ང་ཚོར་དམངས་གཙོ་དགོས་ལབ་ན་ལམ་ཁ་མང་པོ་ཞིག་འགག་འགྲོ་བ་རེད།

ཁ་སང་ཕྱི་དྲོར་བོད་རྒྱལ་ཡོངས་མང་གཙོ་ཚོགས་པས་༼མང་གཙོ་གླེང་བ༽ཞེས་པའི་བརྗོད་གཞིའི་ཐོག་བགྲོ་གླེང་ཞིག་གོ་སྒྲིག་གནང་བའི་ཐོག དེང་སྐབས་ང་ཚོས་དམངས་གཙོ་རྩོད་ཀྱི་མེད་ལབ་པ་དེ་གསར་པ་གང་ཡང་མ་རེད། བཀའ་ཤག་སྔོན་མའི་སྲིད་བྱུས་ཤིག་རེད། འདྲོག་ལང་གི་ཡོད་ན་སྐབས་དེར་མ་གླེང་དོན་ཅི་ཡིན་གསུངས་སོང་།

ཁ་སང་ཕྱི་དྲོའི་ཆུ་ཚོད་ ༤ པ་ཡོལ་ཙམ་ལ་དྷ་ས་ཉིན་སློབ་རྒྱལ་ཡུམ་ཆེན་མོ་ཚོགས་ཁང་དུ། བོད་རྒྱལ་ཡོངས་མང་གཙོ་ཚོགས་པའི་གོ་སྒྲིག་འོག ༼ མང་གཙོ་གླེང་བ༽ཞེས་པའི་བརྗོད་གཞིའི་ཐོག་བགྲོ་གླེང་ཞིག་ཚོགས་ཡོད་པ་དང་། གཏམ་བཤད་པར་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་དང་། སྤྱི་འཐུས་འབའ་བ་སྐལ་བཟང་རྒྱལ་མཚན་ལགས། སྤྱི་འཐུས་ཟླ་བ་ཕུན་སྐྱིད་ལགས་བཅས་ཀྱིས། དམངས་གཙོའིི་དོན་སྙིང་ཅི་ཡིན་པ་དང་། རྒྱ་ནག་གི་རྩ་འཛིན་ཡིག་ཆར་མང་གཙོར་ངོས་འཛིན་ཇི་ལྟར་བྱེད་ཀྱི་ཡོད་པ། དེ་བཞིན། ༧གོང་ས་མཆོག་གིས་མང་གཙོར་ཐུགས་རེ་ཇི་ལྟར་གནང་གི་ཡོད་པའི་སྐོར་སོགས་ལ་བགྲོ་གླེང་གནང་སོང་། བགྲོ་གླེང་ཐོག་དྷ་ས་ཁུལ་གྱི་གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་དང་སེར་སྐྱ་མི་མང་ ༡༠༠ མ་ཟིན་ཙམ་འཛོམས་སོང་ལ། བགྲོ་གླེང་ཐོག་གསར་ཁང་དག་ནས་བཏོན་པའི་དྲི་བ་ཁག་ཅིག་ལ་ལན་འདེབས་ཀྱང་གནང་སོང་།

ཐོག་མར་དབུས་བོད་རྒྱལ་ཡོངས་མང་གཙོ་ཚོགས་པའི་ཚོགས་གཙོ་དགེ་ལེགས་འཇམ་དབྱངས་ལགས་ཀྱིས་བགྲོ་གླེང་གི་དགོས་དམིགས་ངོ་སྤྲོད་གནང་དོན་ལྟར་ན། བོད་ཀྱི་དམངས་གཙོ་ནི་གངས་ལྗོངས་སྲུང་སྐྱོབ་དང་། བོད་མིའི་ཐོབ་ཐང་དང་མདུན་ལམ་རྩོད་ལེན་བཅས་ཀྱི་ཐད་དགོས་མཁོ་ཤིན་ཏུ་ཆེ་བའི་ལམ་ལུགས་ཤིག་ཏུ་ངོས་འཛིན་གསལ་བོ་ཡོད་ཐོག