ལོ་གཉིས་ལ་བྲོས་བྱོལ་བྱས་མཐར་རྒྱ་གར་ལ་སྐྱབས་བཅོལ་དུ་འབྱོར།

༧གོང་ས་མཆོག་བོད་ལ་གདན་འདྲེན་ཞུ་དགོས་པ་དང་། བོད་མིར་རང་དབང་དགོས་པའི་སྦྱར་ཡིག་བཀྲམ་རྗེས་ལོ་གཉིས་རིང་རྒྱ་གཞུང་ལ་ཉེན་གཡོལ་བྲོས་བྱོལ་བྱས་མཐར་ཉེ་ཆར་རྒྱ་གར་ནང་བཙན་བྱོལ་དུ་འབྱོར་ཡོད་པ་བློ་བཟང་ཐུབ་བསྟན་ལགས་སུ་བཅར་འདྲི་ཞུས་ཡོད།

ཟི་ཁྲོན་དཀར་མཛེས་ཁུལ་སྡེ་དགེ་རྫོང་རྫ་ཁོག་ཞང་། ཀ་ཡུལ་གྲོང་ཚོ་ནས་ཡིན་པའི་བློ་བཟང་ཐུབ་བསྟན་ལགས་རྒྱ་གཞུང་གི་ཆབ་སྲིད་ཉེས་མིང་འོག ཁོས་ལོ་ ༢ རིང་བོད་ནང་གི་ས་ཁུལ་མང་པོར་ཉེན་གཡོལ་བྲོས་བྱོལ་བྱས་མཐར། ཉེ་ཆར་ཕྱི་ཟླ་ ༨ ཚེས་ ༥ ཉིན་རྒྱ་གར་ངྷ་རམ་ས་ལའི་དབུས་སྣེ་ལེན་ཁང་དུ་འབྱོར་ཡོད་པ་དང་། འདི་གའི་གསར་འགོད་པས་ཁོང་ལ་ཐུག་འཕྲད་བྱས་ཏེ། ཁོས་བོད་ནང་རྒྱ་ནག་ལ་ངོ་རྒོལ་ལས་འགུལ་ཇི་ལྟར་སྤེལ་བ་དང་། རྒྱ་གཞུང་གི་འཛིན་བཟུང་བཀའ་རྒྱའི་འོག་ས་ཆ་གང་དག་ལ་བྲོས་བྱོལ་བྱས་པ། མཐར་རྒྱ་གར་ལ་ཇི་ལྟར་ཡོང་བ་སོགས་ཀྱི་སྐོར་ལ་བཅར་འདྲི་ཞུས་ཡོད།

