བོད་མིའི་སྐྱིད་སྡུག་མཉམ་ཁུར་བྱེད་དགོས།

ཁ་སང་བོད་རྒྱལ་ཡོངས་མང་གཙོ་ཚོགས་པའི་གོ་སྒྲིག་འོག་རྒྱ་གར་རྒྱལ་ས་ལྡི་ལིར། ཉེ་ལམ་ཁམས་འབྲི་རུ་ཁུལ་དུ་རྒྱ་གཞུང་གིས་དྲག་གནོན་བྱེད་ཀྱིན་པར་ངོ་རྒོལ་གོམ་བགྲོད་ལས་འགུལ་ཞིག་གོ་སྒྲིག་བྱས་ཡོད་ཅིང་། དེ་ནི་ཁ་སང་ཚེས་ ༦ ཉིན་གྱི་སྔ་དྲོའི་ཆུ་ཚོད་ ༡༡།༤༠ ཐོག་རྒྱ་གར་རྒྱལ་ལྡི་ལིའི་རམ་ལེ་ལཱ་( Ram Leela maidan ) ནས་ཇན་ཏར་མན་ཏར་ (Jantar Mantar) བར་གཞིས་བྱེས་བོད་མིའི་སྐྱིད་སྡུག་མཉམ་འཁུར་ཞེས་པའི་རྒྱ་ནག་གཞུང་ལ་ངོ་རྒོལ་གོམ་བགྲོད་ལས་འགུལ་ཞིག་སྤེལ་ཡོད་འདུག

མང་ཚོགས་ཇན་ཏར་མན་ཏར་རུ་འཛོམས་རྗེས་བོད་དོན་ཆེད་སྐུ་སྲོག་ཤོར་བའི་རྒྱལ་གཅེས་དཔའ་བོ་དང་དཔའ་མོ་རྣམས་ལ་མྱ་ངན་གུས་འདུད་ཞུས་རྗེས། བོད་ཀྱི་རྒྱལ་ཡོངས་མང་གཙོ་ཚོགས་པའི་དྲུང་ཆེ་སེར་སྨད་བློ་དགའ་ལགས་ཀྱིས་བོད་སྐད་དང་ཚོགས་གཙོ་དགེ་ལེགས་འཇམ་དབྱངས་ལགས་ཀྱིས་དབྱིན་སྐད། བོད་མི་མང་སྤྱི་འཐུས་ཨ་ཅཱརྱ་ཡེ་ཤེས་ཕུན་ཚོགས་ལགས་ཀྱིས་ཧིན་སྐད་ཐོག་བོད་ནང་གི་ཛ་དྲག་གནས་སྟངས་ངོ་སྤྲོད་གནང་ཡོད་པ་དང་། དེའི་རྗེས་གདན་ཞུའི་སྐུ་མགྲོན་རྒྱ་གར་བ་ཁག་ཅིག་གིས་ཀྱང་གཏམ་བཤད་གནང་ཡོད་འདུག ལས་འགུལ་དེའི་ནང་ལྡི་ལི་བསམ་ཡས་གླིང་མི་མང་དང་མཐོ་སློབ་ཁག་གི་སློབ་ཕྲུག་སོགས་མཉམ་ཞུགས་གནང་ཡོད་འདུག

