ཁ་སང་སྔ་དྲོར་རྒྱ་ནག་ཧྲན་ཏུང་ཞིང་ཆེན་ཆིན་ཏོ་གྲོང་ཁྱེར་གྱི་རྡོ་སྣུམ་བཙོ་སྦྱང་བཟོ་གྲྭར་འབར་གས་དོན་རྐྱེན་བྱུང་སྟེ་ཉུང་མཐར་མི་ ༤༧ རྐྱེན་འདས་དང་མི་ ༡༦༦ ཙམ་ལ་རྨས་སྐྱོན་ཕོག་ཡོད་འདུག
ཁ་སང་སྔ་དྲོའི་པེ་ཅིན་གྱི་ཆུ་ཚོད་ ༡༠།༣༠ ཙམ་ལ། རྒྱ་ནག་ཧྲན་ཏུང་ཞིང་ཆེན་ཆིན་ཏོ་གྲོང་ཁྱེར་གྱི་རྡོ་སྣུམ་བཙོ་སྦྱང་བཟོ་གྲྭའི་སྣུམ་འདྲེན་བུ་གུར་ཆག་སྐྱོན་ཤོར་ནས་འབར་གས་དོན་རྐྱེན་བྱུང་སྟེ་ཉུང་མཐར་མི་ ༤༧ རྐྱེན་འདས་དང་། མི་ ༡༦༦ ལ་རྨས་སྐྱོན་ཕོག་སྟེ་ཆིན་ཏོའི་སྨན་ཁང་ཆེ་ཁག་བཞི་རུ་སྨན་བཅོས་བྱེད་བཞིན་ཡོད་ཀྱང་། འདས་གྲོངས་ཀྱི་གྲངས་འབོར་མུ་མཐུད་དུ་འཕར་བཞིན་ཡོད་པ་དང་། ཐེངས་འདིར་རྒྱུ་དངོས་ལ་གྱོང་ཚབས་ཆེན་ཕོག་ཡོད་འདུག
ཆིན་ཏོ་གྲོང་ཁྱེར་སྲིད་གཞུང་གིས་བརྗོད་པ་ལྟར་ན། ཐེངས་འདིའི་དོན་རྐྱེན་ཁྲོད་ཆིན་ཏོ་གྲོང་ཁྱེར་གྱི་རྒྱ་ཁྱོན་རྨི་གྲུ་བཞི་མ་ ༡༠༠༠ ཙམ་དང་རྒྱ་མཚོའི་རྨི་གྲུ་བཞི་མ་ ༣༢༠༠ ཙམ་ལ་རྡོ་སྣུམ་གྱི་འབག་བཙོག་བཟོས་ཡོད་སྟབས། གང་མགྱོགས་ཆུ་གཙང་སེལ་གྱི་འགག་སྒོ་རྒྱག་རྒྱུ་ཡིན་ལུགས་བརྗོད་ཡོད་པ་དང་། ཆིན་ཏོ་ཁོར་ཡུག་སྲུང་སྐྱོབ་ཁང་གིས་གྲོང་ཁྱེར་མཁའ་དབུགས་ལ་འབགས་བཙོག་ཚབས་ཆེན་ཐེབས་མེད་སྐོར་བརྗོད་ཡོད་ཀྱང་། ས་གནས་མི་མང་གིས་སེམས་འཚབ་བྱས་ཏེ་ཆུ་དང་ཟས་རིགས་ལ་འཛེམ་ཟོན་བྱེད་ཀྱིན་ཡོད་འདུག
ཆིན་ཏོ་རྡོ་སྣུམ་བཙོ་སྦྱང་བཟོ་གྲྭའི་སྣུམ་འདྲེན་བུ་གུ་དེར་རྒྱ་སྒོར་དུང་ཕྱུར་ ༡༣ ཙམ་གྱི་འགྲོ་གྲོན་བཏང་སྟེ། ད་ལོའི་ཕྱི་ཟླ་ ༨ ཚེས་ ༢༨ ནས་དངོས་སུ་སྤྱོད་མགོ་བརྩམས་ཤིང་། རིང་ཚད་ལ་སྤྱི་ལེ་ ༡༧༦ ཡོད་འདུག ཕྱི་ལོ་ ༢༠༡༠ ནས་ད་ལྟའི་བར་རྒྱ་ནག་རྡོ་སྣུམ་བཙོ་སྦྱང་བཟོ་གྲྭ་ཁག་ནས་འབར་གས་དོན་རྐྱེན་ ༡༠ བྱུང་ཡོད་པ་དང་། དེ་དག་གི་ཁྲོད་མི་གྲངས་ ༩༠ ལྷག་རྐྱེན་འདས་སུ་གྱུར་ཡོད་འདུག
གསར་འགོད་པ། པདྨ་མཚོ།
