གནས་ཚུལ་འདིའི་རིགས་ང་ཚོའི་ཁྲིམས་ཁང་གི་ལག་བསྟར་བྱ་རྒྱུའི་རིགས་མ་རེད།

ཉེ་ལམ་པ་ནི་པ་ཏི་སྤོས་བཟོ་སྡེ་ཚན་གྱི་འགན་འཛིན་རྟ་མགྲིན་ཚེ་རིང་ལགས་ཀྱིས་ངྷ་ས་དབུས་སྨན་རྩིས་ཁང་གི་འགན་འཛིན་དང་དྲུང་ཆེ་འབྲེལ་མཐུད་པ་གསུམ་ཁྲིམས་གཏུག་བྱས་པ་དེའི་ཐད། དབུས་སྨན་རྩིས་ཁང་གིས་རྟ་མགྲིན་ཚེ་རིང་ལ་ཁེ་ཕན་ཡོད་པའི་དངུལ་གྱི་འདེམས་ཀ་ཞིག་སྤྲོད་རྒྱུ་དང་། གལ་སྲིད་དེ་ལ་ངོས་ལེན་མ་བྱས་ཚེ་རྟ་མགྲིན་ཚེ་རིང་དང་ལྐོག་ཟ་བར་རྒྱབ་སྐྱོར་གནང་མཁན་གྱི་ཁྲིམས་རྩོད་པ་ཚེ་བརྟན་ནོར་བུ་གཉིས་རིང་མིན་རྒྱ་གར་ཁྲིམས་ཁང་ལ་ཁྲིམས་གཏུག་བྱ་རྒྱུ་ཡིན་ཟེར།

རྒྱ་གར་བྱང་ཕྱོགས་ལྡེ་ར་རྡུན་དུ་ཡོད་པའི་དབུས་སྨན་རྩིས་ཁང་གི་ཁྱབ་ཁོངས་པ་ཏི་སྤོས་བཟོ་སྡེ་ཚན་གྱིས་རྩིས་ཁྲ་གསལ་བོ་ཆགས་མིན་གྱི་གནས་ཚུལ་ཞིག་གི་འོག དབུས་སྨན་རྩིས་ཁང་གིས་སྤོས་བཟོ་སྡེ་ཚན་གྱི་འགན་འཛིན་རྟ་མགྲིན་ཚེ་རིང་ལགས་སུ་ཉེས་ཆད་བཅད་དེ། ངན་པ་ལག་སྦྲེལ་ཐོག་གཞུང་གནོད་སྒེར་ཕན་རྩིས་ཁྲ་སྦས་སྐུང་རྫུན་བཟོ་བྱས་ཚུལ་སོགས་བརྗོད་ཡོད་སྟབས། རྟ་མགྲིན་ཚེ་རིང་ལགས་ཀྱིས་སྨན་རྩིས་ཁང་གིས་ཁོང་ལ་མཚན་ཤས་བཟོས་ཡོད་པའི་ཁ་མཆུ་བཙུགས་ཏེ། བྱང་ཕྱོགས་ས་གནས་བོད་མིའི་ཁྲིམས་ཞིབ་ཁང་ལ་ཁྲིམས་གཏུག་བྱས་ཡོད་པ་དང་། ས་གནས་ཁྲིམས་ཁང་གིས་ངྷ་རམ་ས་ལའི་དབུས་སྨན་རྩིས་ཁང་གི་འགན་འཛིན་ཚེ་རིང་བཀྲ་ཤིས་ལགས་དང་དྲུང་ཆེ་ཚེ་རིང་ཕུན་ཚོགས་ལགས། དམིགས་བསལ་ལས་རིགས་འབྲེལ་མཐུད་པ་བསྟན་འཛིན་རྡོ་རྗེ་ལགས་གསུམ་ལ་བརྡ་ཐོ་སྔ་ཕྱི་ཐེངས་ ༤ ཙམ་བཏང་སྟེ་ས་གནས་ཁྲིམས་ཞིབ་ཁང་དུ་འབོད་འགུག་བྱས་ཀྱང་། གྱོད་ཡ་རྩོད་ལན་པ་གསུམ་གྱི་སྐུ་ཚབ་ཏུ་འབྲེལ་མཐུད་པ་མ་གཏོགས་འགན་འཛིན་དང་དྲུང་ཆེ་གཉིས་ངོ་བཅར་ཞུས་མེད་པ་དང་། སྤྱི་མང་གཏུག་བཤེར་འགྲོ་ལུགས་ཉམས་ལེན་བརྩི་བཀུར་མ་བྱས་པ་སོགས་ལ་བརྟེན། ཟླ་འདིའི་ཚེས་ ༡༥ ཉིན་ས་གནས་ཁྲིམས་ཞིབ་ཁང་གིས་ཁོང་གསུམ་ལ་གདམ་བྱ་འདེམས་བྱེད་ཀྱི་ཐོབ་དབང་མེད་པའི་ཐག་གཅོད་བཀའ་ཁྱབ་བཏང་འདུག

