ངྷ་སྟེང་བོད་ཁྱིམ་སློབ་གྲྭའི་ཨང་རྩིས་དགེ་རྒན་ཞིག་གིས་འཛིན་རིམ་བཅུ་པའི་སློབ་ཕྲུག་ཅིག་ལ་ཉེས་རྡུང་བཏང་བ་བརྒྱུད་སློབ་ཕྲུག་མང་པོ་ཞིག་འདུ་འཛོམས་བྱས་པའི་གནས་ཚུལ་སྐོར་ལ་གསར་འགོད་པས་འབྲེལ་ཡོད་ལ་བཅར་འདྲི་ཞུས་ཏེ་རྒྱུས་ལོན་བྱས་ཡོད།
རེས་གཟའ་མིག་དམར་ཉིན། དྷ་སྟེང་བོད་ཁྱིམ་སློབ་གྲྭའི་འདུ་འཛོམས་ཤིག་གི་སར། འཛིན་རིམ་བཅུ་པའི་སློབ་མ་ཞིག་དང་ཨང་རྩིས་དགེ་རྒན་ཞིག་གི་བར་རྩོད་རྙོག་བྱུང་མཐར་དགེ་རྒན་དེས་སློབ་ཕྲུག་དེར་ཉེས་རྡུང་བཏང་ཡོད་སྟབས། སློབ་གྲྭའི་འཛིན་སྐྱོང་གིས་སྒྲིག་གཞི་གཞིར་བཟུང་དགེ་རྒན་དེའི་ཟླ་གཅིག་གི་གསོལ་ཕོགས་གཅོག་རྒྱུའི་ཐག་གཅོད་བྱས་ཡོད་པ་དང་། ཕྱིས་སུ་སློབ་ཕྲུག་མང་པོ་ཞིག་གིས་བརྗོད་ཚིག་འདྲ་མིན་འཁོད་པའི་ཤོག་བྱང་བཟུང་སྟེ་སློབ་སྤྱིའི་ཡིག་ཚང་སྒོར་འདུ་འཛོམས་བྱས་ཡོད་འདུག
སྤྱི་ཚོགས་ནང་ཁག་ཅིག་གིས་སློབ་ཕྲུག་ཚོས་སློབ་གྲྭའི་འཛིན་སྐྱོང་ལ་ངོ་རྒོལ་བྱས་པ་རེད་ཟེར་བ་དང༌། ཁག་ཅིག་གིས་སློབ་གྲྭའི་གཞུང་ལ་ངོ་རྒོལ་བྱས་པ་མིན་པར་ཨང་རྩིས་དགེ་རྒན་རྩ་དགོངས་ལ་མི་འགྲོ་རྒྱུར་རེ་སྐུལ་ཞུས་ཚུལ་སོགས་བཤད་སྟངས་སྣ་ཚོགས་འབྱུང་བཞིན་པར། དེ་རིང་འདི་གའི་གསར་འགོད་པ་ཆེད་དུ་ངྷ་སྟེང་བོད་ཁྱིམ་སློབ་གྲྭར་བསྐྱོད་དེ། བོད་ཁྱིམ་ཤེས་ཡོན་འགན་འཛིན་བསོད་ནམས་སྒྲོལ་དཀར་ལགས་སུ་བཅར་འདྲི་ཞུས་པར། ཁོང་མོས་བརྗོད་དོན “སློབ་མའི་འདུ་འཛོམས་སར་སློབ་མ་ཞིག་གི་དཔུང་པའི་སྟེང་ཁབ་གཙགས་རི་མོ་བརྐོས་ཡོད་པ་ཨང་རྩིས་རྒན་ལགས་ཀྱིས་མཐོང་སྟེ། ཁབ་གཙགས་རི་མོ་འགེབས་དགོས་ལུགས་ལབ་འདུག སྐབས་དེར་སློབ་མ་དེས་རྣམ་འགྱུར་མི་ལེགས་པ་བསྟན་སྟབས། དགེ་རྒན་དགོངས་པ་འཚོམས་ཏེ་སློབ་ཕྲུག་དེར་ཉེས་རྡུང་བཏང་འདུག སྤྱིར་བཏང་ལུས་ལ་ཁབ་གཙགས་རི་མོ་བརྐོ་བ་དང་མགོའི་སྐྲ་འདྲ་མི་འདྲ་བཟོ་བ། ལུས་གང་སར་ཁུང་བུ་ཕུག་པ་སོགས་སློབ་གྲྭའི་སྒྲིག་སྲོལ་དང་འགལ་གྱི་ཡོད་པ་རེད་ལ། དེ་དག་བོད་པའི་ལུགས་སྲོལ་ཞིག་ཀྱང་མ་རེད། ང་ཚོས་སོ་སོའི་ཡ་རབས་བཟང་སྤྱོད་དོར་ཏེ་ཕྱི་རྒྱལ་གྱི་སྨྱོན་པའི་བྱ་སྤྱོད་རིགས་ལ་ལད་ཟློས་བྱས་ན་ཡག་པོ་མ་རེད”ཅེས་བརྗོད་སོང༌།
