ཉེ་ལམ་རྒྱ་གར་དབུས་སྨན་ཞབས་ལྟ་རྟོག་ལྷན་ཁང་གིས་བཀའ་ཁྱབ་ཅིག་བསྒྲགས་ཏེ། རྒྱ་གར་ནང་སློབ་སྦྱོང་བྱེད་བཞིན་པའི་བོད་དང་འབྲུག བལ་ཡུལ་སོགས་ཀྱི་མི་རིགས་ཚོས་རྒྱ་གར་ནང་སྨན་ཞབས་ལས་ཀ་བྱེད་མི་ཆོག་ཚུལ་བཀོད་ཡོད་པ་དེར། བོད་རིགས་སྨན་ཞབས་ཚོས་ཐུགས་ཁྲལ་གནང་གི་ཡོད་འདུག
ཉེ་ཆར་བོད་རིགས་སྨན་ཞབས་པ་ཐོན་མཁན་ཚོར་རྒྱ་གར་ནང་ལས་ཀ་བྱ་ཆོག་མིན་གྱི་གནས་ཚུལ་ཞིག་འཐོན་ཡོད་པ་དང་། རྒྱ་གར་དབུས་སྨན་ཞབས་ལྟ་རྟོག་ལྷན་ཁང་(INC) གིས་ ༢༠༡༣ ཟླ་ ༣ ཚེས་ ༢༥ འཁོད་པའི་རྒྱ་གར་ཡུལ་མི་དང་ཕྱི་རྒྱལ་སློབ་ཕྲུག་ཚོའི་སློབ་སྦྱོང་སློབ་འཇུག་བྱེད་ཕྱོགས་སྐོར་ལ་བཀའ་ཁྱབ་ཅིག་མངའ་སྡེ་སོ་སོའི་སྨན་ཞབས་ལྟ་རྟོག་ལྷན་ཁང་དང་སློབ་ཆེན་དག་ལ་བཀྲམས་ཡོད་ཅིང་། ཡིག་ཆ་དེའི་ཚན་པ་དང་པོ་ཕྱི་རྒྱལ་མི་རིགས་ཐད་ཀྱི་ནང་གསེས་༼ཀ་བ༽ནང་། “བལ་བོ་དང་བྷང་ལཱ་ཌེ་ཤཱི་བ། འབྲུག་པ། བོད་མི་སྐྱབས་བཅོལ་བ་བཅས་ཚུད་པའི་ཕྱི་རྒྱལ་མི་རིགས་ཚོར་སྨན་ཞབས་(Nurse)དང་། སྐྱེ་གཡོག་(Midwife)སོགས་ཀྱི་སློབ་སྦྱོང་བྱ་རྒྱུའི་ཆ་རྐྱེན་ཚང་རིགས་ལ་རྒྱ་གར་ནང་མུ་མཐུད་སློབ་སྦྱོང་བྱ་རྒྱུའི་གོ་སྐབས་སྤྲོད་ཆོག་པ་ལས། སློབ་སྦྱོང་གི་དུས་ཡུན་སྐབས་དང་སློབ་སྦྱོང་ཐོན་རྗེས་ཕྱིར་སོ་སོའི་རྒྱལ་ཁབ་ཏུ་ལོག་སྟེ་ལས་ཀ་བྱ་དགོས་པ་མ་གཏོགས། རྒྱ་གར་ནང་གནས་བབ་དང་ཁོར་ཡུག་གང་འདྲ་ཞིག་གི་འོག་ནས་ཀྱང་ལས་ཀ་བྱེད་ཆོག་གི་མེད” ཅེས་སོགས་བཀོད་ཡོད་འདུག