ཚོགས་པ་འདིའི་ངོས་ནས་ལོ་ངོ་ ༢༠ མ་ཟིན་ཙམ་གྱི་རིང་བོད་མིའི་དམངས་གཙོ་ཡར་རྒྱས་དང་རྒྱུན་འཛིན་བྱེད་པར་དམིགས་པའི་ལས་འགུལ་ཅི་སྙེད་ཅིག་བསྒྲུབས་དང་སྒྲུབ་མུས་ཡིན་ལ།  དེ་རིང་གི་བགྲོ་གླེང་འདི་ཡང་དམངས་གཙོའི་གོ་རྟོགས་སྤེལ་བའི་ལས་འགུལ་ཞིག་ཡིན་ཚུལ་སོགས་བརྗོད་སོང་།

དེ་རྗེས་མང་གཙོ་ཚོགས་པའི་དྲུང་ཆེ་སེར་སྨད་བློ་དགའ་ལགས་ཀྱི་གཙོ་སྐྱོང་འོག་བགྲོ་གླེང་དབུ་འཛུགས་གནང་སྟེ། སྤྱི་འཐུས་ཟླ་བ་ཕུན་སྐྱིད་ལགས་ཀྱིས་༼༧གོང་ས་མཆོག་གིས་མང་གཙོར་ཐུགས་རེ་ཇི་ལྟར་གནང་ཡོད་དམ།༽ཞེས་པའི་བརྗོད་གཞིའི་འོག ༧གོང་ས་མཆོག་དགུང་གྲངས་ ༡༦ ཐོག་བོད་ཀྱི་ཆོས་སྲིད་གཉིས་ཀྱི་ཐུགས་འགན་བཞེས་པ་ནས་བཟུང་བོད་དེ་དམངས་གཙོའི་ལམ་དུ་སྐྱོད་པའི་ས་བོན་བཏབ་པ་རྒྱལ་རབས་ལོ་རྒྱུས་ཀྱི་ནང་དུ་ཞིབ་ཕྲ་གསལ་བ་དང་།  དམིགས་བསལ་གྱིས་དགུང་ལོ་ ༡༧ ལ་ཕེབས་སྐབས་བོད་ནང་ལ་ལེགས་བཅོས་ལས་ཁུངས་གསར་འཛུགས་དང་འབྲེལ་བའི་ལས་གཞི་རབས་དང་རིམ་པ་མང་པོ་མགོ་འཛུགས་གནང་ཡོད་ཀྱང་། རྒྱ་ནག་གི་བཙན་འཛུལ་རྐྱེན་ངན་འོག་ལས་གཞི་དེ་དག་ལེགས་འགྲུབ་མ་བྱུང་བར་ ༡༩༥༩ ལོར་རྒྱ་གར་ལ་བཙན་བྱོལ་དུ་ཡོང་དགོས་བྱུང་བ་དང་། བཙན་བྱོལ་བོད་མི་ཚོའི་སེམས་ལ་སང་ཉིན་གནངས་ཉིན་དང་ཟླ་ཤས་རྗེས་བོད་དུ་ལོག་ཐུབ་པའི་རེ་བ་དང་དཀའ་ངལ་ཆེན་པོ་ཞིག་གི་གནས་བབ་འོག ༧གོང་ས་མཆོག་གིས་བོད་རྒྱལ་ཁབ་ཀྱི་མ་འོངས་འཛུགས་སྐྲུན་དང་བརྟན་བརླིང་ཡོང་བར་དམངས་གཙོའི་ལམ་ལུགས་གལ་ཆེན་དུ་གཟིགས་ཏེ། ཕྱི་ལོ་ ༡༩༦༠ ཟླ་ ༩ ཚེས་ ༢ ལ་འཐུས་མི་ ༡༣ ཀྱིས་གྲུབ་པའི་བོད་མི་མང་སྤྱི་འཐུས་ཐོག་མ་དེ་དབུ་འཛུགས་གནང་བ་དང་། ༡༩༦༣ ལོར་མ་འོངས་བོད་ཀྱི་རྩ་ཁྲིམས་གཏན་འབེབས་གནང་། ༡༩༩༠ ལོར་བཙན་བྱོལ་བོད་མིའི་བཅའ་ཁྲིམས་ཟིན་བྲིས་ཚོགས་ཆུང་བསྐོ་གཞག་དང་། ༢༠༠༡ ལོར་མི་མང་གི་ཐད་ཀར་འོས་འདེམས་བརྒྱུད་བཀའ་བློན་ཁྲི་པ་པ་འོས་འདེམས་གནང་སྟེ། དམངས་གཙོའི་ལམ་ལུགས་འོག་སྐབས་གཉིས་རིང་ཟམ་གདོང་རིན་པོ་ཆེ་མཆོག་གིས་བཀའ་ཁྲིའི་ཐུགས་འགན་བཞེས་པ་དང་། ༢༠༡༡ ལོར་སྲིད་སྐྱོང་བློ་བཟང་སེང་གེ་མཆོག་སྐབས་གསུམ་པའི་བཀའ་ཁྲིར་འོས་འདེམས་གནང་རྗེས། ༧གོང་ས་མཆོག་གིས་དགོས་པ་དང་རྒྱུ་མཚན་མང་པོ་ཞིག་ལ་གཟིགས་ཏེ། དམངས་གཙོའི་ཀ་བ་གསུམ་ལྡན་གྱི་སྒྲིག་འཛུགས་འདི་ལ་འཛིན་སྐྱོང་དང་ཆབ་སྲིད་ཀྱི་སྐུ་དབང་ཆ་ཚང་གསོལ་རིས་སུ་གནང་སྟེ། བོད་ཙམ་མ་ཟད་འཛམ་བུ་གླིང་ལ་དམིགས་དཔེ་བསྟན་པའི་ཕྱག་ལས་རླབས་ཆེན་གནང་བ་དེ། ༧གོང་ས་མཆོག་གིས་དམངས་གཙོ་ལ་ཐུགས་རེ་ག་ཚོད་ཅིག་གནང་གི་ཡོད་པའི་དཔེ་མཚོན་གསལ་ཤོས་ཤིག་ཆགས་ཡོད་སྐོར་སོགས་བཙན་བྱོལ་བོད་མིའི་དམངས་གཙོའི་འཕེལ་རིམ་མདོར་བསྡུས་སུ་ངོ་སྤྲོད་གནང་སོང་།

དེ་ནས་སྤྱི་འཐུས་འབའ་བ་སྐལ་བཟང་རྒྱལ་མཚན་ལགས་ཀྱིས་༼རྒྱ་ནག་གི་རྩ་འཛིན་ཡིག་ཆར་མང་གཙོར་ངོས་འཛིན་ཇི་ལྟར་གནང་ཡོད་དམ༽ཞེས་པའི་བརྗོད་གཞིའི་ཐོག་གཏམ་བཤད་གནང་དོན། “རྒྱ་ནག་གི་རྩ་འཛིན་ཡིག་ཆའི་ནང་དུ་ཁོ་ཚོའི་དམངས་གཙོ་ཡག་ཤོས་ཡིན་པའི་འགྲེལ་བཤད་གསུམ་རྒྱག་གི་ཡོད་པ་རེད། དང་པོ་དཔལ་འབྱོར་ལམ་ལུགས་ཀྱི་རྨང་གཞིའི་ཐོག་ནས་འགྲེལ་བཤད་བརྒྱབ་ཡོད། རྒྱ་ནག་གི་དཔལ་འབྱོར་ལམ་ལུགས་ཡོངས་རྫོགས་གཞུང་ལ་དབང་བ་དང་། གཞུང་ལ་དབང་བའི་དཔལ་འབྱོར་ལམ་ལུགས་ཀྱི་བདག་པོ་མི་མང་ཡིན་