མདུན་ངོས།
About Us
  • English
Advertisement
བོད་ཀྱི་དུས་བབ།
  • གསར་འགྱུར།
    • ༸གོང་ས་མཆོག གསར་འགྱུར།
    • བཙན་བྱོལ།
    • བོད་ནང་།
    • རྒྱལ་སྤྱི།
    • རྒྱ་ནག
    • ༧གོང་ས་མཆོག གསུང་འཕྲིན།
  • རྩོམ་ཡིག།
    • བསམ་ཚུལ།
    • སྒྱུར་རྩོམ།
  • བརྙན་མཛོད།
    • གླེང་མོལ།
    • མེ་ལོང་།
    • ང་ཡི་བཙན་བྱོལ་བ།
    • གངས་ཕྲུག
    • དྲ་བརྙན་གསར་འགྱུར།
  • ཁྱབ་བསྒྲགས།
    • གླ་ཡོད་ཁྱབ་བསྒྲགས།
    • དུས་བབ་ཀྱི་གསལ་བསྒྲགས།
    • གླ་ཡོད་རིན་གོང་།
  • པར་མཛོད།
    • ང་ཚོའི་པར།
    • གསང་འགྱུར་པར་རིས།
  • དཔེ་དེབ།
  • རྩོམ་སྒྲིག་པའི་གཏམ།
  • ང་ཚོའི་སྐོར།
    • བོད་ཀྱི་དུས་བབ་ཀྱི་བྱུང་རིམ།
    • རྩ་ཆེའི་གསུང་འཕྲིན་ཁག
    • English
    • Chinese
No Result
ཆ་ཚང་གཟིགས།
  • གསར་འགྱུར།
    • ༸གོང་ས་མཆོག གསར་འགྱུར།
    • བཙན་བྱོལ།
    • བོད་ནང་།
    • རྒྱལ་སྤྱི།
    • རྒྱ་ནག
    • ༧གོང་ས་མཆོག གསུང་འཕྲིན།
  • རྩོམ་ཡིག།
    • བསམ་ཚུལ།
    • སྒྱུར་རྩོམ།
  • བརྙན་མཛོད།
    • གླེང་མོལ།
    • མེ་ལོང་།
    • ང་ཡི་བཙན་བྱོལ་བ།
    • གངས་ཕྲུག
    • དྲ་བརྙན་གསར་འགྱུར།
  • ཁྱབ་བསྒྲགས།
    • གླ་ཡོད་ཁྱབ་བསྒྲགས།
    • དུས་བབ་ཀྱི་གསལ་བསྒྲགས།
    • གླ་ཡོད་རིན་གོང་།
  • པར་མཛོད།
    • ང་ཚོའི་པར།
    • གསང་འགྱུར་པར་རིས།
  • དཔེ་དེབ།
  • རྩོམ་སྒྲིག་པའི་གཏམ།
  • ང་ཚོའི་སྐོར།
    • བོད་ཀྱི་དུས་བབ་ཀྱི་བྱུང་རིམ།
    • རྩ་ཆེའི་གསུང་འཕྲིན་ཁག
    • English
    • Chinese
No Result
ཆ་ཚང་གཟིགས།
བོད་ཀྱི་དུས་བབ།
English
No Result
ཆ་ཚང་གཟིགས།

ཀྲུག་ཡོང་ཁང་། བུའི་མིག་ལམ་གྱི་ཕ་རྒན་བྱོལ་སོང་། ༼༡༽

བོད་ཀྱི་དུས་བབ།
༢༠༡༣/༡༢/༡༣
Share on FacebookShare on TwitterShare on EmailShare on Whatsapp