སློབ་མ་དེའི་ནམ་རྒྱུན་གྱི་སྤྱོད་པ་ག་འདྲ་ཡོད་དྲིས་པར། “སྤྱིར་བཏང་སློབ་མ་དེར་སྒྲིག་འཛུགས་ཀྱི་ཐོག་ནས་དཀའ་ངལ་མང་པོ་བྱུང་ཡོད་སྟབས། དངོས་གནས་བྱས་ན་འཛིན་རིམ་བརྒྱད་པའི་སྐབས་སློབ་གྲྭ་ནས་ཐོན་དགོས་ཀྱི་ཡོད་པ་རེད། ཡིན་ནའང༌། རྒྱུ་རྐྱེན་དེ་ཚོ་ངས་ཞིབ་ཕྲ་ཞུ་རྒྱུ་མིན། གང་ཡིན་ཟེར་ན། ཁོ་རང་གི་ཕ་མ་ལ་དཀའ་ངལ་འཕྲད་ངེས་རེད། གང་ལྟར་སློབ་མ་དེ་བོད་ཕྲུག་ཅིག་དང་ང་ཚོའི་སློབ་གྲྭའི་ནང་ནས་འཚར་ལོངས་བྱུང་བའི་སློབ་མ་ཞིག་ཡིན་སྟབས། སློབ་གྲྭའི་ངོས་ནས་ཁོ་རང་ལ་འཛིན་རིམ་ ༩ དང་ ༡༠ པའི་གོ་སྐབས་སྤྲད་དེ་གང་བྱུང་བྱུང་ཐབས་ཤེས་བྱས་དང་བྱེད་མུས་ཡིན།”ཞེས་བརྗོད་བྱུང༌།
དགེ་རྒན་གྱིས་སློབ་མར་ཉེས་རྡུང་བཏང་བ་དེར་སློབ་གྲྭས་ཐག་གཅོད་ག་རེ་གནང་ཡོད་མེད་དྲིས་པའི་ལན་དུ། “སྤྱིར་བཏང་དགེ་རྒན་གྱིས་སློབ་མར་ཉེས་རྡུང་གཏོང་བ་དེ་རྒྱལ་སྤྱིའི་ཁྲིམས་དང་འགལ་གྱི་ཡོད་ལ། རྒྱ་གར་གཞུང་གི་ཁྲིམས་ལའང་འགལ་གྱི་ཡོད་པ་རེད། དེ་བཞིན་ྋརྒྱལ་བ་རིན་པོ་ཆེ་དང་ཨ་མ་ལགས་བཅས་ཚང་མས་དེའི་སྒང་ལ་བཀའ་སློབ་ཞེ་དྲག་གནང་གི་ཡོད་སྟབས། ང་ཚོས་ཁྲིམས་དང་བཀའ་སློབ་དེ་དག་བསྒྲུབ་དགོས་པར་བརྟེན། ལོ་ཤས་སྔོན་འཛིན་སྐྱོང་ཚོགས་འདུའི་ཐོག་དགེ་རྒན་གྱིས་སློབ་མར་ཉེས་རྡུང་བཏང་ན། དགེ་རྒན་གྱི་ཟླ་གཅིག་གི་གསོལ་ཕོགས་མེད་པ་བཟོ་རྒྱུའི་ཐག་གཅོད་གནང་ཡོད་པ་རེད། སྔོན་ཆད་སློབ་གྲྭ་ཁ་ཤས་ནང་དཀའ་ངལ་དེ་འཕྲད་ཡོད་པ་རེད་ལ་ཐག་གཅོད་ཀྱང་དེ་རང་གནང་ཡོད་པ་རེད། དགེ་རྒན་ཁ་ཤས་ཀྱིས་མོས་མཐུན་གནང་གི་མེད་ཀྱང་ཕྱོགས་གཉིས་ཀའི་འདོད་ཐོག་ལ་ཡོང་བ་ཞིག་ཁག་པོ་ཡིན་དུས་སྒྲིག་གཞི་དེ་རང་ལག་བསྟར་བྱས་པ་རེད”ཅེས་བརྗོད་སོང༌།
སློབ་མ་དེར་ཐག་གཅོད་ག་རེ་གནང་འཆར་ཡོད་མེད་དྲིས་པར་ཁོང་མོས། “ ད་ལྟའི་ཆར་ཐག་གཅོད་འདི་རེད་ཟེར་ནས་གསལ་བསྒྲགས་བྱེད་ཐུབ་ཀྱི་མི་འདུག་ཀྱང༌། ཁོ་རང་འདིར་མུ་མཐུད་དུ་བསྡད་པ་ཡིན་ན་མ་སྐྱིད་པ་ཡོང་གི་རེད་བསམ་གྱི་འདུག ད་ལྟ་འཛིན་རིམ་ ༡༠ པའི་ལོ་གཅིག་གི་སློབ་ཚན་ཚང་མ་བསླབ་ཟིན་སྟབས། ང་ཚོས་ཁོ་རང་གནས་སྐབས་པ་ལགས་མཉམ་དུ་བསྡད་བཅུག་སྟེ། འཛིན་རིམ་ ༡༠ པའི་ཡིག་ཚད་བཏང་ཚར་རྗེས། ཐག་གཅོད་ག་རེ་བྱེད་དགོས་མིན་བལྟ་རྒྱུ་རེད། ད་ལྟའི་ཆར་ང་ཚོས་གྲོས་བསྡུར་བྱེད་བཞིན་པ་ཡིན། ”ཞེས་གསུངས་སོང༌།
