གནས་ཚུལ་འདི་རིགས་སྦ་གསང་བྱེད་རྒྱུར་ངོས་ལེན་རྩ་བ་ནས་མེད།

ཉེ་ཆར་རྒྱ་གར་ལྷོ་ཕྱོགས་མོན་གྷོ་བོད་མིའི་གཞིས་ཆགས་ཀྱི་གཞིས་གྲོང་ ༧ པའི་བུ་མོ་ལོ་ ༥ ཅན་ཞིག་ལ་སྐྱེས་པ་གཉིས་ཀྱིས་བཙན་གཡེམ་བྱས་པའི་གནས་ཚུལ་བྱུང་ཡོད་པ་དང་། དེའི་རྗེས་རྒྱ་གར་ཉེན་རྟོག་པས་ཕོ་སར་དེ་གཉིས་འཇུ་བཟུང་གིས་གནས་ཚུལ་ཐག་གཅོད་བྱེད་རྒྱུར་སྒུག་ཡོད་འདུག   

ཟླ་འདིའི་ཕྱི་ཚེས་ ༡༧ ཙམ་ལ་རྒྱ་གར་ལྷོ་ཕྱོགས་མོན་གྷོ་བོད་མིའི་གཞིས་ཆགས་ཀྱི་གཞིས་གྲོང་ ༧ པའི་སྐྱེས་པ་ལོ་ ༤༠ ཅན་ཉི་མ་ཟེར་བ་དང་ལོ་ ༣༧ ཡིན་པའི་ཆོས་འཕེལ་གཉིས་ཀྱིས། གཞིས་གྲོང་གཅིག་པའི་བུ་མོ་ལོ་ ༥ ཅན་ཞིག་ལ་རྔན་པ་སྤྲད་དེ་ཆོས་འཕེལ་ཟེར་བ་དེའི་ཁྱིམ་དུ་ཁྲིད་ནས་བཙན་གཡེམ་བྱེད་སྐབས། སྒེའུ་ཁུང་ནས་བྱིས་པ་གཉིས་ཀྱིས་མཐོང་སྟེ་གནས་ཚུལ་ཕྱི་རུ་ཁྱབ་པ་དང་། ཕྱིས་སུ་བུ་མོའི་ཕ་མ་གཉིས་ཀྱིས་ཤེས་རྟོགས་བྱུང་ཡོད་ཀྱང་། ས་གནས་གནད་ཡོད་མི་སྣས་གནས་ཚུལ་ཕྱིར་བསྒྲགས་བྱས་ན་ཧ་ཅང་ངོ་ཚ་བོ་ཡིན་ལུགས་བརྗོད་དེ་གནས་སྐབས་སུ་གསང་ཐབས་བྱས་ཡོད་འདུག ཡིན་ནའང་། ས་གནས་བུད་མེད་ལྷན་ཚོགས་དང་བུ་མོའི་ཕ་མ་གཉེན་འབྲེལ་བཅས་ཀྱིས་གནས་ཚུལ་དེ་རྒྱ་ཡན་དུ་གཏོང་མི་ཉན་པའི་རེ་བ་བརྒྱབ་པ་ལྟར། བུ་མོའི་པ་ལགས་ཀྱིས་རྒྱ་གར་ཉེན་རྟོག་པར་ཞུ་གཏུག་བྱས་ཏེ། ད་ལྟའི་ཆར་ཉེན་རྟོག་པས་སྐྱེས་པ་གཉིས་འཛིན་བཟུང་གིས་འདྲི་རྩད་བྱེད་བཞིན་ཡོད་པ་དང་། ཆོས་འཕེལ་ཟེར་བ་དེས་རྒྱུན་དུ་ཆང་རག་བཏུང་སྟེ་ཕ་མ་གཉིས་ལ་གཅར་རྡུང་བཏང་བ་སོགས་བྱས་སྟབས། རང་ཁྱིམ་ནས་ཕུད་དེ་མོན་གྷོ་གཞིས་གྲོང་ ༢ པ་རུ་བསྡད་ཡོད་པ་དང་། ཉི་མ་ལ་བཟའ་ཟླ་དང་ཕྲུ་གུ་ཡོད་ཀྱང་། སྔོན་ཆད་ནས་གཉེན་འཐོར་ཏེ་རྒྱུན་དུ་ཆང་རག་འཐུང་ནས་འཁྱམ་ཉུལ་བྱས་ཏེ་བསྡད་ཡོད་འདུག ད་ལྟའི་བར་ཁྱིམ་ཚང་ནང་ཁུལ་ནས་གནད་དོན་ཐག་གཅོད་བྱེད་པར་ཕན་ཚུན་གྲོས་བསྡུར་སོགས་གང་ཡང་བྱས་མེད་པ་རེད།

