རེས་གཟའ་ལྷག་པའི་ཉིན་གྱི་ཕྱི་དྲོར་སི་ཁྲོན་ཁྲིན་ཏུའུ་མེན་ཅང་ས་ཁུལ་གྱི་རང་ལོ་ ༡༠ ཡས་མས་ཀྱི་སློབ་མ་ཞིག་ཁང་རྩེག་ཐོག་ནས་མཆོངས་ཏེ་རང་ཤི་བརྒྱབ་འདུག
ཟླ་སྔོན་མའི་ཚེས་ ༣༠ ཉིན་གྱི་ཕྱི་དྲོར་པེ་ཅིན་གྱི་ཆུ་ཚོད་ ༦ པ་ཙམ་ལ། སི་ཁྲོན་ཁྲིན་ཏུའུ་མེན་ཅང་ས་ཁུལ་གྱི་ལོ་རིམ་ ༥ པའི་སློབ་མ་ལོ་ན་ ༡༠ ཡས་མས་ཤིག་རང་ཁྱིམ་གྱི་ཁང་རྩེག་ ༣༠ ནས་མཆོངས་ཏེ་རང་ཤི་བརྒྱབ་ཡོད་པ་དང༌། སློབ་ཕྲུག་དེའི་སྐད་ཡིག་སློབ་དེབ་ཀྱི་མདུན་ངོས་སུ་ “དགེ་རྒན་ལགས། ངས་སྒྲུབ་ཐུབ་ཀྱི་མི་འདུག ང་ཁང་རྩེག་ནས་མཆོང་སྐབས་ཐེངས་དུ་མར་ཕྱིར་ལོག་དགོས་བྱུང་”ཞེས་བྲིས་ཡོད་འདུག ཡུལ་མི་ཞིག་གིས་བརྗོད་ན། དཔེ་ཀློག་འགྲན་བསྡུར་གྱི་སྐབས་སུ་བུ་ཆུང་གིས་ཁ་བརྡ་བྱས་པར། དགེ་རྒན་གྱིས་ཡིག་འབྲི་ ༡༠༠༠ ཅན་གྱི་རང་སྐྱོན་ངོས་ལེན་ཡི་གེ་འབྲི་དགོས་པ་དང༌། གལ་སྲིད་མ་བྲིས་ན་ཁང་རྩེག་ནས་མཆོང་དགོས་སྐོར་གྱི་འཇིགས་སྐུལ་བྱས་རྗེས། བུ་ཆུང་གིས་རང་སྐྱོན་ངོས་ལེན་ཡི་གེ་འབྲི་མ་ཤེས་པར་རང་ཤི་བརྒྱབ་ཡོད་ལུགས་བརྗོད་འདུག
བུ་ཆུང་དེའི་མ་ཚབ་ཀྱིས་གསར་ལམ་ཁག་ཏུ་བརྗོད་པ་ལྟར་ན། ཉིན་དེའི་ཕྱི་དྲོར་འཛིན་གྲྭའི་དགེ་རྒན་ཁྲིན་ཧྲོ་ཡན་གྱི་ཁ་པར་བསླེབས་ཏེ། ཕྱི་དྲོར་བུ་ཆུང་ལ་སྐད་ཆ་བཤད་དགོས་པས་རྗེས་ལ་འདུག་དགོས་སྐོར་བརྗོད་ཡོད་པ་ དང༌། སྐབས་དེར་མ་ཚབ་ཀྱིས་ཁོའི་སློབ་སྦྱོང་ཐོག་གནད་དོན་བྱུང་བ་ཡིན་ནམ་ཞེས་དྲིས་པར། བུ་ཆུང་གིས་གཅིག་ནས་སློབ་གྲོགས་ཚོས་སྐྱེས་སྐར་གྱི་ལེགས་སྐྱེས་སྤྲོད་སྐབས། འདོད་བློ་མ་ཁེངས་ན་ཕྱིར་སློག་སྟེ་གུས་ཞབས་མེད་ལུགས་དང༌། གཉིས་ནས་རྒྱུན་དུ་ཐུན་མོང་གི་ལས་འགུལ་རིགས་སྤེལ་སྐབས་མཉམ་ཞུགས་མི་བྱེད་པ་མ་ཟད། ཉིན་དེར་འཛིན་གྲྭའི་ནང་སྐད་ཆ་བཤད་ནས་སྒྲིག་ལམ་ལ་གཏོར་བཤིག་བཏང་ཡོད་སྟབས། དགེ་རྒན་གྱིས་ཁོ་ལ་ཡིག་འབྲི་ ༡༠༠༠ ཅན་གྱི་རང་སྐྱོན་ངོས་ལེན་ཡི་གེ་ཞིག་འབྲི་བའམ་ཡང་ན། ཆུ་ཚོད་གཅིག་རིང་ཡར་ལངས་དགོས་པའི་གདམ་ག་གཉིས་སྤྲད་ཡོད་ཀྱང༌། ངོས་ལེན་ཡི་གེ་འབྲི་མགོ་མ་བརྩམས་གོང་ནས་ངུ་ཞོར་དུ། གལ་སྲིད་ངས་འབྲི་མ་ཤེས་ན་ག་རེ་བྱེད་དགོས་པ་རེད་ཅེས་དྲིས་ཡོད་པ་དང༌། སྐབས་དེར་དགེ་རྒན་གྱིས་མ་བྲིས་གོང་ནས་འབྲི་མི་ཤེས་ཟེར་རྒྱུ་ག་ལ་ཡོད་ཅེས་ལབ་ཚུལ་དང༌། ཕྱི་དྲོ་ཆུ་ཚོད་ ༦།༢༠ 
ཙམ་ལ་ཁྱིམ་དུ་བསླེབས་སྐབས་བུ་ཆུང་གིས་རང་ཤི་བརྒྱབ་པ་ཤེས་རྟོགས་བྱུང་བ་དང༌། ནམ་རྒྱུན་ཁོའི་སློབ་སྦྱོང་ཧ་ཅང་ཡག་པོ་ཡོད་པ་མ་ཟད། ཕ་མ་དང་ཁྱིམ་མི་ཚོའི་ཁ་ལ་ཉན་ཞིང་དང་ཡ་རབས་ཚུལ་ལྡན་ཞིག་ཡིན་སྐོར་བརྗོད་འདུག
ཁ་སང་སློབ་ཕྲུག་དེའི་ཁྱིམ་མི་ཚོས་སློབ་གྲྭའི་སྒོ་ཆེན་དུ་“ངའི་བུ་ཕྱིར་སྤྲད་དེ་ཁྱིམ་བདག་དང་བུ་ཕྲུག་ཡོངས་ལ་གསལ་བཤད་བྱོས། ”ཞེས་པའི་འཕྲེད་དར་འཕྱར་ཏེ་ཞུ་སྐུལ་བྱས་ཡོད་པ་མ་ཟད། བུ་ཆུང་འདས་རྐྱེན་གང་མགྱོགས་གསལ་བོ་བཟོ་དགོས་པ་དང༌། འཛིན་གྲྭའི་དགེ་རྒན་བུ་ཆུང་གི་ཕུང་པོར་ལྟ་རུ་ཡོང་དགོས་པའི་རེ་སྐུལ་བྱེད་ཀྱི་ཡོད་ཀྱང༌། ད་ལྟའི་ཆར་འཛིན་གྲྭའི་དགེ་རྒན་མཐོང་སར་ཡོང་མེད་པ་དང༌། ཁ་སང་ཕྱི་དྲོར་ཉེན་རྟོག་ཁང་གིས་བུ་ཆུང་གི་ཁྱིམ་མི་ཚོ་སློབ་གྲྭའི་ནང་སྐད་བཏང་སྟེ། བུ་ཆུང་གིས་རང་ཤི་བརྒྱབ་པ་གསལ་བོ་བྱུང་ཡོད་ལུགས་དང༌། བདུན་ཕྲག་རྗེས་མའི་གཟའ་ཟླ་བའི་ཉིན་ཞིབ་ཕྲའི་གནས་ཚུལ་ཤེས་རྟོགས་ཐུབ་ཚུལ་བརྗོད་ཡོད་འདུག
གསར་འགོད་པ། པདྨ་མཚོ།
ལོ་རེར་རྒྱ་ནག་ནང་རང་ཤི་རྒྱ་མཁན་སློབ་མ་ག་ཙམ་བྱུང་ཡོད་པ་མ་ཤེས་སམ