ཟླ་བ་ཚེ་རིང་།

གསལ་ཁ་མེད་པའི་འཛིན་བཟུང་།

འཛིན་བཟུང་ངམ་བཀག་ཉར། ཁྱིམ་སྐྱིལ་ལྟ་རྟོགཞིབ་གཤེར། གནས་ཚུལ་ཐོན་རིམ་བཞིན་ཀྲུག་ཡོང་ཁང་གི་དོན་རྐྱེན་སྐོར་ལ་གསར་ལམ་ཁག་གིས་མིང་ཚིག་བེད་སྤྱོད་བྱེད་སྟངས་མི་འདྲ་བ་ལྟར། ཁོའི་ནག་ཉེས་ཁག་ཀྱང་རིམ་བཞིན་ལྐོག་ཟ་རུལ་སུངས་ནས་སྲིད་འགྱུར་དུས་ཟིང་། ལྐོག་གསོད་ཉེས་ཅན་ནས་རྒྱལ་ཁབ་ཀྱི་མཐོ་རིམ་དཔོན་རིགས་ལྐོག་གསོད་འཆར་འགོད་སོགས་རྒྱ་ཇེ་ཆེ་དང་ཚབས་ཇེ་སྡུག་ཏུ་འགྲོ་བཞིན་ཡོད། ཞིབ་བཤེར་སྙན་ཐོ་བཀླགས་རྗེས། ‘‘ཀྲུག་ཡོང་ཁང་དོན་རྐྱེན་ནི། ད་བར་རྒྱ་ནག་གུང་ཁྲན་ཏང་གི་ལོ་རྒྱུས་ནང་བྱུང་མྱོང་མེད་པའི་ཚབས་ཆེའི་གྱོད་དོན་”ཞིག་ཡིན་སྐོར་དབུས་ཆབ་སྲིད་ཅུའི་རྒྱུན་ལས་ཟུར་པ་ཞིག་གིས་བཤད་ཡོད། “རྒྱ་ནག་དབུས་ཆབ་སྲིད་ཅུའི་རྒྱུན་ལས་ལས་ཐོག་བདུན་པོས་འོས་བསྡུ་བརྒྱུད་ཀྲུག་ཡོང་ཁང་ལ་ཞིབ་བཤེར་བྱ་གཏན་འཁེལ་རྗེས། ཟླ་འདིའི་ཕྱི་ཚེས་ ༡ ཉིན་གྱི་དགོང་དྲོར་ཀྲུང་དབྱང་གཞུང་ལས་ཁང་གི་འགན་འཛིན་ལི་ཀྲན་ཧྲུ་ཀྲུང་ནན་ཧེ་རུ་ཡོད་པའི་ཀྲུག་ཡོང་ཁང་གི་སྡོད་སར་ཕྱིན་ཏེ་ཀྲུང་དབྱང་གི་ཐག་གཅོད་བརྒྱུད་བསྒྲགས་བྱས་ཤིང་། ཀྲུག་ཡོང་ཁང་བཟའ་མི་གཉིས་ཧུ་པེ་དང་པེ་ཅིན་ནས་དྲག་འདེམས་བྱས་པའི་སྐུ་སྲུང་དམག་མི་ལྔ་བརྒྱའི་ལྟ་སྲུང་འོག་བཞག་པ་མ་ཟད། ཁོའི་དྲུང་ཡིག་དང་སྐུ་སྲུང་དམག་དཔོན། རླངས་འཁོར་ཁ་ལོ་བ་གསུམ་འཛིན་བཟུང་བྱས་ཡོད་དང་། ཕྱི་ཚེས་ ༤ ཉིན་རྒྱ་ནག་དབུས་ཏང་གི་སྒྲིག་ཁྲིམས་ཞིབ་བཤེར་སྡེ་ཁག་གི་དྲུང་ཆེ་ལྦང་ཆི་ཧྲན་གྱིས་ཀྲུག་ཡོང་ཁང་ལ་ཞིབ་བཤེར་བྱས་པའི་གྲུབ་དོན་སྙན་ཐོ་དབུས་ཆབ་སྲིད་ཅུའུ་ལ་སྤྲད་ཡོད་འདུག