རྟ་མགྲིན་ཚེ་རིང་ལགས་ཀྱི་ཐོག་མའི་ཞུ་གཏུག་ཡིག་ཆ་འདི་གར་བསྐུར་འབྱོར་བྱུང་བའི་ནང་འདི་ལྟར་བཀོད་འདུག ཐེངས་འདིའི་རྙོག་གྲའི་འབྱུང་རྐྱེན་གཙོ་བོ་པ་ནི་པ་ཏི་སྤོས་བཟོ་སྡེ་ཚན་གྱིས་ ༢༠༡༡ ཟླ་ ༥ ནང་ཚོང་པའི་ས་ནས་སྤོས་ཤུག་པ་ཀེ་ལོ་ ༢༠༠༠ ཉོ་སྐབས། འགན་འཛིན་དང་རྩིས་པ། གསོག་གཉེར། པོ་ཏ་ལའི་སྤོས་བཟོ་ལས་བྱེད་བཅས་འཛོམས་ཏེ་ཤུག་པའི་རིན་གོང་དང་ལྗིད་ཚད་བཅས་སྤྱི་མོས་ཐོག་གཏན་འབེབས་ཐག་གཅོད་དང་། ཀེ་ལོ་ག་ཚོད་ཡོད་མེད་ལྗིད་ཚད་མཇལ་ཡོད། སྒེར་གྱི་ས་ནས་ཉོས་པའི་སྤོས་རྫས་མང་པོ་ཞིག་ལ་སྒྲིག་མཐུན་བྱུང་འཛིན་ངོ་མ་རག་ཐབས་མེད་པ་དང་། མང་པོ་ཞིག་ཐོག་མའི་ལྗིད་ཚད་ནས་ཉིན་རེ་བཞིན་སྐམ་ཆག་ཏུ་འགྲོ་གྱིན་པ་གོང་རིམ་ནས་མཁྱེན་གསལ་ཡིན། ཟླ་ཤས་རྗེས་སུ་བྱུང་འཛིན་བཟོ་བཀོད་དང་། རྩིས་ཁྲ་དེབ་བཀོད་སྐབས་ཞིབ་འཇུག་ནན་ཏན་མ་བྱུང་བའི་འཐུས་ཤོར་སོང་བས་རྩིས་ཁྲའི་ནང་ཤུག་པ་ཀེ་ལོ་ ༡༠༠ འགོད་ནོར་ཤོར་ཡོད། ཀེ་ལོ་རེར་རིན་གོང་གཏན་འབེབས་ཟིན་པའི་སྒོར་ ༧༥ ཡིན་སྟབས། ཤུག་པ་ཀེ་ལོ་ ༢༠༠༠ ལ་མ་གནས་སྒོར་ཆིག་འབུམ་ལྔ་ཁྲི་ ༡༥།༠༠༠༠།༠༠ མ་གནས་ཀྱི་དངུལ་འབོར་ཐོག་ཧེ་བག་གང་ཡང་སོང་མེད། དེ་ནས་དུས་ཡུན་གང་འཚམ་སོང་རྗེས་རྩིས་པ་དང་ཟོག་གཉེར་བར་གནད་དོན་དེའི་སྐོར་གླེང་གཞི་བྱུང་ཡོད། ཤུག་པ་ཀེ་ལོ་ ༡༩༨༨ ལག་ཐོག་རྩིས་སྤྲོད་བྱུང་བ་ཁོང་གཉིས་ཀས་ངོས་ལེན་བྱེད་བཞིན་ཡོད། ཀེ་ལོ་ ༡༢ ཙམ་ཚང་མ་ཚང་དང་། རྩིས་ཁྲ་དེབ་འགོད་ཞུ་ཕྱོགས་སྐོར་གྱི་གླེང་གཞིར་ནང་འགྲིག་བྱས་ཏེ། གླེང་རྙོག་མི་ཡོང་བ་བྱ་རྒྱུའི་ཐབས་ཤེས་བྱས་ཡོད་ལ། དེའི་ཐོག་རང་ལ་གནོང་འགྱོད་གང་ཡང་མེད་པས་སྤྱི་ཁྱབ་ལས་ཁུངས་སུ་སྙན་གསེང་ཞུས་པ་ཡིན། ཞིབ་འཇུག་ཚོགས་ཆུང་ཁག་གཉིས་ནས་ཞིབ་འཇུག་གནང་ཡོད་ཀྱང་། ཞིབ་འཇུག་གི་ཚད་གཞི་དང་མི་འགྲོ་རྩིས་ཤོག་དང་རྩིས་ཁྲ་ཁག བྱུང་འཛིན། ཟོག་གཉེར་བཅས་མགོ་ནས་མཇུག་བར་རྩད་གཅོད་ཐུབ་པའི་ཞིབ་འཇུག་ཞིབ་ཚགས་འདོད་པ་ཁེངས་པ་མ་བྱུང་། ཞེས་སོགས་བཀོད་འདུག

གཏུག་ཡིག་ནང་མུ་མཐུད་དུ་བཀོད་པར། སྔར་ལོའི་ཕྱི་ཟླ་ ༡༡ ཚེས་ ༢༦ ཉིན་དབུས་སྨན་རྩིས་ཁང་གིས་བོད་དྲུང་གི་མཚན་རྟགས་འཁོད་པའི་དབུས་དང་ཕྱོཊ་མཐའི་ཡན་ལག་ཚང་མར་གསལ་བསྒྲགས་ཤིག་སྤེལ་ཏེ། རྟ་མགྲིན་ཚེ་རིང་དང་ཟོག་གཉེར་པདྨ་དོན་འགྲུབ་གཉིས་ནས་ངན་པ་ལག་སྦྲེལ་ཐོག་གཞུང་གནོད་སྒེར་ཕན་རྩིས་ཁྲ་སྦས་སྐུང་རྫུན་བཟོ་གྲ་མ་སྒྲིག་བྱས་ལུགས་བཀོད་ཡོད་པ་དང་། སྐབས་དེར་རྟ་མགྲིན་ཚེ་རིང་ལགས་ཀྱིས་དབུས་ལས་ཁུངས་ལ་གནས་ཚུལ་དེར་བསྐྱར་ཞིབ་ཡོང་བའི་སྙན་ཞུ་ཕུལ་ཡང་བཀའ་ལན་འབྱོར་མེད་ཅིང་། དེའི་རྗེས་ངག་ལམ་ནས་བསྐྱར་ཞིབ་ཡོང་རེ་མེད་པས་ཁྲིམས་གཏུག་བྱེད་ཅེས་བཀའ་ཕེབས་ཡོད་སྟབས། སྤྱི་མང་གཏུག་བཤེར་འགྲོ་ལུགས་རྩ་འཛིན་ཁྲིམས་ཡིག་ལྟར་ཁྲིམས་རྩོད་པ་གྲ་སྒྲིག་གིས་ད་ལོའི་ཕྱི་ཟླ་ ༤ ཚེས་ ༣ ཉིན་ཁྲིམས་རྩོད་པས་སྤྱི་མང་གཏུག་བཤེར་འགྲོ་ལུགས་རྩ་འཛིན་ཁྲིམས་ཡིག་གཞིར་བཟུང་བརྡ་ཐོ་བཏང་ཡོད་པར། དབུས་སྨན་རྩིས་ཁང་གི་དྲུང་ཆེ་ལགས་ཀྱིས་ཁ་པར་འབྱོར་ཏེ་དབུ་འཛིན་ས་གནས་སུ་བཞུགས་མེད་པ་དང་། ཕྱི་ཟླ་ ༥ ཚེས་ ༡ ནས་ལས་བཅར་ཞུ་རྒྱུ་ཡིན་སྟབས། སྐབས་དེར་བཀའ་བསྡུར་ཐག་གཅོད་ཅི་བྱུང་ལན་སྤྲོད་ངེས་ཡིན་ཚུལ་བརྗོད་ཡོད་འདུག

