ཁམས་ནགས་ཤོད་འབྲི་རུའི་ན་གཞོན་གཞས་པ་མགོན་པོ་བསྟན་འཛིན་ལགས་དང་འཕྲིན་ལས་ཚེ་བཀར་ལགས་གཉིས་སྔ་རྗེས་སུ་རྒྱ་ནག་གཞུང་གིས་འཛིན་བཟུང་བཙན་འཁྲིད་བྱས་ཡོད་འདུག
གནས་ཚུལ་འབྱོར་གསལ་ལྟར་ན། རྒྱ་གཞུང་གི་ཉེན་རྟོག་པས་ཁམས་ནག་ཤོད་འབྲི་རུ་རྫོང་ཤག་ཆུ་གྲོང་རྡལ་སེབ་ཁྲ་གྲོང་ནས་ཡིན་པའི་གཞས་པ་དགོན་པོ་བསྟན་འཛིན་ལགས། ཟླ་སྔོན་མའི་ཕྱི་ཚེས་ ༣༠ ཉིན་དགོང་མོར་ལྷ་སར་གློ་བུར་དུ་འཛིན་བཟུང་བྱས་ཡོད་ཅིང་། ཁོང་ད་ལྟ་རང་ལོ་ ༢༥ ཡིན་པ་དང་། ཁོང་གི་ཁྱིམ་དུ་ཕ་མ་གཉིས་དང་བཟའ་ཟླ་བུ་ཕྲུག་བཅས་ཡོད་འདུག མགོན་པོ་བསྟན་འཛིན་ལགས་ཀྱིས་བཏང་བའི་གླུ་གཞས་༼ གངས་ཅན་བོད་ལ་ལོ་གསར་ག་ན་ཡོད། ༽ཅེས་པ་སོགས་ནི་བོད་པའི་ལས་དབང་དང་། བོད་པའི་སྐད་ཡིག་དར་སྤེལ་དང་མི་རིགས་སློབ་གསོའི་སྐོར་སོགས་ཡིན་འདུག
གཞན། ཁམས་ནགས་ཤོད་འབྲི་རུ་རྫོང་འབྲི་རུ་ཤང་སེར་ཁང་གྲོང་ནས་ཡིན་པའི་གཞས་པ་འཕྲིན་ལས་ཚེ་དཀར་ལགས་ཟླ་བ་སྔོན་མའི་ཚེས་ ༢༠ ཉིན་ཡས་མས་ཤིག་ལ། ནག་ཆུ་ས་ཁུལ་རླངས་འཁོར་ཁ་ལོ་བའི་ལག་ཁྱེར་ལེན་སའི་སློབ་གྲྭར་ཕྱིན་སྐབས་འཛིན་བཟུང་བྱས་ཡོད་པ་དང་། ཁོང་ད་ལྟ་རང་ལོ་ ༢༢ ཡིན་ཞིང་། ཁོང་གི་ཁྱིམ་དུ་ཨ་མ་དབྱངས་ཅན་སྒྲོལ་དཀར་དང་བཟའ་ཟླ་ཕྲུ་གུ་བཅས་ཡོད་འདུག ཁོང་འཛིན་བཟུང་བྱས་པའི་རྒྱུ་རྐྱེན་ནི་ ༼ མཐུན་སྒྲིལ་གྱི་ཨ་ལོང་ ༽ སོགས་བོད་མི་རིགས་ཀྱི་བདེ་སྡུག་དང་འབྲེལ་བའི་གླུ་གཞས་བཏང་བར་ཆབ་སྲིད་ཀྱི་ཉེས་མིང་བཏགས་ཡོད་འདུག
ཁོང་གཉིས་སྙིང་རྗེ།
མགོན་པོ་བསྟན་འཛིན་གྱིས་བཏང་བའི ༼ གངས་ཅན་བོད་ལ་ལོ་གསར་ག་ན་ཡོད ༽ ཅེས་པའི་གཞས་ཚིག་འདི་ལྟར།
གངས་ཅན་བོད་ལ་ལོ་གསར་གང་ན་ཡོད།
གངས་སེང་དཀར་མོ་གངས་ལ་འགྱིང་ཐག་རིང༌།
གངས་རིའི་དཔའ་བོ་གངས་ཕྱིར་འཁོད་ཐབས་བྲལ།
གངས་བུ་རྒོད་པོ་གངས་སླད་སྐྱིད་ཐབས་དབེན།
གངས་ཅན་བོད་ལ་ལོ་གསར་གང་ན་ཡོད།
གངས་རིའི་རྩེ་ནས་ཁྱི་རྒན་ཀུ་ཅོ་འདོན།
གངས་རིའི་སྐེད་ནས་སྤྱང་མོས་ངུ་ཟུག་འཐེན།
གངས་རིའི་འདབས་ནས་ཝ་མོས་གཡོ་གར་འཁྲབ།
གངས་ཅན་བོད་ལ་ལོ་གསར་གང་ན་ཡོད།
གངས་རིའི་སྙིང་ཁྲག་དྲོན་མོ་ས་ལ་གཏོར།
གངས་རིའི་རླུང་རྟ་དཀར་པོ་ཆུ་ལ་བསྐྱུར།
གངས་རིའི་ཚེ་སྲོག་དམར་པོ་མེ་ལ་སྤར།
གངས་ཅན་བོད་ལ་ལོ་གསར་གང་ན་ཡོད།
གངས་རིའི་ངུ་སྐད་རྒྱལ་ཁམས་ཡོངས་ལ་ཁྱབ།
གངས་རིའི་མིག་ཆུས་འཛམ་གླིང་བསྐོར་བ་བརྒྱབ།
གངས་རིའི་ན་ཟུག་ས་སྟེང་སུ་ཡིས་ཚོར།
གངས་ཅན་བོད་ལ་ལོ་གསར་གང་ན་ཡོད།
གངས་རིའི་གཟི་བྱིན་སྨུག་སྤྲིན་ནག་པོ་བསྒྲིབས།
གངས་རིའི་ལང་ཚོ་དུས་ཀྱི་ཉི་མས་གཟས།
གངས་རིའི་འཇིག་རྟེན་ཕལ་ཆེར་འཇིག་ལ་ཉེ།
གངས་ཅན་བོད་ལ་ལོ་གསར་གང་ན་ཡོད།
གངས་རིའི་ཐོབ་ཐང་གཞན་དབང་འོག་ན་ཡོད།
གངས་རིའི་རང་དབང་མནར་གཅོད་ཁྲོད་ན་ལུས།
གངས་ཕྲུག་རྣལ་མའི་སེམས་ཤིག་ཡོད་རྒྱུ་ན།
གངས་ཅན་བོད་ལ་ལོ་གསར་གང་ན་ཡོད།