ཕྱི་ཚེས་ ༥ ཉིན་ཡང་བསྐྱར་དུས་གཅིག་ལ་ཀྲུག་ཡོང་ཁང་གི་སྐྱེས་ཡུལ་ཅང་སུ་དང་པེ་ཅིན་གཉིས་ནས་ཁོའི་གཅེན་གཅུང་མིང་སྲིང་གསུམ་འཛིན་བཟུང་དང་། ཁྱིམ་བཤེར་སྐབས་རྒྱ་སྒོར་དུང་ཕྱུར་གཅིག་ལྷག་གི་དངུལ་དམར་དང་དངུལ་ཁང་འཛིན་ཡིག་ལག་སོན་བྱུང་ཡོད་འདུག” གསར་ལམ་ཁག་ནས་འདི་ལྟར་ཀྲུག་ཡོང་ཁང་ལ་ཞིབ་བཤེར་བྱས་པའི་གནས་ཚུལ་དང་བརྒྱུད་རིམ་ཁ་གསལ་ངང་ཉིན་ལྟར་ཐོན་གྱིན་ཡོད་ནའང་། རྒྱ་ནག་གཞུང་གི་འབྲེལ་ཡོད་སྡེ་ཁག་གིས་ད་སྔ་དེའི་སྐོར་ཡིན་མིན་གྱི་གསལ་ཁ་གང་ཡང་གཏོད་མེད། བཀག་སྐྱིལ་ནས་ཞིབ་བཤེར། དེ་ནས་ཁྲིམས་ཞིབ་སོགས་པོ་ཞི་ལེ་གཞིར་བཞག་ནས་བལྟས་ཚེ། ཟླ་ངོ་བཅོ་བརྒྱད་ནི་ཀྲུག་ཡོང་ཁང་གི་དོན་རྐྱེན་ཁ་གསལ་བཟོ་པར་མཚོན་ན་དུས་ཚོད་ཐུང་དྲགས་པའི་ཚོད་ཡིན། ཁོའི་ལྐོག་ཟ་རུལ་སུངས་ཀྱི་དཔལ་འབྱོར་ནག་ཉེས་ནས་ལྐོག་གསོད་དོན་རྐྱེན་དང་། དེ་ནས་སྲིད་འགྱུར་དུས་ཟིང་། རྒྱལ་ཁབ་ཀྱི་དབུ་ཁྲིད་ལྐོག་གསོད་འཆར་འགོད་སོགས་གང་ལ་བལྟས་ཀྱང་། པོ་ཞི་ལེ་ལས་ལྡབ་འགྱུར་གྱི་ནག་ཉེས་ཆེ་བ་མ་ཟད། ཏང་གི་སྐབས་བཅུ་བདུན་པའི་ཆབ་སྲིད་ཅུའི་དབུས་རྒྱུན་ལས་ཡིན་པ་དེས་ཀྱང་ཁོ་ལ་རང་འགར་ལག་པ་འཆང་ཆོག་ཆོག་དང་། འཆང་ནས་ལས་སླ་བོར་ཐག་བཅད་ཆོག་ཆོག་ཅིག་མེད།

འོན་ཀྱང་པེ་ཅིན་ནས་ “ཀྲུང་ནན་ཧེ་དང་འབྲེལ་ཐག་ཉེ་པའི་མི་” ཡིས་མཁོ་སྤྲོད་བྱས་པ་ལྟར། ཁ་སང་དེ་རིང་གསར་ལམ་ཁག་ན་ཁྱབ་བཞིན་པའི་ཁོའི་དོན་རྐྱེན་དང་། ཏང་གི་སྒྲིག་ཁྲིམས་ཞིབ་བཤེར་ལྷན་ཁང་གིས་ཁོའི་ནག་ཉེས་སྐོར་གྱི་སྙན་ཐོ་བཏོན་ཟིན་པ་སོགས་ལ་གཞི་རྩ་གང་འཚམ་ཡོད་ཚེ། འབྱུང་འགྱུར་གྱི་བདུན་ཕྲག་གཉིས་གསུམ་ནང་རྒྱ་ནག་དབུས་ཆབ་སྲིད་ཅུ་དང་། ཡང་ན་ཏང་གི་སྒྲིག་ཁྲིམས་ཞིབ་བཤེར་ལྷན་ཁང་གང་རུང་ནས་བརྡ་ལན་ཞིག་སྤྲོད་པར་ཡིད་ཆེས་བྱས་ཆོག འགད་རྫས། དུག་ཁབ། ད་དུང་པེ་ཅིན་ནས་གྲག་པའི་ “མེ་མདའ” ཀྲུག་ཡོང་ཁང་ནི་སྐབས་བདུན་པའི་རྒྱ་ནག་དབུས་ཆབ་སྲིད་ཅུའི་རྒྱུན་ལས་དང་། རྒྱ་ནག་དབུས་སྲིད་ཁྲིམས་ཨུ་ཡོན་ལྷན་ཁང་གི་དྲུང་ཆེ་ཡིན། རྒྱ་ནག་རྒྱལ་ཡོངས་ཀྱི་སྤྱི་བདེ་དང་། རྒྱལ་ཁབ་བདེ་འཇགས།ཁྲིམས་འཛིན་མ་ལག་ཡོངས་ཁོའི་དབང་འཛིན་འོག་ཡོད་། སྲིད་དང་ཁྲིམས་ཀྱི་ལྷན་ཁང་ཁག་གསུམ་ཁོའི་དབང་འོག་ན་ཡོད་པ་དེས། ཁོ་སྐབས་དེའི་ཆབ་སྲིད་ཅུའི་དབུས་རྒྱུན་ལས་གཞན་བརྒྱད་ལས་དབང་ཆ་ཆེ་བ་ཡོད་པ་མཚོན་ཐུབ། དེ་རིང་གི་ཁོའི་སྲིད་དོན་ཕམ་ཁ་འདི་མདོར་བསྡུས་ན་གཉིས་སྟེ། ལམ་འགྲོ་མ་རྒྱུག་པའི་“དོན་རྐྱེན་གཉིས་”དང་“འཆར་འགོད་གཉིས་”ལ་རག་ལས་ཡོད། དེ་ཡང་ཁ་གསལ་ན། “སྲིད་འགྱུར་དུས་ཟིང་”དང་“དབུ་ཁྲིད་ལྐོག་གསོད་” གཉིས་ཆགས་ཡོད།