བློ་བཟང་ཐུབ་བསྟན་ལགས་ཀྱིས་བརྗོད་པ་ལྟར་ན། ཁོ་རང་ཆུང་ཆུང་ཡིན་སྐབས་ཁོའི་སྤོ་བོ་དང་རྨོ་མོ་གཉིས་ཀྱིས་ང་དགུ་ལོར་རྒྱ་དམར་གིས་བོད་ཡོངས་རྫོགས་བཙན་བཟུང་བྱས་ཏེ་བོད་མི་མང་པོ་དམར་གསོད་བཏང་བ་དང་། བཙོན་འཇུག་མནར་གཅོད་བཏང་བའི་ལོ་རྒྱུས་མང་པོ་བཤད་པའི་བག་ཆགས་སེམས་ངོར་འབྱར་ཡོད་པ་དང་། ཁོ་རང་འཚར་ལོངས་བྱུང་རྗེས་རྒྱ་གཞུང་གིས་བཙན་ཤེད་ཀྱིས་བོད་མིའི་ས་ཞིང་ཐོག་ཤིང་སྡོང་འདེབས་འཛུགས་དང་འབྲོག་པའི་རྩྭ་སར་ལྕགས་རྭ་སྐོར་བ། ཕྱུགས་ཟོག་ཚོད་འཛིན་བྱས་པ་སོགས་ཀྱི་སྲིད་ཇུས་རབ་དང་རིམ་པ་སྤེལ་བ། ལྷག་པར་དུ་ ༢༠༠༨ ལོའི་བོད་མིའི་གྱེན་ལངས་ཆེན་མོ་བྱུང་སྟེ་རྒྱ་གཞུང་གིས་བོད་མིར་དྲག་གནོན་བྱས་སོགས་སེམས་ནང་བཟོད་བསྲན་མ་ཐུབ་པར། ཕྱི་ལོ་ ༢༠༡༡ ལོའི་བོད་ཟླ་ ༡ ཚེས་ ༢ ཉིན་ཁམས་སྡེ་དགེ་རྫོང་རྫ་ཁོག་ཞང་དུ། ཁོ་རང་དང་ཚེ་རིང་སྐྱབས་པོ་དང་། བྱམས་པ་དངོས་གྲུབ་མི་གསུམ་གྱིས་སྡེ་དགེ་རྫོང་གི་ས་གནས་ཁག་མང་པོའི་ནང་། “ ༸གོང་ས་མཆོག་ཕོ་བྲང་པོ་ཏ་ལར་གདན་འདྲེན་ཞུ་དགོས། བོད་ལ་རང་དབང་དགོས། བོད་ལ་འགྲོ་བ་མིའི་ཐོབ་ཐང་དགོས། རྒྱ་མི་བོད་ནས་མཐར་སྐྲོད་གཏོང་དགོས། ༸གོང་ས་མཆོག་སྐུ་ཚེ་ཁྲི་ལོར་བརྟན་ཤོག ” སོགས་འཁོད་པའི་ཡིག་ཆ་བཀྲམ་ཡོད་འདུག

ཁོང་གསུམ་གྱིས་སྦྱར་ཡིག་དེ་དག་བཀྲམ་རྗེས་བྲོས་བྱོལ་བྱས་ཏེ་དཀར་མཛེས་རྫོང་གོང་ལམ་ཞང་མདའ་ཧོར་གྲོང་དུ་ཟླ་གཅིག་ལྷག་རིང་ཉེན་ཡོལ་བྱས་ཡོད་པ་དང་། ཉིན་དེའི་ཕྱི་དྲོར་རྒྱ་ནག་གི་དམག་མི་དང་ཉེན་རྟོག་པ་མང་པོ་འབྱོར་ཏེ་སྡེ་བའི་མཐའ་སྐོར་ཞིང་། མང་ཚོགས་ལ་འཇིགས་སྣང་སྐུལ་ཏེ་རྩད་གཅོད་བྱེད་སྐབས། སྦྱར་ཡིག་བཀྲམས་མཁན་ཁོང་གསུམ་ཡིན་པ་ཤེས་རྟོགས་བྱུང་ཡོད་པ་དང་། ཁོང་གསུམ་གྱི་ཁྱིམ་ཡོངས་སྔོག་བཤེར་བྱས་ཏེ་རྒྱུ་དངོས་མང་པོ་འཕྲོག་བཅོམ་བྱས་ཡོད་པ་མ་ཟད། བློ་བཟང་ཐུབ་བསྟན་ལགས་ཀྱི་ཨ་མ་རང་ལོ་ ༦༣ ཡིན་པ་འཛིན་བཟུང་བྱས་ཡོད་འདུག ལོ་དེའི་བོད་ཟླ་ ༣ པའི་ནང་རྒྱ་ནག་གཞུང་གིས་སྡེ་དགེ་རྫོང་གི་ས་གནས་ཁག་ཡོངས་ནང་། བློ་བཟང་ཐུབ་བསྟན་དང་ཚེ་རིང་སྐྱབས་པོ། བྱམས་པ་དངོས་གྲུབ་གསུམ་འཛིན་བཟུང་བྱེད་མཁན་ཡོད་ན་རྒྱ་སྒོར་ཁྲི་ ༡༢ རེ་སྤྲོད་རྒྱའི་གསལ་བསྒྲགས་སྦྱར་ཡོད་པ་མ་ཟད། ཉེན་རྟོག་པས་ག་ས་གང་དུ་རྩད་གཅོད་བྱེད་ཀྱི་ཡོད་སྟབས། ཁོ་གསུམ་མཉམ་དུ་སྐྱོད་ན་ཉེན་ཁ་ཆེ་བར་གཟིགས་ཏེ། བློ་བཟང་ཐུབ་བསྟན་དཀར་མཛེས་ནས་རྫ་ཆུ་ཁ་དང་། དེ་ནས་ས་གནས་རིམ་པ་བརྒྱུད་དེ་ཕྱི་ཟླ་ ༩ བའི་ནང་ལྷ་སར་འབྱོར་ཡོད་འདུག

