བོད་དོན་རྐང་འཁོར་སྐོར་སྐྱོད་པ་རིན་པོ་ལགས་རྒྱ་གར་ལྷོ་ཕྱོགས་ཁུལ་དུ་སྐོར་སྐྱོད་དང་གནས་མཇལ་གྲུབ་སྟེ་ཕྱིར་ལྡི་ལིར་འབྱོར་ཡོད་པ་དང་མི་འགྱངས་པར་ངྷ་རམ་ས་ལར་འབྱོར་རྒྱུ་ཡིན་འདུག
ཟླ་སྔོན་མའི་ཕྱི་ཚེས་ ༢༣ ཉིན་བོད་དོན་རྐང་འཁོར་སྐོར་སྐྱོད་པ་རིན་པོ་ལགས་རྒྱ་གར་དུ་འབྱོར་ཏེ་རྒྱ་གར་གྱི་ནང་པའི་གནས་ཆེན་ཁག་དང་། གདན་ས་གསུམ་གཙོས་དགོན་སྡེ་ཁག་ནང་སྐོར་སྐྱོད་ཀྱིས། རྒྱལ་གཅེས་དཔའ་བོ་དཔའ་མོ་ཚོར་བསྔོ་སྨོན་སྐྱབས་འཇུག་ཕུལ་ཡོད་པ་དང་། དེ་བཞིན། སྦེལ་ཀོབ་བོད་མིའི་གཞིས་ཆགས་དང་སེར་བྱེས་མཁས་སྙན་གྲྭ་ཚང་དུ་བོད་དོན་སྐོར་སྐྱོད་དང་འབྲེལ་བའི་གཏམ་བཤད་སོགས་གནང་གྲུབ་སྟེ། ཁ་སང་མོན་གྷོལ་ནས་ཕྱིར་ལྡི་ལིར་ཕྱིན་ཡོད་པ་དང་། མི་འགྱངས་བར་དྷ་རམ་ས་ལར་འབྱོར་རྒྱུ་ཡིན་འདུག
འདི་གའི་གསར་འགོད་པས་ཁ་པར་བརྒྱུད་རིན་པོ་ལགས་སུ། ཟླ་གཅིག་ཙམ་གྱི་རིང་བལ་ཡུལ་གྱི་ནང་པའི་གནས་ཆེན་ཁག་དང་དགོན་སྡེ་ཁག་ཏུ་སྐོར་སྐྱོད་གནང་བའི་སྐོར་དྲིས་པར་ཁོང་གིས། “ ང་བལ་ཡུལ་དུ་བསླེབས་ནས་ཉིན་གཅིག་ཙམ་འགོར་རྗེས། བོད་ཀྱི་རྒྱལ་དར་ཡོད་པའི་གྱོན་པ་གོན་ནས་མཆོད་རྟེན་སྐོར་དུ་ཕྱིན་ཡང་དམིགས་བསལ་གྱི་དཀའ་ངལ་དེ་འདྲ་འཕྲད་མ་སོང་། ཡིན་ནའང་། ངོ་དེབ་ཀྱི་ནང་དུ་བོད་ཡིག་གི་འཕྲིན་ཐུང་གཉིས་བསླེབས་ཏེ། ཁྱེད་རང་ཏཱ་ལའི་རུ་ཚོགས་ཀྱི་ཚོགས་མི་དང་ཁ་བྲལ་བ་ཡིན་སྟབས། ཁྱེད་ཀྱི་གནས་ཚང་དང་འབྲེལ་ཡོད་ཚོ་མི་རིང་བར་རེ་རེ་བཞིན་འཛིན་བཟུང་བྱ་རྒྱུ་ཡིན་ཞེས་སོགས་བརྗོད་འདུག་སྟབས། བལ་ཡུལ་དུ་ཕ་ཡུལ་གཅིག་པ་དང་གྲོགས་པོ་གྲོགས་མོ་སོགས་མང་པོ་འདུག་ཀྱང་ཕན་ཚུན་འབྲེལ་འདྲིས་བྱས་མེད། དེ་ནས་ང་བལ་ཡུལ་དུ་ཡོད་དུས་གློག་འཕྲིན་ཐེངས་གཉིས་ལ་འཕྲོ་བརླག་ཏུ་སོང་ནས་ད་ལྟ་ཁའང་ཕྱེ་ཐུབ་ཀྱི་མི་འདུག དེ་མ་གཏོགས་གཞུང་གི་ངོས་ནས་དམིགས་བསལ་གྱིས་དཀའ་ངལ་སྤྲད་མ་སོང་།”ཅེས་བརྗོད་སོང་།
ཡང་ལྡི་ལི་ནས་དྷ་རམ་སར་ཡོང་འཆར་ཡོད་སྐོར་ཁོང་གིས། “དང་ཐོག་ལྡི་ལི་ནས་དྷ་ས་བར་རྐང་འཁོར་བཞོན་རྒྱུའི་འཆར་གཞི་མེད། འོན་ཀྱང་། འབྲེལ་ཡོད་ཚོས་རྐང་འཁོར་བཞོན་ན་ཡག་པོ་ཡོད་ལུགས་གསུངས་སོང་སྟབས། ཆུ་ཚོད་ཀྱིས་ཁོམ་ན་ལྡི་ལི་ནས་དྷ་ས་བར་རྐང་འཁོར་བཞོན་ནས་ཡོང་རྒྱུ་དང་། མ་བྱུང་ན་ཅན་དྷི་སྒར་ནས་དྷ་ས་བར་རྐང་འཁོར་བཞོན་ནས་ཡོང་རྒྱུ་ཡིན། དྷ་ས་ནས་ཉེ་འགྲམ་གྱི་སློབ་གྲྭ་ཆེ་ཁག་ནང་གཏམ་བཤད་སོགས་གཞུང་འབྲེལ་དང་གཞུང་འབྲེལ་མིན་པའི་ཚོགས་པ་ཁག་གིས་གོ་སྒྲིག་གནང་འཆར་ཡོད་ས་རེད། འོན་ཀྱང་ངས་གསལ་བོ་ཤེས་ཀྱི་མེད།”ཅེས་བརྗོད་སོང་།
རིན་པོ་ལགས་ཀྱིས་ད་ལོའི་གསུམ་བཅུའི་དུས་དྲན་ནས་བཟུང་ཡུ་རོབ་ཀྱི་རྒྱལ་ཁབ་ ༡༣ དང་། ཨེ་ཤ་ཡའི་ནང་ཉི་ཧོང་དང་ཐའེ་ཝན། ཧོང་ཀོང་། བལ་ཡུལ། རྒྱ་གར་བཅས་ཁྱོན་རྒྱལ་ཁབ་ ༡༨ ཙམ་གྱི་ནང་སྐོར་སྐྱོད་དང་། ཕྱི་ལོ་ ༢༠༠༠ ནས་ ༢༠༡༢ བར་ཨ་རིའི་མངའ་སྡེ་ ༤༤ དང་ཁེ་ན་ཌ་བཅས་ཀྱི་ནང་དུ་བོད་དོན་སྐོར་སྐྱོད་གནང་ཡོད་འདུག