པ། མི་མང་གི་འཐུས་མི་མི་མང་འཐུས་མི་ཚོགས་ཆེན་གྱི་འཐུས་མི་ཚོ་ཡིན་ལ། དེས་རྒྱལ་ཁབ་ཀྱི་བདག་དབང་ཡོད་ཚད་བདག་པོ་བརྒྱབ་ཡོད་སྟབས། རྒྱ་ནག་གི་དམངས་གཙོ་དེ་རྒྱ་ཆེན་པོ་དང་མི་མང་ཡོངས་རྫོགས་ཀྱིས་ལག་བསྟར་བྱེད་བཞིན་པའི་དམངས་གཙོ་དེ་རེད། མ་རྩ་རིང་ལུགས་སྤྱི་ཚོགས་ཀྱི་དཔལ་འབྱོར་ལམ་ལུགས་ཡོངས་རྫོགས་སྒེར་ལ་དབང་བ་དང་། མི་ཉུང་ཤས་ཤིག་གིས་རྒྱལ་ཁབ་ཀྱི་དཔལ་འབྱོར་ལམ་ལུགས་ཡོངས་རྫོགས་བདག་བཟུང་དང་ཆབ་སྲིད་སྟངས་འཛིན་བྱེད་བཞིན་ཡོད་སྟབས། ཁོ་ཚོའི་དམངས་གཙོ་དེ་མི་ཉུང་ཤས་ཤིག་གི་རེད་ཟེར་གྱི་ཡོད་པ་རེད། གཉིས་པ། དམངས་གཙོའི་གྲུབ་ཆ་ཡི་ཐོག་ནས་ཤོད་ཀྱི་ཡོད་པ་རེད། རྒྱ་ནག་གི་དམངས་གཙོའི་གྲུབ་ཆ་དེ་བཟོ་བ་གྲལ་རིམ་དང་ཞིང་པ་གྲལ་རིམ་གཉིས་ཡིན་ལ། དམངས་གཙོ་ལག་བསྟར་བྱེད་པའི་གྲུབ་ཆ་ཆེ་ཤོས་དེ་རེད། དེ་གཉིས་ཀྱིས་ཐབས་ཤེས་ག་འདྲ་ཞིག་གི་ཐོག་ནས་དམངས་གཙོ་ལག་བསྟར་བྱེད་དགོས་པ་རེད་ཟེར་ན། བཟོ་པ་གྲལ་རིམ་དེ་རྒྱ་ནག་མགོ་ཁྲིད་མཁན་གྱི་གྲལ་རིམ་ཡིན་པ་དང་། ཞིང་བ་གྲལ་རིམ་དེ་བཟོ་པ་གྲལ་རིམ་གྱི་གནའ་འབྲེལ་གྲལ་རིམ་ཡིན་སྟབས། གྲལ་རིམ་དེ་གཉིས་རྒྱ་ནག་མགོ་ཁྲིད་མཁན་གྱི་གྲལ་རིམ་ཡིན་པ་དང་། གྲལ་རིམ་དེ་གཉིས་ཀྱིས་རྒྱ་ནག་ཀྲུང་ཁྲན་ཏང་དམར་ཤོག་ཚོགས་པ་བཙུགས་ཡོད་སྟབས། དམར་ཤོག་ཚོགས་པས་རྒྱ་ནག་རྒྱལ་ཁབ་དབང་བསྒྱུར་བཞིན་པ་དེས་བཟོ་བ་དང་ཞིང་པ་གྲལ་རིམ་གཉིས་མཚོན་ཡོད་ལ། མི་མང་ཆེ་བས་ལག་བསྟར་བྱེད་པའི་དམངས་གཙོ་དེ་དམངས་གཙོ་གཅིག་སྡུད་དང་སྲིད་དབང་སྒེར་འཛིན་ཆགས་ཀྱི་ཡོད་པ་རེད། དམངས་གཙོ་གཅིག་སྡུད་ག་རེ་རེད་ཟེར་ན། བཟོ་པ་གྲལ་རིམ་དང་ཞིང་བ་གྲལ་རིམ་ཡོངས་རྫོགས་ཀྱི་མང་ཚོགས་གཅིག་ཏུ་བསྡུས་ནས་ལག་བསྟར་བྱས་ཏེ། མི་ཉུང་ཤས་ལ་སྲིད་དབང་སྒེར་འཛིན་བྱེད་དགོས་པ་རེད། སྲིད་དབང་སྒེར་འཛིན་ཅིའི་ཕྱིར་བྱེད་དགོས་པ་རེད་ཟེར་ན། རྒྱལ་ཁབ་མགོ་གཏིང་སློག་མཁན་དང་ལོག་བཤད་རྒྱག་མཁན་ལ་སྲིད་དབང་སྒེར་འཛིན་བྱེད་དགོས་པ་དེ་དམངས་གཙོ་ཡང་དག་པ་ཡིན། མ་རྩ་རིང་ལུགས་ཀྱི་དམངས་གཙོའི་གྲུབ་ཆ་དེ་ཁོ་ཚོར་ཆབ་སྲིད་ཚོགས་པ་ཡོད་ཀྱང་། ཆབ་སྲིད་ཚོགས་པ་ཚང་མ་མ་རྩ་འབྱོར་ལྡན་ཅན་རྐྱང་རྐྱང་གི་རོགས་རམ་འོག་བཙུགས་ཡོད་སྟབས། ཁོ་ཚོའི་འདོད་པ་ལྟར་མ་བྱས་པ་ཡིན་ན། མི་སུ་ཡང་ཆབ་སྲིད་ཀྱི་དབང་ཆའི་ཐོག་ལ་བསླེབ་ཐུབ་ཀྱི་མེད་པས་ནུབ་ཕྱོགས་ཀྱི་དམངས་གཙོ་ཟེར་བ་དེ་དཔལ་འབྱོར་ཡོད་མཁན་ཉུང་ཤས་ཤིག་གི་དམངས་གཙོ་རེད་ཅེས་རྗོད་ཀྱི་ཡོད་པ་རེད། གསུམ་པ། དམངས་གཙོ་ལག་བསྟར་བྱེད་ཕྱོགས་མ་འདྲ་བ་རེད་ཟེར་གྱི་ཡོད་པ་རེད། རྒྱ་ནག་གི་དམངས་གཙོ་ལག་བསྟར་བྱེད་ཕྱོགས་དེ། རྒྱ་ནག་མི་མང་འཐུས་མི་ཚོགས་ཆེན་ཟེར་བ་དེ་རྒྱལ་ཁབ་ཀྱི་དབང་ཆ་མཐོ་ཤོས་ཀྱི་ལས་ཁུངས་ཤིག་ཡིན་ལ། དེར་མི་མང་གིས་འོས་ཤོག་བླུགས་པའི་གདམ་ག་ཡོད་པ་དང་། དེ་དང་མཉམ་དུ་རྒྱ་ནག་ནང་དམངས་གཙོ་ཚོགས་པ་མང་པོ་ཡོད་པ་རྣམས་མགོ་ཁྲིད་མཁན་དང་རྒྱ་ནག་གི་སྲིད་ཀྱི་དབང་ཆ་འཛིན་མཁན་གྱི་ཚོགས་པ་དེ་མིན་ཡང་། རྒྱ་ནག་གཞུང་མཉམ་དུ་ཆབ་སྲིད་གྲོས་མོལ་གྱི་ལམ་ལུགས་ཐོག་ནས་རྒྱལ་ཁབ་ཀྱི་སྲིད་བྱུས་ཡོངས་རྫོགས་གཏན་འབེབས་བྱེད་པའི་ལམ་ལུགས་དེ་དམངས་གཙོ་ཡག་ཤོས་ཡིན་ཟེར་གྱི་ཡོད་པ་རེད། ཡིན་ནའང་། བསྡུས་ཏེ་བཤད་པ་ཡིན་ན། འཛམ་གླིང་གི་རྒྱལ་ཁབ་ ༢༠༠ ཙམ་གྱི་ནང་ནས་མང་ཆེ་བ་དེ་དམངས་གཙོའི་རྒྱལ་ཁབ་ཆགས་ཀྱི་ཡོད་ལ། ཡོངས་གྲགས་ཀྱི་དམངས་གཙོར་འགྲེལ་བཤད་རྒྱག་སྟངས་ལྟར་ན།  