ཏང་གི་ཚོགས་ཆེན་བཅུ་བདུན་པའི་སྟེང་ཞིས་ཅིན་ཕིན་སྐབས་བཅོ་བརྒྱད་པའི་ཏང་དང་རྒྱལ་ཁབ་ཀྱི་ཆེས་མཐོའི་དབུ་ཁྲིད་དང་། ལི་ཁེ་ཆང་རྒྱལ་སྲིད་སྤྱི་ཁྱབ་ཁང་གི་སྲིད་བློན་ལ་གཏན་འཁེལ་རྗེས། ཀྲུག་ཡོང་ཁང་དང་པོ་ཞི་ལེ་ཕྱོགས་ཁག་གིས་བརྒྱུད་རིམ་ལྡན་པའི་སྲིད་དབང་འཐབ་རྩོད་ཀྱི་འཆར་གཞི་དང་གྲ་སྒྲིག་བྱས་ཡོད། ཏང་གི་སྐབས་བཅོ་བརྒྱད་པའི་ཚོགས་ཆེན་སྐབས་པོ་ཞི་ལེ་དབུས་རྒྱུན་ནང་ཡོང་ཐབས་དང་། དེ་ནས་ཀྲིག་ཡོང་ཁང་ལྟར་རྒྱ་ནག་དབུས་སྲིད་ཁྲིམས་ཨུ་ཡོན་ལྷན་ཁང་གི་དྲུང་ཆེ་ལ་བསྐོ་ཐབས་བྱ་རྒྱུ། རྒྱ་ནག་རྒྱལ་ཡོངས་ཀྱི་སྤྱི་བདེ་མ་ལག་དང་། རྒྱལ་ཁབ་བདེ་འཇགས་མ་ལག ཁྲིམས་འཛིན་མ་ལག་ཁག་གི་དབང་ཆ་བཟུང་རྗེས། པོ་ཞི་ལེ་ཡི་སྟངས་འཛིན་འོག་ཡོད་པའི་ཡུ་ནན་གྱི་དམག་སྒར་ཨང་ ༡༤ ་པ་དང་། སི་ཁྲོན་དུ་ཡོད་པའི་དམག་སྒར་ཨང་ ༡༣ པའི་སྟོབས་ཤུགས་སྤྱད་ནས་སྲིད་འགྱུར་དུས་ཟིང་བསླང་རྒྱུ་དང་། དུས་ཟིང་ནང་ལི་ཁེ་ཆང་གནས་དབྱུང་དང་ཞིས་ཅིན་ཕིན་ལྐོག་གསོད་བཏང་རྗེས། པོ་ཞི་ལེ་ཡིས་རིམ་བཞིན་སྲིད་བློན་ནས་སྲིད་འཛིན་སྟེ་ “རྒྱ་ནག་གི་ཕུ་ཅིན་”བྱ་རྒྱུ་དང་། ཀྲུག་ཡོང་ཁང་ཧུའུ་ཅིན་ཐའོ་དུས་སྐབས་ཀྱི་ཅང་ཙེ་མིན་ལྟར་ “གོང་མའི་གོང་མ་”བྱ་རྒྱུ་དེ་ཡིན།

