མུ་མཐུད་འཛིན་བཟུང་དམ་དྲག

ནག་ཆུ་འབྲི་རུ་རྫོང་ཤག་ཆུ་ཞང་གི་བསྟན་འཛིན་རང་གྲོལ་རྒྱ་གཞུང་གིས་འཛིན་བཟུང་བྱས་རྗེས་ས་གནས་མི་མང་བརྒྱ་ཕྲག་མང་པོས་ཞང་སྲིད་གཞུང་སྒོ་ཁར་ངོ་རྒོལ་སྐད་འབོད་གནང་འདུག

གནས་ཚུལ་བཏང་འབྱོར་བྱུང་བ་ལྟར་ན། ཟླ་འདིའི་ཚེས་ ༡༨ ཉིན།  ཁམས་འབྲི་རུ་རྫོང་ཤག་ཆུ་ཞང་གྲོང་ཚོ་བཞི་པའི་རང་ལོ་ ༣༤ ཡིན་པའི་བསྟན་འཛིན་རང་གྲོལ་ལགས་གློ་བུར་དུ་རྒྱ་གཞུང་གི་ཉེན་རྟོག་པས་འཛིན་བཟུང་བྱས་ཏེ་གར་སོང་ཆ་མེད་ཆགས་ཡོད་པ་འདུག

ཚེས ༡༩ ཉིན་དགོ་ཆུ་ནས་ཡིན་པའི་མི་མང་ ༤༠ ཙམ་གྱིས་འབྲི་རུ་རྫོང་ཤག་ཆུ་གྲོང་རྡལ་སྲིད་གཞུང་སྒོ་འགྲམ་དུ་བསྟན་འཛིན་རང་གྲོལ་ཀློད་གྲོལ་གཏོང་དགོས་པའི་སྐད་འབོད་གནང་ཡོད་པ་དང་། དེའི་རྗེས་གྲོང་ཚོ་ལྔ་ཙམ་གྱི་མི་བརྒྱ་ཕྲག་བརྒལ་བས་གོང་མཚུངས་ལྟར། བདེན་པ་དང་གནས་ལུགས་གང་ཡང་བཤད་ས་མེད་པར། ཁྲིམས་འགལ་ཡིན་ཚུལ་བཤད་དེ་མ་ཉེས་ཁ་གཡོགས་མ་བྱེད་རོགས། གང་བྱུང་དུ་མི་མང་ལ་དཀའ་ངལ་མི་སྤྲོད་པའི་རེ་བ་ཡོད། ང་ཚོར་ཁ་བྲལ་བྱེད་མི་རུང་ཟེར་ཡང་། དོན་ངོ་མར་དྲང་བདེན་མིན་པའི་ཁྲིམས་ལུགས་དང་དབང་ཆ་སྒེར་སྤྱོད་ཀྱིས་སྲིད་གཞུང་དང་མི་དམངས་བར་ཁ་བྲལ་གཏོང་གི་འདུག ང་ཚོ་འདིར་ཅ་དངོས་ཉོ་རུ་ཡོང་བ་མིན་ལ། རྔན་པ་ལེན་དུ་ཡོང་བའང་མིན། ང་ཚོས་འདིར་སྲིད་གཞུང་གིས་ཁྲིམས་དྲང་བདེན་སྐྱོང་རོགས་ཞེས་འབོད་སྐུལ་ཞུ་རུ་ཡོང་བ་ཡིན་ཞེས་སོགས་ཀྱི་སྐད་འབོད་བརྒྱབ་ཡོད་འདུག

ཁ་སང་ཚེས་  ༢༠ ཉིན་གྱི་དགོང་མོར། འབྲི་རུ་རྫོང་སྲིད་གཞུང་གི་མགོ་ཁྲིད་ཁ་ཤས་བསླེབས་ཏེ། ཁྱོད་ཚོ་སྒོ་ང་བྲག་ལ་བརྡབ་མཁན་དང་གཅིག་པ་རེད། ང་ཚོས་ལྔ་བཅུ་ང་དགུ་དང་དྲུག་ཅུ་རེ་དགུ་ལྟ་བུ་ཞིག་བཟོ་རྒྱུ་ཡིན་ཞེས་གདོང་ལ་མཛུབ་མོ་བཙུགས་ཏེ་སྡིགས་ར་གཏོང་བཞིན་ས་གནས་བོད་མི་ ༡༠ ཙམ་འཛིན་བཟུང་བྱས་ཡོད་འདུག དེ་དག་ནི་ཞོ་དར། རྡོར་རྒྱལ་ལྷ་མོ། སྐལ་བཟང་རྣམ་གྲོལ། སྨན་རྒྱལ། བཟང་མོའི་བུ་སོགས་ཡིན་འདུག དེ་ནས་མི་དེ་དག་རེ་རེ་བཞིན་མཛུབ་ཐེལ་རྒྱག་ཏུ་བཅུག་རྗེས་བཏང་ཡོད་འདུག

དམག་མི་ཧ་ཅང་མང་པོ་འབྱོར་ཏེ་ཚྭ་ལུང་མདོ་སོགས་འབྲོག་པའི་མི་གཅིག་ཀྱང་ཤག་ཆུ་ཤང་སོགས་སུ་ཡར་མར་འགྲོ་སྐྱོད་བྱེད་འཇུག་གི་མེད་པར་བཀག་འགོག་སྡོམ་བྱས་ཡོད་འདུག