དེ་རིང་ལི་ཐང་རུང་རྒྱས་ཨ་གྲགས་ལགས་རྒྱ་ནག་གི་བཙོན་འོག་ཏུ་ཚུད་དེ་ལོ་ ༦ འཁོར་བའི་ཉིན་མོ་འདིར་ཁོང་གི་ཚ་བོ་བོད་མི་མང་སྤྱི་འཐུས་ཨ་ཀྲུག་ཚེ་བརྟན་ལགས་ཀྱིས་བསྒྲགས་གཏམ་སྤེལ་འདུག
དེ་རིང་ནི་རྒྱ་ནག་གི་བརྒྱད་གཅིག་དམག་མིའི་དུས་ཆེན་དང་། ལི་ཐང་རོང་རྒྱས་ཨ་གྲགས་ཀྱིས་མི་དམངས་སྟོང་ཕྲག་མང་པོའི་མདུན་ནས་རྒྱ་གཞུང་ལ་ངོ་རྒོལ་སྐད་འབོད་ཀྱིས་འཛིན་བཟུང་བྱས་ཏེ་ལོ་ ༦ འཁོར་བའི་ཉིན་མོ་ཡིན། རོང་རྒྱས་ཨ་གྲགས་ཀྱི་ཚ་བོ་བོད་མི་མང་སྤྱི་འཐུས་ཨ་ཀྲུག་ཚེ་བརྟན་ལགས་ཀྱིས་ཉིན་མོ་འདི་དང་བསྟུན་ཏེ་བསྒྲགས་གཏམ་ཞིག་སྤེལ་ཡོད་པའི་ནང་། དེ་རིང་ཕྱི་ཟླ་ ༨ ཚེས་ ༡ ཉིན་ནི་རྒྱལ་གཅེས་དཔའ་བོ་རུང་རྒྱས་ཨ་གྲགས་ལགས་ཀྱིས་རྒྱ་ནག་གི་བོད་དང་བོད་མིའི་ཐོག་ལག་བསྟར་བྱེད་བཞིན་པའི་དྲག་གནོན་དང་གདུག་རྩུབ་ཅན་གྱི་སྲིད་བྱུས་ལ་ཞི་རྒོལ་གནང་བར་རྒྱ་གཞུང་གིས་འཛིན་བཟུང་བྱས་ཏེ། རྒྱལ་ཁབ་མགོ་རྟིང་སློག་པའི་ནག་ཉེས་ཀྱི་མིང་ཐོག་བཙོན་འཇུག་གིས་མི་ལོ་ཧྲིག་པོ་དྲུག་འཁོར་བའི་ཉིན་མོ་དེ་ཡིན་ཞེས་སོགས་བཀོད་འདུག
བསྒྲགས་གཏམ་ནང་། ཉིན་མོ་འདི་ནི་ང་ཚོས་ངེས་པར་དུ་སྲུང་བརྩི་དང་དྲན་གསོ་བྱེད་དགོས་པ་ཞིག་ཡིན་ཏེ། མི་ལོ་དྲུག་སྔོན་གྱི་ཉིན་དེར་ཁོང་གིས་ཨ་མའི་མངལ་ལས་སྐྱེས་ནས་ཉིན་གཅིག་ལས་མ་སོང་བའི་གཅེས་པའི་བུ་མོ་ཆུང་ཆུང་དང་། བརྩེ་བའི་བཟའ་ཟླ་རྣམ་གཉིས་རྫོང་སྨན་ཁང་དུ་བཞག་ཅིང་། ཕྱི་ནང་གི་མི་མང་ཁྲི་ཚོ་བརྒལ་བའི་འདུས་གནས་ལི་ཐང་བརྒྱད་གཅིག་རྟ་རྒྱུགས་ཀྱི་སྡིངས་ཆའི་ཐོག་ཏུ་བུད་དེ། མདོ་འཛིན་པའི་ལག་ནས་རྒྱང་བསྒྲགས་ཁ་པར་བླངས་ནས་ “རྒྱལ་བ་རིན་པོ་ཆེ་བོད་ལ་ཕེབས་འཇུག་དགོས་’’ “པཎ་ཆེན་རིན་པོ་ཆེ་དང་སྤྲུལ་སྐུ་བསྟན་འཛིན་ལེགས་ཀྱི་གཙོས་བོད་ཀྱི་ཆབ་སྲིད་བཙོན་པ་རྣམས་གློད་གྲོལ་གཏོང་དགོས་” “ང་ཚོ་བོད་ལ་རང་དབང་དགོས” རྒྱལ་བ་རིན་པོ་ཆེ་ནི་ང་ཚོ་བོད་ཀྱི་ནང་སྙིང་ལྟར་བུ་ཡིན། བོད་མི་རྣམས་མཐུན་ལམ་རྡོག་རྩ་གཅིག་དྲིལ་དགོས་ཞེས་ཁམས་ལི་ཐང་གི་ཁ་སྐད་ལྡན་པའི་འབོད་སྒྲ་འདི་ངར་ཤུགས་ཆེན་པོའི་ཐོག་འཛམ་བུ་གླིང་ལ་ཁྱབ་བཅུག་ཡོད།
