ཇོ་ལེབས་ཟླ་བ་ཀློད་གྲོལ།

བོད་ནང་གི་༼དུས་རབས་ཀྱི་ང་༽ཞེས་པའི་དུས་དེབ་ཀྱི་རྩོམ་སྒྲིག་པ་ཇོ་ལེབ་ཟླ་བ་ལགས། དེ་རིང་ཞོགས་པར་བཙོན་འཇུག་དུས་ཡུན་རྫོགས་ཏེ་ཀློད་གྲོལ་ཐོབ་ཡོད་འདུག

རྒྱ་ནག་གཞུང་གིས་ཕྱི་ལོ་ ༢༠༡༠ ལོར་བོད་ནང་གི་༼ དུས་རབས་ཀྱི་ང་༽ ཞེས་པའི་དུས་དེབ་ཀྱི་རྩོམ་སྒྲིག་པ་དང་རྩོམ་པ་པོ་ཇོ་ལེབས་ཟླ་བ་ལགས། རྒྱལ་ཁབ་ཁ་བྲལ་གྱི་ཉེས་མིང་འོག་འཛིན་བཟུང་གིས་ལོ་ ༣ བཙོན་འཇུག་ཁྲིམས་ཐག་བཅད་ཡོད་པ་ལྟར། དེ་རིང་ཕྱི་ཚེས་ ༣༠ ཉིན་གྱི་ཞོགས་པའི་ཆུ་ཚོད་ ༩།༠༠ ཡས་མས་སུ་ཁོང་གི་བཙོན་འཇུག་དུས་ཡུན་རྫོགས་ཏེ་སི་ཁྲོན་མེན་ཡཱང་བཙོན་ཁང་གིས་ཀློད་གྲོལ་བཏང་ཡོད་འདུག 

ཇོ་ལེབས་ཟླ་བ་ལགས་ནི་སི་ཁྲོན་རྔ་བ་ཁུལ་རྔ་བ་རྫོང་ཇོ་ལེབས་སྡེ་བའི་ལྟག་ཀ་ཚང་གི་བུ་ཡིན་པ་དང་། བཞག་ལྡོམ་བོད་ཡིག་སློབ་འབྲིང་དང་དར་རྩེ་མདོ་དགེ་འོས་སློབ་གྲྭ་བཅས་ནས་སློབ་མཐར་ཕྱིན་ཡོད་འདུག ཕྱིས་སུ་རྔ་བའི་གྲོང་སྡེའི་སློབ་གྲྭ་ཞིག་གི་དགེ་རྒན་གནང་ཞོར་དུ་༼དུས་རབས་ཀྱི་ང་༽ཞེས་པའི་དུས་དེབ་ཀྱི་རྩོམ་སྒྲིག་པ་གནང་ཡོད་འདུག་ལ། ཕྱི་ལོ་ ༢༠༠༦ ལོར་རྔ་བར་བོད་མི་ཚོས་པགས་རིགས་ཀྱི་རྒྱན་གོས་མེར་བསྲེགས་གཏོང་སྐབས། ལས་འགུལ་སྣེ་ཁྲིད་བྱས་པའི་ཉེས་མིང་འོག་ཟླ་གཅིག་ཙམ་རིང་རྔ་བ་རྫོང་དུ་འཛིན་བཟུང་བཀག་ཉར་བྱས་ཡོད་པ་དང་།  ༢༠༠༨ ལོའི་ཕྱི་ཟླ་ ༣ ཚེས་ ༡༦ ཉིན་གྱི་ཞོགས་ཀར་རང་ཁྱིམ་ནས་ཉེན་རྟོག་པས་འཛིན་བཟུང་བྱས་ཏེ་ཟླ་ཤས་རིང་བཀག་ཉར་བྱས་ཡོད་པ་མ་ཟད། ༢༠༡༠ ཟླ་ ༡༠ པའི་ཚེས་ ༡ ཉིན་རྔ་བ་ཁུལ་གྱི་བདེ་འཇགས་མི་སྣས་རྒྱ་ནག་གི་ཁྲིན་ཏུའུ་གྲོང་ཁྱེར་ནས་འཛིན་བཟུང་བྱས་ཏེ། རྒྱལ་ཁབ་ཁ་བྲལ་གྱི་ཉེས་མིང་འོག་ལོ་ ༣ ཁྲིམས་ཐག་བཅད་དེ་ད་ལྟའི་བར་མེན་ཡཱང་བཙོན་ཁང་དུ་བཙོན་འཇུག་བྱས་ཡོད།

༢༠༡༠ ལོར་ཁོང་འཛིན་བཟུང་བྱས་རྗེས་རྔ་བ་ཁུལ་ཁྲོ་ཆུ་རྫོང་དུ་བཀག་ཉར་བྱས་ཡོད་པ་དང་། སྐབས་དེར་རྔ་བ་རྫོང་ཉེན་རྟོག་མི་སྣས་ཁོའི་ཆུང་མ་འཛམ་ལྷས་རྫོང་ཐོག་ཏུ་གཉེར་གྱིན་པའི་དཔེ་ཚོང་ཁང་དང་རང་ཁྱིམ་བཅས་སུ་སྔོག་བཤེར་བྱས་ཏེ། གློག་ཀླད་དང་དེབ་གཟུགས་མ་ཡིན་པའི་རྩོམ་ཡིག་གང་མང་ཞིག་འཁུར་ཡོད་འདུག 

དེ་རིང་ཕྱི་ཚེས་ ༣༠ ཉིན་གྱི་ཞོགས་པར་ཁོང་ཀློད་གྲོལ་སྐབས་གཟུགས་པོ་སྔར་ལས་སྐམ་དུ་སོང་ཡོད་པ་ལས། གཟུགས་གཞིའི་གནས་སྟངས་གང་འདྲ་ཆགས་ཡོད་མེད་ད་ལྟའི་ཆར་ཤེས་རྟོགས་ཐུབ་ཡོད་མི་འདུག