དེ་རིང་ངྷ་རམ་ས་ལར་ཆབ་སྲིད་བཙོན་ཟུར་ལྷ་མོ་སྐྱབས་ལགས་ཀྱི་མི་ཚེའི་ལོ་རྒྱུས་དང་འབྲེལ་ཏེ་བོད་ནང་གི་རང་ལུས་མེར་བསྲེགས་སྐོར་གྱི་དངོས་བྱུང་གློག་བརྙན་ཞིག་ཁྱབ་བསྒྲཊ་གནང་སོང་།
དེ་རིང་སྔ་དྲོར་ངྷ་རམ་ས་ལའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་གསར་འགོད་གསལ་བསྒྲགས་ཤིག་སྤེལ་ཏེ། ཆབ་སྲིད་བཙོན་ཟུར་ལྷ་མོ་སྐྱབས་ལགས་ཀྱི་མི་ཚེ་ལོ་རྒྱུས་དང་འབྲེལ་ཏེ་བོད་ནང་རང་ལུས་མེར་བསྲེགས་སྐོར་གྱི་དངོས་བྱུང་གློག་བརྙན་ ༼རྒྱལ་གཅེས་པའི་མཆོད་སྦྱིན་ཞིག༽ཞེས་པའི་རིང་ཚད་སྐར་མ་ ༢༦ ཅན་ཞིག་དབུ་འབྱེད་གནང་གནང་སོང་།
གློག་བརྙན་འདིའི་ནང་ཆབ་སྲིད་བཙོན་ཟུར་ཁོང་གི་མི་ཚེ་ལོ་རྒྱུས་ལས་གཞན། བོད་དུ་བྱུང་དང་འབྱུང་བཞིན་པའི་རང་ལུས་མེར་སྲེག་གི་ཞི་རྒོལ་སྐོར་དང་། རང་སྲེག་དོན་རྐྱེན་གྱིས་བོད་དོན་འཐབ་རྩོད་ཐད་ཤུགས་རྐྱེན་ཅི་ཞིག་ཐེབས་ཀྱིན་ཡོད་མེད་བཅས་གསལ་ཞིང་། ༢༠༠༩ ཟླ་ ༩ ཚེས་ ༢༧ ཉིན། གྲྭ་བཀྲ་བྷེ་ལགས་ཀྱིས་རང་ལུས་མེར་བསྲེགས་བཏང་བ་ནས་ད་ལྟའི་བར། བོད་ཕྱི་ནང་གཉིས་སུ་བོད་མི་ ༡༢༨ ཀྱིས་རང་ལུས་མེར་བསྲེགས་ཀྱིས་རྒྱ་གཞུང་གི་དྲག་གནོན་སྲིད་ཇུས་ལ་ངོ་རྒོལ་དང་། བོད་ནང་རང་དབང་སྐྱར་གསོ་དགོས་པ། ༧གོང་ས་མཆོག་བོད་ནང་ཕེབས་འཇུག་དགོས་པའི་མངོན་འདོད་འབོད་ཚིག་བསྒྲགས་ཡོད་པ་རེད།
སྐབས་དེར་ལྟེ་གནས་ཁང་གི་འགན་འཛིན་ཚེ་རིང་མཚོ་མོ་ལགས་ཀྱིས་བརྗོད་དོན་ལྟར་ན། ཆབ་སྲིད་བཙོན་ཟུར་ལྷ་མོ་སྐྱབས་ལགས་ཀྱིས་རྒྱ་ནག་གི་བཙོན་ཁང་དུ་དཀའ་སྡུག་མང་པོ་མྱངས་ཡོད་པ་མ་ཟད། བཙན་བྱོལ་ནང་བསླེབས་རྗེས་ཀྱང་བོད་དོན་འཐབ་རྩོད་ལས་འགུལ་ནང་མུ་མཐུད་མཉམ་ཞུགས་གནང་གི་ཡོད་སྐོར་དང་། ཁོང་ཅག་ལྟེ་གནས་ཁང་གི་ངོ་ནས་འདས་པའི་ལོ་མང་རིང་ཆབ་སྲིད་བཙོན་ཟུར་སྐོར་ལ་ལས་དོན་མང་པོ་བྱས་ཡོད་ཅིང་མ་འོངས་པར་ཡང་སྔར་ལས་ཤུགས་ཆེ་རུ་གཏོང་འཆར་ཡོད་པ། སྦྱིར་གློག་བརྙན་དེ་ཕྱི་རྒྱལ་ཡུལ་གྲུ་ཁག་ནང་སྔོན་མ་ནས་བསྟན་ཚར་ཡོད་ཀྱང་། སྐུ་ཞབས་ཐེའུ་ཧེ་ཟིན་( Thoe Hessing) ལགས་ཀྱིས་གལ་སྲིད་གློག་བརྙན་འདི་རྒྱ་གར་ནང་ཁྱབ་བསྒྲགས་དགོས་ན་ངེས་པར་ཚོགས་པ་ཆེན་པོ་ཞིག་བརྒྱུད་དགོས་པའི་རེ་འདོན་བཏོན་པ་གཞིར་བཟུང་ཐེངས་འདིར་གསར་འགོད་གསལ་བསྒྲགས་སྤེལ་སྐོར་སོགས་བརྗོད་སོང་།
