ཉེ་ལམ་ཆབ་མདོ་ཀརྨ་དགོན་གྱི་དགེ་འདུན་པ་བློ་གྲོས་རབ་གསལ་དང་རྣམ་གསལ་བསོད་ནམས། དོན་འགྲུབ་རྒྱལ་མཚན་བཅས་ལ་བཙོན་འཇུག་ཁྲིམས་ཐག་བཅད་ཡོད་འདུག
ཁ་སང་འགྲོ་བ་མིའི་ཐོབ་ཐང་སྲུང་སྐྱོབ་དྲ་བ་(维权网)ཞེས་པར་གནས་ཚུལ་སྤེལ་བ་ལྟར་ན། ཀརྨ་དགོན་གྱི་དགེ་འདུན་པ་ ༡༠ ཡིས་༢༠༡༡ ཟླ་ ༡༠ ཚེས་ ༢༦ ཉིན་གྱི་མཚན་མོར་ས་གནས་སྲིད་གཞུང་གི་ལས་ཁུངས་ལ་འབར་གས་ཀྱིས་གཏོར་རྒོལ་དང་། ངོ་རྒོལ་གྱི་ཡིག་ཆ་མང་པོ་གཏོར་འགྲེམས་སོགས་ཁྲིམས་འགལ་བྱ་སྤྱོད་སྤེལ་བའི་གནས་ཚུལ་འགེབས་སྲུང་བྱས་པའི་ཉེས་མིང་འོག ཕྱི་ལོ་ ༢༠༡༡ ཟླ་ ༡༡ དང་ ༢༠༡༢ ཟླ་ ༡ ནང་ཆབ་མདོ་རྫོང་ཉེན་རྟོག་པས་འཛིན་བཟུང་བྱས་པའི་ཀརྨ་དགོན་དོ་དམ་ཨུ་ཡོན་ལྷན་ཁང་གི་འགན་འཁུར་བ་དོན་འགྲུབ་རྒྱལ་མཚན་ལགས་དང་ལས་རོགས་བློ་གྲོས་རབ་གསལ་ལགས། རྣམ་གསལ་བསོད་ནམས་ལགས་གསུམ་གྱི་སྐོར་ཡུན་རིང་གོ་ཐོས་མེད་པར་གྱུར་ཡོད་ཀྱང་། ཉེ་ལམ་ཁོ་ཚོར་ལོ་ ༢ དང་ལོ་ཕྱེད་རེའི་བཙོན་འཇུག་ཁྲིམས་ཐག་བཅད་ཡོད་པ་ཤེས་རྟོགས་བྱུང་འདུག
གོང་གི་དགེ་འདུན་པ་ ༣ ཆབ་མདོ་རྫོང་ཀརྨ་ཞང་ཀརྨ་དགོན་གྱི་གྲྭ་བ་ཡིན་པ་དང་། བློ་གྲོས་རབ་གསལ་ལགས་ད་ལྟ་རང་ལོ་ ༤༥ ཡིན་པ་དང་། རྣམ་གསལ་བསོད་ནམས་ལགས་ལོ་ ༤༦། དོན་འགྲུབ་རྒྱལ་མཚན་ལགས་ལོ་ ༤༢ བཅས་ཡིན་འདུག
