ཆབ་སྲིད་བཙོན་ཟུར་ལྷ་མོ་སྐྱབས་ལགས་ཀྱིས་འདི་གར་གནས་ཚུལ་མཁོ་སྤྲོད་བྱས་པ་ལྟར་ན། ཟླ་འདིའི་ཕྱི་ཚེས་ ༨ ཉིན་སི་ཁྲོན་ཞིང་ཆེན་རྔ་པ་ཁུལ་ཁྱུང་མཆུ་རྫོང་གསེར་དེའུ་ཡུལ་ཚོའི་རང་ལོ་ ༢༩ ཡས་མས་ཡིན་པའི་བོད་རིགས་གཞོན་སྐྱེས་མགུལ་གྲགས་ཞུ་བར། ཡུལ་ཚོའི་སྤྱི་བདེ་ལས་ཁུངས་ཀྱི་མགོ་གཙོ་རིན་ཆེན་གཙོས་པའི་ཉེན་རྟོག་པ་ཁག་ཅིག་གིས་རྐུ་འཁྱེར་གྱི་དོགས་གཞིའི་འོག་འཛིན་བཟུང་བྱས་ཡོད་པ་མ་ཟད། ཉེན་རྟོག་པས་ས་གནས་ཀྱི་བཀག་ཉར་ཁང་དུ་འཁྲིད་དེ་འདྲི་བརྩད་གཅར་རྡུང་ཚད་ལས་བརྒལ་བ་བཏང་སྟེ། ཉིན་དེར་ཁོང་འདས་གྲོངས་སུ་ཕྱིན་ཡོད་འདུག
རྗེས་སུ་ཉེན་རྟོག་པས་ནང་མི་ཉེ་འབྲེལ་དང་ས་གནས་བོད་མི་ཚོར་མགུལ་གྲགས་གཅར་རྡུང་བྱས་ཏེ་གྲོངས་པ་མིན་པར། ཁོ་རང་རང་ཤི་བརྒྱབ་ཡོད་ཚུལ་བརྗོད་ཡོད་པ་མ་ཟད། ཅ་དངོས་ཁག་ཅིག་རྫུན་བསྒྲིག་གིས་མི་མང་ལ་བདེན་དཔང་གི་ཚུལ་དུ་བསྟན་ཡོད་འདུག་མོད། ནང་མི་ཉེ་འབྲེལ་དང་ཡུལ་མི་ཚོས་ཉེན་རྟོག་པའི་སྐད་ཆར་ངོས་ལེན་མ་བྱས་པར། ཡུལ་མི་ ༥༠༠ ལྷག་བཀག་ཉར་ཁང་གི་སྒོ་ཁར་འཛོམས་ཏེ། མགུལ་གྲགས་ལགས་ཉེན་རྟོག་པས་གཅར་རྡུང་བྱས་ཏེ་གྲོངས་ཡོད་པ་དང་། གལ་སྲིད། ཁས་ལེན་མ་བྱས་པ་ཡིན་ན། གནས་ཚུལ་ཆེན་པོ་ལྷག་སྲིད་སྐོར་བཤད་སྟབས། ཉེན་རྟོག་པས་མགུལ་གྲགས་གཅར་རྡུང་འོག་འདས་གྲོངས་སུ་གྱུར་བ་ཁས་ལེན་བྱས་ཡོད་པ་མ་ཟད། ཤི་བོའི་འདས་མཆོད་བསྒྲུབ་ཆེད་རྒྱ་སྒོར་ཁྲི་ ༥ དང་། མི་སྟོང་ལ་རྒྱ་སྒོར་ཁྲི་ ༥༠ བཅས་སྤྲད་འདུག
ད་ཆར་ས་གནས་མི་མང་ཁྲོད། མི་གསོད་དོན་རྐྱེན་འདིའི་ནག་ཉེས་ས་གནས་སྤྱི་བདེ་ཉེན་རྟོག་པར་ཡོད་ཀྱང་། གཞུང་ཕྱོགས་ནས་བཙན་དབང་གིས་ཐག་གཅོད་བྱས་ཏེ། ངོས་ལེན་མི་བྱེད་ཐབས་མེད་བྱུང་ཡོད་པའི་གླེང་སློང་བྱེད་ཀྱི་ཡོད་འདུག
མགུལ་གྲགས་ལགས་ཀྱི་ཕ་མིང་ལ་རིག་ལོ་དང་མ་མིང་ལ་མིས་ལོ་ཞུ་བ་དང་། ཁོའི་ཆུང་མའི་མིང་ལ་གཞིས་ཕྲུག་ཟེར་གྱི་ཡོད་འདུག་ལ། ཁོ་བཟའ་ཟླ་གཉིས་ལ་བྱིས་པ་གཉིས་ཡོད་འདུག
