བོད་རྒྱ་ལག་ཏུ་མ་ཤོར་སྔོན་ནས་རྒྱ་གར་ནང་འབྱོར་ཡོད་པ་ཨ་མ་རིན་ཆེན་སྒྲོལ་མ་ལགས་ནི་བོད་དོན་འཐབ་མོ་བ་སྔ་གྲས་ཤིག་ཡིན་པ་དང་། ད་ལྟ་དགུང་གྲངས་ ༦༨ ལ་སོན་ཡོད་ཀྱང་སེམས་ཤུགས་ལ་ཉམས་པ་མེད་པར། བོད་དོན་ལས་འགུལ་རིགས་ལ་མཉམ་ཞུགས་ཀྱི་ཞོར་དུ། བོད་ཡིག་ཀ་ཁ་སློབ་སྦྱོང་ལ་འབད་བཞིན་ཡོད་པར་འདི་གའི་གསར་འགོད་པས་ཁོང་གི་ཀྱག་ཀྱོག་མི་ཚེའི་སྐོར་ལ་གླེང་མོལ་བྱས་ཡོད།
ངྷ་རམ་ས་ལར་གཞུང་དང་གཞུང་འབྲེལ་མིན་པའི་ཚོགས་སྡེ་ཁག་གིས་བོད་དོན་ལས་འགུལ་ཆེ་ཆུང་གང་ཞིག་སྤེལ་ཡང་། དུས་རྒྱུན་ལག་ཏུ་དབྱུག་པ་ཐུང་ཐུང་ཞིག་གི་རྩེར་གངས་སེང་རྟགས་ཅན་གྱི་བོད་པའི་རྒྱལ་དར་ཆུང་ཆུང་ཞིག་དང་། དེའི་འོག་༧གོང་ས་མཆོག་གི་སྐུ་པར་ཞིག་བཏགས་ཡོད་པའི་ཕྱག་མཚན་ཐུན་མོང་མ་ཡིན་པ་ཞིག་བསྣམས་ཏེ། མཚམས་རེར་ལས་འགུལ་གྱི་རྒྱབ་ཏུ་བསྡད་དེ་གཞོན་སྐྱེས་ཚོར་སྐུལ་སློང་བྱེད་པ་དང་། མཚམས་རེར་མདུན་ལ་ཐོན་ཏེ་གསར་འགོད་པ་ཚོའི་མདུན་དུ་ངུ་ཤུམ་བྱེད་བཞིན་བོད་དོན་ཞུ་གཏུག་བྱེད་མཁན་ཨ་མ་རིན་ཆེན་སྒྲོལ་མ་ལགས་ནི། ངྷ་སའི་མི་མང་གི་མིག་ལ་གོམས་འདྲིས་ཆེ་བའི་ལས་འགུལ་བ་དགུང་ལོ་བགྲེས་ཤོས་དང་། ངྷ་སའི་གསར་འགོད་པ་དང་ཆབ་སྲིད་པ་དག་གི་དྲན་ངོས་ན་གོ་གནས་དམའ་ཤོས་ཀྱི་བོད་དོན་འཐབ་མོ་བ་ཉམས་ཆུང་དེ་ཡིན་ངེས།
ཕྲན་རྒྱ་གར་ངྷ་རམ་ས་ལར་ཐོག་མར་འབྱོར་བ་ནས་བཟུང་ཨ་མ་རིན་ཆེན་སྒྲོལ་མ་ལགས་མིག་ལམ་ཏུ་ཡང་ཡང་བརྒྱུད་མྱོང་པ་མ་ཟད། ངྷ་ས་སྟོད་པ་སྐྱིད་སྡུག་ཚོགས་ཁང་གི་སྒེར་བཙུགས་བོད་ཡིག་འཛིན་གྲྭ་རུ་ཨ་མ་རིན་ཆེན་སྒྲོལ་མའི་ལག་ཏུ་འབྲི་དེབ་དང་སྨྱུ་གུ་བཟུང་སྟེ། སློབ་ཆུང་འགྲིམ་བཞིན་པའི་བྱིས་པ་ཆུང་ཆུང་ཞིག་དང་འདྲ་བར། ཡི་གེའི་སྦྱོར་ཀློག་སྐད་ཤུགས་ཆེན་པོས་འདོན་པ། དགེ་རྒན་གྱི་དྲི་བར་ལན་འདེབས་བྱེད་པར་རྔམ་པའི་སྤྲོ་སྣང་དག་མཐོང་སྐབས་ངས་ཀྱང་སོ་སོའི་བྱིས་དུས་ཀྱི་མཛེས་སྡུག་དེ་དག་དྲན་འོང་ཞིང་། ང་ཁོ་མོ་དང་བར་ཐག་ཧ་ཅང་ཉེ་བའི་ཚོར་བ་ཞིག་ཀྱང་སྐྱེ་འོང་གི་འདུག བྲེལ་ཟིང་ཆེ་བའི་ངྷ་སའི་ཁྲོམ་གཞུང་ནས་ཁོ་མོར་འཚམས་འདྲི་རེ་བྱེད་པ་ཙམ་ལས་ཁ་བརྡ་ལྷོད་ལྷོད་ཅིག་གི་གོ་སྐབས་མ་རག་ལ། སྔོན་ཆད་ངེད་གཉིས་ཀྱིས་ཁོང་མོའི་མི་ཚེའི་ལོ་རྒྱུས་སྐོར་ལ་བཅར་འདྲི་ཞིག་བྱེད་རྒྱུ་བྱས་ཡོད་པ་དེ་ཡང་ལེ་ལོ་དང་ལས་བྲེལ་བར་ནས་ད་བར་ལུས་སོང་།
ཉིན་ཤས་གོང་ཨ་མ་རིན་ཆེན་སྒྲོལ་མར་ན་ཚ་ཞིག་གིས་ཉལ་སར་ལྷག་ཡོད་པ་ཐོས་འཕྲལ་ཨུ་ཚུགས་ཀྱིས་ཆུ་ཚོད་ཅིག་བཏོན་ཏེ་ཁོང་མོའི་ཁྱིམ་ལ་ལྟ་རུ་ཕྱིན་པ་ཡིན། ཁོང་མོ་མེག་གྷན་ཟློས་གར་ལམ་གྱི་ཁང་པ་གཉིས་ཐོག་ཅིག་ཏུ་བསྡད་འདུག ཁང་པའི་ནང་གི་བཟོ་དབྱིབས་དེ་ཙམ་མཛེས་པོ་མེད་པ་དང་། ནང་གི་ཅ་དངོས་དག་ཀྱང་གོ་རིམ་མེད་པར་བཞག་འདུག་ཀྱང་།བོད་པའི་ཁ་རྒྱུན་དུ་ ‘མི་རྒན་ཁྱིམ་གྱི་གཡང་ཡིན། རྡོ་རྒན་རི་ཡི་རྒྱན་ཡིན’ ཟེར་བ་བཞིན། ཁོང་མོའི་ཉལ་ཁྲིའི་མདུན་གྱི་ཅོག་ཙེའི་སྟེང་འོ་ཇ་དང་སྦྲང་རྩི། ཆུར་བ་རློན་པ་སོགས་ཟས་རིགས་ཀྱིས་ཁེངས་ཤིང་། ཁྱིམ་ཡོངས་སུ་བཙན་བྱོལ་གྱི་འཚོ་བ་ངན་ངོན་འདིའི་ཁྲོད་ནས་ཆེས་མཐོང་དཀོན་པའི་སྤྲོ་སྣང་དང་དྲོད་ཁོལ་ཞིག་འཁྱིལ་འདུག
ཨ་མ་རིན་ཆེན་སྒྲོལ་མ་ལགས་ཀྱིས་ང་མཐོང་མ་ཐག་ཧ་ཅང་དགའ་ཏེ་“ཕེབས་ཤོག་ཕེབས་ཤོག་”ཟེར་ནས་ལམ་སང་བུ་མོ་ལ་འོ་ཇ་དང་བྷེ་སི་ཁའུ་ཊི་(biscuit )འཁྱེར་ཡོང་དུ་བཅུག་སོང་། ངས་ཐོག་མར་ཁོང་མོའི་ན་ཚའི་གནས་སྟངས་ག་འདྲ་ཡིན་མིན་དྲིས་རྗེས།གཟུགས་པོས་ལྕོགས་ཚེ་མོའི་མི་ཚེའི་ལོ་རྒྱུས་སྐོར་ནས་ཁ་བརྡ་ཞིག་བྱེད་རྒྱུར་རེ་བ་ཞུས་པར་ཁོང་མོས་དགའ་བཞིན་དུ་དང་ལེན་གནང་སོང་། ངེད་གཉིས་ཀྱི་ཆུ་ཚོད་འགའི་རིང་གི་ཁ་བརྡའི་ཁྲོད་ནས་ཨ་མ་རིན་ཆེན་སྒྲོལ་མས་མཚམས་རེར་སྐྱོ་གདུང་གི་དབུགས་རིང་འབྱིན་ཞིང་མིག་མཐར་མཆི་མ་འཁྲུག་པ་དང་། མཚམས་རེར་ཁ་ལག་པས་བཀབ་ནས་གད་མོ་ལྷུག་ལྷུག་དགོད་བཞིན་དགའ་སྐྱོ་ཟུང་གི་འདས་པ་གྲངས་མེད་ཅིག་ལ་ཕྱིར་དྲན་བྱས་སོང་།
ཨ་མ་རིན་ཆེན་སྒྲོལ་མ་ལགས་ཀྱི་ཕ་མ་གཉིས་ཁམས་ནས་ཡིན་ཞིང་། ཕ་མ་གཉིས་ཀྱིས་རྐང་པ་བརྒྱབ་སྟེ་ལྷ་སར་གནས་མཇལ་དུ་སྐྱོད་པའི་ལམ་བར་དུ། ཕྱི་ལོ་ ༡༩༤༠ ཡས་མས་ཤིག་ལ་ཀོང་པོར་ཡོད་པའི་ཨ་མའི་སྤུན་མཆེད་ཅིག་གི་ཁྱིམ་དུ་ཨ་མ་རིན་ཆེན་སྒྲོལ་མ་ཁོ་མོ་སྐྱེས་ཡོད་པ་དང་། དེ་གར་ལོ་ཤས་བསྡད་རྗེས་ཁོང་བཟའ་མི་གསུམ་ཀོང་པོ་ནས་ལམ་ལ་ཆས་ཏེ་ལྷ་ལྡན་སྨོན་ལམ་ཆེན་མོའི་སྐབས་ཤིག་ལ་གནས་མཆོག་ལྷ་སར་འབྱོར་ཡོད་འདུག