སེམས་མ་འདུལ་བའི་དབང་གིས་རང་གཞན་གཉིས་འཕོངས་ཀྱི་ཡོད།

དེ་རིང་སྔ་དྲོར་དྷ་ས་གཙུག་ལག་ཁང་དུ་༧གོང་ས་མཆོག་གིས་ཐའེ་ཝན་གྱི་ཆོས་ཞུ་བ་གཙོས་པའི་སྐྱ་སེར་ལྔ་སྟོང་ལྷག་ལ་གསུང་ཆོས་དབུ་འཛུགས་གནང་སྐབས། ཁོང་གིས་མིའི་སྤྱི་ཚོགས་ནང་རྣམ་གཞག་མང་པོ་ཞིག་ཡོད་པ་དེ་བདེ་སྐྱིད་བསྒྲུབ་པའི་ཆེད་རེད་མ་གཏོགས་རྙོག་དྲ་བཟོ་བའི་དོན་དུ་མ་རེད་ཅེས་གསུངས་སོང༌།

དེ་རིང་སྔ་དྲོའི་ཆུ་ཚོད་༨ ཙམ་ལ་དྷ་ས་ཐེག་ཆེན་ཆོས་གླིང་གཙུག་ལག་ཁང་དུ། ྋགོང་ས་མཆོག་གིས་ཐའེ་ཝན་གྱི་ནང་པ་ཚོ་གཙོ་བོར་གྱུར་བའི་ཆོས་ཞུ་བ་ཚོར་རྗེས་ཙོང་ཁ་པས་མཛད་པའི་༼ལམ་རིམ་བསྡུས་དོན༽དང༌། སློབ་དཔོན་འཕགས་པ་ཀླུ་སྒྲུབ་ཀྱིས་མཛད་པའི༼རིགས་པ་དྲུག་ཅུ་བ༽བཅས་ཀྱི་གསུང་ཆོས་དབུ་འཛུགས་གནང་ཡོད་པ་དང༌། ཐེངས་འདིའི་ཉིན་ ༣ དང་ཕྱེད་རིང་གི་གསུང་ཆོས་ལ་ཐའེ་ཝན་ནས་ཆོས་ཞུ་བ་ ༩༠༠ དང་རྒྱ་ནག་སྐམ་ས་ཆེན་མོ་ནས་མི་ ༣༣ གཙོས་རྒྱལ་ཁབ་ཁག་ ༥༤ ཙམ་ནས་ཡོང་བའི་ནང་ཆོས་དོན་གཉེར་བ་དང༌། དེ་བཞིན་དྷ་ས་ཁུལ་གྱི་སེར་སྐྱ་མི་མང་བཅས་ཁྱོན་མི་གྲངས་ ༥༢༢༠ ལྷག་འཛོམས་འདུག