ཕྱི་ཟླ་ ༤ ཚེས་ ༡༥ ཉིན་དབུས་སྨན་རྩིས་ཁང་གི་དམིགས་བསལ་ལས་འགོད་འབྲེལ་མཐུད་པ་དང་དྲུང་ཆེ། པ་ནི་པ་ཏི་འགན་འཛིན་ལས་ཚབ་བཅས་གློ་བུར་དུ་འབྱོར་ཏེ་རྩིས་ལེན་རྩོད་སྤྲོད་དགོས་ལུགས་བརྗོད་ཡོད་པ་ལྟར། ཡིག་ཆ་ཁག་རྩིས་སྤྲོད་བྱས་ཡོད་ཀྱང་། རྩིས་པ་ས་གནས་སུ་མེད་སྟབས་རྩིས་པ་ལས་བཅར་ཞུས་མཚམས་རྩིས་སྤྲོད་བྱ་རྒྱུ་བྱས་ཡོད་ཀྱང་། ཚེས་ ༡༩ ཉིན་སླར་ཡང་ཁོང་གསུམ་འབྱོར་ཏེ་གཞུང་དངུལ་ཆ་ཚང་རྩིས་ལེན་བྱས་ཡོད་པ་དང་། དེ་དང་མཉམ་དུ་ཡིག་ཆུང་ཞིག་སྤྲད་པའི་ནང་། མ་འོངས་པའི་ཉིན་གསུམ་ནང་ཚུད་དུ་ལས་མཚམས་བཞག་སྟེ་ལས་ཤག་ནང་གི་སྒེར་གྱི་ཅ་དངོས་ཚང་མ་འདོན་དགོས་པ། གལ་སྲིད་དེ་ལྟར་བརྩི་སྲུང་མ་བྱས་ཚེ་སྐོར་སྲུང་བར་རྩིས་སྤྲོད་བྱ་རྒྱུ་ཡིན་ཞེས་སོགས་བཀོད་ཡོད་འདུག

གཏུག་ཡིག་གི་མཇུག་ཏུ། “ རྩ་བའི་རྩིས་ལེན་རྩིས་སྤྲོད་ཟིན་ན་ཡང་གནས་ཡུལ་གཞུང་གི་ཁྲིམས་ཐོག་ནས་པ་ནི་པ་ཏི་སྤོས་བཟོ་ཁང་གི་(Power of Attorney)ཡིག་ཆའི་ཐོག་ངོས་ཀྱི་མིང་ཡོད་པ་མིང་བསྒྱུར་ཟིན་མེད། དེ་བཞིན་ཁྲིམས་ཐོག་ནས་བཀའ་ཁྱབ་མཚམས་འཇོག་(Stay Order)ཞུ་རྒྱུའི་ཐབས་ལམ་དེ་དག་ཁྲིམས་མཐུན་ལྟར་ཞུ་རྒྱུའི་གྲ་སྒྲིག་བྱས་ཡོད། རྒྱུ་མཚན་དེ་དག་ལ་བརྟེན་གལ་ཏེ་ངས་ཡིག་ཆུང་ནང་འཁོད་ལྟར་བཀའ་བརྩི་དང་ལེན་མ་ཞུས་ཀྱང་། དེ་ལྟར་བྱ་ཐུབ་པའི་ཆ་རྐྱེན་གྱི་ནུས་པ་དང་ཐོབ་ཐང་ཆ་ཚང་ཁྲིམས་ཐོག་ནས་ཚང་ཡོད། བཙན་བྱོལ་བོད་མིའི་སྒྲིག་འཛུགས་དང་སྨན་རྩིས་ཁང་གི་སྒྲིག་འཛུགས་ལ་མཚན་ཤས་མི་ཡོང་ཆེད་ཡིག་ཐོག་ནས་བཀའ་གནང་བ་གཞིར་བཟུང་བཀའ་བརྩི་དང་ལེན་ཞུས་པ་ཡིན” ཞེས་བཀོད་སོགས་བཀོད་འདུག