སྐབས་དེར་ཁོ་མོ་རང་ལོ་ ༦ ཙམ་ཡིན་འདུགལྷ་ས་རུ་ཕོ་བྲང་པོ་ཏཱ་ལ་དང་ལྷ་ལྡན་གཙུག་ལག་ཁང་། དེ་བཞིན་ལྷ་སའི་ཉེ་འགྲམ་གྱི་དགོན་པ་དང་གནས་ཆེན་ཁག་ཏུ་མཇལ་སྐོར་དུ་ཕྱིན་ཏེ། རིམ་གྱིས་སྟོད་ཕྱོགས་ཀྱི་གནས་ཆེན་ཁག་ལ་མཇལ་སྐོར་བྱེད་བཞིན་ས་མཚམས་ཇི་ལྟར་བརྒལ་བའང་མ་ཤེས་པར་འབྲུག་རྒྱལ་ཁབ་ནང་བསླེབས་ཡོད་འདུག
འབྲུག་ཏུ་ཁོང་མོའི་ཕ་དམ་པའི་ཚོང་ཤག་ཅིག་གི་སར་ལོ་འགར་བསྡད་ཡོད་པ་དང་། ཨ་མ་རིན་ཆེན་སྒྲོལ་མ་ལོ་ ༡༢ ཙམ་གྱི་སྟེང་རྒྱ་གར་ནང་ཡོང་ཡོད་པ་དང་། སྐབས་རེར་མེ་འཁོར་དང་སྐབས་རེར་ཤིང་རྟ་འཁོར་ལོ། སྐབས་རེར་རྐང་པ་བརྒྱབ་པ་སོགས་བྱས་ཏེ་རྩྭ་མཆོག་དྲུང་དང་རྣམ་དག་གྲོང་། བྱ་རྒོད་ཕུང་པོའི་རི། ཝ་ར་ཎཱ་སི་སོགས་གནས་ཆེན་ཁག་མང་པོར་མཇལ་སྐོར་དུ་ཕྱིན་ཏེ་ ༡༩༥༦ ལོར་གནས་མཆོག་རྡོ་རྗེ་གདན་དུ་འབྱོར་སྐབས། ༸གོང་ས་མཆོག་དང་ཀུན་གཟིགས་པཎ་ཆེན་སྐུ་ཕྲེང་བཅུ་བ་མཆོག་རྣམ་གཉིས་སྟོན་པ་ཤཀྱཱ་ཐུབ་པ་སྐུ་མྱ་ངན་ལས་འདས་ཏེ་ལོ་ངོ་ཉིས་སྟོང་ལྔ་བརྒྱ་འཁོར་བའི་དུས་དྲན་སྟེང་ཕེབས་ཏེ། མི་མང་སྟོང་ཕྲག་མང་པོར་ཆོས་འབྲེལ་བཀའ་དབང་སྩོལ་བཞིན་པའི་སྐལ་བཟང་ལ་ཁེལ་ཡོད་པ་དང་། སྐབས་དེར་རྡོ་རྗེ་གདན་མཆོད་རྟེན་གྱི་ཉེ་འཁོར་ཀུན་དུ་བོད་ནས་ཡོང་བའི་ཆོས་ཞུ་བ་ཚོའི་སྦྲ་གུར་གྱིས་ཁེངས་བའི་རྣམ་པ་དེ། དུས་ད་ལྟའང་ཨ་མ་རིན་ཆེན་སྒྲོལ་མའི་དྲན་ངོས་ན་ཧ་ཅང་གསལ་བོ་འདུག་ཟེར།
གནས་མཆོག་རྡོ་རྗེ་གདན་གྱི་གཞུང་འབྲེལ་མཛད་སྒོ་དང་གསུང་ཆོས་སོགས་གྲུབ་རྗེས། ༸རྒྱལ་བ་པཎ་ཆེན་རྣམ་གཉིས་བོད་དུ་ཕེབས་ཚར་བ་གོ་ཞིང་། ཁོང་མོའི་ཕ་ལགས་ཀྱིས་ད་ནི་རྒྱ་གར་གྱི་གནས་ཆེན་ཁག་ཚང་མར་གནས་མཇལ་བྱས་ཚར་ཡོད་སྟབས་ང་ཚོ་ཕྱིར་ཕ་ཡུལ་དུ་ལོག་ཅེས་ཁོང་བཟའ་མི་གསུམ་ཕ་ཡུལ་བོད་དུ་ལོག་རྒྱུར་གྲ་སྒྲིག་བྱས་ཏེ། ཕ་ཡུལ་གྱི་གཉེན་ཉེ་ཚོར་ལག་རྟགས་བ་སོའི་ལག་གཏུབ་དང་མུ་ཏིག་གི་རྒྱན་ཆ་སོགས་མང་པོ་ཉོས་ཏེ། བོད་རིགས་གནས་མཇལ་བ་འགའ་དང་མཉམ་དུ་རྒྱ་གར་གྱི་རྒྱལ་ས་ལྡི་ལི་བརྒྱུད་མཚོ་པདྨ་ཅན་དུ་བསླེབས་པ་དང་། དེ་ནས་སྤི་ཊི་བརྒྱུད་ས་མཚམས་བརྒལ་ཏེ་སྟོད་མངའ་རིས་ཀྱི་གངས་རིན་པོ་ཆེ་བསྐོར་ནས་ཕ་ཡུལ་དུ་ལོག་རྩིས་བྱས་ཡོད་ཀྱང་། སྐབས་དེར་འགྲོ་མ་ཐུབ་པར་གནས་སྐབས་རིང་ཕྱིར་རྒྱ་གར་ནང་ལོག་དགོས་བྱུང་ཡོད་པ་དང་། དེའི་རྗེས་ཡང་བསྐྱར་རོ་ཐང་བརྒྱུད་གངས་རིན་པོ་ཆེར་གནས་མཇལ་དུ་ཕྱིན་སྐབས། ཁོ་མོའི་ཕ་ལགས་སུ་ཤ་དུག་ཅིག་ཕོག་སྟེ་ལམ་བར་ནས་འདས་གྲོངས་སུ་ཕྱིན་ཡོད་འདུག