དམངས་གཙོའི་སྤྱི་ཚོགས་ཁྲོད་འོས་ཤོག་ལྡུག་པའི་ལམ་ལུགས་ཡོད་མེད་དང་། སྨྲ་བརྗོད་དབང་རང་ཡོད་མེད། རྩོམ་འབྲི་རང་དབང་ཡོད་མེད་སོགས་ཆ་རྐྱེན་མང་པོ་ཞིག་ལ་བལྟ་དགོས་ཡོད། རྒྱ་ནག་གི་རྩ་ཁྲིམས་ནང་དུ་ཆ་རྐྱེན་དེ་ཚོ་གསལ་བོ་བཀོད་ཡོད་ཀྱང་། ལག་བསྟར་བྱེད་ཀྱི་ཡོད་མེད་ང་ཚོ་ཚང་མས་མཁྱེན་གསལ་རེད།”ཅེས་སོགས་གསུངས་སོང་།

མཇུག་ཏུ་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་༼དམངས་གཙོའི་དོན་སྙིང་ཅི་ཡིན༽ཞེས་པའི་ཐོག་གསུང་བཤད་མདོར་བསྡུས་ཤིག་གནང་རྗེས། གསར་ཁང་ཁག་ནས་བཏོན་པའི་ཆེད་དོན་དྲི་བར་ལན་འདེབས་གནང་སོང་། སྐབས་དེར་ཚོགས་གཙོ་མཆོག་ལ་བོད་མིའི་སྒྲིག་འཛུགས་ནས་རྒྱ་ནག་གཞུང་ལ་དམངས་གཙོ་རྩོད་ཀྱི་མེད་པའི་སྐོར་ལ་དགོངས་ཚུལ་ཅི་ཡོད་དྲིས་པར་ཁོང་གིས། “བར་སྐབས་ཤིག་ནས་སྲིད་སྐྱོང་བློ་བཟང་སེང་གེ་མཆོག་གི་བཀའ་ལན་དེར་བོད་པའི་སྤྱི་ཚོགས་ནང་གསར་པ་ལྟ་བུའི་ངོ་བོའི་ཐོག་ནས་གླེང་སློང་མང་པོ་བྱུང་བ་རེད། དེས་ག་རེ་སྟོན་གྱི་ཡོད་པ་རེད་ཟེར་ན། ང་ཚོའི་སྤྱི་ཚོགས་ནང་ཤེས་ཡོན་ཡོད་ཟེར་མཁན་ཡིན་ན་འདྲ། ཆབ་སྲིད་ཀྱི་གོ་རྟོགས་ཡོད་ཟེར་མཁན་ཡིན་ཡང་རེད། གང་ལྟར་གནས་ཚུལ་དེ་འདྲ་ཞིག་བྱུང་སྐབས་འདྲོག་ཐེབས་བདེ་བ་དེ་ནམ་རྒྱུན་དོ་སྣང་སྤྲད་ཀྱི་མེད་པའི་རྟགས་རེད། གལ་སྲིད་དོ་སྣང་སྤྲད་ཡོད་ན། ཡིག་ཆ་སྤྲད་པའི་སྐབས་ལ་ཡོངས་བསྒྲགས་བྱས་པ་རེད། དེ་དུས་བསམ་ཚུལ་བཤད་དགོས་པ་ཞིག་ལས། ད་ལྟ་སྲིད་སྐྱོང་བློ་བཟང་སེང་གེ་མཆོག་གིས་བཤད་པ་ཙམ་གྱིས་གནས་ཚུལ་དེ་གླེང་དགོས་པ་ཞིག་ཆགས་ཀྱི་མེད། ཡིན་ནའང་། ད་ལྟ་ཚོགས་གཙོ་སྒེར་གྱི་བསམ་ཚུལ་ག་རེ་ཡིན་འདྲི་ཡི་ཡོད་པ་རེད། གང་ལྟར་ད་ལྟའི་བོད་ནང་གི་གནས་སྟངས་འདི་འདྲ་ཞིག་གི་འོག