འདས་ལོར་བྱུང་བའི་ལྦང་ལི་ཅུན་གྱི་དོན་རྐྱེན་དང་། དེར་མཐུད་པའི་པོ་ཞི་ལེ་ཡི་དོན་རྐྱེན་དེས་གཞི་རྒྱ་ཆེ་བའི་འཆར་གཞི་འདི་ལ་ལམ་འགྲོ་རྒྱུག་བཅུག་མེད། ལྦང་ལི་ཅུན་གྱིས་ཨ་རིའི་དོན་གཅོད་ཁང་ལ་སྤྲད་པའི་གསང་བའི་ཡིག་ཚགས་ནང་འདིའི་སྐོར་ཞིབ་གསལ་ཡོད་པར་བཤད་ལ། པོ་ཤི་ལེ་ཡི་བཟའ་ཟླ་ཀོ་ཁེ་ལེ་ལ་ཞིབ་བཤེར་སྐབས། ཁོ་མོས་རང་ཉིད་དུས་ཟིང་དེའི་ནང་པོ་ཞི་ལེ་དང་ཀྲུག་ཡོང་ཁང་གཉིས་བར་གྱི་གསང་བའི་བརྡ་ལན་སྤྲོད་མཁན་བྱས་ཚུལ་ངོས་ལེན་བྱས་ཡོད་པར་བཤད། འདས་ལོའི་ཕྱི་ཟླ་ ༣ ཚེས་ ༡༩ ཉིན་གྱི་མཚན་མོར། པེ་ཅིན་ནས་དམག་མི་དང་བདེ་འཇགས་ཉེན་རྟོག་མི་སྣའི་བར་“དམག་འཁྲུག་ཆུང་ཆུང་”ཞིག་ཤོར་ཡོད། སྐབས་དེར་དྲ་རྒྱའི་བརྒྱུད་ལམ་ཁག་ནས་ “པེ་ཅིན་མཁར་དུ་དམག་མི་སླེབས་སོང་”དང་། “པེ་ཅིན་ནས་གྲག་པའི་མེ་མདའ།” ཡང་ན། “པེ་ཅིན་དུ་དོན་དག་བྱུང་འདུག་”སོགས་ཀྱི་བརྗོད་ཚིག་འོག་དམག་མིའི་རླངས་འཁོར་ཕོན་ཆེན་པེ་ཅིན་གྲོང་ཁྱེར་ནང་འཛུལ་བཞིན་པ་དང་། དམག་མི་དང་ཉེན་རྟོག་པའི་བར་མེ་མདའ་རྒྱག་རེས་བྱེད་བཞིན་པའི་པར་རིགས་གང་མང་ཁྱབ་སྤེལ་བྱུང་ཡོད་ནའང་། རྒྱ་ནག་གཞུང་གིས་དེའི་སྐོར་དམ་དྲག་བྱས་ཏེ་གནས་ཚུལ་ཁྱབ་སྤེལ་བྱས་བཅུག་མེད།

ཕྱིས་སུ་འདི་ལ་ “གསུམ་གཅིག་དགུའི་དོན་རྐྱེན་” དུ་འབོད། ཉེ་ཆར་ “ཀྲུང་ནན་ཧེ་དང་འབྲེལ་ཐག་ཉེ་པའི་མི་” དེས་གསར་ལམ་ཁག་ལ་གནས་ཚུལ་མཁོ་སྤྲོད་བྱས་པ་ལྟར་ན། དོན་རྐྱེན་དེ་ཀྲུག་ཡོང་ཁང་གིས་ཁོའི་ལག་འོག་གི་པེ་ཅིན་གྲོང་ཁྱེར་དང་དམིགས་བསལ་ཀྲུང་ནན་ཧེ་ཡི་སྐུ་སྲུང་ཉེན་རྟོག་རུ་དཔུང་དང་བདེ་འཇགས་རུ་དཔུང་སྤྱད་ནས་བསླངས་པའི་ “སྲིད་འགྱུར་དུས་ཟིང་” ཞིག་ཡིན་པ་དང་། སྲིད་འཛིན་ཧུའུ་ཅིན་ཐའོ་ཡིས་ཧུ་པེ་རུ་བཅའ་སྡོད་དམག་ཁུང་ཨང་ ༣༨ པའི་དམག་དཔུང་དྲངས་ཏེ་ “དུས་ཟིང་ཞོལ་འཇགས་” བཏང་བའི་ནང་ཁུལ་གྱི་ “དམག་འཁྲུག་” ཅིག་ཡིན་པར་བཤད། དོན་རྐྱེན་དེ་ཏག་ཏག་པོ་ཞི་ལེ་ལ་ཞིབ་བཤེར་བཀག་ཉར་བྱ་རྒྱུའི་ཐག་གཅོད་བྱུང་བའི་དུས་ཚོད་དང་འཁེལ་ཡོད། ‘‘པེ་ཏེ་ཧུ་གསང་བའི་ཚོགས་འདུའི་སྟེང་ཅང་ཙེ་མིན་གྱིས་ཐོག་དང་པོར་ཀྲུག་ཡོང་ཁང་ལ་ཞིབ་བཤེར་བྱས་ཆོག་པའི་ཁས་ལེན་བྱས་རྗེས་དང་། ཞིས་ཅིན་ཕིན་སྲིད་སྟེགས་སྟེང་དངོས་སུ་བསླེབས་པའི་སྔ་གཞུག་དེར། ཀྲུག་ཡོང་ཁང་གིས་ཉུང་མཐར་ཡང་ཐེངས་གཉིས་ཙམ་ལ་ཞིས་ཅིན་ཕིན་ལྐོག་གསོད་ཀྱི་འཆར་འགོད་བྱས་ཡོད། གཅིག་ནི་ཀྲུང་ནན་ཧེ་ཚོགས་ཁང་དུ་འགད་རྫས་བཞག་ནས་ལྐོག་གསོད་བྱ་རྒྱུ་དང་། གཞན་དེ་ཞིས་ཅིན་ཕིན་གྱིས་འཆར་ཅན་ལྟར་པེ་ཅིན་དམག་མིའི་སྨན་ཁང་ཨང་ ༣༠༡ ནང་ལུས་ཁམས་བརྟག་དཔྱད་སྐབས། དུག་ཁབ་བརྒྱབ་ནས་ལྐོག་གསོད་བྱ་རྒྱུ་དེ་རེད།

འཆར་གཞི་འདི་དངོས་སུ་ལག་བསྟར་དང་སྒྲུབ་མཁན་ཀྲུག་ཡོང་ཁང་གི་དྲུང་ཡིག་དང་སྐུ་སྲུང་དམག་དཔོན་གཉིས་རེད། ཁོ་གཉིས་ཕྱི་ཚེས་ ༡ ཉིན་དངོས་སུ་འཛིན་བཟུང་བྱས་རྗེས་འདིའི་སྐོར་ཁས་ལེན་བྱས་ཡོད་པ་རེད།’’ ཀྲུང་ནན་ཧེ་དང་འབྲེལ་ཐག་ཉེ་བའི་མི་དེས་གསར་ལམ་ཁག་ལ་འདི་ལྟར་བརྗོད་ཡོད། ད་ལོའི་ཕྱི་ཟླ་བརྒྱད་པའི་ཟླ་དཀྱིལ་ནས་དགུ་བའི་ཚེས་ཤར་བར་སྟེ། བདུན་ཕྲག་གཉིས་གསུམ་རིང་ཞིས་ཅིན་ཕིན་གློ་བུར་དུ་ཚང་མའི་མཐོང་ལམ་ནས་ཡལ་ཡོད། འདི་ད་བར་དུ་རྒྱ་ནག་གཞུང་གིས་གསང་བའི་ངོ་བོར་བཞག་ཡོད་ནའང་། སྐབས་དེར་བརྒྱུད་ལམ་ཁག་གིས་ཞིས་ཅིན་ཕིན་ལ་རྨས་སྐྱོན་དང་། ཡང་ན། ནད་མནར། འགྲིམ་འགྲུལ་དོན་རྐྱེན། ལྐོག་གསོད་དོན་རྐྱེན་སོགས་ལས་གང་རུང་ཞིག་བྱུང་ཡོད་པའི་ཚོད་དཔག་བྱས་ཡོད། བར་སྐབས་དེར་ཞིས་ཅིན་ཕིན་ཀྲུང་ནན་ཧེ་ནས་གནས་སྤོར་གྱིས་པེ་ཅིན་ཞི་ཧྲན་དམག་སྒར་གྱི་སྤྱི་ཁྱབ་བཀོད་འདོམས་ཁང་དུ་ “ཉེན་ཡོལ་” དུ་ཕྱིན་ཡོད་པ་དང་། བར་སྐབས་དེ་ནས་བཟུང་ཁོས་སྤྱི་བདེ་དང་བདེ་འཇགས་ལྷན་ཁང་གི་བཀོད་ཁྱབ་འོག་ཡོད་པའི་རང་གི་སྐུ་སྲུང་ཉེན་རྟོག་ཡོངས་བརྗེ་བསྒྱུར་གྱིས་དམག་ཁུལ་ཁག་ནས་དྲག་འདེམས་བྱས་པའི་དམག་མིའི་སྐུ་སྲུང་བ་བཞག་ཡོད་པར་བཤད།