ཁ་སང་ཚེས་ ༢༠ ཉིན་སློབ་གྲྭའི་རྒན་བདག་གསར་རྙིང་ཐུན་མོང་ནས་སློབ་སྤྱི་ལ་སྙན་ཞུ་ཕུལ་བའི་ནང༌། ཁ་སང་གི་བྱུང་རྐྱེན་དེ་ནི་ངེད་འགན་བདག་ཚང་མས་འབོད་སྐུལ་དང་སྣེ་འཁྲིད་པ་གཏན་ནས་མིན། ང་ཚོ་ནི་དུས་དང་རྣམ་པ་ཀུན་ཏུ་བོད་ཁྱིམ་གྱི་དབུ་འཁྲིད་རྣམས་པའི་ལམ་སྟོན་བཀའ་སློབ་ལ་བརྩི་བཀུར་དང༌། རང་ཉིད་ཀྱི་དམ་སྲུང་ཅི་བཞིན་གཞུང་གི་ལངས་ཕྱོགས་ལ་མཐའ་གཅིག་ཏུ་རྒྱབ་སྐྱོར་ཡོད། ཡིན་ཡང་གསལ་བཤད་ཀྱི་ཆེད་དུ་ཞུ་རྒྱུར། ༼རྒན་ལགས་མ་ཕེབས་རོགས་གནང༌། སློབ་སྤྱི་མཆོག་ནས་ཀྱང་ངེས་པར་དུ་རྒན་ལགས་བཀག་འགོག་དང་རྩ་དགོངས་མ་གནང་རོགས་གནང༌། ༽ཞེས་སློབ་ཕྲུག་མང་པོ་ཞིག་མ་བསྐུལ་དྭང་བླངས་ངང་སློབ་སྤྱིའི་ཡིག་ཚང་མདུན་དུ་འདུས་ཏེ་བསྡད་པ་མཐོང་དུས། བློ་འཚབ་ཆེན་པོའི་ངང་ཆེད་དུ་སློབ་མ་རྣམས་ཞི་འཇམ་ཡོང་སླད། དེ་གར་བཅར་པ་ཡིན་པ་མ་གཏོགས་གཞན་དམིགས་ཡུལ་གང་ཡང་མེད། ཅེས་སོགས་བཀོད་འདུག
མཇུག་ཏུ་གསར་འགོད་པས་དོ་བདག་དགེ་རྒན་དང་སློབ་ཕྲུག་གཉིས་ལ་བཅར་འདྲི་ཞུ་རྩིས་བྱས་ཀྱང་དགེ་རྒན་དེས་གནས་ཚུལ་དེའི་སྐོར་ལ་སྐད་ཆ་བཤད་འདོད་མེད་པའི་རྣམ་འགྱུར་བསྟན་སོང་ལ་སློབ་ཕྲུག་དེར་འབྲེལ་བ་བྱེད་ཐུབ་མ་སོང་། གོང་གི་པར་དང་པོ་དེ་བློ་བཟང་དབང་རྒྱལ་ལགས་ཀྱི་དྲ་ཚིགས་ལས་འདྲེན་བཀོད་བྱས་པ་ཡིན།
གསར་འགོད་པ། པདྨ་མཚོ།
མི་ཉན་པ་ལ་རྒན་གྱི་གསུང་ལས་དབྱིག་པ་དགའ། ང་ཚོའི་བྱིས་པ་དེ་ཚོ་བསླབ་བྱ་ཡིས་བཏུལ་ཐུབ་པའི་རིགས་རྒྱུད་ཡིན་ནི་མ་རེད།
བོད་ཕྲུག་ཁྱིམ་སྡེ་ལ་ཚོགས་སྡེ་སུ་དང་མ་མཐུན་པའི་ཁུངས་མེད་ལུང་མེད་ཀྱི་བསྒྲིགས་གཞི་མང་དག་ཅིག་ཡོད་པ་རེད། དཔེར་ན། སློབ་ཕྲུག་ལ་ཉེས་ན་ཟླ་གཅིག་གི་གླ་ཕོགས། དགོངས་པ་ཞུ་དགོས་བྱུང་ཚེ་ཉེས་པ་འབུམ། དེ་ཡང་ལས་བྱེད་པ་མི་རེ་ལ་ཉེས་པ་མི་འདྲ་བ་སོགས། མདོར་ན། ཡོང་སྒོ་ལས་ཆག་སྒོ་ཆེ་བའི་བསྒྲིགས་གཞི་འདི་ཚོས་སྲིད་ཞུ་བ་རྣམས་སུན་འཚེར་ཆེན་པ་ཚོར་གྱི་ཡོད་པ་འདྲ།
