རྒྱ་ནག་གཞུང་གིས་སྔར་ལོའི་འབའ་རྫོང་གི་ཞི་རྒོལ་སྐབས་འཛིན་བཟུང་བྱས་པའི་བོད་མི་ཚེ་རིང་དབང་རྒྱལ་ལཊ་ཁ་སང་སྔ་དྲོ་ཀློད་གྲོལ་བཏང་ཡོད་འདུག
བོད་ནས་འདི་གར་ཁུངས་ལྡན་གནས་ཚུལ་འབྱོར་བ་ལྟར་ན། རྒྱ་ནག་གཞུང་གིས་ཕྱི་ལོ་ ༢༠༡༢ ལོའི་ཟླ་ ༣ ཚེས་ ༢༠ ཉིན་བོད་མདོ་སྨད་མཚོ་སྔོན་ཞིང་ཆེན་མཚོ་ལྷོ་ཁུལ་འབའ་རྫོང་སྐྱ་སེར་གཉིས་ཀྱི་ཞི་རྒོལ་སྐབས་ཀྱི་སྣེ་འཁྲིད་པ་ཡིན་པའི་ཉེས་མིང་འོག འབའ་རྫོང་དབུ་འཁྱུད་པར་ཁང་གི་སྦྱིན་བདག་ཚེ་རིང་དབང་རྒྱལ་ལགས་འཛིན་བཟུང་གིས་ལོ་ ༡ དང་ཟླ་ ༦ གི་བཙོན་འཇུག་ཁྲིམས་ཐག་བཅད་ཡོད་པ་ལྟར། ཁ་སང་ཚེས་ ༡༡ ཉིན་གྱི་བོད་ནང་གི་སྔ་དྲོའི་ཆུ་ཚོད་ ༨།༠༠ ཡས་མས་སུ་ཁོང་བཙོན་འཇུག་དུས་ཡུན་རྫོགས་ཏེ་ཀློད་གྲོལ་བཏང་ཡོད་འདུག
རང་ལོ་ ༣༦ ཡིན་པའི་ཚེ་རིང་རྣམ་རྒྱལ་ལགས་ནི། མཚོ་ལྷོ་ཁུལ་འབའ་རྫོང་རྨ་བྱང་གཡུ་རྔོག་སྡེ་བ་ནས་ཡིན་པ་དང་། སྔར་ལོའི་ཕྱི་ཟླ་ ༣ པའི་ཚེས་ ༡༥ ཉིན་བར་འབའ་རྫོང་སེར་སྐྱ་གཉིས་ཀྱིས་རྒྱ་གཞུང་གི་དྲག་གནོན་དབང་བསྒྱུར་གྱི་སྲིད་ཇུས་ལ་ཞི་བའི་ངོ་རྒོལ་བྱེད་སྐབས་པར་བརྒྱབ་པའི་ཉེས་མིང་འོག་འཛིན་བཟུང་བྱས་ཡོད་འདུག ཕྱི་ཉིན་རྒྱ་གཞུང་དྲག་ཆས་ཉེན་རྟོག་དམག་མིས་མི་མང་ཁྲོད་འགད་རྫས་གཡུག་ཏེ་རང་ལོ་ ༨ ཡིན་པའི་ཁོང་གི་ཚ་བོར་རྨས་སྐྱོན་ཚབས་ཆེན་ཕོག་སྟབས་ཀློད་གྲོལ་བཏང་ཡོད་ཀྱང་། ཕྱི་ཚེས་ ༢༠ ཉིན་ཡང་བསྐྱར་འཛིན་བཟུང་བྱས་ཏེ་སྐབས་དེའི་ལས་འགུལ་གྱི་སྣེ་འཁྲིད་པ་ཡིན་པའི་ཉེས་མིང་འོག་ཐོག་མར་ལོ་ ༤ ཁྲིམས་ཐག་བཅད་ཡོད་འདུག རྗེས་སུ་ནང་མི་ཉེ་འབྲེལ་ཚོས་ཁྲིམས་རྩོད་པ་སོགས་བཙལ་ཏེ་ཁྲིམས་གཏུག་བྱས་རྗེས་ལོ་ ༡ ཟླ་ ༦ བཙོན་འཇུག་ཁྲིམས་ཐག་བཅད་དེ་ཐོག་མར་འབའ་རྫོང་དུ་བཀག་ཉར་དང་། རྗེས་སུ་འབའ་རྫོང་ནས་ཟི་ལིང་དུ་གནས་སྤོར་གྱིས་ད་ལྟའི་བར་ཟི་ལིང་གྲོང་ཁྱེར་གྱི་བཙོན་ཁང་ཞིག་ཏུ་བཙོན་འཇུག་བཀག་ཉར་བྱས་ཡོད་འདུག
ཁ་སང་ཁོང་བཙོན་གྲོལ་ཐོབ་ཏེ་ཕྱིར་རང་ཡུལ་དུ་ལོག་སྐབས་ནང་མི་ཉེ་འབྲེལ་དང་ས་གནས་མི་མང་གིས་ཕེབས་བསུ་བྱས་ཡོད་འདུག་ལ། འབྲེལ་ཡོད་མི་སྣས་ད་ཆར་ཁོང་གི་གཟུགས་པོ་སྔར་ལས་སྐྱོ་རུ་ཕྱིན་ཡོད་པ་ལས། གཟུགས་གཞིའི་གནས་སྟངས་གང་འདྲ་ཆགས་ཡོད་མེད་ད་དུང་གསལ་བོ་ཤེས་ཀྱི་མེད་སྐོར་བརྗོད་བྱུང་།