དབུས་སྨན་རྩིས་ཁང་གི་གནས་ཚུལ་དེའི་བྱུང་རིམ་སྐོར་གྱི་ཡིག་ཆ་ཞིག་འདི་གར་སྤྲད་པའི་ནང་འདི་ལྟར་བཀོད་འདུག བསྐྱར་ཞིབ་ཚོགས་ཆུང་གི་སྙན་ཐོ་དང་བདེན་རྟགས་ཡིག་ཆ་ཆ་ཚང་སྨན་རྩིས་ཁང་གི་འགན་འཛིན་གྱིས་རྟོག་ཞིབ་བྱས་ཏེ་དགོངས་པ་ཆེ་བཞེས་ཀྱིས་གནས་དབྱུང་མ་བཏང་བར་ཕྱི་ལོ་ ༢༠༡༢ ཟླ་ ༡༡ ཚེས་ ༢༦ འཁོད་པ་སྨན་རྩིས་ཁང་གི་ཡོངས་གསལ་ཨང་ ༡༨༠ ཐོག་བཅད་ཁྲ་བཏང་བའི་ནང་། བློ་ཕམ་གྱིས་གནས་ཚུལ་བརྗོད་རྒྱུར། པ་ནི་པ་ཏི་སྤོས་བཟོ་སྡེ་ཚན་གྱི་འགན་འཛིན་རྟ་མགྲིན་ཚེ་རིང་ལགས་དང་། ཟོག་གཉེར་བ་པདྨ་དོན་འགྲུབ་ལགས་གཉིས་ཀྱིས་ངན་པ་ལག་སྦྲེལ་ཐོག་གཞུང་གནོད་སྒེར་ཕན་རྩིས་ཁྲ་སྦས་སྐུང་རྫུན་བཟོ་གྲ་མ་འགྲིག་བྱས་འདུག་ཀྱང་། རྩིས་པ་སངས་རྒྱས་ནོར་བུ་ལགས་ཀྱིས་འགན་འཛིན་དང་། ཟོག་གཉེར་གྱིས་གང་བྱས་པ་ཤེས་བཞིན་རྩིས་པའི་འགན་འཁུར་ནས་སྟངས་འཛིན་བྱེད་དགོས་ངེས་མ་བྱས་པ་དང་། ངན་པ་ལག་སྦྲེལ་གྱི་གནས་ཚུལ་ཤེས་བཞིན་དུ་དབུས་ལ་སྙན་སེང་མ་ཞུས། ༡༽ པ་ནི་པ་ཏི་སྦོས་བཟོའི་འགན་འཛིན་རྟ་མགྲིན་ཚེ་རིང་ལགས་ལ། ཕྱི་ལོ་ ༢༠༡༢ ཟླ་ ༡༢ ཚེས་ ༡ ནས་གནས་རིམ་གཅོག་རྒྱུ་དང་། ལོ་ལྔའི་རིང་གནས་རིམ་དེ་གར་སྡོད་དགོས་པ་ལས་སྤར་མི་ཆོག་པ་དང་། ཧིན་སྒོར་ཉིས་ཁྲི་ ༢༠.༠༠༠།༠༠ ཉེས་ཆད་གཅོད་རྒྱུ།  ༢༽ ཟོག་གཉེར་བ་པདྨ་དོན་འགྲུབ་ལགས་ཕྱི་ལོ་ ༢༠༡༢ ཟླ་ ༡༢ ཚེས་ ༡ ནས་གནས་རིམ་གཅིག་གཅོག་རྒྱུ་དང་། ལོ་ལྔའི་རིང་གནས་རིམ་དེ་གར་སྡོད་དགོས་པ་ལས་སྤར་མི་ཆོག་པ་དང་། ཧིན་སྒོར་ཉིས་ཁྲི་ ༢༠.༠༠༠།༠༠ ཉེས་ཆད་གཅད་རྒྱུ། ༣༽ རྩིས་པ་སངས་རྒྱས་ནོར་བུ་ལགས་སུ་ཉེས་ཆད་ཧིན་སྒོར་ཆིག་ཁྲི་ ༡༠.༠༠༠།༠༠ གཏོང་རྒྱུ་གསལ་བ་ལྟར། ཟོག་གཉེར་པདྨ་དོན་འགྲུབ་ལགས་དང་། རྩིས་པ་སངས་རྒྱས་ནོར་བུ་ལགས་གཉིས་ནས་ཀ་ཀོར་མེད་པ་བརྩི་སྲུང་ཞུས་ཡོད།

རྟ་མགྲིན་ཚེ་རིང་ལགས་ཀྱིས་བརྩི་སྲུང་མ་གནང་བ་མ་ཟད། ཁྲིམས་གཏུག་བྱེད་རྒྱུའི་གོ་སྒྲིག་གནང་བ་ལྟར། བཙན་བྱོལ་བོད་མིའི་ཁྲིམས་དང་ལམ་ལུགས་ཀྱི་ཁྲིམས་རྩོད་པ་ཚེ་བརྟན་ནོར་བུ་ལགས་ནས་རྟ་མགྲིན་ཚེ་རིང་ལགས་ཀྱི་སྤྱི་མང་གཏུག་བཤེར་འགྲོ་ལུགས་རྩ་འཛིན་ཁྲིམས་ཀྱི་བརྡ་ཐོ་ཕྱི་ལོ་ ༢༠༡༣ ཟླ་ ༤ ཚེས་ ༤ ཉིན་སྨན་རྩིས་ཁང་དུ་འབྱོར་བར་བརྟེན། ཕྱི་ལོ་ ༢༠༡༣ ཟླ་ ༤ ཚེས་ ༡༧ ཉིན་སྨན་རྩིས་ཁང་གི་འགན་འཛིན་གྱིས་བཀའ་འབྲེལ་བཞིན་རྟ་མགྲིན་ཚེ་རིང་ལགས་སྨན་རྩིས་ཁང་ནས་གནས་དབྱུང་བཏང་།