བོད་རང་གི་སྐད་ཡིག་དང་བཟང་སྤྱོད་ཀྱི་འཕོངས་པའི་སློབ་ཕྲུགས་དཔུང་སྡེ་འདི་འདི་དག་གི་བྱ་སྤྱོད་ངན་པ་འདི་ལྟ་བུ་དེང་སྐབས་མང་རུ་འགྲོ་བཞིན་མངོན་རྟགས་གང་མང་ཐོན་བཞིན་པ་འདིའི་འབྱུང་ཁུང་ངོ་མ་གང་ཡིན་བཙལ་དགོས་པ་ལས། དེ་མིན་འུར་ཤོད་གཅིག་པུའི་ཕན་ཐོག་གང་ཡང་མེད།
ལུང་རྟོགས་ཀྱིས་བཤད་པ་ལ་གནས་ལུགས་འདུག ༼འདིར་བོད་ཁྱིམ་སློབ་ཕྲུག་ཚོའི་ཤོག་བྱང་དེ་དག་ལ་ལྟོས་དང་། ༽
དེང་གི་སྤྱི་ཚོགས་འདིའི་ནང་དགེ་རྒན་གནང་ཡ་དངོས་གནས་ཁག་པོ་འདུག
སློབ་ཕྲུག་སྤྱོད་ངན་ཚོས་ཡར་ཁ་ལན་སློག་པ་དང་།
སློབ་གྲྭའི་འགོ་ཁྲིད་ཚོས་མར་གནོན་ནས།
ལང་ན་ལང་མི་ཐུབ་པ་དང་། འགྲོ་ན་འགྲོ་མི་ཐུབ་པ་ཞིག་བཟོ་གི་འདུག་ག
གང་ཕྲུག་ལགས། ཁྱེད་ཀྱང་བོད་ཁྱིམ་ཚང་གི་དགེ་རྒན་ཞིག་ཡིན་ན་ཐང་། དེ་ཡིན་ན་ང་ལ་ཞུ་རྒྱུ་ཞིག་ཡོད། འགན་མི་ཁུར་མཁན་ནི་བོད་ཁྱིམ་ཚང་གི་དགེ་ལས་སློབ་ཕྲུག་དེ་དག་རེད། བཙན་བྱོལ་ནང་ལ་བོད་ཀྱི་སློབ་གྲྭ་ལོགས་སུ་བཙུགས་དགོས་དོན་ཅི་རེད། འདི་ནི་བོད་རང་གི་སྐད་ཡིག་དང་རིག་གཞུང་སྲུང་སྐྱོབ་ཀྱི་ཆེད་དུ་མ་རེད་དམ། བོད་ཁྱིམ་ཚང་གིས་བོད་ཡིག་ལ་འཛིན་པའི་ལང་ཕྱོགས་ལ་ལྟོས་དང་། བོད་ཁྱིམ་དབུ་འཛིན་རྗེ་བཙུན་པད་མས་ཤེས་ཡོན་སྲིད་བྱུས་ལ་འཛིན་པའི་རྣམ་འགྱུར་ལ་ལྟོས་དང་། ཟླ་གཅིག་སྔོན་གྱི་བོད་ཁྱིམ་དབུ་བརྙེས་པའི་མཛད་སྒོ་དེ་ལ་ལྟོས་དང་། འདིར་བོད་ཁྱིམ་སློབ་ཕྲུག་ཚོའི་ཤོག་བྱང་དེ་དག་ལ་ལྟོས་དང་། འགན་མི་ཁུར་མཁན་སུ་ཡིན་གཞི་ནས་ཤེས་ཡོང་།
དྲ་གྲོགས་ཚོར་ཁག་མེད། གནས་ཚུལ་དངོས་འདི་འདྲ་ཞིག་རེད་འདུག དང་པོ་སློབ་ཕྲུག་དེ་ལྡི་ལི་ཕྱོགས་ནས་ཡིན་པ་དང་སློབ་ཡོན་སྤྲད་དེ་བོད་ཁྱིམ་དུ་སློབ་སྦྱོང་བྱེད་བཞིན་པའི་སློབ་ཕྲུག་ཅིག་རེད་འདུག
གཉིས་པ་སློབ་ཕྲུག་དེས་སྟོད་ཐུང་གི་ཕུ་ཐུང་ཡར་བརྫེས་ཏེ་ཁབ་བརྩགས་རི་མོ་ཕྱི་རུ་བསྟན་ནས་འགྲོ་བཞིན་པར་དགེ་རྒན་དེས་ཕུ་ཐུང་མར་གློད་དེ་ཁབ་བརྩགས་རི་མོ་མི་མཐོང་བ་བྱ་དགོས་པའི་སྐད་ཆ་སྐད་ཁ་ལ་མ་ཉན་པ་མ་ཟད་སྤྱོད་པ་ལོག་པར་བརྟེན། དགེ་རྒན་གྱིས་ལག་པ་གྱག་འདུག དེ་དངོས་སུ་མཐོང་མཁན་སློབ་ཕྲུག་གསུམ་ཡོད་པ་ལས་གཅིག་གིས་ང་རང་ཉིད་ལ་བཤད་པའི་སྐད་ཆ་ཡིན།