དེའི་རྗེས་བཙོན་ཟུར་ལྷ་མོ་སྐྱབས་ལགས་ཀྱིས། དབྱིན་ཡུལ་གྱི་གློག་བརྙན་བཟོ་སྐྲུན་བྱེད་མཁན་སྐུ་ཞབས་ཐེའུ་ཧེ་ཟིན་ལགས་ཀྱིས་རེ་སྐུལ་ལྟར། གློག་བརྙན་དེ་ ༢༠༡༢ ལོར་ཟླ་གཉིས་རིང་བཟོ་སྐྲུན་བརྙན་པར་བརྒྱབ་ཡོད་པ་དང་། སྐབས་དེར་ཁོ་རང་ལ་དཀའ་ངལ་མིང་པོ་འཕྲད་ཀྱང་བོད་སྤྱི་བའི་ལས་ལ་བསམ་བློ་བཏང་སྟེ་འབད་བརྩོན་བྱས་ཡོད་ཚུལ་བརྗོད་སོང་། ཁོས་བརྗོད་དོན། “ གློག་བརྙན་འདི་ངའི་མི་ཚེ་ལོ་རྒྱུས་སྐོར་ཁོ་ན་མ་ཡིན་པར། བོད་ནང་གི་རྒྱལ་གཅེས་དཔའ་བོ་དཔའ་མོ་རྣམ་པས་རང་ལུས་མེར་བསྲེགས་ཀྱིས་ཞི་རྒོལ་གནང་བའི་སྐོར་གསལ་བོར་བསྟན་ཡོད་སྟབས། བོད་ནང་གི་གནས་སྟངས་ལ་རྒྱུས་མངའ་ཡོད་མཁན་ཞིག་ཡིན་ན་བཤད་མ་དགོས་པ་རེད། གལ་སྲིད་རྒྱུས་མངའ་མེད་མཁན་ཞིག་ཡིན་ནའང་གློག་བརྙན་འདི་བརྒྱུད་ནས་བོད་རྒྱའི་གནས་ཚུལ་དང་བོད་ནང་གི་འགྲོ་བ་མིའི་ཐོབ་ཐང་སྐོར་གསལ་བོ་རྟོགས་ཐུབ་པ་ཞིག་ཆགས་ཡོད། གློག་བརྙན་འདིའི་ནང་བོད་ནང་གི་རང་ལུས་མེར་བསྲེགས་གནང་མཁན་ཚོའི་འབོད་ཚིག་དང་ཞལ་ཆེམས་གསལ་བོར་བཞག་ཡོད་སྟབས། མེར་བསྲེགས་སྐོར་གྱི་གློག་བརྙན་གཞན་དང་མ་འདྲ་བ་ཞིག་ཆགས་ཡོད” ཅེས་བརྗོད་སོང་།
ལྷ་མོ་སྐྱབས་ལགས་ཀྱིས་ངོ་སྤྲོད་གནང་བ་ལྟར་ན། ཁོང་ཐོག་མ་ ༢༠༠༣ ལོར་རྒྱ་གར་ནང་འབྱོར་ཡོད་པ་དང་། ༢༠༠༦ ལོར་ཕྱིར་བོད་ནང་ལས་འགུལ་སྤེལ་དུ་བསྐྱོད་སྐབས་རྒྱ་ནག་གི་ཉེན་རྟོག་པས་འཛིན་བཟུང་བྱས་ཏེ་ལྷ་ས་གྲོང་ཁྱེར་ཁུལ་ཆུ་ཤུལ་བཙོན་ཁང་དུ་ལོ་གསུམ་ལྷག་རིང་བསྡད་ཡོད་པ་དང་། ༢༠༠༩ ཟླ་ ༥ ཚེས་ ༡༣ ཉིན་ཀློད་གྲོལ་ཐོབ་རྗེས་ཕྱིར་རྒྱ་གར་དུ་ལོག་ཡོད་འདུག གློག་བརྙན་བཟོ་སྐྲུན་པ་སྐུ་ཞབས་ཐེའུ་ཧེ་ཟིན་( Theo Hessing) ལགས་ནི། དབྱིན་ཡུལ་གྱི་རྒྱལ་ནང་གློག་བརྙན་མཐོ་སློབ་ཐོན་ཡོད་པ་དང་། ཁོང་གིས་བཟོ་སྐྲུན་བྱས་པའི་གློག་བརྙན་ཐོག་མ་༼གཙང་བཟོ་བ་༽ཞེས་པ་དེ་ཡིན་འདུག
གསར་འགོད་པ། ལྷ་སྐྱབས་རྒྱལ།