བྱང་ཕྱོགས་བོད་མིའི་ས་གནས་ཁྲིམས་ཞིབ་ཁང་ནས་བརྡ་ཐོ་དང་པོ་མི་སྒེར་གསུམ་གྱི་མིང་ལ་བཏང་གནང་བ་དང་། གོང་འཁོད་མི་གསུམ་ནས་དང་པོ་ནས་ཁ་མཆུ་མི་སྒེར་ལ་བཏང་ཡོད་ན་ངེད་གསུམ་དང་རྟ་མགྲིན་ཚེ་རིང་ལགས་བར་ཁ་ཆག་སྣ་རལ་སོགས་སྒེར་གྱི་གནད་དོན་གང་ཡང་བྱུང་མྱོང་མེད་ཅེས་ཞུས་ཡོད། བརྡ་ཐོ་གཉིས་པ་སྨན་རྩིས་ཁང་ལ་ཡིན་པ་བསྒྱུར་བཅོས་བཏང་གནང་འདུག སྨན་རྩིས་ཁང་ལ་ཁ་མཆུའི་བརྡ་ཐོ་བཏང་བར་བརྟེན་བརྩི་སྲུང་ཐོག་འདི་ནས་དོ་ཆོད་སྐུ་ཚབ་ལ་འགན་དབང་དང་གནད་དོན་འདིའི་བྱུང་རིམ། བདེན་རྟགས་ཡིག་ཆ་ཁག ཞུ་རྩའི་དོན་ཚན་ཁག་གིས་ལན་འདེབས། གནད་དོན་འདི་གཞན་དང་མི་འདྲ་བ་ཡིད་ཆེས་དགེ་རྩ་ཚོགས་པའི་རྒྱུ་དང་རྩིས་ཐོག་ནས་ངན་པ་ལག་སྦྲེལ་གྱིས་གཞུང་གནོད་སྒེར་ཕན་གྱི་རྩིས་ཁྲར་རྫུན་བཟོ་སྦས་སྐུང་གྲ་མ་འགྲིག་པ་བྱས་པའི་གནད་དོན་ཞིག་ཡིན་པའི་གསལ་བཤད་ཞུ་ཆེད་ཐེངས་གསུམ་ལ་ཆེད་གཉེར་བཅར་ཡོད། འོན་ཀྱང་། ས་གནས་ཁྲིམས་ཞིབ་ཁང་ནས་ངོས་ལེན་མ་གནང་བར་ཆ་རྐྱེན་ལ་གྱོད་ཡའི་མོས་མཐུན་ཆོད་ཡིག་དང་རྒྱ་གར་ཁྲིམས་ཁང་ནས་ཁས་བླངས་དམ་བཅའ་ (Affidavit)མི་འདྲ་བ་གཉིས་རེ་གྱོད་ཡ་སོ་སོར་དགོས་ལུགས་གསུངས་བར་ཁས་ལེན་ཞུ་ཐབས་བྲལ་ལུགས་ཞུས་ཡོད། གང་ལགས་ཞུས་ན། སྨན་རྩིས་ཁང་ནི་དགེ་རྩའི་ཚོགས་པ་གང་ཞིག་གི་མཁར་དབང་འདི་གའི་འགན་འཛིན་ལྷན་ཚོགས་ཀྱི་ཚོགས་མི་རྣམས་ཀྱིས་མཚོན་པའི་ལས་བྱེད་སོགས་ཀྱི་གྲ་མ་འགྲིག་པ་བྱས་ཚེ་ཁྲིམས་ཐོག་ནས་དམིགས་བསལ་སྲུང་སྐྱོབ་ཡོད་པ་ལོངས་སུ་སྤྱོད་ཆོག་པར་བརྟེན། ས་གནས་ཁྲིམས་ཞིབ་ཁང་ནས་བརྡ་ཐ་མ་བཏང་སྔོན། ཕྱི་ལོ་ ༢༠༡༣ ཟླ་ ༥ ཚེས་ ༨ ཉིན་དབྱིན་ཡིག་ཐོག་རྟ་མགྲིན་ཚེ་རིང་ལགས་དང་། ལྐོག་ཟ་བར་རྒྱབ་སྐྱོར་གནང་མཁན་ཁྲིམས་རྩོད་པ་ཚེ་བརྟན་ནོར་བུ་ལགས་གཉིས་རྒྱ་གར་ཁྲིམས་ཁང་ལ་གཏུག་རྒྱུ་ཡིན་པ་ཐག་ཆོད་ཟིན་ཡོད། དེར་བརྟེན། ཁྲིམས་ཐོག་ནས་གོང་མིང་གསུམ་སོ་སོའི་གྱོད་ཡའི་མོས་མཐུན་ཆོད་ཡིག་དང་། རྒྱ་གར་ཁྲིམས་ཁང་ནས་ཁས་བླངས་དམ་བཅའ་ (Affidavit on Rs 10 INDIAN JUDICIAL stamp paper) མི་འདྲ་བ་ཁག་གཉིས་རེ་བཟོས་ཏེ་འབུལ་དགོས་ལུགས་ཐད་འབུལ་ཐབས་མེད་ལུགས་ཞུས་ཡོད། ཅེས་སོགས་བཀོད་འདུག

གསལ་བཤད་དེའི་མཇུག་ཏུ། “ རྩ་བའི་སྨན་རྩིས་ཁང་གི་ལས་བྱེད་གང་ཞིག་དང་སྨན་རྩིས་ཁང་གཉིས་བར་གནས་རིམ་དང་ཕོགས་རིམ་སྤར་ཕྱོགས། གནས་སྤོ། བཟའ་ཚང་མི་མཐུན་པའི་གནས་ཚུལ། འཁྲུག་རྩོད་ཐག་གཅོད་སོགས་འགྲིག་མིན་ཁྲིམས་གཏུག་བྱས་པའི་གནད་དོན་བྱུང་ཚེ་རྒྱ་གར་ཁྲིམས་ཀྱི་བཀའ་མོལ་ཞུ་མ་དགོས་པར་བོད་མིའི་ཁྲིམས་ཞིབ་ཁང་ལ་གཏུག་བཤེར་གྲུབ་འབྲས་ལ་མོས་མཐུན་ཞུ་མ་ཐུབ་པ་མེད། འོན་ཀྱང་། གནད་དོན་འདི་དེ་ལྟར་མིན་པ་ཡིད་ཆེས་དགེ་རྩ་ཚོགས་པའི་རྒྱུ་དང་རྩིས་ཐོག་ནས་ངན་པ་ལག་སྦྲེལ་གྱིས་གཞུང་གནོད་སྒེར་ཕན་གྱིས་རྩིས་ཁྲར་རྫུན་བཟོ་སྦས་བསྐུངས་གྲ་མ་འགྲིག་པ་བྱས་པའི་གནད་དོན་ཞིག་ཡིན” ཞེས་དང་། “ ས་གནས་ཁྲིམས་ཞིབ་ཁང་ནས་ཁྲིམས་གཏུག་དེ་བཞིན་མི་སྒེར་ལ་མིན་པ་གསུངས་བཞིན་དུ་ད་ཆ་བྱང་ཕྱོགས་བོད་མིིའི་ས་གནས་ཁྲིམས་ཞིབ་པས་བཅད་ཁྲ་བཏང་བ་དེའི་ནང་སྨན་རྩིས་ཁང་གི་གནད་ཡོད་ལས་བྱེད་གསུམ་ལ་བཙན་བྱོལ་བོད་མིའི་སྤྱི་ཚོགས་ནང་འོས་བསྡུའི་རིགས་ཀྱི་གདམ་བྱ་འདེམས་བྱེད་ཀྱི་ཐོབ་ཐང་འཕྲོག་པ་འཁོད་པའི་ཐད་ཆེས་མཐོའི་ཁྲིམས་ཞིབ་ཁང་དུ་ཞུ་སྙན་འབུལ་རྒྱུ་དང་། དང་ཐོག་སྨན་རྩིས་ཁང་ནས་ཐག་གཅོད་ཟིན་པ་ལྟར་རྟ་མགྲིན་ཚེ་རིང་ལགས་དང་ལྐོག་ཟ་བར་རྒྱབ་སྐྱོར་གནང་མཁན་གྱི་ཁྲིམས་རྩོད་པ་ཚེ་བརྟན་ནོར་བུ་གཉིས་ཐད། རིང་མིན་རྒྱ་གར་ཁྲིམས་ཁང་དུ་ཁྲིམས་གཏུག་བྱ་རྒྱུ་ཡིན། ད་བར་གནད་དོན་འདིིའི་ཐོག་འགྲོ་གྲོན་ཇི་སོང་འགན་ཟུར་རྟ་མགྲིན་ཚེ་རིང་ལགས་ནས་སྒྲུབ་རྒྱུ་དང་། མ་འོངས་སྨན་རྩིས་ཁང་གི་ལས་བྱེད་ཆེ་ཕྲ་ཆུ་གསུམ་སུ་ཞིག་གིས་གཞུང་གནོད་སྒེར་ཕན་དང་རྩིས་ཁྲར་རྫུན་བཟོ་སྦས་བསྐུངས་བྱས་རིགས་ལ་བཅད་ཁྲ་བཏང་བར་བརྩི་སྲུང་དང་ལེན་མ་གནང་ཚེ་རྒྱ་གར་ཁྲིམས་ཁང་དུ་ཁྲིམས་གཏུག་བྱ་རྒྱུ་ནི་སྨན་རྩིས་ཁང་གི་རྩ་བའི་ལངས་ཕྱོགས་ཡིན” ཞེས་བཀོད་འདུག