སློབ་ཕྲུག་ཚོས་འཕྲེད་དར་བཟུང་སྟེ་འདུ་འཛོམས་བྱས་པ་དེ། དང་ཐོག་དགེ་རྒན་དེ་སློབ་གྲྭ་ནས་ཕྱིར་འབུད་གཏོང་རྒྱུའི་ཐག་གཅོད་ཅིག་བྱུང་ཡོད་སྐོར་སློབ་མ་ཚོས་ཐོས་སྟབས། སློབ་མ་ཚོས་སློབ་གྲྭའི་འཛིན་སྐྱོང་ལ་དགེ་རྒན་དེ་ནམ་རྒྱུན་སློབ་ཕྲུག་ལ་ཤ་ཚ་དང་སློབ་ཁྲིད་ཡག་པོ་བྱེད་མཁན་གྱི་དགེ་རྒན་ལེགས་གྲས་ཤིག་ཡིན་པས་ཕྱིར་འབུད་མི་གཏོང་པའི་འབོད་སྐུལ་ཞུ་ཕྱིར་འདུ་འཛོམས་བྱས་འདུག་ལ། ཕྱོགས་གཞན་ཞིག་ནས་བཤད་ན་དགེ་རྒན་དེ་ཕྱིར་འབུད་གཏོང་རྒྱུར་ངོ་རྒོལ་གྱི་རྣམ་པ་ཞིག་རྐྱང་ཆགས་འདུག
རྗེས་སུ་དགེ་རྒན་དེ་ཕྱིར་འབུད་གཏོང་མ་དགོས་པར་གླ་ཕོག་གཅོག་རྒྱུ་བྱས་པ་དེར་ཡང་། མུ་མཐུད་སློབ་ཕྲུག་ཚོས་ངོ་རྒོལ་བྱས་འདུག་ལ། དགེ་རྒན་ཚོས་ཀྱང་འཛིན་སྐྱོང་གི་ཐག་གཅོད་དེར་ངོ་རྒོལ་གྱིས་སློབ་ཁྲིད་བྱེད་དུ་མ་ཡོང་པའི་གནས་ཚུལ་ཀྱང་ཐོན་འདུག
སློབ་ཕྲུག་ཚོའི་ཁྲོད་དོན་རྐྱེན་སློང་མཁན་གྱི་སློབ་ཕྲུག་དེར་རྡུང་གི་ཡིན་ཟེར་མཁན་ཡང་བྱུང་ཡོད་འདུག
ལུང་རྟོགས་ལགས། གསུང་རྒྱུ་དང་འབྲི་རྒྱུ་ལས་སླ་པོ་ཡོད་རེད།
རང་གི་མཇིང་པའི་སྒང་ལ་འབབ་དུས་ཤེས་ཀྱི་རེད། དགེ་རྒན་ཟེར་དུས་ཡི་གེ་སློབ་ཐུབ་ཙམ་གྱི་འགྲིག་གི་མེད་ད་ལྟའི་དུས་འདིར་དགེ་རྒན་དེ་དག་ཕ་མ་དང་དགེ་རྒན་གཉིས་ཀར་གྱི་འགན་འཁུར་དགོས་ཡོད།
ལུང་རྟོགས་ལགས། རྒྱུན་དུ་གསར་འགྱུར་ཡང་ཀུན་སློང་བཟང་པོ་ཞིག་འཁུར་ནས་འབྲི་དགོས་པས་འགན་མེད་པའི་འཆལ་གཏམ་མ་གསུང་ན་ལེགས་པར་མཐོང་ངོ།
འདི་ནི་ཆེ་ས་མ་མཐོང་ཆུང་ས་མཐོང་བ་རང་རེད། དགོས་པ་སློབ་ཕྲུག་ཚོར་བོད་ཀྱི་སྐད་ཡིག་གི་སློབ་གསོ་ཡག་པོ་ཞིག་མ་སྤྲད་པར། མི་དགོས་པ་ཁབ་བརྩག་རི་མོ་བཀག་འགོག་བྱེད་པ་ནི་གད་མོ་ཤོར་བའི་གནས་རེད། ནུབ་ཕྱོགས་པའི་སློབ་གསོ་སྤྲད་ན་ནུབ་ཕྱོགས་པའི་ལད་ཟློས་བྱེད་དང་བྱེད།
ང་རང་གིས་གོ་བ་བྱས་ན་དགེ་རྒན་དེས་སློབ་ཕྲུག་ལ་ཉེས་རྡུང་བཏང་རྗེས་སློབ་ཕྲུག་ཚོས་དགེ་རྒན་དེའི་བྱེད་སྟངས་ཐོག་ངོ་རྒོལ་བྱས་པ་རེད་ཟེར་གྱི་འདུག དེ་ནས་རྙོག་དྲ་ལངས་ཏེ་དགེ་རྒན་ལ་ཉེས་པ་བཏང་རྗེས་དགེ་རྒན་དེས་རྩ་དགོངས་ཞུས་པའི་རྗེས་ལ་སློབ་མ་སྐོར་ཞིག་གིས་སླར་ཡང་དགེ་རྒན་དེ་རྩ་དགོངས་བཏང་ཆོག་གི་མེད་ཅེས་ཞི་བའི་ངོ་རྒོལ་བྱས་པ་རེད་ཟེར་གྱི་འདུག