བོད་གཞུང་གི་གྲོཊ་པོ་རྙིང་ཤོས་ཤིག་ལ་མྱ་ངན།

དེ་རིང་སྔ་དྲོར་སྤྱི་འཐུས་གྲོས་ཚོགས་ནང་། ཟླ་འདིའི་ཕྱི་ཚེས་ ༢༠ ཉིན་འདས་གྲོངས་སུ་ཕྱིན་པའི་བོད་དོན་རྒྱབ་སྐྱོར་བ་སྐུ་ཞབས་རོ་བྷར་ཌི་ཧྥོར་ཊི་མཆོག་ལ་གཞུང་འབྲེལ་ཐོག་མྱ་ངན་གྲོས་ཆོད་བཞག་སོང་།  

དེ་རིང་ཕྱི་ཚེས་ ༢༦ སྟེ། སྐབས་བཅོ་ལྔ་བའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དྲུག་པའི་ལས་ཉིན་བརྒྱད་པའི་ཞོགས་པར། ཟླ་འདིའི་ཕྱི་ཚེས་ ༢༠ ཉིན་འདས་གྲོངས་སུ་གྱུར་བའི་བོད་གཞུང་དགའ་ལྡན་ཕོ་བྲང་གི་གཞུང་ཞབས་ཀྱི་མཚན་གནས་གནང་བའི་ཕྱི་གླིང་བ་ཐོག་མ་དང་། ཡུན་རིང་བོད་དོན་ཐོག་ཁ་ཞེ་གཉིས་མེད་ཀྱི་རྒྱབ་སྐྱོར་གནང་མཁན་སྐུ་ཞབས་རོ་བྷར་ཌི་ཧྥོར་ཊི་ (Robert W.Ford) མཆོག་གི་མཛད་རྗེས་ལ་ཡི་རངས་བསྔགས་བརྗོད་དང་། ཤུལ་ལུས་ནང་མི་ཐུགས་གསོའི་འཚམས་འདྲི་ཆེད་གཞུང་འབྲེལ་ཐོག་མྱ་ངན་གུས་འདུད་ཀྱི་གྲོས་ཆོད་བཞག་གནང་སོང་།  

སྐུ་ཞབས་རོ་བྷར་ཌི་ཧྥོར་ཊི་མཆོག་ནི། ༡༩༢༣ ཟླ་ ༣ ཚེས་ ༢༧ ཉིན་དབྱིན་ཡུལ་སི་ཌེལ་ཧྥོར་ཌི་ཤི་རེ་ (Staffordshire) ཞེས་པར་སྐྱེས་པ་དང་། དམག་ཆེན་གཉིས་པའི་སྐབས་དབྱིན་ཡུལ་དང་རྒྱ་གར་ནང་རླུང་འཕྲིན་དང་ཏར་འཕྲིན་རྒྱང་སྲིང་འཕྲུལ་ཆས་ཀྱི་ཕྱག་ལས་གནང་ཡོད། ༡༩༤༥ ལོར་ལྷ་སར་རྒྱ་གར་དབྱིན་གཞུང་གི་དོན་གཅོད་ཁང་དུ་རླུང་འཕྲིན་དང་ཏར་འཕྲིན་རྒྱང་སྲིང་གི་ལས་དོན་དུ་ཞུགས་ཡོད་པ་དང་། སྐབས་དེར་ཁོང་ལ་དགུང་གྲངས་ ༡༡ ཕེབས་པའི་༸རྒྱལ་དབང་སྐུ་ཕྲེང་བཅུ་བཞི་བ་ཆེན་པོ་མཆོག་དང་མཇལ་འཕྲད་ཀྱི་གོ་སྐབས་དང་པོ་དེ་ཐོབ་ཡོད། ༡༩༤༥ ལོའི་ལོ་མཇུག་སྒང་ཏོག་ཏུ་གནས་སྤོ་བྱས་ཡོད་པ་དང་། ༡༩༤༧ ལོར་རྒྱ་གར་རང་བཙན་ཐོབ་རྗེས་བོད་དུ་ཕྱིར་ལོག་བྱས་པས་བོད་གཞུང་གི་གཞུང་ཞབས་མཚན་གནས་ཐོག བོད་ནང་རླུང་འཕྲིན་དང་ཏར་འཕྲིན་རྒྱང་སྲིང་ལས་ཁུངས་གསར་འཛུགས་ཀྱི་ལས་གཞིའི་ཐོག་ལས་བཀོད་གནང་བ་བཞིན་བོད་ནང་རླུང་འཕྲིན་དང་ཏར་འཕྲིན་རྒྱང་སྲིང་གི་ལས་གཞི་ཡོངས་རྫོགས་འགན་འཁུར་རྐང་བཞེས་གནང་སྟེ་བོད་ནང་ཏར་འཕྲིན་གསར་འཛུགས་གནང་བ་མ་ཟད། བོད་མི་ཁག་ཅིག་ལ་ཏར་འཕྲིན་འཛུགས་རྒྱུའི་ལས་གཞིའི་ཟབ་སྦྱོང་ཡང་གནང་ཡོད། ལྷ་སར་ལོ་གཅིག་ཞབས་ཕྱི་ཞུས་རྗེས་གཞུང་གི་བཀོད་མངགས་ལྟར་ལྷ་ས་དང་ཆབ་མདོ་དབར་རྒྱང་སྲིང་མཐུད་རྒྱུ་དང་། བོད་ས་ཡོངས་སུ་རྒྱང་སྲིང་འབྲེལ་མཐུད་ཡོང་ཆེད་ཁོང་སློབ་ཕྲུག་གསུམ་དང་ལྷན་དུ་ཆབ་མདོར་བསྐྱོད་ཡོད།