གསར་འགོད་པས་མོན་གྷོ་ས་གནས་གཞིས་མགོ་ལ་ཁ་པར་ཐེངས་མང་བཏང་ཡང་མཐུད་ཐུབ་མ་སོང་སྟབས། ཕྱི་ཚེས་ ༢༧ ཉིན་ཁ་པར་བརྒྱུད་ས་གནས་སུ་ཆེད་གཏོང་གནང་ཡོད་པའི་དབུས་བོད་ཀྱི་བུད་མེད་ལྷན་ཚོགས་ཀྱི་ཚོགས་གཞོན་བསམ་གཏན་ཆོས་སྒྲོན་ལགས་སུ་བཅར་འདྲི་ཞུས་པར་ཁོང་མོས། “ གནས་ཚུལ་དེ་བྱུང་རྗེས་བུ་མོ་ཆུང་དྲགས་ཏེ་ཕ་མ་གཉིས་ལ་བཤད་ཐུབ་མེད་པ་དང་། ཕ་མ་གཉིས་ཀྱིས་བུ་མོའི་མཚན་མའི་ཁར་སྐྱོན་བཟོས་ཡོད་པ་མཐོང་ཡོད་ཀྱང་། གནས་ཚུལ་དེ་འདྲ་བྱུང་བ་ཤེས་ཡོད་པ་མ་རེད། སྟབས་ལེགས་པ་ཞིག་ལ་བུ་མོར་བཙན་གཡེམ་བཏང་སྐབས་སྒེའུ་ཁུང་ནས་བུ་མོ་དེའི་རྩེད་རོགས་བྱིས་པ་གཉིས་ཀྱིས་མཐོང་སྟེ། བུ་མོར་བཙན་གཡེམ་བྱས་སོང་ཟེར་ནས་བྱིས་པ་གཞན་ལ་བཤད་དེ་གནས་ཚུལ་ཕྱི་རུ་ཁྱབ་པ་དང་། ཕྱིས་སུ་བུ་མོའི་པ་ལགས་ཀྱིས་ཐོས་ཏེ་ཡར་མར་སྐད་ཆ་དྲིས་ཏེ་གནས་ཚུལ་གསལ་བོ་ཆགས་ཡོད་པ་རེད། ཡིན་ནའང་བཙན་གཡེམ་རང་གཏོང་ཐུབ་མེད་པ་འདྲ། ཚེས་ ༢༢ ཉིན་ང་ཚོས་བུ་མོའི་ཁྱིམ་དུ་འགྲོ་སྐབས་མོ་རང་རྩེད་མོ་རྩེས་ནས་བསྡད་འདུག སེམས་ལ་དངངས་སྐྲག་དང་གནོན་ཤུགས་གང་ཡང་ཐེབས་མེད་པ་འདྲ་བོ་འདུག སྨན་པས་གཟུགས་པོར་བརྟག་དཔྱད་བྱས་པར་སྐྱོན་གང་ཡང་མེད་ལུགས་བརྗོད་འདུག ཡིན་ནའང་། ཁོ་མོའི་ཨ་མ་ལགས་མང་པོ་ངུ་བཞིན་འདུག་ལ། སེམས་ཁྲལ་ཆེན་པོ་བྱེད་ཀྱི་འདུག” ཅེས་བརྗོད་སོང་།