སྐབས་དེར་ལྷ་སར་ཁམས་དང་ཨ་མདོའི་ཕྱོགས་ཀྱི་བོད་མི་ཚོར་ཐོབ་ཐང་ལག་འཁྱེར་མེད་ན་སྡོད་གནས་རག་གི་མེད་པའི་དཀའ་ངལ་འོག ལྷ་སའི་འབྲས་སྤུངས་དང་སེ་ར་དགོན་པའི་ཉེ་འཁྲིས་སོགས་སུ་ཉིན་དཀར་རི་མགོར་སྦས་སྐུང་དང་། མཚན་མོ་དགོན་པའི་ཉེ་སར་བཅར་ཏེ་ཟ་མ་དང་ཉལ་ས་ངན་ངོན་རེ་རག་ཐབས་བྱས་ཏེ་ཟླ་ ༢ ཙམ་བསྡད་ཡོད་འདུག སྐབས་དེར་ཕ་ཡུལ་གཅིག་པ་འགར་ཐུག་སྟེ་སྦྱར་ཡིག་བཀྲམ་རོགས་ཚེ་རིང་སྐྱབས་པོ་ལགས་རྒྱ་གཞུང་གིས་འཛིན་བཟུང་བྱས་ཏེ་གར་སོང་ཆ་མེད་ཆགས་ཡོད་པ་དང་། བྱམས་པ་དངོས་གྲུབ་ལགས་སྔོན་མ་ཁོང་གསུམ་ཁ་གྱེས་པའི་རྗེས་ལ་གར་སོང་ཅི་ཆགས་ཀྱི་གནས་ཚུལ་མི་གཅིག་གིས་ཀྱང་ཤེས་རྟོགས་མེད་པ་ཆགས་པ་སོགས་གོ་ཡོད་འདུག གནས་ཚུལ་དེ་དག་ཐོས་རྗེས་ཕྱིར་རང་ཡུལ་དུ་འགྲོ་ས་མེད་པ་ཤེས་ཏེ་རྒྱ་གར་ནང་སྐྱབས་བཅོལ་དུ་འགྲོ་རྒྱུའི་སེམས་ཐག་བཅད་དེ། ༢༠༡༢ ལོའི་ལོ་མགོར་ལྷ་ས་ནས་མངའ་རིས་ཕྱོགས་སུ་སོང་སྟེ་ཟླ་ཤས་རིང་འབྲོག་པ་ཚོར་ཕྱུགས་འཚོ་རོགས་བྱས་ཏེ་བསྡད་ཡོད་ཅིང་། ལོ་དེའི་བོད་ཟླ་ ༥ པ་ཡས་མས་སུ་བོད་དང་བལ་བོའི་ས་མཚམས་སྤུ་ཧྲེང་དུ་འབྱོར་ཏེ་ས་བརྐོ་རྡོ་སློག་གི་ལས་ཀ་བྱས་ཏེ་ཟླ་ཤས་རིང་བསྡད་ཡོད་པ་དང་། སྐབས་དེར་ལམ་ཁྲིད་པ་མེད་པར་ཐེངས་གཅིག་ལ་གངས་རི་བརྒྱུད་དེ་ས་མཚམས་བརྒལ་ཐབས་བྱས་ཀྱང་ལམ་ནོར་ཐེབས་ཏེ་ཕྱིར་ལོག་དགོས་བྱུང་ཡོད་འདུག

