དེ་རིང་ངྷ་སའི་གཞུང་འབྲེལ་མིན་པའི་ཚོགས་པ་ལྔས་རྒྱ་ནག་ནི་འགྲོ་བ་མིའི་ཐོང་ཐང་གསལ་བསྒྲགས་རྡོག་རོལ་གཏོང་མཁན་གཏེ་བོ་དེ་ཡིན་སྟབས། ཐེངས་འདིར་རྒྱ་ནག་འགྲོ་བ་མིའི་ཐོབ་ཐང་ལྷན་ཚོགས་ཀྱི་རྒྱུན་ལས་གྲས་སུ་ཞུགས་རྒྱུའི་ཐོབ་ཐང་མེད་ཅེས་ངོ་རྒོལ་ལས་འགུལ་ཞིག་སྤེལ་སོང་།
དེ་རིང་སྔ་དྲོའི་ཆུ་ཚོད་ ༡༠ པའི་ཐོག སུད་སིའི་གྲོང་ཁྱེར་ཇི་ནེ་ཝའི་ནང་མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཚོགས་ཀྱིས་ལོ་བཞིའི་རིང་ཚོགས་མིའི་རྒྱལ་ཁབ་སོ་སོའི་ནང་གི་འགྲོ་བ་མིའི་ཐོབ་ཐང་ལ་བསྐྱར་ཞིབ་ཚོགས་འདུ་དེ་རིང་མཇུག་བསྒྲིལ་ཏེ་ལྷན་ཚོགས་ཀྱི་རྒྱུན་ལས་འོས་འདེམས་བྱེད་ཀྱི་ཡོད་པའི་སྐབས་དང་བསྟུན་ཏེ། ངྷ་སའི་གཞུང་འབྲེལ་མིན་པའི་ཚོགས་པ་ལྔའི་གོ་སྒྲིག་འོག ངྷ་ས་མེག་གྷན་ཁྲོམ་གཞུང་དུ། རྒྱ་གཞུང་གིས་བོད་མིའི་གཞི་རྩའི་འགྲོ་བ་མིའི་ཐོབ་ཐང་བརྩི་མེད་རྡོག་རོལ་བཏང་དང་གཏོང་བཞིན་ཡོད་པའི་སྐབས་འདིར། འགྲོ་བ་མིའི་ཐོབ་ཐང་ལྷན་ཚོགས་ཀྱི་རྒྱུན་ལས་རྒྱལ་ཁབ་ཁག་གིས་འགྲོ་བ་མིའི་ཐོབ་ཐང་ཡོངས་ཁྱབ་གསལ་བསྒྲགས་ཀྱི་རྩ་ཁྲིམས་ལ་དོན་དངོས་ཀྱིས་བརྩི་བཀུར་བྱས་ཏེ། རྒྱ་ནག་ཡང་བསྐྱར་མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཚོགས་རྒྱུན་ལས་གྲས་སུ་ཞུགས་རྒྱུར་རྒྱབ་སྐྱོར་མི་བྱེད་རྒྱུར་བསྒྲགས་གཏམ་དང་། ད་ལྟ་བོད་ནང་གི་ཛ་དྲག་གནས་སྟངས་སྔར་ལས་ཇེ་སྡུག་ཏུ་འགྲོ་བཞིན་ཡོད་པར་ངོ་རྒོལ་ལས་འགུལ་ཞིག་སྤེལ་སོང་།
ཐེངས་འདིའི་ལས་འགུལ་དང་འབྲེལ་བའི་གཞུང་འབྲེལ་མིན་པའི་ཚོགས་པ་ལྔའི་བསྒྲགས་གཏམ་ནང་། གཞོན་ནུ་ལྷན་ཚོགས་ཀྱི་ཚོགས་གཙོ་བསྟན་འཛིན་འཇིགས་མེད་ལགས་ཀྱིས། རྒྱ་ནག་མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་མིར་འོས་འདེམས་བྱེད་པ་དེ་ནི་ལྷན་ཚོགས་ཀྱི་དགོས་དམིགས་དང་ཡོངས་སུ་འགལ་བའི་ངོ་ཚ་དགོས་པའི་གནད་དོན་ཞིག་རེད། ཟུར་གནས་ཀྱི་འགྲོ་བ་མིའི་ཐོབ་ཐང་ཚོགས་པ་ཡོངས་ནས་རྒྱ་ནག་ནང་འགྲོ་བ་མིའི་ཐོབ་ཐང་ཡོད་པའི་སྙན་ཐོ་ཞིག་སྟོན་རྒྱུ་མེད་པ་གསལ་སྟོན་བྱས་ཡོད། རྒྱ་གཞུང་གིས་བོད་གཙོས་རྒྱ་ནག་གི་དབང་སྒྱུར་འོག་ཏུ་ཡོད་པའི་མི་རིགས་ཡོངས་ལ་དོན་དམ་གྱི་འགྲོ་བ་མིའི་ཆེ་མཐོང་དང་དྲང་བདེན། འདྲ་མཉམ་བཅས་ཀྱི་ཐོབ་ཐང་ཡོད་པའི་དཔང་རྟགས་ཤིག་མ་སྟོན་བར་དུ་མཉམ་འབྲེལ་རྒྱལ་ཚོགས་ཀྱིས་རྒྱ་ནག་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་མིར་འཇོག་ཐབས་མེད་ཅེས་བརྗོད་འདུག
བུད་མེད་ལྷན་ཚོགས་ཀྱི་ཚོགས་གཙོ་བཀྲ་ཤིས་སྒྲོལ་མ་ལགས་ཀྱིས། བོད་ནང་བོད་མི་གྲངས་ ༡༢༢ ཙམ་གྱིས་རང་ལུས་མེར་བསྲེགས་གནང་ནས་རྒྱ་ནག་གཞུང་ལ་ངོ་རྒོལ་ལས་འགུལ་སྤེལ་ཡོད་ པ་འདིས་བོད་ནང་འགྲོ་བ་མིའི་ཐོབ་ཐང་གི་གནས་སྟངས་ཇེ་ཞན་ཇེ་སྡུག་དུ་འགྲོ་བཞིན་ཡོད་པ་གསལ་སྟོན་དང་། རྒྱ་གཞུང་གིས་བོད་ནང་གི་འགྲོ་བ་མིའི་ཐོབ་ཐང་ལ་ཚད་ལས་བརྒལ་བའི་བརྡབ་གསིག་དང་བརྩི་མེད་གཏོང་བཞིན་པ་མཚོན་ཡོད་ལ། གནད་དོན་དེའི་ཐོག་ཨ་རིའི་ནེའུ་ཡོག་ཏུ་རྟེན་གཞི་བྱས་པའི་འགྲོ་བ་མིའི་ཐོབ་ཐང་རྟོག་ཞིབ་ཚོགས་པས་བཏོན་པའི་ ༢༠༡༣ ལོའི་སྙན་ཐོའི་ནང་རྒྱ་གཞུང་གིས་བཙོན་པ་སྲོག་ཐོག་བཏང་བའི་གྲངས་ཚད་དེ་ནི་འཛམ་གླིང་རྒྱལ་ཁབ་གཞན་ཁག་གིས་སྲོག་ཐོག་བཏང་བའི་ཁྱོན་བསྡོམས་ཀྱི་གྲངས་འབོར་ལས་ཀྱང་མང་བ་ཆགས་ཡོད་པ་ལྟར། རྒྱུ་མཚན་དེ་དག་གིས་རྒྱ་ནག་མཉམ་འབྲེལ་རྒྱལ་ཚོགས་ཀྱི་ཚོགས་ཁོངས་སུ་སླར་འདེམས་བྱེད་རྒྱུ་རན་པོ་མེད་ལ་འཛུལ་ཞུགས་ཀྱི་འོས་བབ་གཏན་ནས་མེད་པར་ར་འཕྲོད་བྱུང་ཡོད་ཅེས་བརྗོད་འདུག