ཉེ་ཆར་ལྡི་ལིར་བོད་རིགས་སྨན་ཞབས་སློབ་ཐོན་པ་ཁག་ཅིག་གིས་རྒྱ་གར་སྨན་ཁང་ནང་ལས་ཀ་བྱེད་རྒྱུར་དཀའ་ངལ་ཞིག་འཕྲད་ཡོད་སྟབས། གསར་འགོད་པས་ནང་སྲིད་བཀའ་བློན་རྒྱ་རི་སྒྲོལ་མ་མཆོག་ལ་གནད་དོན་དེའི་ཐད་བཅར་འདྲི་ཞུས་པར། ཁོང་མོས “ ཉེ་ཆར་ལྡི་ལིར་བོད་པའི་སྨན་ཞབས་པ་ཁག་ཅིག་གི་ཡིག་ཆའི་ཐོག་དཀའ་ངལ་ཞིག་འཕྲད་པ་དེ་དངོས་ཡོད་རེད། དེའི་ཐད་ལྡི་ལི་དོན་གཅོད་སྐུ་ངོ་བཀའ་ཟུར་བསྟན་པ་ཚེ་རིང་མཆོག་གིས་རྒྱ་གར་གཞུང་ལ་འབྲེལ་བ་གནང་སྟེ་གནས་སྐབས་རིང་དཀའ་ངལ་དེ་སེལ་ཡོད་པ་ཞིག་གོ་སོང་། ང་རང་ཚོ་བཙན་བྱོལ་ནང་ཡོད་པའི་བོད་མི་སུ་འདྲ་ཞིག་ལ་སྨན་ཞབས་བྱེད་ཕྱོགས་ཀྱི་ཐོག་ནས་དཀའ་ངལ་འཕྲད་པ་ཡིན་ན། སྣང་མེད་དུ་འཇོག་རྒྱུ་མ་ཡིན་པར་ངེས་པར་དུ་འབྲེལ་ཡོད་ལས་ཁུངས་དང་ཡང་ན་ལྡི་ལི་དོན་གཅོད་ལ་འབྲེལ་བ་ཞུས་པ་ཡིན་ན། ལམ་ཁ་ཞིག་རག་གི་རེད་བསམ་གྱི་ཡོད”ཅེས་བརྗོད་བྱུང་།
ཡང་ཁོང་མོར་མ་འོངས་པར་དཀའ་ངལ་དེ་འདྲ་བྱུང་མིན་ཐོག་བོད་མིའི་སྒྲིག་འཛུགས་ཀྱིས་དགོངས་པ་གང་འདྲ་བཞེས་ཀྱི་ཡོད་མེད་དྲིས་པར་ “དཀའ་ངལ་འདི་རིགས་སེལ་ཐབས་བྱ་རྒྱུ་དེ་བོད་མིའི་སྒྲིག་འཛུགས་ཀྱི་ལས་འགན་གལ་ཆེ་ཤོས་ཤིག་རེད། རྒྱ་གར་གཞུང་ལའང་ཏན་ཏན་ལས་འགན་ཡོད་པ་རེད། རྒྱ་གར་གཞུང་བཀའ་དྲིན་ཆེན་པོ་ཞེ་དྲག་རེད། ང་ཚོ་སྐྱབས་བཅོལ་ལ་བསྡད་བཅུག་པ་རེད། སྔོན་མ་ནའེ་རོ་དང་༸གོང་ས་མཆོག་མཇལ་འཕྲད་སྐབས། གལ་ཆེ་ཤོས་དང་པོ་སློབ་གྲྭ་ཁག་བཙུགས་པ་རེད། སློབ་གྲྭ་མཐར་ཕྱིན་སྐབས་ལས་ཀ་བྱེད་ཆོག་གི་མེད་ཟེར་ན་ནི། སྐྱབས་བཅོལ་གྱི་ཐོབ་ཐང་ཞིག་གནང་དགོས་པ་རེད། དེ་མིན་ན་ལས་ཀ་བྱེད་ཆོག་དགོས་པ་རེད། དེར་བརྟེན། འདི་རིགས་རྒྱ་གར་གཞུང་ལ་ཞུས་པ་ཡིན་ན་ཏན་ཏན་ལམ་ཀ་ཞིག་རག་གིོ་རེད་བསམ་གྱི་ཡོད”ཅེས་གསུངས་སོང་།