ཟླ་འདིའི་ཚེས་ ༢༩ ཉིན་འདི་གའི་གསར་འགོད་པས་རྟ་མགྲིན་ཚེ་རིང་ལགས་སུ་བཅར་འདྲི་ཞུས་པར། “ ང་རང་ལ་མཚོན་ན་པ་ནི་པ་ཏི་སྤོས་བཟོ་གྲྭ་ཐོག་མར་གསར་འཛུགས་ཀྱི་སྐབས་ནས་ལས་ཀ་བྱས་པ་ཡིན། བར་ལམ་རྩིས་པ་དང་ཚོང་གཉེར་འགན་འཛིན་བཅས་ཀྱི་བར་ནས་རྩིས་ནོར་ཏོག་ཙམ་བྱུང་སྟེ་སྨན་རྩིས་ཁང་གིས་ང་ལ་ཉེས་ཆད་བཅད་པ་རེད། སྤྱིར་བཏང་ང་རང་འགན་འཛིན་ཡིན་པའི་ཆ་ནས་རྩིས་ཁྲ་སྟངས་འཛིན་ཡག་པོ་བྱས་མ་ཐུབ་པ་དང་ངས་འགན་འཁྱེར་མ་ཐུབ་པ་དེར་ངས་ངོས་ལེན་བྱེད་ཀྱི་ཡོད། ཡིན་ནའང་སྨན་རྩིས་ཁང་གིས་ང་ལ། ངན་པ་ལག་སྦྲེལ་ཐོག་གཞུང་གནོད་སྒེར་ཕན་རྩིས་ཁྲ་སྦས་སྐུང་རྫུན་བཟོ་བྱས་ཚུལ་སོགས་ཀྱི་ཚིག་ངན་པ་མང་པོ་བེད་སྤྱོད་བཏང་འདུག ཕར་འགྲེལ་བཤད་དང་གསལ་བཤད་ཅི་ཙམ་བྱས་ཀྱང་ཡ་ལན་མེད་པ་དང་། ཐག་གཅོད་དེས་ང་རང་གི་ཕ་མ་སྤུན་མཆེད་དང་ཉེ་འབྲེལ་ཚང་མར་མཚན་ཤས་འགྲོ་བ་ཆགས་ཏེ་ལམ་ཁ་འདི་ལས་ལྷག་མ་སོང་སྟབས་ངས་ཁྲིམས་གཏུག་བྱས་པ་ཡིན”ཞེས་བརྗོད་བྱུང་།

ཡང་གསར་འགོད་པས་དབུས་སྨན་རྩིས་ཁང་གི་འགན་འཛིན་ཚེ་རིང་བཀྲ་ཤིས་ལགས་སུ། དབུས་སྨན་རྩིས་ཁང་གིས་རྟ་མགྲིན་ཚེ་རིང་ལགས་སུ་རྩིས་ཁྲ་རྫུན་བཟོ་བྱས་ཚུལ་བརྗོད་དོན་སྐོར་བཅར་འདྲི་ཞུས་པར་ཁོང་གིས། “ ཚིག་དེ་དག་རྟ་མགྲིན་ཚེ་རིང་གཅིག་པུར་བེད་སྤྱོད་བཏང་བ་མ་རེད། མི་ངན་པ་གཉིས་གསུམ་ལག་པ་སྦྲེལ་ནས་གཞུང་གནོད་སྒེར་ཕན་པའི་ལས་ཀ་བྱས་པ་རེད་ཟེར་གྱི་ཡོད། རྟ་མགྲིན་ཚེ་རིང་གི་ཉེས་ཆད་འཁུར་གྱི་ཡོད་ལབ་པ་དེ་སྐྱག་རྫུན་རེད། གནས་ཚུལ་བྱུང་སྐབས་རྟ་མགྲིན་ཚེ་རིང་དང་ཟོག་ཉར་པདྨ་དོན་འགྲུབ་གཉིས་ངན་པ་ལག་སྦྲེལ་བྱས་ཏེ་རྩིས་ཁྲ་རྫུན་མ་བཟོས་པ་ང་ཚོས་ཞིབ་འཇུག་བྱས་ཏེ་ཐོན་པ་རེད། རྩིས་པ་ཁོ་རང་གིས་ཧ་གོ་སྟེ་ཁོའི་ཉིན་དེབ་ནང་ཐོ་བཀོད་ཡོད་པ་ལས། འཛིན་སྐྱོང་ལ་ལས་ཁུངས་ལ་ཞུས་མེད་སྟབས་ཉེས་ཆད་བཅད་པ་རེད། ཟོག་ཉར་བ་དང་རྩིས་པ་གཉིས་ཀས་ཉེས་པ་འཁུར་གྱི་ཡོད། རྟ་མགྲིན་ཚེ་རིང་གིས་ང་ས་གནས་སུ་ཐེངས་གཉིས་འགྲོ་དུས་བསྐྱར་ཞིབ་གནང་རོགས། ངས་གཞུང་གི་རྒྱུ་ཟོས་མེད་ཅེས་ཤོད་ཀྱི་འདུག ཉེས་པ་གཞུང་གི་རྒྱུ་ཟོས་སོང་ཞེས་ཕོག་པ་ཡིན་དུས། ཟོས་མེད་པའི་ཁུངས་སྐྱེལ་དགོས་ཀྱི་ཡོད་པ་རེད། གནས་སྟངས་དེ་དག་གི་ཐོག་ནས་སྨན་རྩིས་ཁང་གིས་ཚིག་དེ་དག་བེད་སྤྱོད་བྱས་པ་རེད”ཅེས་བརྗོད་བྱུང་།