དགུ་བཅུ་གསུམ་ལས་འགུལ་ཚོགས་པའི་ཚོགས་གཙོ་པ་སངས་ཚེ་རིང་ལགས་ཀྱིས། ཁོ་ཚོ་མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་མིར་བཞུགས་པའི་དུས་ཡུན་རིང་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཇེ་ཞན་ཇེ་སྡུག་ཏུ་ཕྱིན་ཡོད། རྒྱ་ནག་དམར་ཤོག་དབང་སྒྱུར་རིང་ལུགས་པས་བོད་གཙོས་སོག་པོ་དང་ཡུ་གུར་མི་རིགས་སོགས་ཀྱི་རང་དབང་དང་ཐོབ་ཐང་ལ་རྩིས་མེད་དྲག་གནོན་དང་མནར་གཅོད། འཇིགས་སྐུལ་བཅས་བྱེད་ཀྱི་ཡོད། དེས་ན་རྒྱ་ནག་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ཚོགས་མིའི་ཁོངས་སུ་ཡོད་པ་ནི་དོན་དངོས་དུ་ལྷན་ཚོགས་ཀྱིས་རྗོད་བཞིན་པའི་རང་དབང་དང་འགྲོ་བ་མིའི་ཐོབ་ཐང་གི་གལ་གནད་ལ་མཐོང་ཆུང་དང་ཁྱད་གསོད་བྱས་པ་ཞིག་ཡིན་ཞེས་བརྗོད་འདུག
བོད་མི་དང་བོད་དོན་རྒྱབ་སྐྱོར་པ་གཙོས་འཛམ་གླིང་མི་མང་ས་ཡ་གཅིག་ལྷག་གིས་གཟའ་འཁོར་གཅིག་རིང་དྲ་ཚིགས་ཨ་ཝ་ཛེ་ (Avaaz.org) https://secure.avaaz.org/en/stand_with_tibet_loc/?bKfnNab&v=30811བརྒྱུད་རྒྱ་ནག་མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཚོགས་ཀྱི་རྒྱུན་ལས་རྒྱལ་ཁབ་གྲས་སུ་མི་འདེམས་རྒྱུར་འབོད་སྐུལ་མཚན་རྟགས་བསྡུས་ཡོད་འདུག
དེ་རིང་ཕྱི་དྲོའི་ཆུ་ཚོད་ ༦ སྟེང་ཁ་སང་བོད་ནང་དུ་གྲྭ་ཚེ་རིང་རྒྱལ་ལགས་ཀྱིས་བོད་ཀྱི་བསྟན་སྲིད་མི་རིགས་ཆེད་རང་ལུས་མེར་བསྲེགས་གནང་བར་གདུང་སེམས་མཉམ་སྐྱེད་ཀྱི་མར་མེ་ཁྲོམ་སྐོར་ཞིག་ཀྱང་གནང་སོང་།
གསར་འགོད་པ། ལྷ་སྐྱབས་རྒྱལ།
འདི་ལས་ཀ་ཉི་འཚེ་བ་འདི་རིགས་མཐོང་ན་ཉོབ་ཀི་འདུག
སྐུ་ཞབས་ཞིས་ཅིན་ཕིན་གྱི་འདྲ་གཟུགས་དེ་རྩེད་མོ་རྩེད་སྤྱད་མ་བྱས་ན་ཡག་གི་རེད། ཁྱེད་ཚོགས་པ་ལྔས་བོད་ལ་ཕན་མི་ཐོག་ཡང་སྡུག་ཉེས་མ་བསགས་ན་དགའ་གི་རེད། དགུ་བཅུ་གསུམ་ཟེར་བ་དེས་ཁ་སྔོན་དབུ་མ་ཡིན་ཟེར་ནས་ལྷ་རང་འབབ་རྒྱག་གིས། དེ་རིང་ཡང་གཞུང་འབྲེལ་མིན་པའི་ཚོགས་པ་ལྔ་ཟེར་ནས་འཚང་ཁ་རྒྱག་གིས། ཧཧཧཧཧཧཧ