༡༩༥༠ ལོར་རྒྱ་ནག་བཙན་འཛུལ་དམག་གིས་ཁོང་ལ་གསང་ཉུལ་དང་དམར་ཤོག་ལ་འགལ་ཟླའི་དྲིལ་བསྒྲགས་བྱས་པའི་ཉེས་འཛུགས་འོག་འཛིན་བཟུང་བྱས་ཏེ་ལོ་ ༥ ཙམ་བཙོན་འཇུག་གི་ཉེས་ཆད་བཏང་། ༡༩༥༤ ལོར་ཉེས་མེད་ཉེས་འཛུགས་ཀྱིས་ལོ་ ༡༠ བཙོན་འཇུག་ཁྲིམས་ཐག་བཅད་ནའང་ ༡༩༥༥ ལོ་ཀློད་གྲོལ་བཏང་བ་དང་འབྲེལ་རྒྱ་ནག་ནས་ཕྱིར་འབུད་བྱས། ༡༩༥༧ ལོར་ཁོང་རང་ཉིད་ཀྱི་ཉམས་དང་འབྲེལ་ནས་ ༼བོད་ནང་འཛིན་བཟུང་༽ ཞེས་པའི་དེབ་ཅིག་དཔར་འགྲེམས་གནང་བ་དང་། ༡༩༦༠ ལོར་དེར་སླར་ཡང་༸གོང་ས་མཆོག་གི་ཆེད་བརྗོད་བསྩལ་ཏེ་པར་འགྲེམས་ཞུས། ༡༩༥༧ ལོར་དབྱིན་ཡུལ་ཕྱི་སྲིད་ལས་ཁུངས་ཀྱི་ལས་བྱེད་ཁོངས་སུ་འཛུལ་ཞུགས་བྱས་པ་དང་། ༡༩༨༣ ལོའི་བར་ཝེ་ཐི་ནམ་དང་ཧིན་རྡུ་ནི་ཤི་ཡཱ། ཨ་རི། མོ་རོ་ཁོ། ཨན་གྷོ་ལཱ། ཧྥ་རན་སི། སི་ཝེ་ཌེན་བཅས་དང་། མཐའ་མ་སུད་སི་ཇི་ནེ་ཝར་དབྱིན་གཞུང་གི་གཞུང་ཚབ་བཅས་ཀྱི་འགན་འཁུར་ཞུས་ཏེ། ༡༩༨༢ ལོར་ (Commander of the Order of the British Empire) ཞེས་པའི་ཆེས་མཐོའི་གཟེངས་རྟགས་ཐོབ་ཡོད།

ཁོང་ནི་ (Tibet Society) ཞེས་འཛམ་གླིང་ནང་བོད་དོན་རྒྱབ་སྐྱོར་ཚོགས་པ་ཐོག་མ་དབུ་འཛུགས་གནང་མཁན་གྱི་གྲས་ཡིན་པ་དང་། ད་ལྟའི་བར་ཚོགས་པ་དེའི་ཚོགས་གཞོན་མཚན་གནས་ཐོག་འགན་འཁུར་རྒྱུན་མཐུད་གནང་ཡོད་པ་དང་། བོད་དོན་ཐོག་རྩོམ་སྒྲིག་དང་གསུང་བཤད་སོགས་འཛམ་གླིང་ཕྱོགས་གང་སར་གནང་ཡོད། ཁོང་གིས་བོད་རང་བཙན་ཡིན་པའི་གནས་སྐབས་ཀྱི་དཔང་པོ་གཙོ་བོ་ཁོང་རང་ཡིན་སྐོར་ཐེངས་མང་གསུངས་མྱོང་ཡོད།  ༡༩༩༦ ཟླ་ ༧ ཚེས་ ༡༧ ཉིན་༸གོང་ས་མཆོག་དབྱིན་ཡུལ་གྱི་རྒྱལ་མོ་(Her Majesty Queen Elizabeth) མཆོག་མཇལ་འཕྲད་མཛད་རྒྱུའི་ཐོག་གོ་སྒྲིག་ཞུ་སྒོ་ལེགས་པར་ཞུས་ཡོད། འདི་ལོའི་ཟླ་ ༣ ཚེས་ ༢༡ ཉིན་དབྱིན་ཡུལ་སྐུ་ཚབ་དོན་གཅོད་ཁང་གི་གོ་སྒྲིག་འོག་ཁོང་གི་གཉེན་ཉེ་དང་དབྱིན་ཡུལ་ཁུལ་གནས་སྡོད་བོད་མི་རྣམས་ཀྱིས་སྐུ་ཁོང་དགུང་ལོ་ ༩༠ ཕེབས་པའི་སྐྱེས་སྐར་སྔ་སྣུར་གྱིས་ཕྱི་ཟླ་ ༣ ཚེས་ ༢༣ ཉིན་སྲུང་གཙི་ཞུས་ཡོད་པ་དང་། སྐབས་དེར་ཁོང་དེ་སྔོན་བོད་གཞུང་དགའ་ལྡན་ཕོ་བྲང་གི་གཞུང་ཞབས་གནང་མྱོང་བའི་དྲན་རྟེན་ཆེད་བོད་དངུལ་དངུལ་སྲང་ ༡༠༠ ཐམ་པ་ཕུལ་བ་དང་། ཕྱི་ཟླ་ ༤ ཚེས་ ༡༣ ཉིན་རྒྱལ་སྤྱིའི་བོད་དོན་ལས་འགུལ་ཁང་གིས་ཁོང་ལ་ (Light of Truth Award) ཞེས་པའི་གཟེངས་བསྟོད་ཕུལ་སྐབས་༸གོང་ས་མཆོག་གིས་དངོས་སུ་འབུལ་ལམ་ཞུས་ཡོད་འདུག

གསར་འགོད་པ། དོན་གོ