ནང་ཆེན་གྱི་མཁན་པོ་གཉིས་བཙན་ཁྲིད།

ཉེ་ཆར་ཁམས་ནང་ཆེན་ནས་ཡིན་པའི་མཁན་པོ་ཀར་ཚེ་དང་མཁན་པོ་འགྱུར་མེད་ཚུལ་ཁྲིམས་རྒྱ་གཉིས་རྒྱ་གཞུང་གིས་འཛིན་བཟུང་གིས་ཉིན་ཤས་སོང་མཚམས་ས་གནས་མི་མང་གིས་རྩད་གཅོད་ཤུགས་ཆེན་བྱས་པར་བརྟེན་གཉིས་ཀ་ཀློད་གྲོལ་བཏང་ཡོད་འདུག

ངག་དབང་ཐར་པ་ལགས་སུ་དེ་རིང་བོད་ནས་འབྲེལ་ཡོད་མི་སྣས་གནས་ཚུལ་ངོ་སྤྲོད་གནང་བ་ལྟར་ན། ནང་ཆེན་རྫོང་གི་མཁན་པོ་ཀར་ཚེ་དགོན་པའི་ཆེད་དུ་སྐུ་འདྲ་ཆེན་པོ་ཞིག་བསླུ་སར་འགྲོ་སྐབས། ཕྱི་ཟླ་ ༡༢ ཚེས་ ༦ གི་མཚན་མོའི་ཆུ་ཚོད་༡ ཙམ་ལ་རྒྱ་ནག་ཁྲིན་ཏུའུ་གྲོང་ཁྱེར་ནས་རྒྱ་གཞུང་གིས་ལྐོག་ནས་འཛིན་བཟུང་བྱས་པ་དགོན་པ་དང་ཡུལ་མིས་ཤེས་རྟོགས་བྱུང་སྟེ། དགོན་སྡེ་ཁག་གི་འཐུས་མི་དང་གྲོང་སྡེ་ཆེ་ཆུང་ ༣༠ ལྷག་གི་འཐུས་མི་རྣམས་མཉམ་འཛོམས་ཀྱིས་ཁོང་མགྱོགས་མྱུར་དགོན་པར་རྩིས་སྤྲོད་མ་བྱས་ཚེ་ནང་ཆེན་རྫོང་གི་དགོན་སྡེ་དང་ཡུལ་སྡེ་སོ་སོས་རང་སྲོག་ལ་མི་འཛེམས་པར་ངོ་རྒོལ་ཤུགས་ཆེན་བྱ་རྒྱུ་ཡིན་ཞེས། ཡུལ་སྡེ་ཆེ་ཆུང་ ༣༠ ལྷག་གི་མི་མང་དང་ནང་ཆེན་རྫོང་དང་རྫོང་གི་ཉེ་སར་ཡོད་པའི་མི་མང་ ༤༠༠༠ ཙམ་གྱིས་ས་རྟགས་བཀོད་པའི་ཞུ་ཡིག་སྲིད་གཞུང་ལ་ཕུལ་བར་བརྟེན། ཕྱི་ཚེས་ ༡༠ ཉིན་ཁོང་ཀློད་གྲོལ་བཏང་སྟེ་མཁན་པོས་དགོན་པར་ཞལ་པར་ཕུལ་ཏེ་ཁོང་ཉིན་ཤས་རིང་ཆབ་མདོའི་ཉེན་རྟོག་པས་བཙན་བཀག་བྱས་སོང་ཞེས་གསུངས་ཡོད་འདུག

མཁན་པོ་ཀར་ཚེ་ནི་ནང་ཆེན་ཕྱོགས་ཀྱི་མཁན་པོ་མིང་གྲགས་ཆེ་ཤོས་གྲས་ཤིག་ཡིན་པ་མ་ཟད། ཁོང་དེ་སྔོན་ནས་རྒྱ་གཞུང་གིས་ཐེངས་མང་པོར་འཛིན་བཟུང་བྱེད་རྩིས་བྱས་ཡོད་པ་དང་། ཁོང་གལ་སྲིད་ནང་ཆེན་རྫོང་ཁོངས་ནས་ཕྱི་ལོགས་སུ་འགྲོ་དགོས་ན་ནང་ཆེན་རྫོང་སྲིད་གཞུང་ལ་ཐོ་འགོད་བྱ་དགོས་ཀྱི་ཡོད་འདུག

གཞན། ཕྱི་ཟླ་༡༡ ཚེས་ ༢༩ ཉིན་ཁམས་ནང་ཆེན་རྟ་རྣ་དགོན་གྱི་མཁན་པོ་མཁན་པོ་འགྱུར་མེད་ཚུལ་ཁྲིམས་རྒྱ་གཞུང་གིས་འཛིན་བཟུང་བཙན་ཁྲིད་བྱས་ཡོད་པ་དང་། ཁོང་གིས་བཀའ་བརྒྱུད་འཛམ་གླིང་ཞི་བདེའི་སྨོན་ལམ་སྐབས་བོད་ཀྱི་ཆོས་དང་རིག་གཞུང་དར་སྤེལ་དགོས་ལུགས་དང་། ཡ་རབས་བཟང་སྤྱོད་གལ་ཆེན་ཡིན་པ་སོགས་ཀྱི་བཀའ་སློབ་གནང་བར་བརྟེན་ལྐོག་ནས་འཛིན་བཟུང་བྱས་ཡོད་འདུག ཁོང་འཛིན་བཟུང་བྱས་རྗེས་རྟ་རྣ་དགོན་གྱི་དགེ་འདུན་པ་རྣམས་དང་སྡེ་པ་སོ་སོའི་འཐུས་མི་རྣམས་ཀྱིས་ཡུལ་ཤུལ་ཁུལ་གྱི་སྲིད་གཞུང་ལ་ཞུ་གཏུག་བྱས་པར་བརྟེན་གནས་སྐབས་རིང་ཀློད་གྲོལ་བཏང་ཡོད་ཀྱང་། ཁོང་ལ་ཁུལ་དང་ཞིང་ཆེན་སོགས་ལ་སློབ་གསོ་ཉན་དུ་ཡོང་དགོས་པའི་བཙན་བཀའ་བཏང་ཡོད་འདུག