གསུང་ཆོས་དབུ་འཛུགས་སྐབས་༧གོང་ས་མཆོག་གིས་བར་སྐབས་ཤིག་ལ་རྒྱ་ནག་ནང་ཤེས་རབ་སྙིང་པོ་འདོན་རྒྱུའི་ལམ་སྲོལ་ཉམས་སོང་བ་དེར་ཐུགས་སྐྱོ་བོ་བྱུང་སྐོར་གསུངས་དོན། “ ཕྱི་ལོ་ ༡༩༦༥  དང་ ༡༩༦༦ ཙམ་ལ་ང་མཱ་ལེ་ཞི་ཡ་དང་སངྒ་ཕོར་ཕྱིན་པ་རེད། སྐབས་དེར་གྲྭ་བ་ཚོ་དང་མཉམ་དུ་ཤེས་རབ་སྙིང་པོ་བཏོན་པ་ཡིན། སྔ་མོ་ཡིན་ན་རྒྱ་ནག་ནང་ནང་པ་མང་པོ་ཞིག་གིས་ཤེས་རབ་སྙིང་པོ་འདོན་གྱི་ཡོད་ཀྱང་བར་སྐབས་ཉམས་པ་རེད་བསམ་ནས་སེམས་ཏོག་ཙམ་སྐྱོ་བོ་བྱུང༌། ཡིན་ནའང༌། སྐབས་ཤིག་ནས་དྷ་རམ་ས་ལ་རུ་ཐའེ་ཝན་གཙོ་བོར་གྱུར་བའི་ཆོས་གྲོགས་ཚོ་དང་ལོ་ལྟར་ཐུག་སྟེ། ང་ཚོ་མཉམ་དུ་ཤེས་རབ་སྙིང་པོའི་ཚིག་འདོན་ཙམ་དུ་མ་ཟད། ཤེས་རབ་སྙིང་པོའི་དོན་དག་ལའང་བསམ་བློ་གཏོང་བའི་གོ་སྐབས་ཡོང་གི་ཡོད་པ་དང༌། དེ་བཞིན་ཧོང་ཀོང་དང་སངྒ་ཕོར། མཱ་ལེ་ཞི་ཡ། རྒྱ་ནག་སྐམ་ས་ཆེན་མོ་བཅས་ནས་ཡོང་བའི་ཆོས་གྲོགས་མང་པོ་མཉམ་དུ་འདུས་ཏེ་ཆོས་ཉམས་ལེན་བྱེད་རྒྱུ་བྱུང་བ་རེད། ཁྱེད་རང་ཚོ་ལམ་དང་ལུགས་སྲོལ་ལྟ་བུ་མ་ཡིན་པར་སངས་རྒྱས་པའི་ཆོས་ལ་དོ་སྣང་སླེབ་ཀྱིན་ཡོད་པ་དང༌། དེ་བཞིན་རྒྱ་ནག་ནང་ལོགས་ལ་ཆ་བཞག་ནའང༌། དེ་རིང་ཁ་སང་ནང་པ་ས་ཡ་ ༤༠༠ ལྷག་ཅིག་ཡོད་པར་ཤོད་ཀྱི་འདུག་སྟབས། དེ་དངོས་གནས་དགའ་སྤྲོ་སྐྱེས་དགོས་པ་ཞིག་རེད། ”ཅེས་གསུངས་སོང༌།

ཡང་ཁོང་གིས། “ཆོས་ཕྱོགས་ཀྱི་ཐོག་ནས་དུག་གསུམ་ཟེར་བ་དེ་སྐྱོན་རེད་ཅེས་བཤད་པ་ཙམ་མ་ཡིན་པར། ང་རང་ཚོས་འཛམ་གླིང་འདིའི་སྒང་ལ་ཞིབ་འཇུག་ཡག་པོ་བྱས་པ་ཡིན་ན། འདོད་ཆགས་དང་ཞེ་སྡང་གཉིས་ཀྱིས་རྙོག་དྲ་མང་པོ་ཞེ་དྲག་ཅིག་བཟོ་བཞིན་ཡོད་པ་རེད། དེའི་རྩ་བ་དེ་མ་ཤེས་པ་དང་མ་རིག་པ་ཟེར་བ་དེར་ཐུག་ཡོད། རང་གཞན་སུ་ཡིན་ནའང་བདེ་བ་འདོད་པ་དང་སྡུག་བསྔལ་མི་འདོད་ཀྱང༌། སེམས་མ་འདུལ་བའི་ཐོག་ནས་འཕོངས་ཡོང་གི་ཡོད་པ་རེད། དུག་གསུམ་ཉོན་མོངས་སེལ་བར་ཉོན་མོངས་པ་མེད་པར་གྱུར་ཅིག་ཅེས་སྨོན་ལམ་རྒྱག་པ་དང༌། སངས་རྒྱས་བཅོམ་ལྡན་འདས་ལ་བདག་ཅག་གི་རྒྱུད་ཀྱི་ཉོན་མོངས་དུག་གསུམ་དེ་བྱིན་རླབས་ཀྱིས་སེལ་རོགས་གནོངས་ཞེས་གསོལ་བ་བཏབ་ནས་སེལ་ཐུབ་པ་མ་རེད། འོ་ན། རྒྱུ་ཉོན་མོངས་དུག་གསུམ་དང་དེས་བསྐྱེད་པའི་ང་ཚོའི་སྡུག་བསྔལ་རྣམས་ག་འདྲ་སེལ་དགོས་པ་རེད་ཟེར་ན། ཆོས་རྣམ་འབྱེད་ཀྱི་ཤེས་རབ་དང་ལྷག་པར་དེ་ཁོ་ན་ཉིད་ཀྱི་གནས་ལུགས་ཤེས་པའི་ཤེས་རབ་ཁོ་ནས་སེལ་ཐུབ་པ་རེད། ”ཅེས་གསུངས་སོང༌།