ཁོང་འཛིན་བཟུང་བྱས་པའི་རྗེས་སུ་ས་གནས་མང་ཚོགས་སྟོང་ཚོ་མང་པོ་རྫོང་ཉེན་རྟོག་ལས་ཁང་དུ་བཅར་ཏེ་ཁོང་གློད་གྲོལ་གཏོང་དགོས་པའི་ཞུ་འབོད་ཤུགས་ཆེན་གནང་ཡོད་པ་དང་། ཡུལ་སྡེ་ཐག་རིང་ནས་ཡིན་པའི་མང་ཚོགས་ཁྱུ་དང་ཁྱུ་ལི་ཐང་རྫོང་གི་མཐར་བསྐོར་དུ་གུར་སྒར་བརྒྱབ་སྟེ་ཉིན་གྲངས་མང་པོའི་རིང་ངོ་རྒོལ་བྱས་ནས་བསྡད་ཡོད་ཀྱང་། མཐར་རྒྱ་གཞུང་གིས་མང་ཚོགས་ཀྱི་གདུང་འབོད་ལ་ཡ་ལན་སྤུ་ཙམ་མེད་པར་དམག་མི་ཁྲི་ཚོ་མང་པོ་བཏང་སྟེ་ཁོང་ལ་ལོ་ ༨ ཀྱི་ཁྲིམས་ཐག་བཅད་པ་དང་། ཁོང་གི་ཚ་བོ་ལི་ཐང་དགོན་ཆེན་གྱི་དབུ་མཛད་དང་དོ་དམ་པ་ཟུར་བ་ཨ་ཀྲུག་བློ་སྦོ་ལ་ལོ་ ༡༠ དང་། སྒྱུ་རྩལ་པ་འཇམ་དབྱངས་ཀུན་མཁྱེན་ལ་ལོ་ ༩ ། ཁོང་གི་ཚ་བོ་ཨ་ཀྲུག་སྐལ་བཟང་རྒྱ་མཚོ་ལ་ལོ་ ༥ ། (ད་ལྟ་ལོ་དུས་ཚང་ནས་གློད་གྲོལ་བཏང་ཟིན།) བློ་ཐོག་ལ་ལོ་ ༣ ། (ད་ལྟ་ལོ་དུས་ཚང་ནས་གློད་གྲོལ་བཏང་ཟིན།) འཇམ་དབྱང་བསྟན་འཛིན་ལ་ལོ་ ༣ ། (ལོ་དུས་ཚང་ནས་གློད་གྲོལ་བཏང་ཟིན་ཀྱང་སླར་ཡང་འཛིན་བཟུང་གི་ལོ་གསུམ་ཁྲིམས་ཐག་བཅད། ) བདེ་སྐྱིད་གྲོང་པ་བློ་བཟང་ཕུན་ཚོགས་ལ་ལོ་ ༡ དང་ཕྱེད་ཀྱི་(ད་ལྟ་ལོ་དུས་ཚང་ནས་གློད་གྲོལ་བཏང་ཟིན།) ཁྲིམས་ཐག་གཅོད་ནས་བཙོན་བཀག་བྱས་ཡོད” ཅེས་བཀོད་འདུག
བསྒྲགས་གཏམ་དེའི་མཇུག་ཏུ། ༢༠༠༧ ཟླ་ ༨ ཚེས་ ༡ ཉིན་རྒྱ་གཞུང་གིས་རུང་རྒྱས་ཨ་གྲགས་ལགས་འཛིན་བཟུང་བྱས་རྗེས། བོད་མི་ཁྲི་ཚོ་མང་པོ་འཛིན་བཟུང་བཀག་ཉར་འོག་མནར་གཅོད་ཚད་མེད་མྱངས་དང་མྱོང་བཞིན་ཡོད་པ་དང་། བོད་ཁྱོན་ཡོངས་དམག་མིས་དྲག་གནོན་གྱིས་བོད་མི་ཚོས་དཀའ་སྡུག་ཚད་མེད་མྱོང་བཞིན་ཡོད་སྟབས། དྲང་བདེན་དང་རང་དབང་ལ་དགའ་བའི་རྒྱལ་ཁབ་དང་ཚོགས་སྡེ། དཔོན་རིགས་དང་གང་ཟག་སྒེར་བཅས་ཚང་མས་དཔའ་བོ་རུང་རྒྱས་ཨ་གྲགས་གཙོས་པའི་བདེན་བོད་ཀྱི་དཔའ་བོ་དཔའ་མོ་ཚོར་བདེན་པའི་རྒྱབ་དཔུང་ཡོང་བའི་རེ་སྐུལ་བཅས་ཞུས་འདུག
