ཟླ་འདིའི་ཕྱི་ཚེས་ ༨ ཉིན་རྒྱ་ནག་རྒྱལ་ཡོངས་སྐབས་བཅུ་གཉིས་པའི་ལུས་རྩལ་འགྲན་ཚོགས་ཐོག བོད་རིགས་བུ་མོ་ཤི་ལོག་སྒྲོལ་མས་སྤྱི་རྒྱ་ ༦༣ པའི་གྱད་རྩལ་འཇུ་རེས་ཀྱི་འགྲན་སྡུར་ལས་གསེར་གྱི་རྟགས་མ་བླངས་འདུག
ད་ལྟ་གསར་དུ་གནས་ཚུལ་ཐོན་པ་ལྟར་ན། ཟླ་འདིའི་ཕྱི་ཚེས་ ༨ ཉིན་རྒྱ་ནག་རྒྱལ་ཡོངས་སྐབས་བཅུ་གཉིས་པའི་ལུས་རྩལ་འགྲན་ཚོགས་ཐོག བོད་རང་སྐྱོང་ལྗོངས་ལུས་རྩལ་རུ་ཁག་གི་རང་ལོ་ ༢༦ ཡིན་པའི་བོད་རིགས་བུ་མོ་ཤི་ལོག་སྒྲོལ་མ་ལགས་ཀྱིས། སྤྱི་རྒྱ་ ༦༣ པའི་གྱད་རྩལ་འཇུ་རེས་ཀྱི་འགྲན་སྡུར་ཁྲོད་ཨང་དང་པོ་བླངས་ཏེ་གསེར་གྱི་རྟགས་མ་ཐོབ་ཡོད་པ་དང་། ཁོ་མོ་ནི་རྒྱལ་ཡོངས་ལུས་རྩལ་འགྲན་སྡུར་ཁྲོད་ཨང་དང་པོ་ལེན་མཁན་གྱི་བོད་རང་སྐྱོང་ལྗོངས་ཀྱི་ལུས་རྩལ་བ་ཐོག་མ་དེ་ཆགས་ཡོད་འདུག
ཤི་ལོག་སྒྲོལ་མ་ལགས་བོད་རང་སྐྱོང་ལྗོངས་ཉིང་ཁྲི་ས་ཁུལ་ཉིང་ཁྲི་རྫོང་བུ་སྐྱིད་གྲོང་བརྡལ་གྱི་ཞིང་བའི་ཁྱིམ་ཚང་དཀྱུས་མ་ཞིག་ནས་སྐྱེས་ཤིང་། རང་ལོ་ ༡༥ ཙམ་ནས་བཟུང་གྱད་རྩལ་འཇུ་རེས་ཀྱི་སྦྱོང་བརྡར་བྱེད་མགོ་བརྩམས་ཤིང་། ༢༠༠༥ ལོར་བོད་རང་སྐྱོང་ལྗོངས་ལུས་རྩལ་རུ་ཁག་ནང་འཛུལ་ཞུགས་ཀྱིས་པེ་ཅིན་ལུས་རྩལ་ སློབ་ཆེན་དུ་སློབ་སྦྱོང་དང་ལུས་རྩལ་སྦྱོང་བརྡར་བྱས། ༢༠༡༠ ལོར་རྒྱལ་ཁབ་གྱད་རྩལ་འཇུ་རེས་ཀྱི་ལུས་རྩལ་བའི་གྲས་སུ་བདམས་ཐོན་བྱུང་ཡོད་པ་དང་། ༢༠༡༡ ལོའི་ཊུར་ཀའེ་(Turkey) ནང་སྐོང་ཚོགས་བྱས་པའི་འཛམ་གླིང་རང་བཞིན་གྱི་ལུས་རྩལ་འགྲན་ཚོགས་ཁྲོད་བུད་མེད་ཀྱི་སྤྱི་རྒྱ་ ༦༧ པའི་གྱད་རྩལ་འཇུ་རེས་འགྲན་སྡུར་དང་། ད་ལོའི་ཕྱི་ཟླ ༤ པའི་ནང་རྒྱ་གར་དུ་ཚོགས་པའི་ཨེ་ཤ་ཡའི་ལུས་རྩལ་འགྲན་ཚོགས་བཅས་ལས་ཨང་དང་པོ་ཐོབ་ཡོད་འདུག
བོད་མོ་ཤི་ལོག་སྒྲོལ་མས། གྱད་རྩལ་འཇུ་རེས་ཀྱི། འགྲན་སྡུར་ཁྲོད་ཨང་དང་པོ། བླངས་ཏེ་གསེར་གྱི་རྟགས་མ་ཐོབ། ཡོད་པར་དགའ་བསུའི་ཐལ་མོ་རྡེབ་བཞིན་ཡོད་ལགས།
ཨ་ཇོ་ཆབ་བྲག་གི་གཏམ་ལ་བསྔགས་སོ།།
བཀྲིས་བདེ་ལེགས་སོ།།
རྟེན་འབྲེལ་ཞུ། བོད་མོ་རྣམས་ཀྱི་མཛད་རྗེས་གངས་ལྗོངས་རྒྱན། དུས་ཀུན་གཡོལ་བ་མེད་པའི་སྨོན་ལམ་འཕྱོ།
ལས་རིགས་འདྲ་མིན་ཁྲོད་དུ་ཕུལ་བྱུང་གི་གྲུབ་འབྲས་འཇོག་ཐུབ་པ་ཅི་ཙམ་གྱིས་མང་ན་དེ་ཙམ་གྱིས་མི་རིགས་དེ་ཡར་རྒྱས་སུ་འགྲོ་ངེས། བོད་མི་ཚོ་གཞི་ནས་ལས་རིགས་འདྲ་མིན་ཁྲོད་དུ་རིགས་གཅིག་རྐང་འཛིན་བྱེད་ཐུབ་པའི་རྣམ་པ་མངོན་གྱིན་འདུག འདི་རིགས་་མུ་མཐུད་འཕེལ་རྒྱས་གཏོང་རྒྱུར་འབྲེལ་ཡོད་ཚང་མས་ནུས་པ་འདོན་འོས།