བུད་མེད་ལྷན་ཚོགས་ཀྱིས་གནས་ཚུལ་དེར་རོགས་རམ་གང་འདྲ་གནང་གི་ཡོད་མེད་དྲིས་པར། “ ང་ཚོ་དབུས་དང་ས་གནས་མཉམ་དུ་བུ་མོའི་ཁྱིམ་ཚང་ལ་བཅར་བ་ཡིན། ང་ཚོའི་ངོས་ནས་དངུལ་སོགས་ཀྱི་རོགས་རམ་ག་རེ་བྱེད་དགོས་ཀྱང་བྱེད་འཆར་ཡོད་མོད། བུ་མོའི་པ་ལགས་ཀྱིས་དཔལ་འབྱོར་གྱི་དཀའ་ངལ་མེད། ཡིན་ནའང་རྒྱ་གར་ཉེན་རྟོག་པ་དང་ལས་ཀ་བྱེད་སྐབས་ཡི་གེ་འབྲི་རྒྱུ་སོགས་ལ་རོགས་པ་ཞིག་བྱེད་ཐུབ་ན་ཡག་པོ་འདུག་གསུངས་བ་ལྟར། ང་ཚོས་ས་གནས་མགོ་འཛིན་ལ་ཞུས་ཏེ་ཞལ་བཞེས་གཙང་མ་གནང་སོང་ལ། ང་ཚོ་བུད་མེད་ལྷན་ཚོགས་ཀྱི་ངོས་ནས་ཀྱང་མཐུན་འགྱུར་རོགས་རམ་གང་ཞིག་དགོས་ཀྱང་བྱེད་འཆར་ཡོད།” ཅེས་དང་། ནང་སྲིད་བཀའ་བློན་མཆོག་ནས་ཚོགས་ཆུང་ཆེད་འཛུགས་ཀྱིས་གནད་དོན་འདི་ལ་ཞིབ་འཇུག་ཐག་གཅོད་བྱས་ན་ཡག་པོ་ཡོད་པའི་ལམ་སྟོན་གནང་ཡོད་སྐོར་སོགས་བརྗོད་སོང་།

ནང་སྲིད་དྲུང་འཕར་དོན་གྲུབ་རྡོ་རྗེ་ལགས་སུ་ནང་སྲིད་ཀྱི་ངོས་ནས་གནད་དོན་འདི་ཐག་གཅོད་ཡོང་ཐབས་སུ་ག་རེ་གནང་ཡོད་མེད་དྲིས་པར་ཁོང་གིས། “གནད་དོན་འདི་ནག་ཉེས་ཀྱི་ཁྲིམས་ཡིན་སྟབས་བོད་མིའི་སྒྲིག་འཛུགས་ནས་ལམ་སྟོན་གསལ་བོ་ཡོད་པ་རེད། ནག་ཉེས་ཀྱི་ཁྲིམས་དང་འབྲེལ་བ་ཆགས་པའི་གནས་ཚུལ་ག་རེ་བྱུང་བ་ཡིན་ནའང་། ཡུལ་ཁྲིམས་རང་ལ་བསྟུན་ནས་འགྲོ་དགོས་པ་ལས་ནང་སྲིད་ཀྱི་ངོས་ནས་ཐག་གཅོད་གནང་རྒྱུ་གང་ཡང་ཡོད་པ་མ་རེད། ནག་ཉེས་ཀྱི་ཁྲིམས་ལས་བརྒལ་བའི་གནད་དོན་ལ་ང་ཚོ་ནང་སྲིད་ལས་ཁུངས་ནས་སྙོབ་ཐུབ་ཀྱི་མེད་ལ། ཐག་གཅོད་བྱས་ན་འགྲིག་གིའང་ཡོད་པ་མ་རེད། ང་ཚོའི་ཐག་གཅོད་དེ་ས་གནས་ལ་བཀོད་ཁྱབ་གཏོང་བ་དང་ཡུལ་ཁྲིམས་ལ་གཏུག་ཟེར་བ་དེ་རེད། ཁྲིམས་གཏུག་ནི་བྱས་ཡོད་པ་རེད། ”ཅེས་བརྗོད་སོང་།

