དེ་རིང་བོད་དོན་ལས་འགུལ་བ་རིན་པོ་ལགས་ཀྱིས་ཡུ་རོབ་རྒྱལ་ཁབ་ ༡༣ ནང་གི་རྐང་འཁོར་སྐོར་སྐྱོད་མཇུག་སྒྲིལ་ཏེ། ཉི་ཧོང་དང་ཐའེ་ཝན། ཧོང་ཀོང་བཅས་སུ་མུ་མཐུད་ལས་འགུལ་སྤེལ་རྒྱུ་ཡིན་འདུག
ཨ་རིར་གནས་སྡོད་བོད་རིགས་ལས་འགུལ་བ་རིན་པོ་ལགས་ཀྱིས་འདས་པའི་ཟླ་ ༥ ལྷག་གི་རིང་། ཡུ་རོབ་རྒྱལ་ཁབ་ ༡༣ ནང་རྐང་འཁོར་སྐོར་སྐྱོད་ཀྱི་བོད་དོན་ལས་འགུལ་སྤེལ་ཏེ། དེ་རིང་ཕྱི་ཚེས་ ༡༢ ཉིན་ཡུ་རོབ་གླིང་གི་ལས་འགུལ་དེ་དབྱིན་ཡུལ་གྱི་རྒྱལ་ས་ལོན་ཌོན་དུ་མཇུག་སྒྲིལ་རྗེས་ཉི་ཧོང་དུ་ཕེབས་ཡོད་པ་དང་། ཉིན་ཤས་རྗེས་ཉི་ཧོང་ནས་མགོ་བཙུགས་ཏེ་ཐའེ་ཝན་དང་ཧོང་ཀོང་བཅས་སུ་ལས་འགུལ་སྤེལ་མཐར་རྒྱ་གར་དུ་ཡོང་རྒྱུ་ཡིན་འདུག
གསར་འགོད་པས་རིན་པོ་ལགས་སུ་འབྲེལ་བ་བྱས་ཏེ་གནས་ཚུལ་རྒྱུས་ལོན་བྱེད་སྐབས། དེ་རིང་ཁོང་གིས་ཡུ་རོབ་གླིང་གི་རྐང་འཁོར་སྐོར་སྐྱོད་ཀྱི་ལས་འགུལ་དེ་ཐོག་མའི་འཆར་གཞི་ལྟར་དབྱིན་ཇིའི་རྒྱལ་ས་ལོན་ཌོན་ནས་མཇུག་སྒྲིལ་ཡོད་པ་མ་ཟད། ད་ལྟ་དབྱིན་ཡུལ་ནས་ཉི་ཧོང་དུ་ཐོན་བཞིན་ཡོད་འདུག ཁོང་གིས་རང་ཉིད་ཀྱི་རེ་བར་ཉི་ཧོང་དང་ཐའེ་ཝན་ནང་སྐོར་སྐྱོད་ཀྱིས། ཧོང་ཀོང་དང་དེ་ནས་རྒྱ་གར་དུ་ཡོང་སྟེ་བོད་རྒྱལ་ཁབ་དང་མི་རིགས་ཀྱི་ཆེད་དུ་རང་ལུས་མེར་བསྲེགས་གནང་མཁན་ཚོའི་མཚན་གཞུང་ཁྱེར་ནས་ནང་པའི་གནས་ཆེན་ཁག་ཏུ་གནས་སྐོར་དང་། མཐར་༧གོང་ས་མཆོག་ལ་བསྔོ་སྨོན་སྐྱབས་འཇུག་ཞུ་རྒྱུར་ཡིན་སྐོར་བརྗོད་བྱུང་།
