གཟའ་ཟླ་བའི་ཉིན་དཔལ་རྒྱལ་དབང་ཀརྨ་པ་མཆོག་གཡུང་དྲུང་བོན་གྱི་གདན་ས་སྨན་རིའི་གླིང་དུ་ཞབས་སོར་བཀོད་ཡོད་འདུག
ཟླ་འདིའི་ཚེས་ ༤ཉིན་དཔལ་རྒྱལ་བ་ཀརྨ་པ་མཆོག་བྱེས་ཡུལ་གཡུང་དྲུང་བོན་གྱི་གདན་ས་ཆེན་པོ་སྨན་རིའི་གླིང་དུ་ཞབས་སོར་བཀོད་ཡོད་འདུག ཉིན་དེའི་ཉིན་གུང་ཆུ་ཚོད་ ༡༢།༣༠ སྟེང་སྨན་རིའི་ཁྲི་འཛིན་མཆོག་གིས་དབུས་པའི་བོན་གཞིས་ས་གནས་འཐུས་མི་ལྷན་ཚོགས་དང་བོན་གཞིས་ས་གནས་མགོ་འཛིན། སྨན་རི་དགོན་གྱི་གྲྭ་མང་དང་བོན་གཞིས་མི་མང་། ས་གནས་ཉིན་སློབ་ཀྱི་སློབ་ཕྲུག་བཅས་ཀྱིས་ལྷ་བསང་དང་ཆེ་བསྟོད་གཤེན་རབ་མཆོད་རྔའི་མཆོད་འབུལ་གྱི་དབུས་ནས་ཕེབས་བསུ་ཞུས་ཡོད་ཅིང་། འདུ་ཁང་གི་བཞུགས་ཁྲིར་མངའ་གསོལ་རྗེས་གྲྭ་མང་གིས་ཁྲི་གསོལ་ཚིག་བཤད་གྱེར་འདོན་དང་འབྲེལ་སྨན་རིའི་བཤད་སྒྲུབ་མཁན་རིན་པོ་ཆེ་དང་བཤད་སྒྲུབ་སློབ་དཔོན་རིན་པོ་ཆེ་རྣམ་གཉིས་ཀྱིས་མཎྚལ་སྐུ་གསུང་ཐུགས་རྟེན་འདེགས་འབུལ་ཞུས་ཡོད་འདུག
ཉིན་རྒྱབ་ཆུ་ཚོད་ ༢ སྟེང་། སྨན་རིའི་གཙུག་ལག་ཁང་མདུན་དུ་ཞབས་སོར་བཀོད་དེ། བླ་ཁྲི་མཁན་པོ་དགེ་བཤེས་ཉི་གྲགས་པ་རིན་པོ་ཆེ་ལགས་ནས་དཔལ་རྒྱལ་དབང་ཀརྨ་པ་སྐུ་ཕྲེང་རིམ་བྱོན་གྱི་ལོ་རྒྱུས་དང་འབྲེལ་བའི་གཏམ་བཤད་དང་། དེ་རྗེས་དཔལ་རྒྱལ་བ་ཀརྨ་པ་མཆོག་གིས་བོན་གཞིས་སེར་སྐྱ་མང་ཚོགས་ལ་བཀའ་སློབ་བསྩལ་དོན། “ད་ལན་གཡུང་དྲུང་བོན་གྱི་གདན་ས་ཆེན་མོ་འདིར་ཕྲན་དངོས་སུ་བཅར་ཐུབ་པ་འདིར་ཧ་ཅང་གིས་སྐལ་པ་བཟང་པོ་བྱུང་། སྔར་ནས་རྒྱལ་དབང་ཀརྨ་པའི་སྐུ་ཕྲེང་རིམ་བྱོན་དང་གཡུང་དྲུང་བོན་གྱི་བསྟན་པ་འཛིན་པ་དཔལ་རྒྱལ་བ་སྨན་རི་བའི་ཁྲི་འཛིན་རིམ་བྱོན་རྣམས་ཕན་ཚུན་ལས་སྨོན་དང་འབྲེལ་འདྲིས་ཟབ་ཅིང་། ཕྲན་ནས་ཀྱང་གཤེན་བསྟན་ལ་དགའ་གུས་ཆེན་པོ་ཡོད་ཅིང་། བསྟན་པ་དར་རྒྱས་ཀྱི་སྨོན་འདུན་རྩེ་གཅིག་ཏུ་ཞུ་བཞིན་ཡོད་”ཅེས་དང་། ཁོང་གིས་མུ་མཐུད་དུ་ “ང་རང་ཚོ་དེ་རིང་འདིར་བཅར་བྱས། མཇལ་ཐུབ་པ་དེ་ང་རང་གི་ཡིན་ན་ཡང་དམིགས་བསལ་གྱི་དོན་ཆེན་པོ་ཞིག་འགྲུབ་སོང་སྙམ་པ་ཞིག་དང་། སོ་སོ་མི་ཚེའི་ནང་གི་གང་ཅིའི་དོན་ཆེན་པོ་ཞིག་ལ་ངོས་འཛིན་བྱེད་རྒྱུ་ཡིན། མ་འོངས་པར་ཡིན་ན་ཡང་གཡུང་དྲུང་བོན་གྱི་གདན་ས་འདིར་མཇལ་ཐུབ་པའི་རེ་བ་དང་སྨོན་ལམ་ཞུ་གི་ཡིན།”ཞེས་སོགས་གསུངས་ཡོད་འདུག