ཀྲུག་ཡོང་ཁང་། བུའི་མིག་ལམ་གྱི་ཕ་རྒན་བྱོལ་སོང་།

ཁྲིན་ཏུར་དཔེ་ཁང་ཆུང་ཆུང་ཞིག་འཚོ་རྟེན་དུ་ཉར་བའི་ཀྲུག་ཧན་ནི་ཀྲུག་ཡོང་ཁང་དང་ཁོའི་བཟའ་ཟླ་སྔོན་མའི་བུ་ཆུང་བ་དེ་ཡིན། ཁོས་དེ་སྔ་འགྲིམ་འགྲུལ་དོན་རྐྱེན་ནང་རྐྱེན་འདས་སུ་སོང་བའི་ཨ་མའི་ ‘‘རྒྱབ་ལོགས་ཀྱི་ལག་དམར་’’ ནི་རང་གི་ཕ་རྒན་ཀྲུག་ཡོང་ཁང་ཡིན་པའི་ཡིད་ཆེས་བྱེད་ཀྱིན་ཡོད་ལ། དོན་རྐྱེན་བྱུང་རྗེས་ནས་བཟུང་ཁོས་རང་གི་ཕ་རྒན་ཀྲུག་ཡོང་ཁང་དང་ཕ་བུའི་འབྲེལ་ཐག་བཅད་ཡོད། ཀྲུག་ཡོང་ཁང་གིས་སི་ཁྲོན་ཞིང་ཆེན་གྱི་དམར་ཤོག་དྲུང་ཆེ་འཁུར་སྐབས། ཁོའི་བཟའ་ཟླ་སྔོན་མ་གློ་བུར་བའི་འགྲིམ་འགྲུལ་དོན་རྐྱེན་ཞིག་ནང་རྐྱེན་འདས་སུ་སོང་ཡོད། སྐབས་དེར་དོན་རྐྱེན་དང་ཐད་ཀར་འབྲེལ་བ་ཡོད་པའི་མི་གཉིས་ལ་ལོ་བཅོ་དང་ཉི་ཤུའི་ཁྲིམས་ཐག་བཅད་ཡོད་ནའང་། ལོ་གསུམ་བཞིའི་རྗེས་གཉིས་ཀ་བཙོན་གྲོལ་ཐོབ་སྟེ་རྒྱ་ནག་རྡོ་སྣུམ་སྡེ་ཁག་ནང་ལས་ཀ་བྱས་ཡོད། གཅིག་གིས་རྡོ་སྣུམ་རླངས་འཁོར་རུ་ཁག་གི་མགོ་གཙོ་དང་། གཅིག་ཤོས་ཀྱིས་ཧྲན་ཏུང་རྡོ་སྣུམ་ཁེ་ལས་སྡེ་ཚན་ནང་འགན་འཛིན་འཁུར་ཡོད།

 ད་ལོའི་ཕྱི་ཟླ་ ༧ པའི་ནང་ཁོ་གཉིས་ཡང་བསྐྱར་འཛིན་བཟུང་འདྲི་ཞིབ་བྱེད་སྐབས། གཉིས་ཀས་འགྲིམ་འགྲུལ་དོན་རྐྱེན་དེ་ཀྲུག་ཡོང་ཁང་སི་ཁྲོན་གྱི་དྲུང་ཆེ་ཡིན་སྐབས། ཁོའི་དྲུང་ཡིག་ཀོ་ཡོང་ཤང་གིས་བཀོད་བྱུས་འོག་བསྒྲུབས་པ་ཡིན་ཚུལ་ངོས་ལེན་བྱས་ཡོད། འགྲིམ་འགྲུལ་དོན་རྐྱེན་བྱུང་ནས་ཅུང་མ་འགོར་བར། ཀྲུག་ཡོང་ཁང་གིས་ཅང་ཙེ་མིན་གྱི་བཟའ་ཟླའི་ཚ་མོ་སྟེ། རང་ལས་ལོ་ཉེར་བརྒྱད་ཀྱིས་ཆུང་བའི་ད་ལྟའི་བཟའ་ཟླ་ཅ་ཞོ་ཡེ་དང་གཉེན་སྒྲིག་བྱས་ཤིང་། ཀོ་ཡོང་ཤང་ཡང་ཀྲུག་ཡོང་ཁང་གི་དྲུང་ཡིག་ནས་སི་ཁྲོན་ཞིང་ཆེན་གྱི་དམར་ཕྱོགས་དྲུང་ཆེ་གཉིས་པར་གོ་གནས་སྤར་ཡོད། “ངས་ཕ་རྒན་བྱོལ་སོང་དེ་དང་འབྲེལ་ཐག་གཙང་བཅད་བྱས་ཚར་ཡོད། རང་གི་མི་ཚེ་ནང་ཁོ་ལ་ཁྱོན་ནས་ཐུག་འདོད་མེད།” འདི་ཀྲུག་ཡོང་ཁང་རང་གི་ཚ་བོར་ལྟ་བར་འགྲོ་སྐབས་ཀྲུག་ཧན་གྱིས་ཁོ་ཁྱིམ་དུ་ཡོང་བཅུག་མེད་ལ། འབྲེལ་ཡོད་ཀྱིས་ཁོ་ལ་སློབ་གསོ་གཏོང་སྐབས་བཤད་པའི་སྐད་ཆའི་དུམ་བུ་ཞིག་ཡིན། སྐབས་དེར་ཁོས་དངོས་སུ་རང་གི་ཕ་རྒན་ལ་ “བྱོལ་སོང་” ཞེས་པའི་མིང་ཚིག་འདི་བེད་སྤྱོད་བཏང་ཡོད། ད་དུང་ཁོས་ཀྲུང་ཡོང་ཁང་ལ་དབང་ཤུགས་ཆེ་བས་དྲང་བདེན་གྱི་ཁྲིམས་གཅོད་མི་ཐུབ་ཀྱང་། ཕ་བུའི་འབྲེལ་ཐག་བཅད་ནས་ཚ་བོར་ཐུག་མ་བཅུག་པ་དེ་ཁོ་ལ་ ‘‘ལས་འབྲས་ཀྱི་ཁྲིམས་ཆད་’’ ཅིག་ཡིན་ཚུལ་བཤད་ཡོད།