རིན་པོ་ལགས་ཀྱིས་འདི་ལོའི་ཕྱི་ཟླ་ ༣ ཚེས་ ༡༠ ཉིན་བྷེལ་ལྗམ་གྱི་རྒྱལ་ས་སྦར་སིལ་ནས་མགོ་བཙུགས་ཏེ། འདས་པའི་ཉིན་གྲངས་ ༡༥༢ རིང་ཁྱོན་སྤྱི་ལེ་༦༣༠༠ ཙམ་ལ་བསྐྱོད་ཡོད་པ་དང་། ད་ལྟའི་བར་ཧྥ་རན་སི་དང་སི་པེན། ཨི་ཊ་ལི། སུད་སི། ཨོ་སི་ཊོ་རི་ཡ། ཅེཀ་སྤྱི་མཐུན་རྒྱལ་ཁབ། འཇར་མན། སུ་ཝེ་ཌན། ཌན་མཀ ནོར་ཝེ། ཧོ་ལན་ཌི། དབྱིན་ཡུལ་བཅས་ཡུ་རོབ་རྒྱལ་ཁབ་ ༡༣ ནང་རྐང་འཁོར་སྐོར་སྐྱོད་ཀྱིས་རྒྱལ་ཁབ་སོ་སོའི་གྲོས་ཚོགས་འཐུས་མི་དང་མངའ་སྡེ་བློན་ཆེན། གྲོང་ཁྱེར་སྤྱི་ཁྱབ་སོགས་གནད་ཡོད་མི་སྣ་ ༡༣༠ ཙམ། གསར་འགྱུར་བརྒྱུད་ལམ་ཁག་བཅས་ལ་ཐུག་འཕྲད་ཐོག བོད་མི་རང་ལུས་མེར་བསྲེགས་གནང་མཁན་ཚོའི་མངོན་འདོད་དང་། བོད་མིའི་དཀའ་ངལ་ངོ་སྤྲོད། བོད་དོན་རྒྱབ་སྐྱོར་གནང་རྒྱུའི་ཞུ་འབོད་བཅས་གནང་ཡོད་འདུག
ཁོང་གིས་ “ དབྱིན་ཡུལ་དུ་གྲོས་ཚོགས་འཐུས་མི་སོགས་གནད་ཡོད་མི་སྣ་མང་པོ་ཞིག་ལ་ཐུག་འཕྲད་བྱུང་། ལྷག་པར་དུ་བྷེ་བྷེ་སེ་སོགས་གསར་ཁང་ཡང་མང་པོ་ཞིག་གིས་འབྲེལ་བ་བྱས་བྱུང་། གནས་ཚུལ་གང་འཚམ་ཁྱབ་སྤེལ་ཡག་པོ་བྱས་ཐུབ་སོང་བསམ་པ་བྱུང་”ཞེས་བརྗོད་བརྗོད་བྱུང་།
རིན་པོ་ལགས་ཀྱི་སྐྱེས་ཡུལ་བོད་ཡིན་པ་དང་། རྒྱ་གར་ནང་བཙན་བྱོལ་དུ་འབྱོར་རྗེས་ ༡༩༩༨ ལོར་ཨ་རིར་གནས་སྤོར་བྱས་ཤིང་། ༢༠༠༠ ལོའི་པཎ་ཆེན་རིན་པོ་ཆེའི་འཁྲུངས་སྐར་དང་བསྟུན་ཏེ། ཨ་རིའི་མངའ་སྡེ་མེ་ནེ་སོ་ཊ་ནས་མགོ་བཙུགས་ཏེ་ཨ་རིའི་མངའ་སྡེ་ ༤༤ ནང་མེལ་ལེ་ ༨༤༠༠ ལྷག་ལ་རྐང་འཁོར་སྐོར་སྐྱོད་ཀྱི་ལས་འགུལ་ཐེངས་ ༢༤ དང་། ཕྱག་འཚལ་ནས་སྐྱོད་པའི་ལས་འགུལ་ཐེངས་གཉིས། གོམ་བགྲོད་ལས་འགུལ་ཐེངས་གཉིས་བཅས་སྤེལ་ཡོད།
གསར་འགོད་པ། བནྡེ་སྐྱབས།