ཁོང་གིས་མུ་མཐུད་དུ་གསུངས་དོན། “སྐད་དང་ཡི་གེའི་ཐོག་ནས་མིའི་སྒོ་ལྔའི་ཤེས་པའི་ཡུལ་དུ་ཡོད་པ་དེ་གཅིག་པུ་མ་ཡིན་པར་ཡིད་བློའི་སྟེང་ནས་རྣམ་གཞག་མང་པོ་ཞིག་ལ་བསམ་བློ་བཏང་སྟེ། མིའི་སྤྱི་ཚོགས་ནང་དུ་རྣམ་གཞག་མང་པོ་ཞིག་ཡོད་པ་རེད། དེ་ཚོའི་དམིགས་ཡུལ་ནི་བདེ་སྐྱིད་སྒྲུབ་པའི་ཆེད་རེད་མ་གཏོགས་རྙོག་དྲ་བཟོ་བའི་དོན་དུ་ཕལ་ཆེར་བྱུང་ཡོད་པ་མ་རེད། དེ་འདྲ་ཞིག་གི་ཐོག་ནས་ཆོས་བརྒྱུད་མི་འདྲ་བ་མང་པོ་ཞིག་ལ་ཕལ་ཆེར་ལོ་སྟོང་ཕྲག་བཞི་ལྔ་ཞིག་ནས་དད་པ་ཆགས་པ་དང༌། དད་པ་ཟེར་བ་དེས་མི་ལ་དཀའ་ངལ་འཕྲད་ནས་སོ་སོའི་ནུས་པའི་ཐོག་ནས་དཀའ་ངལ་དེ་སེལ་མ་ཐུབ་པ་ཞིག་ཆགས་ཡོང་དུས། མིའི་སེམས་ཀྱི་རེ་བ་མི་བརླག་པར་འཛིན་ཐུབ་པ་ཞིག་ཡོང་གི་ཡོད་པ་རེད།  དེ་བཞིན། དུད་འགྲོ་ཚུན་ཆད་ཀྱིས་ཀྱང་བརྩེ་བ་ཟེར་བ་དེ་ལ་དགའ་བོ་བྱེད་ཀྱི་ཡོད་པ་རེད། གཞན་གྱིས་རང་ཉིད་ལ་བརྩེ་བ་བྱས་པ་ཡིན་ན། དུད་འགྲོ་ཡིན་ནའང་ཁོ་རང་ཚོ་ཕན་ཚུན་འཆམ་པོ་དང་ཞི་བདེ་བག་ཕེབས་ཡོང་གི་ཡོད་པ་རེད། བརྩེ་བ་མེད་པར་ཁྲོ་བ་དང་སྡང་སེམས་ཡོད་པ་ཡིན་ན། དུད་འགྲོ་ཡིན་ནའང་ཕན་ཚུན་གཡོལ་ནས་འདུག་པ་མ་གཏོགས་འཆམ་པོ་ཡོང་གི་མི་འདུག་གཱ། མིའི་སྤྱི་ཚོགས་ནང་དུའང་བརྩེ་བ་ཟེར་བ་དེ་ང་ཚོ་ཐོག་མ་སྐྱེས་པའི་སྐབས་ནས་མ་ལ་བརྟེན་ནས་སྐྱེས་པ་དང༌། མ་ཡི་ནུ་ཞོས་འཚོས། མ་ཡི་བརྩེ་བས་བསྐྱངས་པ་སོགས་བརྩེ་བ་ནི་རྩ་ཆེན་པོ་ཞེ་དྲག་ཅིག་ཆགས་ཡོད་སྟབས། ཆོས་ལུགས་ཚང་མའི་ནང་དུ་བརྩེ་བ་ཟེར་བ་དེ་གལ་ཆེན་པོར་ངོས་འཛིན་གྱིས་ཚང་མས་བཤད་ཡོང་གི་ཡོད་ལ།  དད་པ་དེ་བརྩེ་བ་གོང་འཕེལ་གཏོང་བའི་རྒྱུ་མཚན་དུ་བགྲང་གི་ཡོད་པ་འདྲ་བོ་ཞིག་འདུག ”ཅེས་གསུངས་སོང༌།