དབུས་བུད་མེད་ལྷན་ཚོགས་ཀྱི་ཚོགས་གཙོ་བཀྲ་ཤིས་སྒྲོལ་མ་ལགས་སུ། བོད་མིའི་སྤྱི་ཚོགས་ཁྲོད་བཙན་གཡེམ་གྱི་གནས་ཚུལ་བྱུང་བཞིན་ཡོད་ཀྱང་། ངོ་ཚར་འཛེམས་ནས་སྦ་གསང་བྱེད་བཞིན་པར་དགོངས་ཚུལ་ཅི་ཡོད་དྲིས་པར་ཁོང་མོས། “ང་ཚོ་བུད་མེད་ལྷན་ཚོགས་ཀྱི་ངོས་ནས་གནད་དོན་ཐབས་སྐྱོ་བོ་འདི་རིགས་སྦ་གསང་བྱེད་པར་ངོས་ལེན་རྩ་བ་ནས་མེད། བཙན་གཡེམ་གྱི་ཐོག་ནས་ལས་ཀ་སྡུག་ཅག་བྱེད་མཁན་དེ་བུ་ཡིན་སྟབས། ངོ་ཚ་དགོས་མཁན་དེ་བུ་ཡིན་པ་ལས་བུ་མོ་གཏན་ནས་མ་རེད། བུ་མོའི་མི་ཚེའི་ནང་ངོ་ཚ་དང་སྡུག་བསྔལ་ཡོང་བ་དངོས་ཡོད་རེད། ཡིན་ནའང་། ལས་ཀ་སྡུག་པོ་བྱེད་མཁན་དེ་སྐྱེས་པ་ཕོ་ཡིན་དུས་ང་ཚོ་བུད་མེད་ཀྱི་ཕྱོགས་ནས་དེ་ཙམ་ངོ་གནོང་དགོས་དོན་ཡོད་པ་མ་རེད། བཙན་གཡེམ་གྱི་གནས་ཚུལ་བྱུང་སྐབས་བུ་ཚོས་བཙན་གཡེམ་ཐེབས་པའི་བུ་མོར་རྒྱབ་སྐྱོར་བྱེད་དགོས་པ་མ་ཟད། བཙན་གཡེམ་བྱེད་མཁན་གྱི་བུ་དེར་སློབ་གསོ་དང་། ཡང་ན་སྤྱི་ཚོགས་ནང་ཐེར་འདོན་བྱེད་དགོས་པའི་ལས་འགན་དེ་བུ་ཚོར་མང་བ་ཡོད་པ་རེད། དེ་བཞིན། བཙན་གཡེམ་གྱི་གནས་ཚུལ་འདི་རིགས་སྦ་གསང་བྱེད་རྒྱུར་ངོས་ལེན་རྩ་བ་ནས་མེད། གནས་ཡུལ་རྒྱལ་ཁབ་ཀྱི་ཁྲིམས་ཀྱི་སྲུང་སྐྱོབ་རག་ཐབས་སུ་ཞུ་གཏུག་ངེས་པར་དུ་བྱེད་དགོས་པ་རེད། ཞུ་གཏུག་དེ་མ་འོངས་པར་གནད་དོན་འདི་རིགས་མི་འབྱུང་བའི་ཐབས་ལམ་རེད། མ་འོངས་པར་གནད་དོན་འདི་རིགས་ཐོག་ང་ཚོ་བུད་མེད་ལྷན་ཚོགས་ཀྱིས་བརྒྱ་ཆ་བརྒྱ་རྒྱབ་སྐྱོར་དང་རོགས་རམ་ཞུ་རྒྱུ་ཡིན། ”ཞེས་བརྗོད་སོང་། 

གོང་གི་པར་མཁོ་སྤྲོད་གནང་མཁན་བོད་ཀྱི་བུད་མེད་ལྷན་ཚོགས་ཡིན།

གསར་འགོད་པ། པདྨ་མཚོ།