གསར་འགོད་པས་ལྡི་ལི་དོན་གཅོད་བསྟན་པ་ཚེ་རིང་མཆོག་ལ་ཁ་པར་བརྒྱུད་བཅར་འདྲི་ཞུས་པར། ཁོང་གིས། “གནས་ཚུལ་འདི་ལྡི་ལི་ནས་རྒྱ་གར་སྨན་ཁང་ནང་ལས་ཀ་བྱེད་མཁན་བུ་མོ་ ༦ ལ་ཡིག་ཆ་མ་སྤྲད་པའི་དཀའ་ངལ་ཞིག་བྱུང་འདུག སྐབས་དེར་ངས་རྒྱ་གར་ཕྱི་སྲིད་ལས་ཁུངས་ལ་འབྲེལ་བ་བྱས་པ་ཡིན། ཕྱི་སྲིད་ལས་ཁུངས་ཀྱིས་རྒྱ་གར་དབུས་སྨན་ཞབས་ལྟ་རྟོག་ལྷན་ཁང་ལ་བོད་རིགས་སྨན་ཞབས་པ་དེ་དག་ལ་རྒྱབ་གཉེར་ཡིག་ཆ་འཕྲོད་རོགས་ཞེས་ཡི་གེ་ཞིག་གནང་ཡོད་ས་རེད། ཡི་གེ་དེར་ནུས་པ་གང་འདྲ་ཡོད་མེད་སྨན་ཞབས་པ་ཁོ་ཚོར་སྨན་ཞབས་ལྟ་རྟོག་ལྷན་ཁང་གིས་ཡིག་ཆ་སྤྲད་རྗེས་ཧ་གོ་ཡོང་གི་རེད་”ཅེས་དང་། ཡང་དཀའ་ངལ་འདི་ལྡི་ལི་ནང་འཕྲད་ཡོད་པ་ལས་མངའ་སྡེ་གཞན་དག་ནང་འཕྲད་ཀྱི་ཡོད་མེད་ད་སྔ་གནས་ཚུལ་གང་ཡང་འབྱོར་མེད་སྐོར་གསུངས་སོང་།
ཤེས་རིག་དྲུང་ཆེ་དངོས་གྲུབ་ཚེ་རིང་ལགས་ཀྱིས་གནད་དོན་དེའི་ཐད། ཡིག་ཆ་དེའི་ནང་། བལ་བོ་དང་བྷང་ལཱ་ཌེ་ཤཱི་བ། འབྲུག་པ། བོད་མི་སྐྱབས་བཅོལ་བ་བཅས་སྨན་ཞབས་པ་ཚོར་རྒྱ་གར་ནང་ལས་ཀ་བྱེད་རྒྱུར་ཆོག་མཆན་སྤྲོད་མི་ཆོག་པར། ཕྱིར་སོ་སོའི་རྒྱལ་ཁབ་ཏུ་ལོག་སྟེ་ལས་ཀ་བྱ་དགོས་པར་གསལ་ཡོད་ཀྱང་། བོད་མི་སྐྱབས་བཅོལ་བ་ཚོ་མི་རིགས་གཞན་ལྟར། ཕྱིར་ལོག་ས་དང་ལས་ཀ་བྱེད་ས་མེད་དུས་ཐབས་ལམ་ཞིག་རག་རེས་ཡིན་ཚུལ་བརྗོད་བྱུང་།
གསར་འགོད་པས་ལྡི་ལིར་སྨན་ཞབས་ལས་ཀ་བྱེད་བཞིན་པའི་བུ་མོ་དབྱངས་ཅན་སྒྲོལ་དཀར་ལགས་སུ་བཅར་འདྲི་ཞུས་པར། ཁོང་མོས་ “ ང་ཚོས་དང་ཐོག་ལྡི་ལི་སྨན་ཞབས་ལྟ་རྟོག་ལྷན་ཁང་(DNC) ལ་ལྡི་ལི་རྒྱ་གར་སྨན་ཁང་ནང་ལས་ཀ་བྱེད་ཆོག་པའི་ཐོ་འགོད་ཡིག་ཆ་ཞུས་པར། བོད་རིགས་ཚོས་རྒྱ་གར་སྨན་ཁང་ནང་ལས་ཀ་བྱེད་མི་ཆོག་པའི་ཐག་གཅོད་བྱུང་ཡོད་སྟབས། གལ་སྲིད་ང་ཚོས་ཡིག་ཆ་སྤྲོད་དགོས་ན་དང་པོ་རྒྱ་གར་དབུས་སྨན་ཞབས་ལྟ་རྟོག་ལྷན་ཁང་གི་མཆོག་མཆན་ཡི་གེ་ཁྱེར་ཤོག་ལབ་སོང་། དེ་ནས་ང་ཚོ་དབུས་སྨན་ཞབས་ལྟ་རྟོག་ལྷན་ཁང་ལ་སོང་སྟེ་སོ་སོ་རྒྱ་གར་ནང་སྐྱེས་ཡོད་པ་དང་། རྒྱ་གར་གྱི་སྨན་ཁང་ནས་སློབ་སྦྱོང་ཐོན་པ་སོགས་ཆ་རྐྱེན་ཚང་ཡོད་སྐོར་ཞུས་སྐབས། ཆ་རྐྱེན་ག་རེ་ཡོད་ཀྱང་བོད་རིགས་ཡིན་པ་ཙམ་གྱིས་ལས་ཀ་བྱ་ཆོག་གི་མ་རེད། འདི་ཁྲིམས་ཀྱི་གཏན་འབེབས་རེད། ལྡི་ལི་ཙམ་མ་ཡིན་པར་རྒྱ་གར་གྱི་མངའ་སྡེ་གང་དུའང་ལས་ཀ་བྱེད་ཆོག་གི་མ་རེད། ཁྱེད་ཚོ་བོད་མི་ཚོ་རྒྱ་གར་སྨན་ཁང་ནང་ལས་ཀ་བྱེད་མཁན་མང་པོ་ཡོད་རེད། དེ་ཚང་མ་ཁྲིམས་འགལ་རེད། འདི་ལོའི་ཕྱི་ཟླ་ ༡༠ བར་ང་ཚོས་སྨན་ཁང་ཆེ་ཁག་ཚང་མར་བཀའ་ཁྱབ་བཏང་སྟེ། བོད་རིགས་སྨན་ཞབས་ལས་ཀ་བྱེད་མཁན་ཚོར་ལས་མཚམས་འཇོག་ཏུ་འཇུག་རྒྱུ་ཡིན་ལབ་སོང”ཞེས་བརྗོད་བྱུང་། ཁོ་མོས་མུ་མཐུད་དུ། ང་ཚོས་གནས་ཚུལ་དེ་ལྡི་ལི་དོན་གཅོད་མཆོག་ལ་ཞུས་པ་ཡིན། དོན་གཅོད་མཆོག་གིས་ང་ཚོར་ཕྱག་རོགས་ཧ་ལས་པ་གནང་བྱུང་། རྒྱ་གར་ཕྱི་སྲིད་ལས་ཁུངས་ནས་དབུས་སྨན་ཞབས་ལྟ་རྟོག་ལྷན་ཁང་ལ་ང་ཚོ་བོད་རིགས་ཚོར་དམིགས་བསལ་བྱས་ཏེ་ཆོག་མཆན་ཐོ་གོད་ཡིག་ཆ་སྤྲོད་རོགས་ཞེས་ཡི་གེ་ཞིག་ཕུལ་ཡོད་རེད། དེ་ཕུལ་རྗེས་ང་ཚོ་བསྐྱར་དུ་དབུས་རྒྱ་གར་སྨན་ཞབས་ལྟ་རྟོག་ལྷན་ཁང་ལ་སོང་སྟེ་སྐད་ཆ་བཤད་སྐབས། ང་ཚོས་ལྟ་དགོས། ཉིན་ ༡༠ རིང་སྒུག་ཅེས་བརྗོད་བྱུང་”ཟེར།
