ཉེ་ཆར་སི་ཁྲོན་ཞིང་ཆེན་ཤེ་ཡཱོང་རྫོང་གི་བུ་མོ་རང་ལོ་ ༡༦ ཅན་ཞིག་ལ་མཐོ་འབྲིང་གི་ཡིག་རྒྱུགས་གཏོང་དུ་མ་བཅུག་པར་རང་ཤི་བརྒྱབ་ཡོད་འདུག
ད་ལོའི་ཕྱི་ཟླ་ ༦ ཚེས་ ༢༨ ཉིན། སི་ཁྲོན་ཞིང་ཆེན་ལོའུ་ཀྲུའུ་གྲོང་ཁྱེར་ཤེ་ཡཱོང་རྫོང་ཁྲི་ཧྲེ་ཞང་གི་རང་ལོ་ ༡༦ ཡིན་པའི་བུ་མོ་ཚེ་ཡཱན་ཆོང་ཟེར་བ་ཞིག་ལ། སྲིད་གཞུང་གིས་ཁྱིམ་ཐོའི་ནང་མེད་པར་བརྗོད་དེ་མཐོ་འབྲིང་གི་ཡིག་རྒྱུགས་ནང་འཛུལ་ཞུགས་བྱེད་བཅུག་མེད་སྟབས། བུ་མོ་དེས་ཞིང་སྨན་རིགས་ཤིག་བཟོས་ནས་རང་ཤི་རྒྱག་ཐབས་བྱས་སྐབས། དེ་མ་ཐག་ཕ་མ་གཉིས་ཀྱིས་ཤེས་ཏེ་སྨན་ཁང་དུ་ཁྲིད་དེ་སྲོག་ཉེན་ལས་ཐར་ཡོད་ཀྱང་། སྨན་ཁང་གིས་ཁོ་མོའི་གློ་བ་ལ་གནོད་སྐྱོན་ཐེབས་ཡོད་ལུགས་བརྗོད་ཡོད་འདུག
གསར་ལམ་ཁག་གིས་གནས་ཚུལ་སྤེལ་བ་ལྟར་ན། བུ་མོ་ཚེ་ཡཱན་ཆོང་གི་ཕ་མ་གཉིས་ལ་ཕྲུ་གུ་ ༢ ཡོད་པའི་ནང་ནས་ཁོ་མོ་ཆུང་བ་དེ་ཡིན་པ་དང་། རྒྱ་ནག་གཞུང་གི་ ‘འཆར་ལྡན་བུ་སྐྱེས’ ཟེར་བའི་སྒྲིག་ཁྲིམས་ལྟར་ན། ཁྱིམ་ཚང་གཅིག་ལ་བྱིས་པ་གཅིག་གི་གཏན་འབེབས་ལས་བརྒལ་ཡོད་སྟབས། ཕ་མ་གཉིས་ཀྱིས་བུ་མོ་ཁྱིམ་ཐོའི་ནང་འཇུག་ཐབས་ལ་འབད་བརྩོན་མང་པོ་བྱས་ཀྱང་སྲིད་གཞུང་གིས་སྤྲད་ཡོད་མི་འདུག ཐེངས་འདིར་བུ་མོ་དེར་གཅིག་ནས་འཆར་ལྡན་བུ་སྐྱེས་ཀྱི་སྒྲིག་ཁྲིམས་དང་འགལ་ཡོད་པ་དང་། གཉིས་ནས་ཕ་མ་གཉིས་ལ་གཉེན་སྒྲིག་དཔང་ཡིག་མེད་སྟབས་བུ་མོར་སྐྱེས་ཚེས་སོགས་ཀྱང་བཟོ་ཐུབ་མེད་སྟབས་ཐེངས་འདིར་ཡིག་རྒྱུགས་ནང་ཞུགས་རྒྱུ་བཀག་ཡོད་འདུག
རྒྱ་ནག་གི་གཞུང་འབྲེལ་མ་ཡིན་པའི་འགྲོ་བ་མིའི་ཐོབ་ཐང་ལྟ་སྲུང་ཚོགས་པ་ཞིག་གིས་བརྗོད་པ་ལྟར་ན། ད་ལྟ་རྒྱ་ནག་ནང་མི་གྲངས་ས་ཡ་ ༡༣ ལྷག་ལ་ཁྱིམ་ཐོ་མེད་པ་དང་། དེ་དག་ལས་མང་ཆེ་བ་འཆར་ལྡན་བུ་སྐྱེས་ཀྱི་གཏན་འབེབས་ལས་བརྒལ་བའི་བྱིས་པ་དང་གཞོན་སྐྱེས་ཡིན་སྟབས། ཁང་ས་བགོ་འགྲེམས་དང་སློབ་གྲྭར་འགྲིམས་པ་སོགས་ཀྱི་གོ་སྐབས་མེད་པ་ཆགས་ཡོད་འདུག
དེའི་ཐད་རྒྱ་ནག་ཀང་ཏུང་ཞིང་ཆེན་གྱི་ཁྲིམས་རྩོད་པ་གྲགས་ཅན་ཐང་ཅིན་ལིན་གྱིས་བརྗོད་དོན། “ རྒྱལ་ཁབ་ཀྱི་རྩ་ཁྲིམས་ནང་ཁྲིམས་ཀྱི་མདུན་སར་སྤྱི་དམངས་འདྲ་མཉམ་ཡིན་ཞེས་བཀོད་ཡོད་པ་ལྟར། ས་ཆའི་བདག་དབང་དང་འཆར་ལྡན་བུ་སྐྱེས་ཀྱི་སྲིད་བྱུས་གཉིས་སྤྱི་དམངས་ཀྱི་ཁེ་ཕན་བཙན་འཕྲོག་བྱེད་པར་ཁ་གཡར་ས་ལྟ་བུ་ཞིག་ཏུ་གྱུར་མི་རུང་ལ། བཅའ་ཁྲིམས་དང་ཁྲིམས་སྲོལ་ག་འདྲ་ཞིག་ཡིན་ནའང་རྩ་ཁྲིམས་ཀྱི་གཏན་འབེབས་དང་འགལ་མི་རུང་། ཡིན་ནའང་དེང་སྐབས་རྒྱ་ནག་ནང་རྩ་ཁྲིམས་དང་འགལ་བའི་བཅའ་ཁྲིམས་དང་ཁྲིམས་སྲོལ་རིགས་བྱུང་བ་ཧ་ཅང་ཚབས་ཆེ་ལ། ཆེས་བཅོས་དཀའ་བའི་གནད་དོན་ཞིག་རེད། ” ཅེས་བརྗོད་འདུག
