ཟླ་འདིའི་ཕྱི་ཚེས་ ༡༥ ཉིན་ཞོགས་པའི་ཆུ་ཚོད་ ༨།༤༥ སྟེང་། ཆབ་སྤེལ་ཚེ་བརྟན་ཕུན་ཚོགས་ལགས་ལྷ་སར་སྐུ་གཤེགས་ཡོད་པ་དང་། སྐུ་གཤེགས་སྐབས་ཁོང་དགུང་ལོ་ ༩༢ ལ་ཕེབས་ཡོད་འདུག
བོད་རང་སྐྱོང་ལྗོངས་འོག་གི་གཞུང་འབྲེལ་བརྒྱུད་ལམ་ཁག་ཅིག་ནང་གནས་ཚུལ་ཐོན་པར། བོད་རང་སྐྱོང་ལྗོངས་མི་དམངས་འཐུས་ཚོགས་སྐབས་དྲུག་པའི་རྒྱུན་ལས་ཨུ་ཡོན་ལྷན་ཁང་གི་འགན་འཛིན་གཞོན་པ། ཆབ་སྤེལ་ཚེ་བརྟན་ཕུན་ཚོགས་ལགས་སྐུའི་སྙུང་གཞི་ཞིག་གི་རྐྱེན་པས་སྨན་བཅོས་བྱས་ཀྱང་མ་ཕན་པར། ཟླ་འདིའི་ཕྱི་ཚེས་ ༡༥ ཉིན་ཞོགས་པའི་ཆུ་ཚོད་ ༨།༤༥ སྟེང་ལྷ་སར་སྐུ་གཤེགས་ཡོད་སྐོར་བཀོད་འདུག
ཆབ་སྤེལ་ཚེ་བརྟན་ཕུན་ཚོགས་ཀྱིས་བོད་ནང་འབྲེལ་བའི་ལོ་རྒྱུས་རྩོམ་ཡིག་དང་དཔེ་དེབ་འགའ་རེ་བཏོན་ཡོད་ཅིང་། ཞྭ་སྒབ་པ་དབང་ཕྱུག་བདེ་ལྡན་མཆོག་གིས་བརྩམས་གནང་མཛད་པའི་༼ བོད་ཀྱི་སྲིད་དོན་རྒྱལ་རབས། ༽ཞེས་པར་དགག་ལན་གྱི་ཚུལ་དུ་ ༼ ཞྭ་སྒབ་པའི་སྲིད་དོན་རྒྱལ་རབས་དང་བོད་ཀྱི་ལོ་རྒྱུས་ངོ་མ ༽ ཞེས་པ་འབྲི་མཁན་གྱི་རྩོམ་པ་པོ་ཡང་ཁོ་ཡིན།
རྒྱ་ནག་གཞུང་འབྲེལ་དྲ་ལམ་ནང་ཆབ་སྤེལ་ཚེ་བརྟན་ཕུན་ཚོགས་ལགས་ཀྱི་ལོ་རྒྱུས་འཁོད་པ་ལྟར་ན། ཕྱི་ལོ་ ༡༩༢༢ ལོར་བོད་ལྗོངས་གཞིས་རྩེ་ས་ཁུལ་ལྷ་རྩེ་རྫོང་ལྷ་རྩེ་སྨོན་སྐྱིད་པའི་ཁྱིམ་དུ་འཁྲུངས་ཤིང་། དགུང་ལོ་ ༧ པ་ནས་ ༡༦ བར་སྔ་རྗེས་སུ་ལྷ་རྩེ་ཁུལ་གྱི་སྒེར་གཉེར་སློབ་གྲྭ་ཁག་ནས་སློབ་གཉེར་མཛད། དེ་ནས་ལྷ་རྩེ་ཆོས་སྡེའི་དགེ་བཤེས་བློ་བཟང་ཚུལ་ཁྲིམས་མཆོག་དང་གཙང་སྟོད་པ་ཆོས་གླིང་གི་མཁས་དབང་བློ་བཟང་ཆོས་འཕེལ་ལགས་སོགས་དགེ་རྒན་དུ་བསྟེན། དགུང་ལོ་ ༢༠ ཕེབས་སྐབས་ཡུམ་གྱི་གཞིས་ཆབ་སྤེལ་ལ་བུ་དོད་དུ་ཕེབས་པ་ནས་བཟུང་མཚན་ གྱི་མགོར་ཆབ་སྤེལ་ཞེས་པའི་ཁྱིམ་མིང་འཇགས་ཤིང་དེ་ནས་བཟུང་འགག་པ་དང་རྫོང་སྡོད། ལས་བྱ། ཚྭ་ཤོད་སོགས་ཀྱི་ཕྱག་ལས་མཛད། སྐྱིད་གྲོང་རྫོང་དུ་བཞུགས་པའི་ལོ་ ༣ རིང་ལྡན་ཆོས་འཁོར་དགོན་གྱི་དགེ་བཤེས་མཁས་དབང་ནོར་བུ་བཀྲ་ཤིས་སློབ་དཔོན་དུ་བསྟེན་ཏེ་སྙན་གཞུང་མེ་ལོང་མའི་དཀའ་གནད་ལ་ཟབ་ཁྲིད་དོགས་གཅོད་དང་འབྲེལ་དོན་རྒྱན་སོ་ལྔའི་དཔེར་བརྗོད་ཞིབ་ཚགས་བརྩམས་འབུལ་མཛད་པ་སོགས་རྩོམ་རིག་ལ་སྦྱོང་བ་མཛད། ཕྱི་ལོ་ ༡༩༥༣ ལོར་གཞིས་རྩེ་སློབ་ཆུང་གསར་དུ་བཙུགས་རྗེས་ཐོག་མར་སློབ་དོན་འགན་འཛིན་དང་། དེ་ནས་དོན་བྱེད་ཁང་ཚུགས་སྐབས་དེ་གའི་རྒྱུན་ལས། རིག་སློབ་སྡེ་ཚན་གྱི་འགན་འཛིན་གཅིག་ལྕོགས་མཛད། ༡༩༦༠ ལོ་ནས་བཟུང་སྔ་རྗེས་སུ་གཞིས་རྩེ་ས་ཁུལ་སྲིད་གྲོས་དང་། ལྷ་ས་གྲོང་ཁྱེར་སྲིད་གྲོས། བོད་རང་སྐྱོང་ལྗོངས་ཟེར་བའི་སྲིད་གྲོས་བཅས་ཀྱི་ཨུ་ཡོན་དང་། རྒྱུན་ལས་ཨུ་ཡོན་མཛད་ མྱོང་། ཕྱི་ལོ་ ༡༩༨༡ ལོ་ནས་ ༡༩༨༧ ལོའི་བར་ལྗོངས་སྲིད་གྲོས་རིག་གནས་ལོ་རྒྱུས་དཔྱད་གཞིའི་རྒྱུ་ཆ་ཨུ་ཡོན་ལྷན་ཁང་གི་ཀྲུའུ་རིན་མཛད་ཅིང་ཕྱི་ལོ་ ༡༩༨༡ ལོ་ནས་ ༡༩༩༣ ལོའི་བར་ལྗོངས་རིག་གནས་སྒྱུ་རྩལ་མཉམ་ཚོགས་སྐབས་དང་པོ་དང་གཉིས་པའི་ཨུ་ཡོན་ལྷན་ཁང་གི་ཀྲུའུ་ཞི་གཞོན་པ་མཛད། ཕྱི་ལོ་ ༡༩༨༣ ལོ་ནས་ ༡༩༨༧ ལོའི་བར་བོད་ལྗོངས་སྤྱི་ཚོགས་ཚན་རིག་ཁང་གི་ཡོན་ཀྲང་གཞོན་པ་མཛད་པ་དང་ ༡༩༨༧ལོར་ལྗོངས་སྤྱི་ཚོགས་ཚན་རིག་ཁང་གི་ཞིབ་འཇུག་པའི་གོ་མིང་བཞེས། ༡༩༩༡ ལོར་རྒྱལ་སྲིད་སྤྱི་ཁྱབ་ཁང་ནས་དམིགས་བསལ་ཕོགས་སྣོན་གྱི་བྱ་དགའི་གཟེངས་བསྟོད་ལག་ འཁྱེར་བསྩལ། ༡༩༩༨ ལོར་ལས་འཁྱུར་ངལ་གསོ་མཛད་དེ་ ༡༩༩༩ ལོར་བོད་ལྗོངས་སློབ་ཆེན་གྱི་གདན་ཞུས་ལྟར་བོད་རིགས་རབ་འབྱམས་ཞིབ་འཇུག་སློབ་མའི་གཙོ་ཁྲིད་སློབ་དཔོན་མཛད་པ་མ་ཟད་གཞན་ཡང་རྒྱལ་ཡོངས་སྲིད་གྲོས་ཀྱི་ཨུ་ཡོན་དང་། ལྗོངས་མི་དམངས་མཐུན་ཚོགས་ཀྱི་ཀྲུའུ་རིན་གཞོན་པ་སོགས་གནང་མྱོང་ཡོད་འདུག
ལོ་རྒྱུས་དེའི་ནང་ཁོས་བྲིས་པའི་བརྩམས་ཆོས་ཐད། ” ༼ བོད་ལྗོངས་ཞིབ་འཇུག༽དང་༼ཀྲུང་གོའི་བོད་རིག་པ༽སོགས་བོད་ཡིག་དུས་དེབ་ཐོག་དཔྱད་རྩོམ་ ༥༠ ལྷག་ཙམ་སྤེལ་མཛད་པའི་ནང་ནས་༼བོད་ཀྱི་ལྷ་གསོལ་བསང་གཏོང་གི་ཡུལ་གོམས་སྐོར་ཅུང་ཟད་གླེང་བ༽ཞེས་པར་ ༡༩༩༠ ལོར་ཀྲུང་གོའི་བོད་རིག་པའི་དུས་དེབ་ཀྱི་ཕུལ་བྱུང་བརྩམས་བྱ་དཔྱད་བསྡུར་སྐབས་བོད་ཡིག་དཔྱད་རྩོམ་རིག་པ་དང་པོའི་གཟེངས་བསྟོད་བྱ་དགའ་ཐོབ་པ་དང་། དེ་མིན་༼གཉའ་ཁྲི་བཙན་པོ་ནི་བོད་རང་གི་ མི་ཞིག་ཡིན༽ཞེས་པར་ ༡༩༨༦ ལོར་བོད་ལྗོངས་སྤྱི་ཚོགས་ཙན་རིག་ཁང་གི་དཔྱད་རྩོམ་དཔྱད་བསྡུར་གྱི་ཨང་དང་པོ་ཐོབ། གཞན་ཡང་༼བོད་ཀྱི་རྩོམ་རིག་སྒྱུ་རྩལ༽སོགས་དུས་དེབ་ཕལ་ཆེའི་ནང་སྙན་ངག་དང་། དཔྱད་གཏམ། བརྩམས་སྒྲུང་། ལྷུག་རྩོམ་སོགས་རྩོམ་རིག་གི་བརྩམས་ཆོས་མང་པོ་སྤེལ་མཛད་པ་ལས་ཀ་ཕྲེང་སྙན་ཚིག༼བསིལ་དུས་ཀྱི་བོད་ལྗོངས༽ཞེས་པར་ ༡༩༨༡ ལོར་རྒྱལ་ཡོངས་ཀྱི་སྐབས་དང་པོའི་གྲངས་ཉུང་མི་རིགས་ཀྱི་གསར་རྩོམ་དཔྱད་བསྡུར་སྐབས་གསར་རྩོམ་གྱི་གཟེངས་བསྟོད་བྱ་དགའ་ཐོབ་པ་དང་། སྒྲ་རྒྱན་སྙན་ངག་༼ལྷ་ས་སྐྱིད་གླུ༽ཞེས་པས་ ༡༩༨༥ ལོར་རྒྱལ་ཡོངས་ཀྱི་སྐབས་གཉིས་པའི་གྲངས་ཉུང་མི་རིགས་ཀྱི་གསར་རྩོམ་དཔྱད་བསྡུར་ནང་རྩོམ་རིག་གསར་རྩོམ་གྱི་བྱ་དགའ་ཐོབ་པ་དང་། གཞན་ཡང་ཞིང་ལྗོངས་ལྔའི་བོད་ཡིག་གསར་རྩོམ་དཔྱད་བསྡུར་སྐབས་བྱ་དགའ་རིགས་གཉིས་དང་། ལྗོངས་རིམ་པའི་བྱ་ དགའ་ཐེངས་བདུན་བཅས་ཐོབ་པ་ལགས། བརྩམས་ཆོས་ཀྱི་ཐད་ཡིག་འབྲུ་ཁྲི་ ༡༠༠ ལོང་བའི་༼ བོད་ཀྱི་ལོ་རྒྱུས་རགས་རིམ་གཡུ་ཡི་ཕྲེང་བ༽ཞེས་པ་ལྷན་རྩོམ་མཛད་པ་ཅན་དང་།༼གཏམ་མཛོད་མེས་པོའི་ཞལ་རྒྱུན༽ཞེས་པ་ཡིག་འབྲུ་ཁྲི་ ༡༦ ལྷག་ཅན།༼ཕུ་བོས་ནུ་བོར་བཏམས་ ཤིང་བསྟན་པའི་མདོ་རྩ་འགྲེལ༽ཞེས་པ་ཡིག་འབྲུ་ ༡༠ ཙམ་ཡོད་པ་དང་། དེ་བཞིན། ཀྲུང་གོའི་བོད་རིག་པའི་དཔེ་སྐྲུན་ཁང་གིས་ཕྱོགས་བསྒྲིགས་བྱས་པའི༼ཆབ་སྤེལ་ཚེ་བརྟན་ ཕུན་ཚོགས་ཀྱི་གསུང་རྩོམ་ཕྱོགས་བསྒྲིགས༽ཡིག་འབྲུ་ཁྲི་ ༤༠ བདག་ཉིད་ཅན་དང་། དེ་མིན༼ཞྭ་སྒབ་པའི་བོད་ཀྱི་སྲིད་དོན་རྒྱལ་རབས་དང་བོད་ཀྱི་ལོ་རྒྱུས་ངོ་མ༽ ཞེས་པའི་དོན་ཚན་ ༦༤ ལ་ཡིག་འབྲུ་ཁྲི་ ༡༥ ཙམ་ཡོད་པ་སོགས་སྒེར་དང་ཐུན་མོང་དུ་རྩོམ་བསྒྲིགས་མཛད་པའི་གསུང་རྩོམ་མི་ཉུང་བ་ཞིག་ཡོད་པ་དེ་དག་གི་གཟུ་བོར་གནས་པའི་མཁས་པ་རྣམས་དང་། བློ་གསལ་དོན་གཉེར་ཅན་རྣམས་ཀྱི་གསོས་སུ་སྨིན་པར་ལགས་སོ།།” ཞེས་བཀོད་འདུག
ད་དུང་། ” ཁོང་གིས་སྔ་གཞུག་ཏུ་བོད་ལྗོངས་སྤྱི་ཚོགས་ཚན་རིག་ཁང་གི་ཞིབ་འཇུག་པ་དང་ཡོན་ཀྲང་གཞོན་པ། བོད་ལྗོངས་རྩོམ་རིག་སྒྱུ་རྩལ་མཉམ་འབྲེལ་ལྷན་ཚོགས་ཀྱི་ཀྲུའུ་ཞི་གཞོན་པ། ཀྲུང་གོའི་རྩོམ་པ་པོའི་ལྷན་ཚོགས་ཀྱི་ཚོགས་མི་དང་། ཀྲུང་གོའི་རྩོམ་པ་པོའི་ལྷན་ཚོགས་བོད་ཡན་ལག་ཚོགས་པའི་མཚན་འཛིན་ཀྲུའུ་ཞི་སོགས་མཛད་མྱོང་ཡོད་འདུག” ཅེས་སོགས་བཀོད་འདུག