ཡང་ཁོང་ལ་བྱང་ཕྱོགས་བོད་མིའི་ས་གནས་ཁྲིམས་ཞིབ་ཁང་གིས་བརྡ་ཐོ་གཏོང་སྐབས་ས་གནས་སུ་བཅར་མེད་པའི་རྒྱུ་མཚན་དྲིས་པར། “ ཉེ་སྔོན་རྟ་མགྲིན་ཚེ་རིང་གིས་ཁྲིམས་གཏུག་བྱེད་སྐབས་ང་ཚོས་ཁྲིམས་རྩོད་པ་ཚེ་དབང་ནོར་བུ་བུར་ཡི་གེ་བཏང་སྟེ་གནས་ཚུལ་ཆ་ཚང་ཧ་མ་གོ་བ་དང་རྐུ་མར་རྒྱབ་སྐྱོར་བྱེད་ཀྱིན་པ་གང་འདྲ་ཡིན་མིན་དྲིས་ཡོད། ས་གནས་ཁྲིམས་ཞིབ་ཁང་གི་ཐོག་མའི་བརྡ་ཐོ་འབྱོར་སྐབས་ཡི་གེ་བླངས་ཏེ་དྲི་བ་དྲིས་ལན་ཆ་ཚང་ཕུལ་བ་ཡིན། ཡིན་ནའང་། ཁྲིམས་ཁང་གི་བརྡ་ཐོ་ཐོག་མར་གཏོང་སྐབས་ང་ཚོ་མི་གསུམ་གྱི་མིང་བཏགས་ཏེ་བཏང་འདུག རྗེས་སུ་ང་ཚོས་ཁྲིམས་ཞིབ་ཁང་ལ་ང་ཚོ་མི་སྒེར་གྱི་ངོས་ནས་རྟ་མགྲིན་ཚེ་རིང་ལ་ཁ་ཆག་སྣ་རལ་གྱི་གནད་དོན་གང་ཡང་མེད་ཅེས་ཞུས་པར། བརྡ་ཐོ་གཉིས་པའི་ཐོག་བཟོ་བཅོས་བྱས་ཏེ་སྨན་རྩིས་ཁང་ཡིན་པའི་བརྡ་བསླེབས་པ་རེད། ང་ཚོས་བརྡ་ཐོ་བརྩི་སྲུང་བྱས་ཏེ་ང་ཚོས་འཐུས་མིས་གནད་དོན་གྱི་བྱུང་རིམ་དང་བདེན་རྟགས་ཡིག་ཆ། ཞུ་རྩའི་དོན་ཚན་ཁག་གི་ལན་འདེབས་བཅས་འཁུར་ཏེ་གསལ་བཤད་ཆེད་ཐེངས་གསུམ་བཅར་བ་ཡིན། ས་གནས་ཁྲིམས་ཞིབ་ཁང་གིས་ངོས་ལེན་མ་གནང་བར་ཆ་རྐྱེན་ལ་གྱོད་ཡའི་མོས་མཐུན་ཆོད་ཡིག་དང་། རྒྱ་གར་ཁྲིམས་ཁང་ནས་ཁས་ལེན་དམ་བཅའ་ (Affidavit) གཉིས་རེ་གྱོད་ཡ་སོ་སོར་དགོས་ལུགས་གསུངས་སོང་། དེ་ང་ཚོས་ཁས་ལེན་ཐུབ་ཀྱི་ཡོད་པ་མ་རེད། རྟ་མགྲིན་ཚེ་རིང་གིས་ས་ཡིག་བརྒྱབ་ཡོད་པ་རེད། ང་ཚོས་ངོས་ལེན་མ་ཐུབ་པའི་རྒྱུ་མཚན་སྨན་རྩིས་ཁང་གིས་བཙན་བྱོལ་བོད་མིའི་བཅའ་ཁྲིམས་དང་། ཁྲིམས་ཁང་ལ་བརྩི་བཀུར་མ་ཞུས་པ་མ་རེད། སྨན་རྩིས་ཁང་དུ་འཛིན་སྐྱོང་གིས་གནས་རིམ་དང་ཕོགས་རིམ་སོགས་རྙོག་གྲ་ཆུང་ཚགས་རིགས་དང་། སྨན་རྩིས་ཁང་དང་སྡེ་ཚན་གཞན་བར་རྙོག་གྲ་བྱུང་བའི་རིགས་ནང་ཁུལ་གྱི་ཐག་གཅོད་ལ་མོས་མཐུན་མེད་པར་ང་ཚོའི་ཁྲིམས་ཁང་གི་ཐག་གཅོད་བྱས་ཀྱང་མ་འགྲིག་པ་མེད་ཀྱང་། ད་རེབ་ཀྱི་འདི་དགེ་རྩའི་ཚོགས་པ་ཞིག་གི་སྤྱི་རྫས་རྐུ་མ་བརྐུས་པའི་རིགས་དེ་ང་ཚོའི་ཁྲིམས་ཁང་གི་གནས་ཚད་བསྡད་ཡོད་པ་མ་རེད་ལ། ཁྲིམས་དེ་འདྲར་སོ་རྒྱག་པའི་ནུས་པ་དེ་མེད་སྟབས། གནས་ཚུལ་འདིའི་རིགས་ང་ཚོའི་ཁྲིམས་ཁང་གི་ལག་བསྟར་བྱ་རྒྱུའི་རིགས་མ་རེད། ”ཅེས་བརྗོད་བྱུང་།

