དྲོའི་ཆུ་ཚོད་ ༨ ཡས་མས་སུ། རྒྱ་ནག་ཀུང་ཞི་ཞིང་ཆེན་ཏུང་ཤིན་གྲོང་ཁྱེར་གྱི་རང་ལོ་ ༣༣ ཡིན་པའི་ཞིང་པ་ཞིག་གིས། ས་གནས་འཆར་ལྡན་བུ་སྐྱེས་སྨན་ཁང་གི་ལས་བྱེད་ ༢ ལ་གྲིས་བརྒྱབ་ནས་བསད་ཡོད་པ་དང་། ཁྲིམས་རྩོད་པ་ཞིག་དང་ལས་བྱེད་གཞན་གསུམ་བཅས་མི་ ༤ ལ་རྨས་སྐྱོན་བཟོས་ཏེ་སྨན་ཁང་དུ་མྱུར་སྐྱོབ་བྱེད་བཞིན་ཡོད་འདུག
མི་གསོད་དོན་རྐྱེན་དེ་བྱུང་མ་ཐག་ཉེན་རྟོག་པས་རྒྱ་མི་དེ་འཛིན་བཟུང་བྱས་ཤིང་། སྨན་ཁང་དེ་ཉེན་རྟོག་པ་དང་དམག་མིས་ཡོངས་སུ་བཀག་སྡོམ་བྱས་ཏེ་དམར་གསོད་བཏང་བའི་ལས་བྱེད་དག་གི་ཕུང་པོ་ཡང་ནང་མི་ཚོར་བདག་པོ་རྒྱག་མ་བཅུག་པར་སྨན་ཁང་ནང་དུ་ལྷག་ཡོད་འདུག མང་ཚོགས་ཁྲོད་ཞིང་པ་དེས་ཅིའི་ཕྱིར་བུ་སྐྱེས་ཁང་གི་ལས་བྱེད་དམར་གསོད་བཏང་བའི་སྐོར་ལ་གླེང་སློང་སྣ་ཚོགས་ཡོང་གི་ཡོད་འདུག
རྒྱ་ནག་གཞུང་འབྲེལ་གསར་ལམ་ཁག་ཏུ། རྒྱ་མི་དེར་བུ་ ༡ དང་བུ་མོ་ ༣ ཡོད་པ་དང་། རྒྱལ་ཁབ་ཀྱི་སྒྲིག་གཞི་ལྟར་ན་དེ་ནི་ཁྲིམས་འགལ་ཞིག་ཆགས་ཡོད་སྟབས་བུ་ཁྱིམ་ཐོའི་ནང་མ་ཚུད་པ་མ་ཟད། བྱིས་པ་ཚོར་འཚོ་བའི་རོགས་ཀྱང་རེག་ཐབས་མེད་སྟབས་ཁྱིམ་བདག་དེས་བསམ་བཞིན་དུ་དོན་རྐྱེན་དེ་བསླངས་པ་ཞིག་ཡིན་ཚུལ་དང་ཁོ་ལ་སྙིང་གི་ན་ཚ་ཡོད་སྐོར་སོགས་བརྗོད་འདུག
གནས་ཚུལ་དེའི་སྐོར་ཝེ་པཱོ་དྲ་བའི་སྟེང་། འཆར་ལྡན་བུ་སྐྱེས་ཁང་གིས་བཙན་དབང་གིས་རྒྱ་མི་དེའི་ཆུང་མའི་མངལ་གྱི་བྱིས་པ་ལེན་རྩིས་བྱས་སྐབས། ལམ་ལྷོང་མ་བྱུང་བར་མ་བུ་གཉིས་ཀ་འདས་གྲོངས་སུ་ཕྱིན་ཡོད་པར་བརྟེན། རྒྱ་རིགས་ཞིང་པ་དེས་བུ་སྐྱེས་ཁང་གི་ལས་བྱེད་ཚོར་འཁོན་ལན་བསློགས་ཞིག་ཡིན་སྐོར་བརྗོད་པ་མ་ཟད། སྲིད་གཞུང་གིས་འཆར་ལྡན་བུ་སྐྱེས་ཀྱི་སྲིད་བྱུས་འོག་ད་ལྟའི་བར་མི་ག་ཚོད་བསད་ཡོད་པ་དང་། གནད་དོན་དེ་རྒྱ་ནག་ནང་ཁྱོད་ཤི་ང་གསོན་གྱི་གནས་བབ་ཛ་དྲག་ཅན་ཞིག་ཏུ་གྱུར་ཡོད་ལུགས་སོགས་བཀོད་འདུག