མཇུག་ཏུ་སྨན་རིའི་མཁན་རིན་པོ་ཆེ་ལགས་ནས་ཐུགས་རྗེ་ལེགས་གསོལ་གྱི་གཏམ་བཤད་དང་བཅས་མཛད་སྒོ་མཇུག་གྲུབ་རྗེས། གཡུང་དྲུང་བོན་གྱི་དཔེ་མཛོད་ཁང་དང་བོན་གཞིས་གསང་སྔགས་སྒོམ་སྒྲུབ་གླིང་བཅས་ལ་གཟིགས་སྐོར་གནང་ཞིང་། ཕྱི་དྲོའི་ཆུ་ཚོད་ ༣།༣༠ ཙམ་ལ་སྨན་རིའི་ཁྲི་འཛིན་གཙོས་བོན་གཞིས་སེར་སྐྱ་མང་ཚོགས་ཡོངས་ནས་ཕེབས་སྐྱེལ་ཞུས་ཡོད་འདུག གནས་ཚུལ་དང་པར་མཁོ་སྤྲོད་གནང་མཁན་ཁྲི་གཡུང་དྲུང་ཡིན།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
བཀའ་བོན་གྱི་བསྟན་པའི་མངའ་བདག་རྣམ་གཉིས་གསེར་ཞལ་ལྷན་འཛོམ་གྱིས། ལོ་རྒྱུས་ཀྱི་དོན་སྙིང་ལྡན་པའི་བཀའ་བོན་དམ་ཚིག་འོ་ཆུ་གཅིག་འདྲེས་ཀྱི་མཛད་རྗེས་ལ་གུས་འདུད་དང་། སླད་ཀྱང་བཀའ་བོན་བསྟན་པའི་མངའ་བདག་བླ་ཆེན་རྣམ་པ་དང་། དགེ་འདུན་གྱི་སྡེ་ཕན་ཚུན་ཁོང་རྣམ་པའི་མཛད་པར་འཕྲོ་མཐུད་ནས་དམ་ཚིག་རྡོག་རྩ་གཅིག་སྒྲིལ་གནང་དགོས་པ་ནི་དུས་དང་འཚམས་ལ་ལོ་རྒྱུས་ཀྱི་ཡང་སྙིང་དུ་ངེས་སོ།།
ཤ་སྐལ་ཆེ་དུས་བནྡེའི་ནང་། ཐུད་སྐལ་ཆེ་དུས་བོན་པོའི་ནང་།
༸དཔལ་རྒྱལ་བ་ཀརྨ་པ་མཆོག་དང་། ༸དཔལ་རྒྱལ་བ་སྨན་རི་བ་མཆོག་རྣམ་གཉིས་ཀྱི། ༸སྐུ་ཚེ་ཡུན་དུ་བརྟན་ཅིང་། མཛད་འཕྲིན་ཕྱོགས་ཀུནད་ཏུ། རྒྱས་པའི་སྨོན་འདུན་ཞུའོ།། །།
་་་་ དཔལ་རྒྱལ་བ་ཀརྨ་པ་མཆོག་གིས་བོན་གཞིས་སེར་སྐྱ་མང་ཚོགས་ལ་བཀའ་སློབ་བསྩལ་དོན།
“ད་ལན་གཡུང་དྲུང་བོན་གྱི་གདན་ས་ཆེན་མོ་འདིར་ཕྲན་དངོས་སུ་བཅར་ཐུབ་པ་འདིར་ཧ་ཅང་གིས་སྐལ་པ་བཟང་པོ་བྱུང་། སྔར་ནས་རྒྱལ་དབང་ཀརྨ་པའི་སྐུ་ཕྲེང་རིམ་བྱོན་དང་གཡུང་དྲུང་བོན་གྱི་བསྟན་པ་འཛིན་པ་དཔལ་རྒྱལ་བ་སྨན་རི་བའི་ཁྲི་འཛིན་རིམ་བྱོན་རྣམས་ཕན་ཚུན་ལས་སྨོན་དང་འབྲེལ་འདྲིས་ཟབ་ཅིང་། ཕྲན་ནས་ཀྱང་གཤེན་བསྟན་ལ་དགའ་གུས་ཆེན་པོ་ཡོད་ཅིང་། བསྟན་པ་དར་རྒྱས་ཀྱི་སྨོན་འདུན་རྩེ་གཅིག་ཏུ་ཞུ་བཞིན་ཡོད་”
ཅེས་དང་། ་་་་་་
བླ་ཆེན་ཁག་གི་མཐུན་སྒྲིལ་ནི་ཆོས་ལུགས་ཁག་གི་མཐུན་སྒྲིལ་ཡིན་ཞིང་། ཆོས་ལུགས་ཁག་གི་མཐུན་སྒྲིལ་ནི་ང་ཚོའི་མི་རིགས་ཀྱི་མཐུན་སྒྲིལ་ཡིན། ༸དཔལ་རྒྱལ་བ་ཀརྨ་པ་མཆོག་དང་༸སྨན་རིའི་ཁྲི་འཛིན་རིན་པོ་ཆེ་རྣམ་པ་གཉིས་ཀྱི་མཛད་འཕྲིན་ལ་སྙིང་ནས་གུས་འདུད་ཞུ།