ཐེངས་འདིའི་ལས་འགུལ་ནི་མདོ་ཁམས་འབྲི་རུའི་ནང་གི་ཛ་དྲག་གི་གནས་སྟངས་གཙོ་བོ་བྱས་པའི་བོད་ནང་གི་རྒྱ་ནག་གི་དམ་བསྒྲགས་ལས་འགུལ་རྣམས་རྒྱལ་སྤྱིའི་སྤྱི་ཚོགས་ནས་ཐུགས་སྣང་ཡོང་ཆེད་ཡིན་པ་དང་། ལས་འགུལ་དེར་བསྒྲགས་གཏམ་དོན་ཚན་བཞི་ཡོད་པ་དག་ནི། ༡༽ བོད་ཀྱི་ལོ་རྒྱུས་ནི་ཡུན་རིང་གི་བྱུང་རབས་ཤིག་ཡིན་པར་འཛམ་གླིང་གི་ཆེས་མཐོའི་མི་སྣས་མཁྱེན་གསལ་ཡིན་པ་མ་ཟད། ཉེ་ལམ་བོད་ནང་གཅིག་པུར་རྒྱལ་གཅེས་དཔའ་བོ་ ༡༢༡ གིས་རང་ལུས་མེར་བསྲེགས་ཀྱི་ལམ་ནས་བོད་ཀྱི་སྡུག་བསྔལ་རྣམས་འཛམ་གླིང་ཐོག་གསལ་སྟོན་གནང་ཡོད་ལ། རྒྱལ་སྤྱིའི་གསར་འགྱུར་བརྒྱུད་ལམ་དུ་བོད་ནང་གི་ཛ་དྲག་གི་གནས་ཚུལ་ཆ་ཚང་བ་ཞིག་ཐོན་མིན་ལ་མ་ལྟོས་པར་རྒྱལ་སྤྱིའི་གནད་ཡོད་མི་སྣ་དང་གཞུང་འབྲེལ་ཁག་ནས། བོད་ཀྱི་དཀའ་ངལ་དེ་དག་མ་གོ་མ་ཐོས་པའི་ཟོལ་གྱིས་སྐྱུར་འཇོག་དང་སྣང་ཆུང་དུ་མི་གཏོང་བའི་རེ་སྐུལ་ཞུ་རྒྱུ། ༢༽ བོད་ནང་གི་ཛ་དྲག་གི་གནས་སྟངས་སྤྱི་དང་ལྷག་པར་ཉིན་གྲངས་བརྒྱ་མ་ཟིན་པའི་ནང་། རྒྱ་ནག་གཞུང་གིས་མདོ་ཁམས་འབྲི་རུ་ལ་རྡུང་རྡེག་ཚ་ནན་བཏང་བ་དང་ས་གནས་མང་ཚོགས་ཀྱི་མངོན་འདོད་རྡོག་རོལ་བཏང་སྟེ་ས་གནས་གང་སར་དམག་མི་བཀྲམས་པ་དང་མི་མང་ནང་གང་བྱུང་མེ་མདའ་བརྒྱབ་པ། ཉེས་མེད་ཡུལ་མི་འཇུ་བཟུང་བྱས་པ་སོཌ་མི་སྦྱོད་ལས་འདས་པའི་བྱ་སྤྱོད་དེ་དག་འཕྲལ་དུ་མཚམས་འཇོག་དང་བོད་མི་དེ་རྣམས་མྱུར་དུ་གློད་གྲོལ་བྱ་དགོས།

༣༽ བོད་ཀྱི་ཡུལ་མི་དང་གནའ་བོའི་སྲོལ་རྒྱུན་རིག་གནས་སོགས་རྩ་མེད་གཏོང་བའི་ཇུས་ངན་བཤམ་སྟེ། བོད་པ་རིག་གནས་ཅན་དང་མི་རིགས་ཀྱི་སློབ་གསོའི་ལམ་སྟོན་པ་སོགས་འཇུ་བཟུང་བྱས་པ། གཏེར་ཁ་སྔོག་འདོན་སོགས་ཀྱིས་འཁོར་ཡུག་གཏོར་སྐྱོན་བཏང་བ། འབྲོག་སྡེ་རྣམས་ཤུལ་མེད་དང་ཞིང་པའི་ཞིང་སར་ནགས་ཚལ་ཅན་དུ་བསྒྱུར་བ་སོགས་སྲོལ་རྒྱུན་འཚོ་བའི་ཁ་ཕྱོགས་རྣམས་བཙན་སྒྱུར་བྱེད་བཞིན་པའི་བྱ་ངན་དེ་དག་འཕྲལ་དུ་ཕྱིར་འཐེན་བྱ་དགོས། ༤༽ རྒྱ་ནག་རང་ཉིད་ཀྱིས་གཏན་འབེབ་བྱས་པའི་རྩ་ཁྲིམས་ཀྱི་མང་གཙོའི་ཐོབ་ཐང་སོགས་ལ་སྣང་ཆུང་གཏོར་བཤིག་བཏང་བ་དང་། བོད་མི་རིགས་ཀྱི་སོན་རྩའི་མི་རབས་གསར་པའི་ན་གཞོན་ཤེས་ཡོན་ཅན་རྣམས་ལ་འོས་བབ་ཀྱི་ལས་ཀ་མི་སྤྲོད་པ་དང་ལས་སྣེ་ནས་ཕྱིར་འཕུད་གཏོང་བ། ཐབས་ལམ་སྣ་ཚོགས་ཀྱི་སྒོ་ནས་ཁོང་ཚོའི་མདུན་ལམ་ལ་བར་ཆད་གཏོང་བ་སོགས་ཀྱི་གཡོ་ཇུས་ཇི་སྙེད་ཅིག་རྩོམ་བཞིན་པ་དེ་དག་འཕྲལ་མར་མཚམས་འཇོག་བྱ་དགོས། ཞེས་སོགས་བཀོད་ཡོད་འདུག