གསར་འགོད་པས་བོད་རིགས་སྨན་ཞབས་པའི་སློབ་སྦྱོང་དང་ལས་ཀ་བྱེད་མཁན་མང་པོ་ཡོད་པའི་ས་གནས་ལྡི་ལི་དང་བྷིང་ལོར། མཱང་མོར། རྡེ་རཱ་ལྡུན་སོགས་སུ་འབྲེལ་བ་བྱས་ཏེ། གནས་ཚུལ་དེ་རིགས་བྱུང་ཡོད་མེད་སྐད་ཆ་དྲིས་པར། ས་གནས་གཞན་ནང་ད་སྔ་གནས་ཚུལ་དེ་འདྲ་འདྲ་བྱུང་མེད་ཀྱང་། བོད་རིགས་སྨན་ཞབས་ཚང་མས་གནས་ཚུལ་དེའི་ཐད་ཐུགས་འཚབ་གནང་གི་ཡོད་པ་དང་། ཉེ་ཆར་རང་རྒྱ་གར་ལྷོ་ཕྱོགས་མཱ་ནེ་པལ་སྨན་ཁང་དུ་སྨན་ཞབས་པའི་ལས་ཀ་རག་མཁན་བསྟན་འཛིན་ཚེ་བརྟན་གྱིས། “ ང་ད་ལོའི་ཕྱི་ཟླ་ ༦ ནང་སྨན་ཞབས་ཐོན་པ་ཡིན། ཕྱི་ཟླ་ ༧ ནང་ཀཱ་ཎ་ཊ་ཀཱི་སྨན་ཞབས་ལྟ་རྟོག་ལྷན་ཁང་ལ་ཡིག་ཆ་ཞུས་ཏེ་ཕྱི་ཟླ་ ༨ ནང་རག་བྱུང་། བཀའ་ཁྱབ་དེ་ཀཱ་ཎ་ཊ་ཀ་མངའ་སྡེ་ནང་ལག་བསྟར་བྱ་མིན་སྐབས་རྗེས་མའི་སློབ་ཐོན་པ་ཚོའི་སྐབས་སུ་གསལ་བོ་ཆགས་ཡོང་གི་རེད་”ཅེས་བརྗོད་བྱུང་།
བྷིང་ལོར་གྲོང་ཁྱེར་དུ་སྨན་ཞབས་སློབ་སྦྱོང་བྱེད་བཞིན་པའི་བོད་རིགས་བུ་མོ་བསྟན་འཛིན་ཚེ་རྒྱལ་ལགས་སུ་དགོངས་ཚུལ་དྲིས་པར། “རྒྱ་གར་སྨན་ཁང་ནང་སྨན་ཞབས་ཀྱི་ལས་ཀ་བྱེད་བཞིན་པའི་བོད་རིགས་བརྒྱ་ཆ་ ༩༨ སྒེར་གཉེར་སྨན་ཁང་རྐྱང་ཡིན་པ་དང་། བརྒྱ་ཆ་ཉུང་ཤས་ཤིག་རྒྱ་གར་གཞུང་གི་སྨན་ཁང་ནང་ལས་ཀ་རག་ཡོད་པ་ཚོ་ལ་རྒྱ་གར་མི་སེར་ལག་འཁྱེར་དང་། མི་སེར་ནང་ནས་ཀྱང་དམིགས་བསལ་ལྟ་རྟོག་ཐོབ་པའི་རྗེས་ལུས་ཅན་གྱི་ལག་འཁྱེར་(ST, SC, OBC) ཡོད་མཁན་རིགས་ཡིན་སྟབས་དཀའ་ངལ་ཆེན་པོ་ཨེ་ཡོང་ན་བསམ་གྱི་འདུག ང་ཚོས་ཀཱ་ཎ་ཊ་ཀ་མངའ་སྡེའི་སྨན་ཞབས་ལྟ་རྟོག་ལྷན་ཁང་(KNC) ལ་འབྲེལ་བ་བྱས་དུས། ཁྱེད་ཚོ་ཀཱ་ཎ་ཊ་ཀ་མངའ་སྡེ་ནང་སྨན་ཞབས་ཐོན་པ་ཡིན་ན། འདིར་བོད་རིགས་སྨན་ཞབས་པ་ཚོར་གནད་དོན་དེའི་ཐད་དཀའ་ངལ་མེད་ལབ་སོང”ཞེས་བརྗོད་བྱུང་།
གསར་འགོད་པ། བནྡེ་སྐྱབས།
༼ བོད་ཀྱི་དུས་བབ་ཚགས་པར་ལས་འདིར་བཀོད། ༽