བོད་ཀྱི་རིག་གནས་རྐྱང་པའི་ངོས་ནས་བཤད་ན། གནས་ཚུལ་བྱ་བྲག་ཁག་ཅིག་གི་ཐོག་ཁོང་གི་ཕྱག་ལས་གནང་བར་བསྔགས་བརྗོད་གུས་འོས་ཆོག་པར་ལྟུ་བུར་སྣང་།
འོན་ཏེ་ཁོའི་མི་གཤིས་དང་ལྷག་པར་བོད་ཀྱི་ལོ་རྒྱུས་དང་ཆབ་སྲིད་དང་འབྲེལ་བའི་བོད་མི་རིགས་ཀྱི་བདེ་སྡུག་གི་གཉེན་འཕྲང་གི་སྐབས་འདིར། ཁོས་སྡུག་ཐོག་སྡུག་དང་རྣག་ཐོག་ཚྭ་བླུག་གི་རྒྱལ་བཙོང་རིང་ལུགས་ཀྱི་ཐལ་ཤའི་བྱ་ངན་དེ་དག་བོད་མི་རིགས་ཀྱི་ལོ་རྒྱུས་ལས་དུས་ནམ་ཡང་ཡལ་བར་མི་སྲིད་དོ། །
ཆབ་སྤེལ་དང་ལྷ་ཀླུ་ལ་སོགས་པའི་བླ་ཆེན་དང་མི་ཆེན། དེ་བཞིན་བོད་ཀྱི་མཁས་པར་བརྫུས་པའི་ལས་ངན་པ་མི་ཉུང་བ་ཞིག་བོད་དང་རྒྱ་ནག་སོགས་ལ་མི་རིགས་ཀྱི་བླ་སྲོག་བཙོངས་ནས་མི་ཚེ་མཐའ་མ་བོད་དང་བོད་མིར་བཞག་པ་ནི་ལས་ངན་དང་ལམ་ལོག་རྐྱང་པ་ལས་མ་འདས་པས་སྙིང་རྗེས་ཀུན་ནས་བླངས་ཏེ་མནར་མེད་དུ་མི་ལྷུང་བའི་སྨོན་ལམ་འདེབས། འོན་ཀྱང་བོད་དུ་བཞུགས་པའི་སྔར་གྱི་བླ་ཆེན་མི་ཆེན་ཚང་མ་དེ་འདྲ་གཏན་ནས་མིན་པ་མཁྱེན་དགོས། ཨོྂ་མ་ནི་པདྨེའི་ཧཱུྂ།།
་་་་་ ཆབ་སྤེལ་ལགས་ད་བར་རང་གི་མི་ཚེ་དང་ཁྱིམ་ཚང་ཆེད་དུ་རྒྱ་གཞུང་ལ་ངོ་དགའ་དང་སྤྲེལ་ལད་ད་བར་བྱས་ནས་བོད་མི་རིགས་དང་བདེ་དོན་ལ་མངོན་སུམ་འཛེམ་མེད་ཀྱིས་ལོ་རྒྱུས་འཁྱོག་བཤད་སོགས་ཀྱི་དོ་ཕོགས་མི་ཉུང་བ་ཞིག་བྱས་་་་་་ ཟེར།
དེང་གི་དུས་འདིར། ངེས་པ་དོན་གྱི་མཁས་དབང་ཞིག་དགོངས་པ་རྫོགས་པར་ཞེ་གཏིང་ནས། མྱ་ངན་དང་དྲན་གསོ་ཞུ།