འགྲོ་བ་མིའི་ཐོབ་ཐང་ཚང་ལ་རེ་སྐུལ་ཞིག་ཞུ་རྒྱུ་ཡོད། གནས་ཚུལ་གང་ཞིག་རེག་ཀྱང་དེའི་ཕྱི་ནང་མདུན་རྒྱབ་ཚང་མར་སྔོག་བཤེར་དང་ཞིབ་འཇུག་ཡག་པོ་གནང་རོགས།
དུས་རྒྱུན་གསར་འགྱུར་བརྒྱུད་ལམ་ཁག་ལ་ཁ་གདངས་མིག་ཅེར་ནས་བསྡད་ནས་དེ་དག་ནང་ཐོན་པའི་གནས་ཚུལ་རིགས་ལམ་སིང་བཀོག་རྐྱང་བྱས་ཏེ་སོ་སོའི་ཡིན་མདོག་མདོག་གིས་བསྐྱར་དུ་གསལ་བསྒྲགས་སྤེལ་བ་དང་ལས་ཁུངས་ཀྱི་ལས་བསྡོམས་བཟོ་ནང་བླུགས་ཏེ་སྦྱིན་བདག་དེ་ཚོར་མགོ་བསྐོར་གཏོང་ཐབས་བྱས་བསྡད་ན་ཆོལ་ཡོད་པ་མ་རེད།
དེ་ནས་སོ་སོས་གནས་ཚུལ་ཞིག་གི་ཟུར་ཙམ་གོ་མ་ཐག་དེ་ལ་རྒྱུས་ལོན་ཞིབ་འཇུག་གང་ཡང་མེད་པར་ཡར་བཟོ་མར་གཟོ་དང་ཡར་བསྒྱུར་མར་བསྒྱུར་འགའ་བྱས་ཤིང་དེའི་མགོ་རྔར་ཚོན་རྩུ་སྣ་ཚོགས་བྱུགས་ཏེ་ཆེན་པོ་ཞིག་རེག་ཡོད་མདོག་མདོག་གིས་གསར་འགོད་གསལ་བསྒྲགས་སྤེལ་རྐྱང་བྱེད་ཀྱི་ཡོད་པ་དེ་གདོང་སྤགས་མཐུག་དྲགས་པ་དང་། ཡང་ན་སོ་སོ་གཅིག་པོ་ལས་བོད་སྤྱི་བའི་རྩ་དོན་ཐོག་གང་འདྲ་ཆགས་ཀྱི་ཡོད་མེད་ལ་འགན་མ་འཁུར་བའི་རྟགས་རེད། གནས་སྐབས་དེ་ཙམ་ལས་ཞུ་རྒྱུ་མིན།
དེང་སྐབས་རྡ་རམ་ས་ལའི་ཚོགས་པ་སྒྲིག་འཛུགས་རེ་ཟུང་ལ་ལས་རྒྱུ་མེད་དྲགས་ཏེ། དཔེ་དེབ་དང་གློག་བརྙན་ཐུང་ངུ་རེ་ཐེངས་གཉིས་གསུམ་ལ་དབུ་འབྱེད་བྱེད་པའི་ལུགས་སྲོལ་ཞིག་དར་འདུག ཟླ་བ་ཁ་ཤས་སྔོན་ལ་རྡ་སའི་གྲོག་མ་མིག་མེད་དང་གསར་བུ་ལས་མེད་སྐོར་ཞིག་གིས་བཀའ་ཟུར་དཔལ་འབྱོར་ཚེ་རིང་མཆོག་གིས་བརྩམས་ཁོ་རང་གི་ལོ་རྒྱུས་དཔེ་དེབ་<<དངོས་པོ་ཀུན་གྱི་རང་བཞིན>>ཞེས་པ་ཞིག་ཐེངས་གཉིས་པ་དབུ་འབྱེད་བྱས་སོང་། དེ་རིང་གངས་སྐྱིད་ཀྱི་གཉིད་ལ་ཤོར་ཡོད་པའི་འགྲོ་བ་མིའི་ཐོབ་ཐང་ལས་ཁུངས་ཀྱིས་ལྷ་མོ་སྐྱབས་ལོ་རྒྱུས་ <<རྒྱལ་གཅེས་པའི་མཆོད་སྦྱིན་ཞིག>>ཅེས་པའི་གློག་བརྙན་རྙིང་པ་ཞིག་ཐེངས་གཉིས་པ་དབུ་འབྱེད་གནང་སོང་། གསར་འགྱུར་བརྒྱུད་ལམ་ཁག་གིས་ཀྱང་གནས་ཚུལ་འདི་དག་ལ་འགྲོ་སྟངས་འདུག་སྟངས་ཤིག་མ་བཟོས་ན་ཚོགས་པ་སྒྲིག་འཛུགས་འདི་དག་གིས་དཔེ་དེབ་དང་གློག་བརྙན་གཅིག་ལོ་རེར་ཐེངས་རེ་དབུ་འབྱེད་བྱེད་པའི་ལམ་སྲོལ་མི་གཏོད་པའི་ངེས་པ་མི་འདུག