ད་གང་ལྟར་གསར་འགྱུར་འདིའི་འོག་གི་རྒན་བདག་ཚོའི་ཡི་གེ་དེ་ལས་གསལ་བོ་ཆགས་སོང་། ཡིན་ནའང་དགེ་རྒན་ཚོས་སློབ་མར་ཉེས་རྡུང་བཏང་བ་དེ་འགྲིག་ཡོད་མ་རེད་བསམ་གྱི་འདུག རྩ་བའི་དེང་སྐབས་སློབ་མ་དང་སུ་འདྲ་ཞིག་ཡིན་ན་ཉེས་རྡུང་གཏོང་བའི་དུས་ཚོད་ཡལ་ཚར་ཡོད་པ་རེད། གཉིས་ནས་བོད་ཁྱིམ་སྒྲིག་གཞིའི་ནང་དགེ་རྒན་གྱིས་སློབ་ཕྲུག་ཚོར་ཉེས་རྡུང་གཏན་ནས་གཏོང་ཆོག་གི་མེད་ཅེས་འཁོད་ཡོད་རེད།
མགྱོགས་མྱུར་བོད་ཁྱིམ་དགེ་རྒན་མཐུན་ཚོགས་ཤིག་ངེས་པར་འཛུགས་དགོས་འདུག
དེ་ལྟར་མ་གནང་ཚེ་བོད་ཁྱིམས་དེ་ལོ་ཤས་རྗེས་སུ་གཅེན་མོ་ཚེ་རིང་སྒྲོལ་མ་ལགས་ཀྱི་དགོངས་དོན་རྣམས་ཆུད་བཟོས་སུ་འགྲོ་ངེས་རེད་འདུག
ཁབ་གཙགས་རི་མོ་དང་འབྲེལ་བ་འདིར་ངེད་ལ་ཉམས་མྱོང་ཕྲན་བུ་ཞིག་ཡོད། ང་ལོ་ཉེར་གསུམ་ཡིན་དུས་དཔུང་པར་སྐབས་དེའི་སེམས་ཚོར་༼ པཎ་ཆེན་འཁྲུངས་སྐར་དང་འབྲེལ་ནས་བདུན་གཉིས་ལ་བཙོན་འཇུག་བྱས་རྗེས། ༽ཞིག་དང་འབྲེལ་ནས་ཡི་གེ་ཞིག་བྲིས་ཡོད། ཡི་གེ་དེར་རང་ངོས་ནས་རྒྱུ་མཚན་ཡོད་ལོས་ཆེ། རིམ་པར་སྤྱི་ཚོགས་འདྲ་མིན་འགྲིམས་སྐབས། ཁབ་གཙགས་རི་མོ་དེ་དང་འབྲེལ་ནས་མཐོང་ཆུང་མང་པོ་གཟེད་དགོས་བྱུང། དེ་ནི་ང་སྒེར་གཅིག་པུར་མཐོང་ཆུང་མ་རེད། བོད་པ་ཚོས་ཀྱང་འདི་འདྲ་གནང་གི་རེད་དམ་ཟེར་བ་སོགས་ཡིན།
ཐའེ་ཝན་ནས་ཉིན་གཅིག་སྣང་མེད་ངང་འཛིན་གྲྭའི་ནང་དཔུང་པའི་སྟེང་གི་ཁབ་གཙགས་རི་མོ་ཀུན་གྱིས་མཐོང། ཉིན་དེར་རྒན་ལགས་ཀྱིས་མགོ་བོ་འཕྲེད་དུ་གཡུག་བཞིན་ང་ཚོའི་སྤྱི་ཚོགས་ནང་གི་ཇག་ཚོགས་དང། ཐ་མག་ནག་པོ་བཏུང་མཁན། ཨ་རག་ཚོད་མེད་བཏུང་ནས་ཡུལ་འཁྱམས་རྒྱག་མཁན། སེམས་པ་བདེ་བོ་མེད་མཁན་ཕོ་མོ་གཉིས་ཀས་ལུས་ལ་འདྲ་མིན་བརྐོ་ཡི་འདུག དམིགས་བསལ་སྐྲ་སེར་འཁྱམས་པོ་རིང་ལུགས་ཁྱོན་ནས་མེད་མཁན་དེ་ཚོ་རེད། ཁོང་ཚོའི་རིགས་གཅིག་སྤྲང་འཁྱམས་རྒྱབ་ནས་སྤྱི་ཚོགས་གཞན་ཡང་མི་དགོས་པའི་ངན་སྤྱོད་ན་ཚ་བཞིན་བགོ་བཞིན་འདུག་ཟེར། ཁྱེད་ཚོ་བོད་དང་ང་ཚོ་ཐའེ་ཝན་ཡིན་ན་མང་ཆེ་བ་ནང་པ་རེད། ད་དུང་འཇར་པན་གྱི་སློབ་གྲོགས་ཁ་ཤས་ལ་མཛུབ་མོ་བཙུགས་ནས། ཁོང་ཚོའང་དེ་བཞིན་རེད། ང་ཚོའི་སྤྱི་ཚོགས་ངོ་ཚ་སྨིན་པོ་དང་སྤྱོད་བཟང་ད་བར་ཡོད་པ་དང་མ་འོངས་པར་ཡོད་དགོས་པ་གལ་ཆེན་རེད།ཅེས་བཀའ་བཀྱོན་ལྟ་བུའི་བསླབ་བྱ་རིང་པོ་ཞིག་གནང་བ། ཁབ་གཙགས་རི་མོ་དང་འབྲེལ་ནས་དེ་རིང་ཉིན་ཐོ་སྔོགས་དེ་འདིར་བཀོད་འདོད་བྱུང།