ཆབ་སྤེལ་ལགས་ད་བར་རང་གི་མི་ཚེ་དང་ཁྱིམ་ཚང་ཆེད་དུ་རྒྱ་གཞུང་ལ་ངོ་དགའ་དང་སྤྲེལ་ལད་ད་བར་བྱས་ནས་བོད་མི་རིགས་དང་བདེ་དོན་ལ་མངོན་སུམ་འཛེམ་མེད་ཀྱིས་ལོ་རྒྱུས་འཁྱོག་བཤད་སོགས་ཀྱི་དོ་ཕོགས་མི་ཉུང་བ་ཞིག་བྱས་ནས་ལས་ངན་སྡིག་སྒྲིབ་ཀྱིས་དམྱལ་བ་མནར་མེད་ནང་ལྷུང་རྒྱུར་བརྟེན་ངས་སྙིང་རྗེས་ཀུན་ནས་བླངས་ཏེ་སྨོན་ལམ་གྲངས་མེད་ཞུ་བཞིན་ཡོད་ལགས་
དུས་རབས་ཉུ་ཤི་དང་ཉེར་གཅིག་པའི་མགོ་སྟོད་ཀྱི་བོད་ཀྱི་དོན་གྱི་མཁས་པའི་དབང་པོ་སྐུ་ཞབས་ཆབ་སྤེལ་ཚེ་བརྟན་ཕུན་ཚོགས་སྐུ་གཤེགས་པའི་ཡིད་སྐྱོའི་གནས་ཚུལ་ལ་སེམས་གཏིང་ནས་མྱ་ངན་དང་།
ཁོང་གི་མཛད་རྗེས་ལ་ཡིད་གཏིང་ནས་བསྔགས་བརྗོད་དང་ནམ་ཡང་ཁོང་གི་མཛད་རྗེས་ཀྱིས་བོད་མི་རིགས་ཀྱི་ཤེས་རིག་གོང་སྤེལ་གྱི་བྱ་གཞག་ལ་ཕན་ནུས་བླ་ལྷག་ཡོང་བའི་ཡིད་ཆེས་བཅས།
མི་ལུས་སྐྱེ་ཞིག་སྐྱེ་བ་ཐམས་ཅད་དུ།།
ངན་སོང་ངན་འགྲོ་ལེགས་པར་ལྟུང་བ་ཡི།།
སྐྱེ་གནས་རྣམས་སུ་ནམ་ཡང་མི་སྐྱེ་ཞིང་།།
དལ་འབྱོར་ཚང་བའི་མི་ལུས་ཐོབ་པར་ཤོག།
ཅེས་ཀྱང་བསྔོའོ།།
ངའི་ངོས་ནས་མྱ་ངན་ཡོད་་་་་ཨོཾ་མ་ཎི་པདྨེ་ཧྰུཾ་ཧྰུཾ་་་།།
ངས་ངོས་ནས་མྱ་ངན་གུས་དུད་མེད་དོ། །
ད་དུང་ < ལྷ་ས་བརྙན་འཕྲིན > ཞེས་པའི་ནང་། ཀྲུང་གོ་གུང་་ཁྲན་ཏང་གི་མཛའ་བཤེས་གྲོགས་པོ་བཟང་བོ། ཏང་དང་རྒྱལ་ཁབ་ལ་བློ་བརྟན་འགྱུར་མེད་ཀྱི་སྙིང་སྟོབས་ལྡན་པའི་རྒྱལ་གཅེས་རིང་ལུགས་པ། དྲང་བདེན་ཕྱོགས་སུ་མ་ལྷུང་བའི་གཟུར་གནས་མཁས་དབང་ཆབ་སྤེལ་ཚེ་བརྟན་ཕུན་ཚོགས། ཞེས་མྱ་ངན་ཞུ་བཞིན་འདུག་གོ།།།།།