ང་ཚོ་བོད་ལ་ལོག་སྟེ་སོ་སོའི་ཆོས་དང་རིག་གཞུང་། སྐད་ཡིག་བཅས་སྲུང་སྐྱོབ་བྱེད་རྒྱུ་གཙོ་བོར་འཛིན་པའི་བསམ་བློ་འཁུར་དགོས་སྟབས། བོད་ནང་ལོག་པ་ཡིན་ན་ལམ་སང་ང་ཚོར་དམངས་གཙོ་དགོས་ཡོད། རྒྱ་ནག་གི་སྤྱི་ཚོགས་རིང་ལུགས་ཀྱི་ལམ་ལུགས་ངོས་ལེན་བྱེད་ཐུབ་ཀྱི་མི་འདུག་ཅེས་ལབ་པ་ཡིན་ན། རྒྱ་ནག་མཉམ་དུ་སྐད་ཆ་བཤད་སའི་ལམ་ཀ་ཞིག་འགག་འགྲོ་གི་ཡོད་པ་རེད། སྤྱིར་བཏང་བོད་རྒྱ་འབྲེལ་མོལ་གྱི་སྲིད་བྱུས་འཛིན་སྟངས་དེ་ཐད་ཀར་གྲོས་ཚོགས་དང་འབྲེལ་བ་ཆགས་མེད། འཛིན་སྐྱོང་བཀའ་ཤག་གི་ངོས་ནས་དབུ་མའི་ལམ་གྱི་ཐོག་ནས་དེར་སྲིད་བྱུས་འཛིན་གྱི་ཡོད་པ་རེད། ད་ལྟའི་འཛིན་སྐྱོང་བཀའ་ཤག་གིས་ཀྱང་བཀའ་ཤག་སྐབས་སྔོན་མས་དབུ་མའི་ལམ་གྱི་ཡིག་ཆ་ཕུལ་བ་དེའི་འགྲེལ་བརྗོད་ནང་དུ་བཀོད་པ་བསྐྱར་ལེན་གནང་བ་རེད་མ་གཏོགས་གསར་བ་བཟོས་པ་གང་ཡང་ཆགས་ཀྱི་ཡོད་པ་མ་རེད། རྒྱ་ནག་ནང་ཆབ་སྲིད་ཀྱི་འགྱུར་བ་གཏོང་བའི་སྐད་ཆ་བཤད་སྐབས་འགྲོ་ས་ཡོད་པ་མ་རེད། གང་ལྟར་དམར་ཤོག་ཚོགས་པ་དེས་མུ་མཐུད་ནས་རྒྱ་ནག་གཞུང་འཛིན་པ་དེ་དམར་ཤོག་ཚོགས་པའི་དམིགས་ཡུལ་གཙོ་བོ་ཡིན་སྟབས། དེ་ལ་འགལ་ཟླ་ག་རེ་བྱུང་ཡང་གདོང་ལེན་བྱེད་དགོས་བསམ་པ་མ་གཏོགས་གུ་ཡངས་བྱེད་དགོས་པའི་བསམ་བློ་ཞིག་ད་ལྟའི་བར་སླེབ་ཀྱི་མེད་པ་གསལ་བོ་རེད། གནས་སྟངས་འདི་འདྲ་ཞིག་གི་འོག ང་ཚོར་དམངས་གཙོ་དགོས་ཡོད་ཟེར་བ་དེ་མདུན་ལ་བཏོན་པ་ཡིན་ན། ཐབས་ལམ་གཞན་མང་པོ་འགག་གི་ཡོད་སྟབས། གཏན་འབེབས་དེ་འདྲ་བྱུང་བར་ང་རང་སྒེར་གྱིས་ངོས་འཛིན་བྱེད་ཀྱི་ཡོད་ “ཅེས་སོགས་གསུངས་སོང་།

གསར་འགོད་པ། པདྨ་མཚོ།