རྗེས་སུ་བོད་ཀྱི་དཔེ་མཛོད་ཁང་དུ་བོད་རིག་པར་མཁས་དབང་ཡིན་པའི་ཨིན་ཇི་པ་ཞིག་ལ་དེའི་སྐོར་སྐད་ཆ་དྲིས་པ་ཡིན། ཁོང་གིས་ངྷ་རམ་ས་ལར་འཁྱམས་སྡོད་མཁན་ཨིན་ཇི་ཕོ་མོ་དེ་ཚོས་ཨིན་ཇི་པ་སྤྱིའི་ཀུན་སྤྱོད་དང་གནས་བབ་མཚོན་གི་མ་རེད་ཟེར། ཡིན་ནའང། ང་ཚོའི་སྤྱི་ཚོགས་ཐོབ་ཐང་རྩོད་རྒྱུར་དགའ་བོ་ཡོད་ཙང། དེ་ཚོ་ཚང་མ་ཐོབ་ཐང་ནང་སྦྱར་གི་རེད། སྤྱིར་བཏང་ཚན་རིག་དང་འཕྲོད་བསྟེན་གང་ནས་བཤད་ཀྱང་ཁབ་གཙགས་རི་མོས་མིའི་ལུས་ལ་གནོད་ཀྱི་ཡོད་པ་གསལ་བོ་རེད་ཟེར། དེ་ནས་བཟུང་སྟེ་ཁབ་གཙགས་རི་མོ་འདི་དོན་དམ་གྱི་སྒྱུ་རྩལ་གྱི་ཁྱབ་ཁོངས་ལ་སྦྱར་འོས་མིན་དང། ང་ཚོ་བོད་ཀྱི་རིག་གནས་ཡ་རབས་བཟང་སྤྱོད་དང་མཐུན་གྱི་ཡོད་མེད་ལ་བསམ་བློ་ཡང་ཡང་བཏང་བ་ཡིན།།
གནས་ཚུལ་འདི་རིགས་བྱུང་སྐབས་བོད་པའི་གསར་འགྱུར་བརྒྱུད་ལམ་ཁག་གིས་ག་མགྱོགས་གནས་ཚུལ་དངོས་གནས་དེ་འཁོད་ཐུབ་བྱེད་རྒྱུ་ཧ་ཅང་གལ་ཆེན་པོ་འདུག སྤྱི་ཚོགས་བརྒྱུད་ལམ་ཁག་ནང་བོད་ཁྱིམ་གནས་ཚུལ་དེ་སྐོར་ལ་སྐད་ཆ་འདྲ་མི་འདྲ་བདེན་པ་མིན་པ་མང་པོ་འཐོན་ཡོང་གི་འདུག སྔོན་མ་མ་སུ་རིར་གནས་ཚུལ་བྱུང་སྐབས་ཀྱང་རྒྱ་གར་གསར་ཤོག་ཁག་ཅིག་ནང་སློབ་ཕྲུག་ཚོས་སློབ་གྲྭའི་གཞུང་དང་བོད་གཞུང་ལ་ངོ་རྒོལ་རྒྱག་གི་ཡོད་པ་འདྲ་བོ་ཞིག་འཁོད་འདུག ད་རེས་ཀྱང་དཀྲོགས་གཏམ་ཆགས་རྒྱུའི་ཉེན་ཁ་ཆེན་པོ་འདུག་ཕྱི་ལོག་ན་མགོ་འཚོས་ལ་མ་འཚོས་པའི་སྐད་ཆ་སྣ་ཚོགས་ཤིག་ཤོད་ཀྱི་འདུག
དྲ་གྲོགས་ཚོ། གནས་ཚུལ་འདི་ཅུང་ཡ་མཚན་པོ་ཞིག་རེད། བོད་ཁྱིམ་སྒྲིག་གཞིའི་ནང་སློབ་མར་ཉེས་རྡུང་བཏང་མི་ཆོག་པ་ཧ་གོ་བཞིན་དུ་ཉེས་རྡུང་བཏང་། དེ་མ་ཐག་ཡིག་ཚང་གིས་ཟླ་གཅིག་གི་ཟླ་ཕོག་བཅག་ཅིང་། དགེ་རྒན་དེས་ཁ་ཐུག་ལ་རྩ་དགོངས་ཞུས། དེ་དང་མཉམ་དུ་སློབ་མ་མང་པོས་བརྗོད་ཚིག་སྣ་ཚོགས་འཁོད་པའི་འཕྲེད་དར་འཕྱར་ནས་འདུ་འཛོམས་བྱས། དགེ་རྒན་དང་སློབ་ཕྲུག་དེ་གཉིས་ཀྱི་གནས་ཚུལ་ཐག་གཅོད་བྱེད་རྒྱུ་རྗེས་ལ་བཞག