སྐབས་དེའི་གནས་སྟངས་ཧ་ཅང་སྐྱོ་བོ་ཡིན་སྟབས་གནས་སྐོར་བ་རོགས་པ་ཚོ་དང་མཉམ་དུ་ཕུང་པོ་མེར་བསྲེགས་བཏང་རྗེས། ཁོང་མ་སྨད་གཉིས་མུ་མཐུད་རྐང་པ་བརྒྱབ་སྟེ་གངས་རིན་པོ་ཆེར་གནས་སྐོར་དུ་བསྐྱོད་ཡོད་འདུག “རྒྱ་ཉོ་མ་”ཟེར་བའི་ཐང་ཆེན་ཞིག་ཏུ་རྟ་ནོར་ལུག་གསུམ་དང་། གོས་ཆེན་དང་རས། སྲན་མའི་རིགས།བལ་སོགས་ཉོ་ཚོང་བྱེད་སའི་ཚོང་ར་ཆེན་པོ་ཞིག་ཡོད་པ་དང་། ཁོ་ཚོ་དེར་ཉིན་ཤས་རིང་བསྡད་རྗེས། གནས་མཇལ་བ་གཞན་རྣམས་བོད་དུ་མ་སོང་བར་ཕྱིར་རྒྱ་གར་དུ་ལོག་པར་བརྟེན། ཁོང་མ་བུ་གཉིས་ཀྱང་བོད་ལ་འགྲོ་མ་ནུས་པར་ཕྱིར་ལོག་སྟེ་རྒྱ་གར་རྡོ་རྗེ་གླིང་དུ་ཕྱིན་ཡོད་འདུག
སྐབས་དེར་རྡོ་རྗེ་གླིང་བོད་པ་མང་པོ་ཡོད་པ་དང་། ཁོ་ཚོས་རྒྱ་གར་ཚོང་བའི་ལག་ནས་རས་ཆ་དང་ཁབ་སྐུད་སོགས་ཉོས་ཏེ་རྒྱ་གར་གྲོང་གསེབ་ཁག་ཏུ་འཁྱེར་ནས་ཚོང་ལས་ཙག་ཙིག་གཉེར་གྱི་ཡོད་ཀྱང་། ཁོང་མ་སྨད་གཉིས་ཀྱིས་རྒྱ་གར་སྐད་ཤེས་ཀྱི་མེད་སྟབས་གནས་སྐབས་རིང་ཚོང་ལས་སོགས་གཉེར་མ་ཐུབ་པར་སློང་མོ་བྱས་ཏེ་འཚོ་བ་སྐྱེལ་ཐབས་བྱས་ཡོད་པ་དང་། ལོ་དེའི་དགུན་ཁ་ལྡི་ལི་ནས་བལ་གོས་ཉོས་ཏེ་རྒྱ་གར་གྲོང་གསེབ་ཁག་ཏུ་བཙོང་བ་སོགས་བྱས་ཏེ་བཟའ་བཏུང་ལ་དཀའ་ངལ་མེད་པ་ཙམ་བྱུང་ཡོད་ཀྱང་། ཁོང་མོའི་ཨ་མ་ལགས་ཀྱིས་ནམ་རྒྱུན་“ཕ་ཡུལ་དུ་ཁྱེད་ལ་ཨ་ཁུ་དང་ཨ་ཞང་། ཨ་ནེ་སོགས་གཉེན་ཉེ་མང་པོ་ཡོད་ལ།འུ་ཚང་ལ་ཁང་པ་དང་རྒྱུ་ནོར་སོགས་ཚང་མ་ཡོད་པ་རེད། ཕ་ཡུལ་དུ་ལོག་ཐུབ་ན་འདི་ལྟར་སྡུག་པོ་མྱོང་དགོས་པ་མ་རེད”ཅེས་ཡང་ཡང་བཤད་སྟབས།ལོ་གཅིག་ཙམ་རྗེས་ལམ་གྲོགས་བཙལ་ཏེ། ཡང་བསྐྱར་གངས་རིན་པོ་ཆེ་བསྐོར་ནས་ཕ་ཡུལ་དུ་ལོག་རྩིས་བྱས་ཡོད་ཀྱང་། སྐབས་དེར་སྔོན་ཆད་ཀྱི་ཚོང་ར་ཆེན་པོ་དེར་རྒྱ་དམག་གིས་ཁེངས་ཡོད་པ་མ་ཟད། གནས་མཇལ་བ་ཚང་མར་སྔོག་བཤེར་དང་གངས་རིན་པོ་ཆེར་འགྲོ་བའི་ལམ་ཡིག་ཡོད་མེད་སོགས་འདྲི་རྩད་བྱས་སྟབས། གནས་མཇལ་བ་ཚོ་ཧང་སང་སྟེ་ “ང་ཚོ་ས་ཆ་འདིའི་མི་ཡིན། ས་ཆ་འདི་ང་ཚོའི་སྐྱེས་ས་སྐྱེས་ཡུལ་ཡིན།ཁྱེད་ཚོ་གང་ནས་ཡོང་བ་ཡིན། ཁྱེད་ཚོ་ས་འདིར་ཡོང་རྒྱུར་ལམ་ཡིག་ཡོད་དམ” ཞེས་ལོ་ཙཱ་བ་བརྒྱུད་དེ་ཁ་རྩོད་མང་པོ་བརྒྱབ་ཡོད་པ་དང་། མཐར་གངས་རིན་པོ་ཆེ་བསྐོར་དུ་བཅུག་ཡོད་ཀྱང་བོད་དུ་འགྲོ་མ་ཐུབ་པར་ཕྱིར་ལོག་དགོས་བྱུང་ཡོད་འདུག
དེ་ནས་མ་སྨད་གཉིས་ཀྱིས་མཚམས་རེར་སློང་མོ་བརྒྱབ་པ་དང་མཚམས་རེར་ཁབ་སྐུད་སོགས་ཅ་དངོས་ཙག་ཙིག་གི་བར་ཁེ་བཙལ་ནས་ལོ་ཤས་བསྡད་རྗེས། ཐེངས་གསུམ་པར་གངས་རིན་པོ་ཆེ་བསྐོར་ནས་བོད་དུ་འགྲོ་རྒྱུའི་སྟ་གོན་བྱས་ཡོད་ཀྱང་རྒྱ་གར་བྱང་ཕྱོགས་ཨུ་ཊར་ཁན(Uttarakhand)མངའ་སྡེའི་ཨཱ་རུ་མུ་ར་ཟེར་བའི་ས་གནས་སུ་བསླེབས་སྐབས། ཨ་མ་ལགས་སུ་གྲོད་ཁོག་བཤལ་བའི་ནད་གཞི་ཞིག་ཕོག་སྟེ་ཡུན་རིང་ན་རྗེས་འདས་གྲོངས་སུ་ཕྱིན་ཡོད་པ་དང་། ཉིན་དེ་ནས་བཟུང་ཨ་མ་རིན་ཆེན་སྒྲོལ་མ་གཅིག་པུ་ལྷག་ཡོད་འདུགཕ་མ་གཉིས་སྔ་ཕྱིར་འདས་རྗེས་ཨ་མ་རིན་ཆེན་སྒྲོལ་མ་ལགས་ཕ་ཡུལ་བོད་དུ་ལོག་རྒྱུའི་རེ་ཐག་ཆད་དེ་ཕྱིར་རྡོ་རྗེ་གླིང་དུ་ལོག་ནས་ལམ་བཟོ་དང་ཁུར་གླ་ལེན་པ། བལ་གོས་བཙོང་བ་སོགས་བྱས་རང་ཁ་རང་གསོ་བྱས་ཡོད་པ་དང་། ཕྱིས་སུ་སྐྱེས་པ་ཞིག་དང་མཉམ་དུ་བསྡད་དེ་ཕྲུ་གུ་གཉིས་སྐྱེས་ཡོད་ཀྱང་འཚོ་བའི་གནས་སྟངས་སོགས་ཀྱི་དབང་གིས་གྲོངས་ཡོད་པ་མ་ཟད། ཁོང་མོ་ཡང་བཤག་བཅོས་བྱས་ཏེ་སྨན་ཁང་དུ་ཡུན་རིང་ལྷག་ཡོད་སྟབས་ཁྱོ་གས་ཁོང་མོར་བདག་པོ་མ་བརྒྱབ་པར་གཡུགས་ཡོད་འདུག
དེའི་རྗེས་ཁོང་མོ་རང་ལོ་ ༢༥ ཙམ་ཡིན་སྐབས་མོའི་གྲོགས་ངོ་ཤེས་གྲོགས་པོ་ཚོས་སླར་ཡང་། བྱིས་པ་ ༢ གྱི་ཕ་རྒན་ལོ་༥༠ ཅན་ཞིག་དང་ངོ་སྤྲོད་ཀྱིས་ཕན་ཚུན་ལ་ཁྲེལ་མེད་མི་བྱེད་པའི་དཔང་མི་བཞག་སྟེ་གཉེན་སྒྲིག་བྱེད་དུ་བཅུག་ཡོད་པ་དང་། དེ་ནས་ཁོང་གཉིས་ཀྱིས་སིམ་ལ་རུ་བལ་གོས་སོགས་ཅ་དངོས་སྣ་ཚོགས་ཀྱི་ཚོང་ལས་གཉེར་ཏེ་ལོ་ཤས་བསྡད་རྗེས་དྷ་རམ་ས་ལར་གནས་སྤོ་བྱས་ཡོད་པ་དང་། སྔ་གཞུག་ཏུ་ཁོང་གཉིས་ལ་བྱིས་པ་ ༧ ཙམ་སྐྱེས་ཡོད་ཀྱང་ ༤ གྲོངས་ཡོད་པ་དང་། བུ་མོ་ཆུང་བ་ཟླ་༦ཙམ་ཡིན་སྐབས་ཁྱོ་ག་ལ་གྲུབ་གཅོང་གི་ན་ཚ་ཞིག་ཕོག་སྟེ་ལོ་ ༡༢རིང་ཉལ་སར་ལྷུང་རྗེས་འདས་གྲོངས་སུ་ཕྱིན་ཡོད་འདུག ཨ་མ་རིན་ཆེན་སྒྲོལ་མའི་ཁྱོ་ག་འདས་གྲོངས་སུ་ཕྱིན་རྗེས་བུ་མོ་ ༢ དང་བུ་ ༡ བཅས་ཁོང་མ་བུ་གསུམ་ཤུལ་དུ་ལྷག་ཡོད་པ་དང་། སྐབས་དེར་ཁྱིམ་ཚང་གི་ཆ་རྐྱེན་ཧ་ཅང་སྐྱོ་བོ་ཡིན་ནའང་ཨ་མ་རིན་ཆེན་སྒྲོལ་མ་ལགས་ཀྱིས་བུ་མོ་གཉིས་བོད་ཁྱིམ་སློབ་གྲྭར་བཅུག་པ་དང་། བུ་གཅིག་པུ་རྒྱ་གར་ལྷོ་ཕྱོགས་གདན་སར་གྲྭ་བ་བྱས་ཏེ། ཨ་མ་རིན་ཆེན་སྒྲོལ་མ་ལགས་ཀྱིས་ངྷ་སའི་མཛད་སྒོ་རིགས་དང་ཚོགས་འདུ་སོགས་སུ་ཕོར་བ་འཁྲུད་པ་སོགས་ཞོར་ལས་ཙག་ཙིག་བྱས་ཏེ་འཚོ་བ་འཁྱོལ་ཐབས་བྱས་ཡོད་འདུགཕྱིས་སུ་ཁོང་མོའི་བུ་གདན་ས་ནས་མ་བསྡད་པར་ཁེ་ན་ཌར་ཕྱིན་ཡོད་པ་དང་། ལོ་ཤས་རྗེས་ཕྱིར་རྒྱ་གར་ངྷ་རམ་ས་ལར་ལོག་སྟེ་ཨ་མ་རིན་ཆེན་སྒྲོལ་མ་ལགས་ལ་ཁང་པ་གསུམ་ཐོག་ཅིག་བརྒྱབ་ཡོད་འདུག ཉིན་དེ་ནས་བཟུང་ཨ་མ་རིན་ཆེན་སྒྲོལ་མ་ལགས་ཀྱི་དཀའ་སྡུག་གི་མི་ཚེའི་མཇུག་རྫོགས་ཤིང་དབུལ་ཕོངས་ཀྱི་འཚོ་བ་མཐའ་ཟད་དེ། བདེ་སྐྱིད་དང་དྲོད་འཁོལ་ལྡན་པའི་ཁྱིམ་གཞིས་ཤིག་གི་མགོ་བཙུགས་ཤིང་། ཁོང་མོ་སྐོར་བར་འགྲོ་ཞོར་དང་མ་ཎི་བགྲང་ཞོར་དུ་གསལ་བྱེད་སུམ་ཅུར་འབྲེལ་འདྲིས་བྱེད་པའི་གོ་སྐབས་ཀྱང་གཞི་ནས་རག་ཡོད།
ངེད་གཉིས་ཀྱིས་ཨ་མ་རིན་ཆེན་སྒྲོལ་མའི་ལོ་རྒྱུས་སྐོར་ལ་གླེང་མོལ་བྱས་ཚར་རྗེས། ཁོང་མོར་ད་ལྟ་རང་ལོ་ ༦༨ ཙམ་ཟིན་རྗེས་གཞི་ནས་སློབ་སྦྱོང་བྱེད་དོན་གང་ཡིན་དྲིས་པར་ཁོང་མོས། “ཁྱོ་ག་སྔོན་མས་ང་གཡུགས་ནས་ཕྱིན་སྐབས་ང་ལོ་ ༢༥ ཙམ་རེད། བོད་ཁྱིམ་སློབ་གྲྭར་ཚུད་ཨེ་ཐུབ་སྙམ་པའི་རེ་འདོད་ཆེན་པོ་ཡོད་ཀྱང་གོ་སྐབས་རག་མ་སོང་། ང་ལོ་ ༦༨ ཙམ་ཡིན་སྐབས་གཞི་ནས་ང་ལྷོད་ལྷོད་ཅིག་ཆགས་ཏེ། གསལ་བྱེད་སུམ་ཅུ་ཡོད་པའི་དེབ་ཆུང་ཞིག་ཉོས་ནས་སྐོར་བར་འགྲོ་སྐབས་ཡི་གེ་ཤེས་མཁན་ཚོར་ཡིག་འབྲུ་རེ་རེ་བཞིན་དྲིས་ནས་སྦྱངས་པ་ཡིན། སྐབས་དེར་རྒན་པ་འགའ་རེས་རྒན་འཁོགས་ཤིག་གིས་མ་ཎི་མི་བགྲང་བར་ཡི་གེ་སྦྱངས་ནས་ག་རེ་བྱེད་དགོས་པ་རེད་ཟེར་མཁན་འདུགཡིན་ནའང་ང་ཁྱོན་ནས་སེམས་ཕམ་གྱི་མི་འདུགངས་ཁོ་ཚོར་ང་མ་ཤི་བར་ག་ཚོད་ཤེས་ཐུབ་ཐུབ་ཅིག་སྦྱོང་རྒྱུ་ཡིན་ཞེས་ལབ་པ་ཡིན” ཞེས་སྤོབས་པས་ཐོག་ནས་རྗོད་བཞིན་རྒྱབ་ཁུག་དམར་པོ་ཞིག་གི་ཁ་ཕྱེས་ཏེ་འགྱིག་ཤོག་གིས་བཏུམས་ཡོད་པའི་༼བོད་ཡིག་རྨོངས་སེལ་སློབ་དེབ༽ཅེས་པའི་དེབ་ཆུང་ཞིག་བླངས་ཏེ། ཁྱེད་ཀྱིས་ནོར་གྱི་ཡོད་མེད་ལྟོས་ཨཱ་ཟེར་ནས་ཡིག་འབྲུ་རེ་རེ་བཞིན་བཀླགས་སོང་ལ། ད་དུང་ཁོང་མོས་བྲིས་པའི་ཡི་གེ་ཞིག་ཀྱང་བསྟན་སོང་།