ད་རྒྱ་གར་གཞུང་གིས་ཀྱང་ཁ་ནས་བོད་པ་སྐྱབས་བཅོལ་པ་རྣམས་རོགས་པ་བྱེད་མདོག་མདོག་གི་སྒོ་ནས་སྐེ་བཙིར་གི་འདུག་ག བོད་པ་སྐྱབས་བཅོལ་པ་ཚོས་རྒྱ་གར་ནང་སློབ་སྦྱོང་མཐར་ཕྱིན་རྗེས་རྒྱ་གར་ནང་ལས་ཀ་མི་བྱེད་ན་གང་དུ་བྱེད་དགོས་སམ། ད་འདི་ནི་བོད་མིའི་སྒྲིག་འཛུགས་ཀྱི་དཔོན་རིགས་རྣམས་ཀྱིས་གང་ཡང་འཇོན་གི་མེད་པ་དང་། གང་ཡང་སྒྲུབ་གི་མེད་པ་མཚོན་ཐུབ་བོ།།
འདི་ནི་སྐྱབས་བཅོལ་ལ་ཡོང་པའི་ལས་དབང་རེད་ཡ།
“གྲང་ལྟོགས་ཞུ་ས་ཕ་མ། སྐྱིད་སྡུག་ཞུ་ས་དཔོན་པོ།” གཏམ་དཔེ་འདི་གནའ་སྔོན་མའི་རེད། འདིས་སྤྱི་ཚོགས་རྙིང་པར་ཡང་དཔོན་བཟང་པོ་ཡོད་པ་མཚོན་ཐུབ། འདིས་དཔོན་ཞིག་ཡིན་ན་དམངས་ཀྱི་བདེ་སྡུག་ལ་འགན་འཁུར་མཁན་ཞིག་ཡིན་པ་བསྟན་ཡོད།
དེང་སང་ང་རང་ཚོའི་གནས་སྟངས་ལ་མཚོན་ན། གྲང་ལྟོགས་ཞུ་ས་ཡང་གཞུང་ཡིན།
གཞུང་ཟེར་བ་འདི་དེད་སོང་ན་དཔོན་པོ་ཚོར་ཐུག་ཡོད།
དེང་སང་ང་ཚོའི་སྤྱི་ཚོགས་དམངས་གཙོ་རེད། དཔོན་པོ་ཚོ་ཡང་དམངས་ཀྱིས་བདམས་པ་རེད། དཔོན་དེ་མི་བཟང་ན། མི་འཇོན་ན། ཡང་དམངས་ལ་དབང་ཆ་ཡོད།
གནས་ལུགས་རྒྱུ་མཚན་གསལ་བར་བགྲངས་ཏེ་སྐྱིད་སྡུག་ཞུ་དགོས། འོན་ཀྱང་གུས་ཞབས་ཡོད་དགོས། ཤོད་་་ངུས་་་འདི་ངུ་ས་དང་བཤད་ས་རེད་ཡ་་
ནང་སྲིད་བཀའ་བློན་རྒྱ་རི་སྒྲོལ་མས”བཀའ་ཟུར་བསྟན་པ་ཚེ་རིང་མཆོག་གིས་རྒྱ་གར་གཞུང་ལ་འབྲེལ་བ་གནང་སྟེ་གནས་སྐབས་རིང་དཀའ་ངལ་དེ་སེལ་ཡོད་པ་ཞིག་གོ་སོང”། གོ་སོང་ཨེ། སྐད་ཆ་འདི་ནང་སྲིད་བློན་ཆེན་ཞིག་སྐད་ཆ་རེད་དམ། གོ་སོང་ཞེས་བའི་སྐད་ཆ་འདིའི་ཉེ་ཆར་ལྡི་ལིར་བོད་རིགས་སྨན་ཞབས་སློབ་ཐོན་པ་ཁག་ཅིག་གིས་རྒྱ་གར་སྨན་ཁང་ནང་ལས་ཀ་བྱེད་རྒྱུར་དཀའ་ངལ་ཞིག་འཕྲད་ཡོད་པར་དོ་སྣང་སྤུ་ཙམ་ཡང་བྱས་མེད་རྟོགས་ཐུབ། གོ་བ་མ་གཏོགས་ནང་སྲིད་བློན་ཆེན་ཞིག་གི་ངོས་ནས་ཁོ་མོར་གནས་ཚུལ་འདིའི་སྐོར་གསལ་བོ་ཞིག་ཞུ་རྒྱུ་མེད་ཡ་མཚན་རེད།
