ཆབ་སྲིད་བཙོན་ཟུར་ལྷ་མོ་སྐྱབས་ལགས་ཀྱིས་གནས་ཚུལ་མཁོ་སྤྲོད་བྱས་པ་ལྟར་ན། རྒྱ་ནག་གཞུང་གིས་བོད་མདོ་སྨད་ཀན་ལྷོ་ཁུལ་རྨ་ཆུ་རྫོང་གི་གླུ་བ་སྐལ་བཟང་ཡར་འཕེལ་ལགས་སུ། ༢༠༡༢ ལོའི་བོད་ཟླ་ ༡༠ བ་དང་ ༡༡ བཅས་སུ་བོད་རིགས་ཡོངས་ཀྱིས་ཕ་སྐད་གཙང་མ་བཤད་པར་སྐུལ་སློང་གི་དགོང་ཚོགས་༼ཁ་བའི་མེ་ཏོག༽ ཞེས་པ་བསྡུས་ཏེ། ༼བོད་པ་ཚོ༽ ཞེས་པའི་གླུ་དབྱངས་བླངས་ཡོད་པ་དེ་ཆབ་སྲིད་དང་འབྲེལ་བ་ཡོད་པའི་ཉེས་འཛུགས་འོག རྒྱ་གཞུང་གིས་དེ་སྔ་ཁོང་ཐེངས་འགར་བཀག་ཉར་འདྲི་རྩད་བྱས་ཡོད་པ་དང་། ཟླ་སྔོན་མའི་ཚེས་ ༡༤ ཡས་མས་ནང་། སི་ཁྲོན་ཁྲིན་ཏུའུ་གྲོང་ཁྱེར་བདེ་འཇགས་ཚན་པས་སྐལ་བཟང་ཡར་འཕེལ་ལགས་ལྷ་སར་འཛིན་བཟུང་བྱས་ཏེ། ད་ཆར་སི་ཁྲོན་ཁྲིན་ཏུའུ་གྲོང་ཁྱེར་གྱི་ལྟ་སྲུང་ཁང་ཞིག་ཏུ་བཙོན་འཇུག་བཀག་ཉར་བྱས་ཡོད་འདུག
སྐལ་བཟང་ཡར་འཕེལ་ལགས་ནི། རྨ་ཆུ་རྫོང་རྨ་ཁུག་རྟ་རར་སྐྱེས་པ་དང་། ཕ་མིང་ལ་མགོན་པོ་ཚེ་བརྟན་དང་མ་མིང་ལ་མ་ཁོ་ཟེར་གྱི་ཡོད་འདུག ཁོང་གི་བཟའ་ཟླའི་མིང་ལ་ཚེ་འཛིན་དཔལ་མོ་ཞུ་བ་དང་། ད་ལྟ་རང་ལོ་ ༣༨ ཡིན་འདུག་ལ། ཁོང་བཟའ་ཟླ་གཉིས་ལ་བུ་གཉིས་དང་བུ་མོ་གཅིག་ཡོད་པ་ལས། བུ་ཆེ་བ་ཨོ་རྒྱན་སྐྱབས་ལོ་ ༢༡ དང་། བུ་ཆུང་བ་དཀོན་མཆོག་བསྟན་པ་རང་ལོ་ ༡༩ ། བུ་མོ་སྒྲོལ་དཀར་ལྷ་མོ་ལོ་ ༡༨ བཅས་ཡིན་འདུག
གླུ་བ་སྐལ་བཟང་ཡར་འཕེལ་ལགས་ཆུང་དུས་ནས་སྐད་ངག་སྙན་ཞིང་ཡ་རབས་བཟང་སྤྱོད་ལྡན་པ་ཞིག་ཡིན་སྟབས། ས་གནས་ཀྱི་རྒན་དར་གཞོན་གསུམ་ཚང་མས་དགའ་མོས་བྱེད་མཁན་ཞིག་ཡིན་འདུག་ལ། ལོ་ ༡༥ ཡས་མས་ནས་བཟུང་གླུ་བ་བདུད་བྷེ་དང་དཔལ་མགོན་སོགས་ཀྱི་མདུན་ནས་སྒྲ་རྡུང་སྟངས་སོགས་ལ་སྦྱངས་པ་བྱས་རྗེས། ཆེད་སྒྲིག་སྒྲ་ཐག་༼དགུང་ནས་འབྲུག་གྲགས་བྱུང་༽ དང་༼གཡུ་འབྲུག་སྔོན་མོའི་འཁྱུག་རྩལ༽ སོགས་འགྲེམས་སྤེལ་བྱས་ཏེ་མང་ཚོགས་ཀྱིས་དགའ་བསུ་ཐོབ་ཡོད་པ་མ་ཟད། ལྷག་པར་དུ་ཁོང་གི་ཆེད་སྒྲིག་འོད་སྡེར་ཐོག་མ་༼གླིང་གེ་སར་རྒྱལ་པོའི་ཕ་ཡུལ༽ཞེས་པ་འགྲེམས་སྤེལ་བྱས་རྗེས་བོད་མི་ཚོས་ཁོང་ལ་བདུད་བྷེ་ཆུང་བ་དང་། དེང་རབས་ཀྱི་ཁུ་བྱུག་གཞོན་ནུ་ཞེས་པའི་མཚན་སྙན་ཕུལ་ཡོད་འདུག ཕྱིས་སུ་ཁོང་གིས་མུ་མཐུད་ཆེད་སྒྲིག་འོད་སྡེར་ ༼དཔྱིད་དཔལ་བསུ་བའི་འབྲུག་སྒྲ༽ དང་༼ ཉི་ཟེར་འབོད་པའི་གངས་རི༽ ། ༼དེང་རབས་ཀྱི་བོད་པ༽ ། ༼གངས་ཅན་བསུ་བའི་འབྲུག་སྒྲ༽ ༼གྲགས་སྙན་གཡུ་འབྲུག་སྔོན་མོ༽། ༼དེང་རབས་ཁུ་བྱུག་གི་འགྱུར་ཁུགས༽ སོགས་ཆེད་བསྒྲིགས་སྒྲ་ཐག་དང་འོད་སྡེར་མང་པོ་འགྲེམས་སྤེལ་བྱས་ཡོད་འདུག་ལ། བོད་ནང་གི་གཞུང་དང་སྒེར་གྱི་གླུ་གཞས་སྤྲོ་ཚོགས་མང་པོའི་ནང་མཉམ་ཞུགས་བྱས་ཏེ་བོད་མི་ཚོས་དགའ་བསུ་བྱེད་བཞིན་པའི་གླུ་བ་ཞིག་ཡིན་འདུག
༢༠༡༢ ལོའི་བོད་ཟླ་ ༡༠ དང་ ༡༡ བཅས་སྔ་ཕྱིར་ཁོང་དང་བོད་ནང་གི་གཞས་བ་ཁག་ཅིག་མཉམ་རུབ་ཀྱིས། བོད་མི་ཚོར་ཕ་སྐད་གཙང་མ་བཤད་པར་སྐུལ་སློང་གི་རིག་རྩལ་སྤྲོ་ཚོགས་༼ཁ་བའི་མེ་ཏོག༽ ཅེས་པའི་དགོང་ཚོགས་སྟེང་། ཁོང་གིས་༼བོད་པ་ཚོ༽ ཞེས་པའི་གླུ་དབྱངས་ཤིག་བླངས་ཡོད་པ་དང་། ཕྱིས་སུ་སྤྲོ་ཚོགས་དེའི་འོད་སྡེར་མཚོ་སྔོན་དང་ཀན་སུའུ། སུ་ཁྲོན། ཡུན་ནན་བཅས་བོད་ཁུལ་གྱི་ས་ཆ་མང་པོར་འགྲེམས་སྤེལ་བྱས་ཡོད་ཀྱང་། ཟླ་གཅིག་གི་རྗེས་སུ་རྒྱ་གཞུང་གིས་ས་གནས་ཁག་ནང་འོད་སྡེར་དེ་ཕྱིར་བསྡུ་བྱས་ཡོད་པ་མ་ཟད། ཁོང་སྔ་ཕྱིར་ཐེངས་འགར་ལྷ་སར་བཀག་ཉར་འདྲི་བརྩད་བྱས་ཡོད་འདུག་ལ། ཟླ་སྔོན་མའི་ཕྱི་ཚེས་ ༡༤ ཡས་མས་སུ་ཁོང་ལྷ་སར་འཇུ་བཟུང་བྱས་ཏེ་རྒྱ་ནག་ཁྲིན་ཏུའུ་གྲོང་ཁྱེར་གྱི་ལྟ་སྲུང་ཁང་ཞིག་ཏུ་བཀག་ཉར་བྱས་ཡོད་འདུག
ཁོང་གིས་བླངས་བའི་༼བོད་པ་ཚོ༽ ཞེས་པའི་གླུ་དབྱངས་དེའི་ནང་། ” བོད་པ་ཚོ། ང་ཚོའི་བོད་ཡིག་སྦྱོང་། བོད་སྐད་བཤད། བོད་ཀྱི་སྐད་དང་ཡི་གེ་སྦྱོང་བའི་འོས་འགན་ང་ཚོར་ཡོད། བོད་པ་ཚོ། ང་ཚོས་མཐུན་སྒྲིལ་བྱེད། མཐུན་སྒྲིལ་བྱེད། སྟོད་སྨད་བར་གསུམ་མཐུན་སྒྲིལ་བྱས་ཏེ་རྡོག་རྩ་གཅིག་སྒྲིལ། བོད་པ་ཚོ། ང་ཚོས་སྙིང་སྟོབས་སྐྱེད། སྐྱིད་སྡུག་འདྲེས་མའི་ལོ་ཟླ་བསམ་ཏེ་ང་ཚོས་སྙིང་སྟོབས་སྐྱེད། བོད་པ་ཚོ། ང་ཚོས་བདེ་སྡུག་གླེང་། མ་འོངས་བོད་མིའི་མདུན་ལམ་བསམ་དེ་ང་ཚོས་ཕུགས་བསམ་འཚོལ། བོད་པ་ཚོ། ང་ཚོས་ལ་རྒྱ་འཛིན། ལ་རྒྱའི་ཕྲག་གདང་གཤིབ་སྟེ། ང་ཚོ་མདུན་དུ་བསྐྱོད། བོད་པ་ཚོ། ང་ཚོས་འབད་བརྩོན་བྱེད། དུས་རབས་གསར་བའི་བོད་པའི་རྒྱུད་འཛིན་ང་ཚོ་ཡིན། བོད་པ་ཚོ། ” ཞེས་འཁོད་ཡོད་འདུག