ཁོང་མོ་དྷ་སའི་ལས་འགུལ་རིགས་ཚང་མའི་ནང་མཉམ་ཞུགས་བྱེད་ཀྱི་ཡོད་སྐོར་བརྗོད་དོན། “བོད་ནང་གི་བོད་མི་ཚོར་བདེ་སྡུག་གང་ཡང་ཞུ་ས་མེད་པར་སྐད་ཅིག་བརྒྱབ་ནའང་ཚེ་སྲོག་ཤོར་འགྲོ་གི་ཡོད་པ་དེ་ཤ་ཚ་བ་ཞིག་མ་རེད་དམ།ང་རང་གི་མི་ཚེའི་ནང་དཀའ་སྡུག་མང་པོ་བྱུང་མྱངས་མྱོང་ཡང་སེམས་པ་སྐྱོ་ནས་མིག་ཆུ་ཤོར་བ་དྲན་གྱི་མི་འདུགབོད་ནང་གི་བོད་མི་ཚོས་དཀའ་སྡུག་ཚད་མེད་མྱོང་བཞིན་པ་གོ་ཡོང་དུས་ངུ་ཤོར་འགྲོ་གི་འདུགངས་ཆེན་པོ་ཞིག་སྒྲུབ་ཐུབ་ཀྱི་མི་འདུག་ཀྱང་ལས་འགུལ་ཆེ་ཆུང་ཚང་མར་གང་ཐུབ་ཀྱིས་ཞུགས་པ་ཡིན། ཡིན་ནའང་། དེས་ཚོ་བོད་གཞུང་ལ་ཐུགས་ཕན་གསོ་པ་ཞིག་ཡོང་མེད་ཀྱང་། སོ་སོའི་སེམས་ནས་ཕན་ཐོགས་ཕྲན་བུ་ཞིག་ཏན་ཏན་ཡོང་གི་རེད་བསམ་གྱི་ཡོད”ཅེས་བརྗོད་སོང་།
གསར་འགོད་པ། པདྨ་མཚོ།
དེས་ན་གློག་ཀླད་ཀྱི་ཁྱད་པར་ཞིག་གིས་ཡིན་ནམ་གསལ་པོ་མ་ཤེས། ང་ཚོ་ཚང་མ་ལ་དྲི་རྟགས་དེ་ཤར་གྱི་འདུག ཁྱེད་ཀྱིས་ submit དེར་བསྣུན་ན་མཆན་བུ་གཏོང་ཐུབ་ཀྱི་མི་འདུག་གམ། ད་ལྟ་ནི་ཁ་བརྡའི་འགྱུར་བ་སྐོར་ཞིག་བཟོ་བཅོས་བྱེད་ཀྱིན་ཡོད་སྟབས། དེ་མ་ཚར་བར་དུ་ང་ཚོར་ཐབས་ལམ་གཞན་མི་འདུག ཁྱེད་ཀྱིས་ཡང་བསྐྱར་ཚོད་ལྟ་ཞིག་གནང་རོགས། ཐུགས་རྗེ་ཆེ།
ཁ་བརྡས།
ངས་ཨ་མ་རིན་ཆེན་སྒྲོལ་མ་ལགས་མཐོང་སྟེ་ལོ་ ༢༠ ་ལྷག་ཕྱིན་སོང་། མོ་རང་གི་འདས་པའི་དཀའ་སྡུག་གི་ལོ་རྒྱུས་དེ་དག་ཤེས་ཀྱི་མེད། ཧ་ཅང་ཡིད་འགུལ་ཐེབས་པ་ཞིག་རེད། ངས་ཐོག་མ་མོ་རང་རྡ་རམ་ས་ལའི་སྐད་འབོད་ལས་འགུལ་ལས་མཐོང་བ་ཡིན། ང་རང་གི་བག་ཆགས་ཟབ་ཤོས་དེ་ཡང་ཁོང་མོས་མི་མང་གི་མདུན་དུ་ཐོན་ཏེ་སྐད་འབོད་རྒྱག་གི་ཡོད་པ་དེ་རེད། ལྷག་པར་དུ་༨༠༠༨་ལོར་བོད་ནང་ཡར་ལངས་བྱུང་སྐབས་རྡ་རམ་ས་ལས་ནས་གཞུང་དམངས་ཡོངས་ཀྱིས་ལས་འགུལ་སྤེལ་སྐབས་ཉིན་རྟག་པར་མོ་རང་ལས་འགུལ་ནང་ཞུགས་གི་ཡོད་པ་དང་། གསར་འགོད་པ་མང་པོ་ཡོད་སར་ཕྱིན་ཏེ་མིག་ཆུ་འདོན་བཞིན་སྐད་འབོད་རྒྱག་གི་ཡོད་པ་ཐེངས་མང་པོར་མཐོང་སོང་། སྐབས་དེར་གཟའ་ལྷག་པ་འཆར་ཅན་ལྟར་རྡ་རམ་ས་ལར་མར་མེ་ཁྲོམ་སྐོར་ཡོད་པ་རེད། མོ་ཆད་མེད་དུ་མར་མེ་ཁྲོམ་སྐོར་ནང་མཉམ་ཞུགས་གནང་གི་ཡོད་པ་མཐོང་སོང་།
