གནས་ཚུལ་བཏང་འབྱོར་བྱུང་བར། རྒྱ་ནག་གཞུང་གིས་ཟླ་སྔོན་མའི་ཚེས་ ༡༨ ཉིན་ཁམས་འབྲི་རུ་རྫོང་ཚྭ་ཆུ་ཞང་རྔ་གཡང་གྲོང་གི་བློ་བཟང་ཆོས་དབྱིངས་ལགས་སྔོན་འབྲི་རུ་རྫོང་གི་སློབ་གྲྭའི་ངོ་རྒོལ་དང་འབྲེལ་བ་ཡོད་པའི་ཉེས་མིང་དང་། ཀུན་མཆོག་ཆོས་འཕེལ་ལགས་ཀྱིས་འབྲི་རུའི་ནང་བྱུང་བའི་གནས་ཚུལ་ཁག་ཕྱིར་གཏོང་བྱས་པའི་ཉེས་མིང་བཅས་ཀྱི་འོག་འཛིན་བཟུང་བྱས་ཡོད་པ་དང་། ཟླ་དེའི་ཚེས་ ༢༣ ཉིན་འབྲི་རུ་རྫོང་རབ་བརྟན་དགོན་པའི་གྲྭ་བཟང་བཀྲ་ཤིས་སྔགས་རྒྱུན་མཚམས་ལ་བཞུགས་པའི་སྐབས་ལ་འཛིན་བཟུང་བྱས་ཡོད་འདུག
ཁོང་གསུམ་གྱི་ནང་མི་གཉེན་འབྲེལ་སུ་གང་ཡང་ཐུག་འཕྲད་སོགས་བྱེད་བཅུག་མེད་སྟབས། ད་ཆར་ཁོང་ཅག་གི་གནས་སྟངས་གང་ཡང་ཤེས་རྟོག་མེད་པ་ཆགས་ཡོད་འདུག འབྲི་རུ་རྫོང་སྲིད་གཞུང་གིས་དེ་སྔོན་ཕྱི་ལོགས་ལ་སློབ་གཉེར་ལ་སྐྱོད་མྱོང་མཁན་སྐྱ་སེར་གཉིས་ཀའི་མིང་ཐོ་བཀྲམས་ཏེ་རྫོང་སྲིད་གཞུང་གིས་འདྲི་གཅོད་དང་བསམ་བློའི་སློབ་གསོ་སྤེལ་རྒྱུ་ཡིན་པའི་གསལ་བསྒྲགས་སྤེལ་ཡོད་འདུག་ལ། དེ་སྔོན་བཙོན་གྲོལ་ཐོབ་པ་དག་ལའང་སློབ་གསོ་སྤེལ་ཡོད་འདུག
ད་ལྟའི་ཆར་འབྲི་རུ་རྫོང་གི་བོད་མི་ཧ་ཅང་མང་པོ་ཞགི་འབྲི་རུ་རྫོང་བཙོན་ཁང་དང་ནག་ཆུ་ས་གནས་བཙོན་ཁང་། དེ་བཞིན་ལྷ་ས་བཙོན་ཁང་སོགས་སུ་བཙོན་འཇུག་བྱས་ཡོད་འདུག
ཁམས་འབྲི་རི་ལུང་པ་འདི་དཔའ་བོའི་ལུང་པ་ཞིག་ཡིན། བོད་ཀྱི་ལོ་རྒྱུས་ཐོག་ཏུའང་མི་གཤིས་དྲང་མོ་དང་དཔའ་མཛངས་རྟུལ་ཕོད་ཀྱི་ངག་རྒྱུན་དང་གཏམ་བརྒྱུད་མང་པོ་ཞིག་གནས་མཆོག་འདི་ནས་བྱུང་མྱོང་ཡོད།