སྤུ་ཧྲེང་ས་གནས་ཀྱི་མི་ལ་སྐད་ཆ་དྲིས་ཏེ་ས་མཚམས་ཀྱི་གནས་སྟངས་དང་། རྒྱ་གར་དང་བལ་ཡུལ་ནང་ལམ་ཁ་གང་དུ་ཡོད་མེད་སོགས་ལ་རྒྱུས་ལོན་ཡག་པོ་བྱས་ཏེ། བོད་ཟླ་ ༡༡ པའི་ནང་ས་མཚམས་ཀྱི་དམག་སྒར་བརྒལ་ཏེ་ཟླ་གཅིག་ལྷག་རིང་གོམ་པ་བརྒྱབ་མཐར། རྒྱ་གར་ཨུ་ཊིར་ཀང་མངའ་སྡེའི་ལྡེ་ར་རྡུན་ཕྱོགས་སུ་འབྱོར་ཡོད་པ་དང་། གྷང་ཇི་ལཱ་ས་གནས་སུ་འབྱོར་སྐབས་རྒྱ་གར་དམག་མིས་འཛིན་བཟུང་བྱས་ཡོད་འདུག དམག་མི་ཚོས་ཁོང་ལ་ཟ་མ་དང་གྱོན་ཆས་སོགས་སྤྲད་ཡོད་པ་དང་། ཕྱིས་སུ་མདའ་ཆུང་ལ་ཞེས་པའི་ས་ཆར་ཁྲིད་དེ་བོད་པའི་སྐད་སྒྱུར་བ་འཁྲིད་ཡོང་སྟེ་འདྲི་རྩད་བྱས་རྗེས། ཊེ་ཊེ་ཨེར་ཌི་ཞེས་པའི་བཙོན་ཁང་དུ་ཟླ་ ༢ ལྷག་རིང་བཀག་ཉར་བྱས་ཡོད་པ་དང་། ཨ་ལོ་མུ་རཱ་ཞེས་པའི་ས་གནས་བཙོན་ཁང་དུ་ཟླ་ ༤ ཙམ་ལ་བཅུག་རྗེས་རྒྱ་གར་དང་བལ་བོའི་ས་མཚམས་ཤིག་ཏུ་ཀློད་གྲོལ་བཏང་ཡོད་འདུག

ཁོ་བཙོན་ཁང་དུ་སྡོད་རིང་བལ་ཡུལ་གྱི་བཙོན་པ་ཞིག་ས་ནས་བལ་ཡུལ་མཆོད་རྟེན་དང་རྒྱ་གར་ལྡི་ལི། ལྡེ་ར་རྡུན་སོགས་ཀྱི་བོད་མི་སྡོད་ཡུལ་ས་གནས་ཁག་ཅིག་གི་མིང་ཡིག་ཐོག་ཏུ་བྲིས་ཡོད་པ་དེ་རྒྱ་གར་བ་ཚོར་བསྟན་པ་དང་། སྐབས་དེར་ཁོ་ལ་རྒྱ་སྒོར་ ༤༠༠ ཙམ་ཡོད་པ་དེ་བརྗེ་བོ་རྒྱག་ས་མ་རག་པར་དཀའ་ངལ་མང་པོ་འཕྲད་ཡོད་འདུག་ལ། མཐར་ལག་མགོའི་ཆུ་ཚོད་བཙོང་སྟེ་རླངས་འཁོར་ཞིག་ལ་བསྡད་དེ་ལྡི་ལིར་འབྱོར་ཡོད་འདུག ལྡི་ལི་ནས་ཡར་འཁྱམ་མར་འཁྱམ་བྱས་མཐར་བོད་མི་ཁག་ཅིག་ལ་ཐུག་སྟེ་ལྡི་ལིའི་སྣེ་ལེན་ཁང་ལ་བསྐྱལ་ཡོད་པ་དང་། ལྡི་ལིའི་སྣེ་ལེན་ཁང་དུ་ཞག་ ༢ ལ་བསྡད་རྗེས་བལ་ཡུལ་སྣེ་ལེན་ཁང་དུ་བསྐྱལ་ཡོད་འདུག དེ་གར་ཉིན་ ༢༥ རིང་བསྡད་རྗེས་ཉེ་ཆར་སླར་རྒྱ་གར་ངྷ་རམ་ས་ལའི་དབུས་སྣེ་ལེན་ཁང་དུ་འབྱོར་ཡོད་འདུག  