༄།། བོད་ཀྱི་དཔའ་བོ་ཨ་གྲགས།
བོད་ཀྱི་དཔའ་བོ་ལི་ཐང་རོང་རྒྱས་༸ ཨ་གྲགས་མཆོག་གིས་བོད་བསྟན་སྲིད་མི་རིགས་ཀྱི་ཆེད་དུ། ལོ་དྲུག་གི་བཙོན་པའི་དུས་ཡུན་མྱང་བར་རྗེས་དྲན་ཞུས་པ།
1
༄།། སྐུ་འཁྲུངས་ས་མདོ་སྟོད་ལི་ཐང་གྲོང་ཚོ།།
འཚོ་གནས་སྡོད་འབྲོག་མི་དཀྱུས་མའི་མི་ཚེ།།
སེམས་དད་པས་བླ་མ་འབོད་ཐེངས་གཅིག་གིས།།
མཚན་སྙན་གྲགས་འཛམ་གླིང་ཁྱོན་ལ་ཁྱབ་ཐལ།།
2
དད་དམ་ཚིག་ཐུགས་དགོངས་དཀྱིལ་དུ་བཞག་ནས།།
དཔའ་བློ་ཁོག་བཙན་པོའི་སྟོབས་ལ་བཅོལ་ཏེ།།
ཁམས་ལི་ཐང་རྟ་རྒྱུགས་སྟེགས་བུའི་སྟེང་ནས།།
བོད་མི་རིགས་སྐྱིད་སྡུག་གླེང་བ་གོ་འམ།།
3
དབྱར་རྟ་རྒྱུགས་ཁྱོད་སྐྱིད་ང་བཟང་ཡིན་དུས།།
བུ་བུ་མོས་འཕྱོར་གོས་གང་ཡག་གྱོན་ནས།།
སྤང་གཡུ་ལོས་མཛེས་པར་དགའ་སྟོན་
བྱེད་དུས།།
བཙོན་ནག་ཁུང་འདེམ་པའི་ཕོ་རྒོད་སུ་རེད།།
4
ཤ་ཆད་པའི་བུ་དང་བུ་མོ་བཞག་སྟེ།།
ཚེ་གཅིག་གི་གཉེན་གྲོགས་ཅམ་གྱིས་བསྐྱུར་ནས།།
གདུག་རྩུབ་སྤྱོད་ཆེ་བའི་བཙོན་ཁང་ཞིག་ནས།།
ལོ་དྲུག་གི་དུས་ཡུན་བཟོད་མཐའ་བྲལ་ཨང་།།
5
ངའི་ཕ་རྒན་མིན་ཀྱང་འདང་ཞིག་འདུག་ལ།།
ངའི་ཕུ་ནུ་མིན་ཀྱང་འགྱོད་པ་ཆེ་བས།།
བོད་བཙན་པོའི་རྒྱལ་ས་སྲུང་བའི་བུ་ལ།།
ལག་ཐལ་མོ་སྦྱོར་བཞིན་བཀུར་ན་འདོད་དོ།།
གདུང་སེམས་མཉམ་བསྐྱེད་ཡོད། རྒྱལ་གཅེས་པ་ཁོང་གི་ཆེས་འབུར་ཏུ་ཐོན་པའི་འབོད་སྒྲ་རེ་རེའི་བོད་ཁམས་ཡོངས་ལ་༧རྒྱལ་བ་རིན་པོ་ཆེ་བོད་དུ་གདན་དྲང་ཐུབ་པའི་སྙིང་སྟོབས་དང་བསྐྲུན་པས་རིམ་པས་མེ་མཆོད་སོགས་རྒྱལ་གཅེས་སྙིང་སྟོབས་ཅན་རྣམས་ཀྱི་དཔའ་ཉམས་རེ་རེ་བཞིན་མདོ་དབུས་ཁམས་གསུམ་དུ་བྱུང་ཡོད།
གདུང་སེམས་མཉམ་བསྐྱེད་ཡོད། །