མ་འོངས་བར་བོད་རིགས་སྨན་ཞབས་པ་ཚོས་རྒྱ་གར་ནང་ལས་ཀ་བྱེད་མི་ཆོག་པ་དེ་སྣང་མེད་དུ་འཇོག་རྒྱུ་འདི་ལྟར་རོ “ང་རང་ཚོ་བཙན་བྱོལ་ནང་ཡོད་པའི་བོད་མི་སུ་འདྲ་ཞིག་ལ་སྨན་ཞབས་བྱེད་ཕྱོགས་ཀྱི་ཐོག་ནས་དཀའ་ངལ་འཕྲད་པ་ཡིན་ན། སྣང་མེད་དུ་འཇོག་རྒྱུ་མ་ཡིན་པར་ངེས་པར་དུ་འབྲེལ་ཡོད་ལས་ཁུངས་དང་ཡང་ན་ལྡི་ལི་དོན་གཅོད་ལ་འབྲེལ་བ་ཞུས་པ་ཡིན་ན། ལམ་ཁ་ཞིག་རག་གི་རེད་བསམ་གྱི་ཡོད”ཅེས་བརྗོད་བྱུང་།” རེད་རེད་། སྐད་ཆ་རྫིག་པོ་རེ་བཤད་ནས་བསམ་སྡད་ན་དོན་དག་ཆ་ཚང་འགྲིག་འགྲོ་གི་རེད།
ལོ་འགས་སྔོན་ལ་བོད་གཞུང་གསར་ཤོག་སྟེང་གཞུང་གི་ལས་བྱེད་ཕྱི་རྒྱལ་དུ་འགྲོ་མཁན་ཚོའི་མིང་ཐོ་དང་ལས་གནས་ད་དུང་དངུལ་ཆད་ཡོད་པ་སོགས་ཕྱིར་བསྒྲགས་བྱས་སོང། དེ་ནི་གཞིའི་ཆགས་མགོ་བདེ་དང་སྤང་ཀི་རྣ་ཚར་འདོགས་མཁན་ཚོའི་ལས་དོན་གཙང་མ་སྒྲུབ་པའི་འཇུག་འབྲས་རེད། དེ་ང་ཚོ་ལ་འབྲེལ་བ་ཅི་ཡང་མེད།
རྒྱ་གར་ནང་འཚར་ལོང་བྱུང་མཁན་ཚོ་དཀའ་ངལ་ཏོག་ཙམ་འཕྲད་ན་ནང་སྲིད་དང་དོན་གཅོད་ཀྱིས་དོ་སྣང་ཆེན་པོ་བྱེད་ཡོད་ན་། བོད་པ་གསར་འབྱོར་བ་ཐང་ཁྲོམ་སྟོན་མཁན་དང་བག་ལེབ་བསྲེགས་མཁན་ཚོ་དཀའ་ངལ་ཅི་ཙམ་ཡོད་ཀྱང་སྣང་མེད་བཏང་བ་འདིའི་བོད་པ་གསར་འབྱོར་་བ་དང་གཞིའི་ཆགས་གཉིས་ཀྱིས་བར་ལ་འགལ་ཟླ་ཆེན་པོ་ཞིག་བསླངས་ཡོད། ནག་ཉེས་འདི་བསྲགས་མཁན་གཙོ་བོ་མགོ་ནས་ཁ་མར་འཁོར་མཁན་སྤྲངས་བོ་རྟ་ཞོན་མ་མྱང་མཁན་འདི་ཚོ་རེད།