ཁོང་ལ་ནང་མི་ཚོས་ཁོ་རང་གི་གནས་ཚུལ་ཧ་གོ་ཡོད་མེད་དང་རྒྱ་གར་ནང་འབྱོར་རྗེས་ཕ་ཡུལ་དུ་འབྲེལ་བ་བྱས་ཡོད་དྲིས་པར། “ ང་ཚོ་ཕ་ཡུལ་དང་ཁ་བྲལ་རྗེས་རྒྱ་གཞུང་གིས་ཡུལ་མི་ཚོར་དམ་དྲག་བྱེད་ཀྱི་ཡོད་པ་དང་། ནང་མི་འགའ་རེ་འཛིན་བཟུང་བྱས་སོང་བ་གོ་སོང་། དེིའི་རྗེས་ནས་བཟུང་གནས་ཚུལ་གཅིག་ཀྱང་གོ་མ་སོང་། ང་རང་གི་ནང་མིས་ང་ཤི་གསོན་གང་བྱུང་ཧ་གོ་ཡོད་པ་མ་རེད། ང་ངྷ་རམ་ས་ལར་འབྱོར་རྗེས་མཱེག་ལོར་ནས་ཕ་ཡུལ་གཅིག་པ་ཞིག་ལ་ཐུག་སྟེ། ཁོས་ངའི་ནང་མིར་ཁ་པར་བཏང་སྟེ་ང་ཤི་མེད་པར་རྒྱ་གར་ལ་འབྱོར་ཡོད་པ་བཤད་ཡོད་པ་རེད” ཅེས་བརྗོད་བྱུང་། 

མཇུག་ཏུ་བློ་བཟང་ཐུབ་བསྟན་ལགས་སུ་ཁོང་ལ་རྒྱ་གར་ནང་འབྱོར་བར་སེམས་ཚོར་གང་འདྲ་ཡོད་མེད་དྲིས་པར། “ ད་ང་རང་རྒྱ་གར་རང་དབང་ལུང་པར་ཐར་ཙམ་བྱུང་སོང་། ཡིན་ནའང་བོད་ནང་བོད་མི་མང་པོ་ཞིག་རྒྱ་གཞུང་གི་བཙན་གནོན་འོག་དཀའ་སྡུག་མྱོང་གི་ཡོད་པ་རེད། ལྷག་པར་དུ་བཙོན་འོག་ཏུ་ཚུད་པ་མང་པོ་ཞིག་གིས་ཉིན་འཁྱོལ་ཡང་མཚན་མ་འཁྱོལ་བར་མནར་གཅོད་མྱོང་གི་ཡོད། ད་དུང་ང་དང་ང་ལྟ་བུ་མང་པོ་ཞིག་བྲོས་བྱོལ་བྱས་ཏེ་དངངས་སྐྲག་འོག་བསྡད་ཡོད། དེ་དག་གི་ཆེད་དུ་ང་ཚོས་ག་རེ་བྱེད་དགོས་པ་རེད། ངའི་སེམས་ཚོར་ཆེ་ཤོས་དེ་རེད”ཅེས་བརྗོད་བྱུང་།

གསར་འགོད་པ། དོན་གོ

༼ བོད་ཀྱི་དུས་བབ་ཚགས་པར་ལས་འདིར་བཀོད། ༽