ཀརྡོ་གཉེར་ཕྱག་པ། ཞེས་ང་ཀརྨ་རྡོ་རྗེ་ཁ་བརྡར་འབྲི་ས་མེད་པ་བཟོས་འདུག་པ་ལ། ཁ་བརྡའི་དྲ་བདག་ཚོས་གསལ་བཤད་ཅིག་གནང་རོགས་གནོངས་དང་། ཁ་བརྡ་ལགས།། །།
་་་་་ སྐབས་དེར་སྔོན་ཆད་ཀྱི་ཚོང་ར་ཆེན་པོ་དེར་རྒྱ་དམག་གིས་ཁེངས་ཡོད་པ་མ་ཟད། གནས་མཇལ་བ་ཚང་མར་སྔོག་བཤེར་དང་གངས་རིན་པོ་ཆེར་འགྲོ་བའི་ལམ་ཡིག་ཡོད་མེད་སོགས་འདྲི་རྩད་བྱས་སྟབས།
གནས་མཇལ་བ་ཚོ་ཧང་སང་སྟེ་ “ང་ཚོ་ས་ཆ་འདིའི་མི་ཡིན། ས་ཆ་འདི་ང་ཚོའི་སྐྱེས་ས་སྐྱེས་ཡུལ་ཡིན།ཁྱེད་ཚོ་གང་ནས་ཡོང་བ་ཡིན། ཁྱེད་ཚོ་ས་འདིར་ཡོང་རྒྱུར་ལམ་ཡིག་ཡོད་དམ” ཞེས་ལོ་ཙཱ་བ་བརྒྱུད་དེ་ཁ་རྩོད་མང་པོ་བརྒྱབ་ཡོད་པ་དང་། མཐར་གངས་རིན་པོ་ཆེ་བསྐོར་དུ་བཅུག་ཡོད་ཀྱང་བོད་དུ་འགྲོ་མ་ཐུབ་པར་ཕྱིར་ལོག་དགོས་བྱུང་ཡོད་འདུག ་་་་་་ཟེར།
ཨ་མ་རིན་ཆེན་སྒྲོལ་མའི་མི་ཚེ་ལོ་རྒྱུས་འདི་ངེས་བར་ང་ཚོ་བོད་མི་ཚོས་ཤེས་དགོས་བར་མ་ཟད་ཁོང་གི་སེམས་ཤུགས་དང་གངས་ཅན་པར་བཅིངས་པའི་བརྩེ་སེམས་ལ་ང་ཚོས་བསམ་བློ་གཏོང་དགོས་པར་སེམས།ཁོང་གིས་”ང་རང་གི་མི་ཚེའི་ནང་དཀའ་སྡུག་མང་པོ་བྱུང་མྱོང་ཡང་སེམས་པ་སྐྱོ་ནས་མིག་ཆུ་ཤོར་བ་དྲན་གྱི་མི་འདུགབོད་ནང་གི་བོད་མི་ཚོས་དཀའ་སྡུག་ཚད་མེད་མྱོང་བཞིན་པ་གོ་ཡོང་དུས་ངུ་ཤོར་འགྲོ་གི་འདུག”ཞེས་གསུངས་པ་དེ་ཁ་ཞེ་གཉིས་མེད་ཡིན་པ་ནི་ཨ་མ་རིན་ཆེན་སྒྲོལ་མ་ཁོང་གིས་ལག་ལེན་གྱིས་ཐོག་ནས་ང་ཚོ་ལ་ངོ་སྤྲོད་གསལ་བོ་བྱས་ཡོད།ང་ཚོ་བཙན་བྱོལ་བ་སྤྱི་དང་ལྷག་པར་ཁ་ཡར་གྲགས་ལ་གཞི་ལུས་བོད་མི་སྐྱིད་སྡུག་དང་ཁ་མར་གྲགས་ལ་གཞི་ལུས་བོད་མི་རྣམས་གཉེན་ཕྲང་གི་གནས་སྟངས་སྐོར་གླེང་ཏེ་སྡོད་མཁན་རྣམས་ཀྱི་ལྷག་པར་དུ་བསམ་བློ་གཏོང་དགོས་པའི་གནད་འགག་ཅིག་རེད་འདུག།ཞོར་ལ་ཨ་མ་རིན་ཆེན་སྒྲོལ་མ་དང་གསར་འགོད་པ་པདྨ་མཚོ་ལ་གཉིས་ལ་ཐུགས་རྗེ་ཆེ་ཞུ་རྒྱུ་ཡིན།ད་དུང་འདྲའི་རིགས་ལ་དོ་སྣང་བྱེད་རྒྱུ་གལ་ཆེན་པོ་རེད།