ད་རྒྱ་གར་ནས་ཀྱང་མི་རིགས་དབྱེ་འབྱེད་ཀྱིས་ལས་ཀ་རེག་པར་དཀའ་ངལ་རིམ་པས་འཕྲད་ཡོང་ས་རེད།
བོད་ནས་རྒྱ་ནག་པོས་དཀའ་ངལ་སྤྲད། རྒྱ་གར་ནས་རྒྱ་དཀར་པོས་དཀའ་ངལ་སྤྲད། བོད་འདིས་ལས་ཅི་ཞིག་བསགས་ཡོད་ན།
རྒྱ་གར་ནང་དུ་བོད་རིགས་བུ་མོ་སློབ་མ་མང་པོ་ཞིག་རྒྱ་གར་གྱི་མཐོ་རིམ་སློབ་གྲྭ་མང་པོར་སྨན་ཞབས་སློབ་གཉེར་སློབ་ཐོབ་བྱས་རྗེས་རྒྱ་གར་གྱི་སྨན་ཁང་ཆེ་ཆུང་མང་པོར་སྨན་ཞབས་ལས་ཀ་རེག་ཡོད་ལ། ཁོ་ཚོས་སྨན་ཞབས་སློབ་གཉེར་སློབ་ཐོན་ཆེད་རྔུལ་ཆུའི་ཐིགས་པ་མང་པོ་སྟོར་ཡོད་པས་སྨན་ཞབས་ལས་ཀ་བྱེད་གནང་སྐབས་ཟླ་རེའི་ཕོག་ཐོབ་ཀྱང་བཟང་པོ་ཐོབ་བཞིན་ཡོད་ལ། འདིས་བོད་མི་སློབ་ཐོན་པ་ཚོར་ལས་ཀ་མི་རེག་པའི་དཀའ་ངལ་ལས་ཐར་པར་རོགས་རམ་ཆེན་པོ་ཐོབ་ཡོད།
འོན་ཀྱང་དེང་སྐབས་གར་གཞུང་གི་སྲིད་ཇུས་ལངས་ཕྱོགས་གང་ཐད་ནས་འགྱར་བ་སོང་དང་འགྲོ་བཞིན་འདུག་པ་དང་། དམིགས་བསལ་བོད་མི་སྐབས་བཅོལ་བའི་ཐོག་ལ་དོན་དག་རེ་ཟུང་ཁ་ཇེ་གསལ་དུ་འགྲོ་བཞིན་པའི་ཚོར་སྣང་ཤུགས་ཆེར་བྱུང་།
ད་དུང་མཐོ་སློབ་མང་པོར་བོད་མི་སློབ་གཉེར་པ་ཚོར་རྒྱ་མི་ཡིན་པ་དང་། རྒྱ་ཁོངས་ཡིན་པའི་ཟུར་ཟའི་སྐད་ཆ་ཡང་མཚོན་མེད་དུ་བཤད་མཁན་དགེ་སློབ་མང་དུ་འགྲོ་བཞིན་པའི་ཚོར་སྣང་བྱུང་།
ད་བོད་མོ་སྨན་ཞབས་སློབ་ཐོན་པ་ཚོར་རང་གཞུང་ནས་ལས་ཀ་སྤྲོད་ཐོབས་མེད་པ་དང་། སྨན་ཞབས་མང་པོར་ས་མིག་དེ་འདྲ་མེད་ངེས་ན། སྨན་ཞབས་སློབ་ཐོན་པ་དག་གི་ལས་ཀའི་དཀའ་ངལ་བསལ་བར་རང་གཞུང་དང་ཚོགས་སྒེར་ཚང་མས་ཕྱར་གྲུ་མཉམ་འདེགས་ཡོང་བའི་རེ་བ་སྙིང་ནས་ཞུ།
བོད་རིགས་སྨན་ཞབས་པ་ཚོའི་རེ་དམིགས་ནུབ་གླིང་རེད། ཁོ་ཚོ་དེ་གར་འགྲོ་གི་རེད། ཁྱེད་རང་ཚོས་སེམས་ཁྲལ་གནང་བ་སྟོང་བ་རེད། ཧཧཧཧཧ