༧གོང་ས་མཆོག་གིས་ཕྱི་དངོས་པོ་ལས་ནང་ཤེས་པའི་སྐོར་ལ་དོ་སྣང་གནང་གལ་ཆེ་སྐོར་གསུངས་དོན། “ དུས་རབས་ཉི་ཤུ་པའི་སྨད་ནས་བཟུང་དངོས་པོ་ཡར་རྒྱས་ཤུགས་ཆེན་པོ་ཕྱིན་པ་དེས་མི་ལ་ཕན་ཐོགས་ཞེ་དྲག་བྱུང་ཡོད་ཀྱང༌། མི་གསོད་པར་ཡང་ནུས་པ་ཆེན་པོ་ཐོན་ཡོད་པ་རེད། དཔེར་ན། རྡུལ་ཕྲན་མཚོན་ཆ་ལྟ་བུ་ཞིག་ལ་ཆ་བཞག་པ་ཡིན་ན། མིའི་རིགས་ཀྱིས་དངངས་སྐྲག་བྱེད་དགོས་ས་ཞིག་ཆགས་ཡོད། ད་ལྟ་འཛམ་བུ་གླིང་འདིའི་སྒང་ལ་རྡུལ་ཕྲན་མཚན་ཆ་ཡོད་པ་ཚང་མ་བེད་སྤྱོད་བཏང་བ་ཡིན་ན། འཛམ་བུ་གླིང་དུམ་བུ་གཉིས་གསུམ་དུ་གཏོར་ཐུབ་པའི་ནུས་པ་ཡོད་སྟབས། འགྲེལ་བཤད་བརྒྱབ་ཡོང་དུས་དངོས་གནས་ཞེད་སྣང་སྐྱེས་བ་ཞིག་འདུག དེ་ཚོ་ཚན་རིག་ཡར་རྒྱས་ཕྱིན་པའི་ཐོག་ནས་བྱུང་བ་ཡིན་དུས། ཚན་རིག་དང་འཕྲུལ་ཆས་རྐྱང་རྐྱང་གི་ཐོག་ནས་ཡར་རྒྱས་ཕྱིན་པ་དེས་མིའི་སེམས་ལ་བདེ་སྐྱིད་སྒྲུབ་མི་ཐུབ་པ་དང༌། འཛམ་བུ་གླིང་འདིར་མཐའ་གཅིག་ཏུ་ཞི་བདེ་ཡོང་ཐུབ་རྒྱུ་ཁག་པོ་ཡིན་པ་མཐོང་སྟེ།  དེང་སང་ཚན་རིག་པ་ཚོས་ཀྱང་ཕྱི་དངོས་པོའི་ཡར་རྒྱས་ཁོ་ན་མ་ཡིན་པར་ནང་ཤེས་པའི་སྐོར་ལ་ཉམས་ཞིབ་བྱེད་པའི་དུས་སྐབས་ཤིག་ལ་བསླེབས་བསྡད་ཡོད་པ་རེད། ”ཅེས་སོགས་གསུངས་སོང༌།

གསར་འགོད་པ། པདྨ་མཚོ།