ང་རང་གནས་ཚུལ་འདིའི་རྒྱབ་ལོགས་ན་དོགས་པ་ཆེན་པོ་འདུག སྔོན་མ་ཞིག་ནས་བོད་ཁྱིམ་སློབ་གྲྭ་ཁག་ནང་སློབ་ཕྲུག་ལ་ཉེས་རྡུང་གཏོང་མི་ཆོག་ཅེས་པའི་སྒྲིག་གཞི་དེ་བཞག་མ་ཐག་དགེ་རྒན་རྙིང་ཞེན་ཅན་མང་པོ་ཞིག་གིས་ངོ་རྒོལ་ཤུགས་ཆེན་བྱས་ཡོད་པ་མ་ཟད། དགེ་རྒན་འགའ་རེ་སྒྲིག་གཞི་དེར་འདོད་པ་མེད་པར་རྩ་དགོངས་ཀྱང་ཞུས་ཡོད་པ་རེད། ད་རེས་ཀྱི་གནས་ཚུལ་འདི་འདྲ་ཞིག་ལ་རྐྱེན་བྱས་ཏེ་སྒྲིག་གཞིར་འགྱུར་བ་གཏོང་འདོད་མ་རེད་དམ། ཐོག་མའི་གནས་ཚུལ་བྱུང་སྟངས་དེའི་མདུན་ཕྱོགས་ཡ་མཚན་རེད། གནས་ཚུལ་བྱུང་མ་ཐག་སློབ་མ་མང་པོ་འདུ་འཛོམས་བྱས་པ་དེའི་རྒྱབ་ལོགས་ཡ་མཚན་རེད།
སློབ་གྲྭའི་སྒྲིག་གཞིའི་ནང་ཁབ་གཙགས་རི་མོ་བྲིས་མི་ཆོག་ལབ་ཡོད་ན་སློབ་ཕྲུག་ལ་གནས་ལུགས་རྒྱུ་མཚན་བཤད་དགོས་
དེ་ལྟར་མ་ཉན་ན་མ་ཉན་པ་བྱེད་ནས་བཞག་ཤོག
ཉེས་རྡུང་གཏོང་ན་ཁྲིམས་དང་སྒྲིག་གཞིར་འགལ་གྱི་ཡོད་པ་ཡིན་ན་ཡིག་ཚང་ཞུས་ན་འགྲིག་གི་འདུག་ག
དེ་འདྲའི་ཉེས་རྡུང་གཏོང་དགོས་པ་མི་འདུག་ག
བུང་བུ་ཡར་སླང་པའི་ངོ་མེད་རྔ་མ་ཆད་པའི་བཀའ་ཀྱོན་རེད།
ངོ་དེབ་ཁག་ནང་དུ་སློབ་ཕྲུག་ཚོས་སློབ་གྲྭའི་གཞུང་ལ་ངོ་རྒོལ་གནང་བ་ཡིན་སྐོར་བརྗོད་ཀྱིན་འདུག སློབ་ཕྲུག་མང་པོ་ཞིག་གིས་འཕྲེད་དར་འཕྱར་ནས་ཡིག་ཚང་སྒོ་ཁར་ངོ་རྒོལ་བྱེད་ཀྱིན་འདུག་ཅེས་འཁོད་འདདུག གསར་འགྱུར་འདིའི་ནང་སློབ་ཕྲུག་ཚོས་དགེ་རྒན་རྩ་དགོངས་ལ་མི་འགྲོ་ཆེད་འདུ་འཛོམ་ཞུ་འབོད་བྱས་པ་ཡིན་མདོག་མདོག་ཅིག་ལབ་འདུག གསལ་བོ་ཞིག་ཆགས་ཐུབ་མ་སོང་། ཡིན་ནའང་སློབ་ཕྲུག་ཚོས་མང་ཚོའི་མཁས་དབང་ལོངས་སུ་སྤྱད་པར་རྒྱབ་སྐྱོར་བརྒྱ་ཆའི་བརྒྱ་ཐམས་པ་ཡོད། སློབ་ཕྲུག་དེའི་སྤྱོད་ལམ་ག་ཚོད་འགྲིག་མེད་ནའང་ལག་པ་བསྐྱངས་ཏེ་ཉེས་རྡུང་བཏང་བ་དེ་ནོར་བ་རེད།
སློབ་གྲྭའི་སྒྲིག་གཞིའི་ནང་ཁབ་གཙགས་རི་མོ་བྲིས་མི་ཆོག་ལབ་ཡོད་དམ། དགེ་རྒན་གྱིས་སློབ་མར་ཉེས་རྡུང་བཏང་ན་འགྲིག་གི་ཡོད་ལབ་ཡོད་དམ། ཁྱད་མཚར་ནོར་འཁྲུལ་དང་པོ་གཉིས་པ་ཚང་མ་དགེ་རྒན་གྱིས་བཟོས་པ་ཡིན་ནའང་གསར་འགྱུར་འདིའི་ནང་སློབ་ཕྲུག་ལ་ནག་ཉེས་ཡོད་པའི་བཟོ་འདྲ་ཞིག་འཁོད་འདུག