ཅང་ཙི་མིན་སོགས་འཛིན་བཟུང་བཀའ་ཁྱབ།

སི་པན་གྱི་ཁྲིམས་ཁང་ཞིག་གིས་རྒྱ་ནག་གི་སྲིད་འཛིན་ཟུར་པ་ཅང་ཙི་མིན་གཙོས་པའི་མཐོ་རིམ་དཔོན་རིགས་ལྔ་འཛིན་བཟུང་བྱ་རྒྱུའི་བཀའ་ཁྱབ་བཏང་ཡོད་འདུག

པོ་ཤིན་དྲ་བར་གནས་ཚུལ་བཀོད་པ་ལྟར་ན། ཟླ་འདིའི་ཚེས་ ༡༩ ཉིན་སི་པན་རྒྱལ་ཁབ་ཀྱི་ཁྲིམས་ཁང་ཞིག་གིས་རྒྱ་ནག་གི་མགོ་ཁྲིད་ཁག་ཅིག་འཛིན་བཟུང་བྱེད་རྒྱུའི་བཀའ་ཁྱབ་བཏང་ཡོད་ཅིང་། དེར་ཀྲུང་གོའི་སྲིད་འཛིན་ཟུར་པ་ཅང་ཙི་མིན་གཙོས་པའི་རྒྱ་ནག་གི་དཔོན་རིགས་མཐོ་གྲས་ལྔ་འཛིན་བཟུང་བྱ་རྒྱུ་ཡིན་པ་དང་། ཀྲུང་གོའི་དཔོན་རིགས་ཚོས་བོད་ལྗོངས་མི་རིགས་རྩ་མེད་བཟོས་བའི་ནག་ཉེས་བསགས་ཡོད་ཅེས་སོགས་བཀོད་ཡོད་འདུག

གོང་གསལ་གནས་ཚུལ་འདི་རྒྱལ་སྤྱིའི་གསར་ལམ་མང་པོ་ཞིག་ཏུ་ཐོན་འདུག་ཅིང་། ཁྲིམས་ཁང་དེའི་གསལ་བསྒྲགས་ནང་། སི་པན་གྱི་འགྲོ་བ་མིའི་ཐོབ་ཐང་ཚོགས་པས་བོད་ནང་གི་གནས་སྟངས་ལ་ཞིབ་འཇུག་བྱས་པའི་སྙན་ཐོ་གཞིར་བཟུང་རྒྱ་ནག་གི་མཐོ་རིམ་དཔོན་རིགས་དེ་དག་གིས་མི་རིགས་རྩ་མེད་གཏོང་བའི་སྲིད་ཇུས་ལག་བསྟར་བྱས་པའི་ཁུངས་སྐྱེལ་ཁག་ལ་ཁོང་ཚོའི་ཁྲིམས་ཁང་གིས་ངོས་ལེན་བྱས་ཡོད་པ་དང་། དེའི་ཁྲོད་རྒྱ་ནག་གི་གཙོ་འཛིན་ཟུར་པ་ལེའི་ཕུན་ཡང་ཚུད་ཡོད་ཅིང་། མ་འོངས་པར་སྲིད་འཛིན་ཟུར་པ་ཧུའུ་ཅིན་ཐོ་ལ་ཡང་བརྟག་དཔྱད་བྱ་རྒྱུ་ཡིན་སྐོར་བཀོད་ཡོད་འདུག རྒྱ་ནག་གིས་ཐེངས་འདིའི་སི་པན་ཁྲིམས་ཁང་གི་གསལ་བསྒྲགས་དེ་ཀྲུང་གོའི་ནང་སྲིད་ལ་ཐེ་གཏོགས་དང་ཉེས་མེད་ཉེས་འཛུགས་བྱས་པ་ཞིག་ཡིན་པའི་སྐྱོད་བརྗོད་བྱས་འདུག   

སི་པན་གྱི་ཁྲིམས་ལུགས་ཚན་པས་སི་པན་གྱི་ས་ཁོངས་ལས་བརྒལ་ཏེ་རིགས་རྒྱུད་རྩ་མེད་གཏོང་བའི་ནག་ཉེས་བསགས་རིགས་ཚོར་རྒྱལ་སྤྱིའི་ཁྲིམས་ལུགས་གཞིར་བཟུང་འདྲི་གཅོད་བྱེད་ཆོག་གི་ཡོད་པ་མ་ཟད། འཛམ་གླིང་ཀུན་ཁྱབ་ཀྱི་ཁྲིམས་ལུགས་དབང་ཚད་ཡོད་པ་དང་། དེ་ནི་འཛམ་གླིང་ཐོག་དམག་འཐབ་ཀྱི་ནག་ཉེས་བསགས་པ་དང་། འགྲོ་བ་མིའི་རིགས་རྩ་མེད་བཟོས་པ་སོགས་ཁྲིམས་འགལ་བྱ་སྤྱོད་སྤེལ་མཁན་ཚོར་ཁྲིམས་བཤེར་བྱེད་རྒྱུའི་དབང་ཚད་ཡོད་འདུག

པོ་ཤིན་དྲ་བའི་སྟེང་བཀོད་པར། སི་པན་རྒྱལ་ཡོངས་ཁྲིམས་ཁང་དེ་ ༡༩༧༧ ལོར་བཙུགས་པ་དང་། ༡༩༩༨ ལོར་ Chilean རྒྱལ་ཁབ་གྱི་སྲིད་འཛིན་Pinochet ལ་ཁྲིམས་བཤེར་བྱས་ཏེ་ཁོང་དབྱིན་ཡུལ་དུ་ལོ་གཉིས་རིང་བཀག་ཉར་བྱས་ཡོད་པ་དང་། དེ་བཞིན། ༡༩༩༤ ལོར་ལྷོ་ཨ་ཧྥི་རི་ཀའི་ Rwandan དུ་མི་དམངས་སྡེབ་གསོད་དོན་རྐྱེན། འཇར་མན་གྱི་ nazi དམག་མི་ཟུར་པ་ཁག་གཅིག་དང་ Salvadoran ནང་འཁྲུག་སྐབས་སུ་དམག་མི་ཟུར་པ་ཁག་གཅིག་གིས་ཡེ་ཤུ་ཆོས་དཔོན་ལྐོག་གསོད་བྱས་བའི་གྱོད་དོན་སོགས་ལ་ཁྲིམས་བཤེར་བྱས་ཡོད་འདུག