མཇུག་ཏུ་ཁོང་གིས་ནན་ཏན་སྒོས་བརྗོད་དོན། “ ད་ལྟའི་ཆར་ང་ཚོས་རིམ་པ་བཞི་ལས་དང་པོ་ཚར་བ་རེད། རིམ་པ་གཉིས་པ་ས་གནས་ཁྲིམས་ཞིབ་ཁང་གིས་བཀའ་ཁྱབ་བཏང་སྟེ་ལས་བྱེད་གསུམ་ལ་བཙན་བྱོལ་བོད་མིའི་སྤྱི་ཚོགས་ནང་འོས་བསྡུའི་རིགས་ཀྱི་གདམ་བྱ་འདེམས་བྱེད་ཀྱི་ཐོབ་དབང་འཕྲོག་པའི་ཐད་ཆེས་མཐོའི་ཁྲིམས་ཞིབ་ཁང་ལ་སྙན་ཞུ་འབུལ་རྒྱུ་ཡིན། གསུམ་པ་རྟ་མགྲིན་ཚེ་རིང་ལ་ཁེ་ཕན་ཡོད་པའི་དངུལ་གྱི་འདེམས་ཀ་ཞིག་སྤྲོད་རྒྱུ་ཡིན། གལ་སྲིད་ངོས་ལེན་མ་བྱས་ཚེ་རྟ་མགྲིན་ཚེ་རིང་དང་ལྐོག་ཟ་བར་རྒྱབ་སྐྱོར་གནང་མཁན་གྱི་ཁྲིམས་རྩོད་པ་ཚེ་བརྟན་ནོར་བུ་གཉིས་རིང་མིན་རྒྱ་གར་ཁྲིམས་ཁང་ལ་ཁྲིམས་གཏུག་བྱ་རྒྱུ་ཡིན། དེ་བཞིན། ད་བར་གནད་དོན་འདིའི་ཐད་འགྲོ་གྲོན་ཇི་སོང་ཚང་མ་རྟ་མགྲིན་ཚེ་རིང་གིས་ལག་ནས་བསྡུ་རྒྱུའི་ཐག་གཅོད་བྱས་ཡོད་ལ། མ་འོངས་པར་སྨན་རྩིས་ཁང་གི་ལས་བྱེད་ཆེ་ཕྲ་ཆུང་གསུམ་སུ་ཞིག་གིས་གཞུང་གནོད་སྒེར་ཕན་དང་རྩིས་ཁྲ་སྦས་སྐུང་བྱས་རིགས་ལ་བཅད་ཁྲ་བཏང་བར་བརྩི་སྲུང་དང་ལེན་མ་ གནང་ཚེ་རྒྱ་གར་ཁྲིམས་ཁང་དུ་ཁྲིམས་གཏུག་བྱ་རྒྱུ་དེ་སྨན་རྩིས་ཁང་གི་ལངས་ ཕྱོགས་ཡིན། ” ཞེས་བརྗོད་བྱུང་།

གསར་འགོད་པས་བོད་མིའི་སྒྲིག་འཛུགས་ཆེས་མཐོའི་ཁྲིམས་ཞིབ་ཁང་གི་སྤྱི་ཁྱབ་དྲུང་ཆེ་བཀྲ་ཤིས་རྒྱ་མཚོ་ལགས་སུ་ས་གནས་ཁྲིམས་ཁང་གི་ཐག་གཅོད་དེར་གཟིགས་ཚུལ་གང་འདྲ་ཡོད་མེད་དྲིས་པར། “ སྤྱིར་བཏང་ས་གནས་ཁྲིམས་ཞིབ་ཁང་གིས་ཁ་མཆུ་ཐག་གཅོད་ཅི་ཞིག་བྱས་ཀྱང་། དེ་ལ་ཆེས་མཐོའི་ཁྲིམས་ཞིབ་ཁང་གིས་ལམ་སྟོན་དང་ཐེ་ཇུས་རིགས་གཏན་ནས་བྱེད་ཆོག་གི་མ་རེད། ཁྲིམས་ཀྱི་འགྲོ་སྟངས་ཐོག་ས་གནས་ཁྲིམས་ཞིབ་ཁང་གི་ཐག་གཅོད་ལ་མོས་མཐུན་མེད་པ་ཡིན་ན་ཁྲིམས་ཞིབ་ཁང་གོང་མར་གཏུག་ཡོང་གི་ཡོད་པ་རེད” ཅེས་བརྗོད་བྱུང་། ཁོང་ལ་སྨན་རྩིས་ཁང་གི་འགན་འཛིན་སོགས་ཀྱིས་གདམ་བྱ་འདེམས་བྱེད་ཀྱི་ཐོབ་དབང་བསྐྱར་དུ་ལེན་པའི་ལམ་ཁ་གང་འདྲ་ཡོད་མེད་དྲིས་པར། “ ས་གནས་ཁྲིམས་ཞིབ་ཁང་གིས། སྔར་བཤགས་ཕྱིས་འདོམས་མ་བྱས་པར། བཙན་བྱོལ་བོད་མིའི་སྤྱི་ཚོགས་ནང་འོས་བསྡུའི་རིགས་ཀྱི་གདམ་བྱ་འདེམས་བྱེད་ཀྱི་ཐོབ་དབང་མེད་པའི་ཐག་གཅོད་བྱས་པ་ཡིན། ཞེས་བཀའ་ཁྱབ་བཏང་བ་ལས་བཅད་ཁྲ་མ་རེད། ཐེངས་འདིར་ཁོང་ཚོ་ཉམས་ཞིབ་ཀྱི་རིམ་པ་དང་གྱོད་ཡ་མོས་མཐུན་ཆོད་ཡིག་ལ་ས་རྟགས་མ་བརྒྱབ་པའི་དབང་གིས་ཁྲིམས་ཡིག་ནང་གསལ་གྱི་དོན་ཚན་དང་འགལ་ཏེ་བཀའ་ཁྱབ་བཏང་བ་རེད། ཁོང་ཚོར་རྒྱུ་མཚན་ཁུངས་ལུང་ག་རེ་བཤད་རྒྱུ་ཡོད་ན་བཤད་དེ། ས་གནས་ཁྲིམས་ཞིབ་ཁང་ལ་སྔར་བཤགས་ཕྱིས་འདོམས་བྱས་པ་དང་། མོས་མཐུན་ཆོད་ཡིག་ལ་ས་རྟགས་བརྒྱབ་པ་ཡིན་ན། ཉེས་ཆད་དེ་རང་བཞིན་གྱིས་ཕྱིར་བསྡུ་ཆགས་འགྲོ་བ་རེད” ཅེས་བརྗོད་བྱུང་།