ད་ལོའི་ཨིན་ཌར་གྷན་དྷའི་ཞི་བདེའི་གཟེངས་རྟགས་དེ་འཇར་མན་གྱི་སྲིད་འཛིན་ལྕམ་སྐུ་ཨང་གྷི་ལ་མེར་གྷལ་མཆོག་ལ་སྤྲོད་གཏན་འཁེལ་འདུག
ཟླ་འདིའི་ཚེས་ ༡༩ ཉིན་གསལ་བསྒྲགས་སྤེལ་བ་ལྟར་ན། ད་ལོའི་ལོའི་ཨིན་ཌར་གྷན་དྷའི་ཞི་བདེའི་གཟེངས་རྟགས་དེ་འཇར་མན་གྱི་སྲིད་འཛིན་ལྕམ་སྐུ་ཨན་གྷི་ལ་མེར་གྷལ་ (Angela Merkel )མཆོག་ལ་འབུལ་གཏན་ཁེལ་ཡོད་ཅིང་། ལྕམ་ཨན་གྷི་ལ་མཆོག་གིས་འཛམ་གླིང་དཔལ་འབྱོར་ཉམས་རྒུད་འོག་ཡུ་རོབ་ཁུལ་ནང་དཀའ་ངལ་འཕྲད་བཞིན་པར་གདོང་ལེན་གྱིས་བྱས་རྗེས་རླབས་ཆེན་བཞག་ཡོད་ཅིང་། ལྷག་པར་དུ་འཇར་མན་གྱི་དཔལ་འབྱོར་འཕེལ་རྒྱས་དང་འཛམ་གླིང་ཞི་བདེ། གོ་མཚོན་བཀག་སྡོམ། དེ་བཞིན་རྒྱ་གར་གཙོས་འཕེལ་རྒྱས་འགྲོ་བཞིན་པའི་རྒྱལ་ཁབ་ཁག་ནང་དཔལ་འབྱོར་དར་རྒྱས་དང་ཐོན་ཁུངས་གསར་སྤེལ་སོགས་ཀྱི་ཐོག་ཕྱག་ལས་མང་པོ་གནང་ཡོད་པའི་ངོས་འཛིན་ཐོག་གཟེངས་རྟགས་དེ་འབུལ་གཏན་ཁེལ་པ་ཞིག་ཡིན་འདུག
ཨིན་ཌར་གྷན་དྷའི་ཞི་བདེའི་གཟེངས་རྟགས་ཞེས་པ་ནི་ཨིན་ཌར་གྷན་དྷའི་ཐེབས་རྩ་ཁང་གིས་ ༡༩༨༦ ལོར་མགོ་བཙུགས་ཀྱིས་འཛམ་གླིང་ཞི་བདེ་དང་དཔལ་འབྱོར་ཡར་རྒྱས། དེ་བཞིན་གོ་མཚོན་བཀག་སྡོམ་སོགས་ཀྱི་ཐད་ཕྱག་རྗེས་ཆེ་བའི་མི་སྣ་དང་ཚོགས་སྡེ་ཁག་ལ་འབུལ་བཞིན་ཡོད་ཅིང་། ད་སྔ་གང་ཟག་སྒེར་དང་ཚོགས་པ་ ༢༧ ཙམ་ལ་ཕུལ་ཡོད་འདུག དགུང་ལོ་ ༥༩ ཡིན་པའི་ལྕམ་སྐུ་ཨན་གྷི་ལ་མེར་གྷལ་མཆོག་ནི་འཇར་མན་གྱི་བུད་མེད་སྲིད་འཛིན་ཐོག་མ་དེ་ཡིན་པ་མ་ཟད། འཇར་མན་གྱི་ལོ་རྒྱུས་ནང་ཤུགས་རྐྱེན་དང་སྙན་གྲགས་ཆེ་ཤོས་ཀྱི་སྲིད་འཛིན་དེ་ཆགས་ཡོད་འདུག