( མུ་འགོད། )

འབྲེལ་ཡོད་གསར་འགྱུར།

བོད་ནང་གི་ན་གཞོན་གཞས་པ་ཨ་སངས་ལགས། པར་དུས་བབ་ཀྱིས་ཕྱོགས་སྒྲིག་བྱས།
Mobile App

གཞས་པ་ཨ་སངས་ལགས་མུ་མཐུད་བཀག་ཉར་འོག་ཡོད་འདུག

༢༠༢༥/༡༠/༡༨
Zhang Youxia (front), newly-elected Vice Chairman of the Central Military Commission of the People's Republic of China, swears an oath with members of the Central Military Commission (L-R) Zhang Shengmin, Liu Zhenli, He Weidong, Li Shangfu, and Miao Hua, after they were elected during the fourth plenary session of the National People's Congress (NPC) at the Great Hall of the People in Beijing. photo credit: Reuter
Mobile App

རྒྱ་ནག་གཞུང་གིས་དམར་ཤོག་དཔོན་རིགས་དགུ་ཕྱིར་ཕུད་བཏང་།

༢༠༢༥/༡༠/༡༨
མོན་ཡུལ་འཕགས་བོད་མཛའ་འབྲེལ་ཚོགས་པས་༧གོང་ས་མཆོག་ལ་མནྜལ་བརྟན་གསུམ་འདེགས་འབུལ་ཞུས། ༢༠༢༥།༡༠།༡༨ དུས་བབ་ཀྱི་པར།
Mobile App

མོན་ཡུལ་འཕགས་བོད་མཛའ་འབྲེལ་ཚོགས་པས་༧གོང་ས་མཆོག་ལ་མནྜལ་རྟེན་གསུམ་འདེགས་འབུལ་ཞུས།

༢༠༢༥/༡༠/༡༨
Richard Gere receiving the Human Rights First Visionary Award. Photo: ICT
Mobile App

བོད་དོན་རྒྱབ་སྐྱོར་བ་རེ་ཆར་ཌི་གྷེ་རེ་ལགས་སུ་འགྲོ་བ་མིའི་ཐོབ་ཐང་གི་གཟེངས་རྟགས་ཐོབ།

༢༠༢༥/༡༠/༡༧
Mobile App

སེར་བྱེས་མཁས་སྙན་གྲྭ་ཚང་གིས་༧སྐུའི་གོ་སྟོན་གྱི་བྱམས་བརྩེའི་ལོ་སྲུང་གཙི་ཞུས།

༢༠༢༥/༡༠/༡༧
Mobile App

བོད་ནང་ཤོག་སྦག་གི་སྒྱུ་རྩལ་འགྲེམས་སྟོན་བྱེད་མཁན་ལ་ཉེས་ཆད་བཅད།

༢༠༢༥/༡༠/༡༦

མཆན། 8

  1. བྱ་གཞུང་དཔལ་རྡོར། says:
    ལོ་ 12 སྔོན།

    རྒན་ཟླ་བ་ཚེ་རིང་གི་རྩོམ་ཡིག་ནམ་རྒྱུན་ཀློག་གི་ཡོད། རྩོམ་པ་པོ་རྒན་རབས་ཚོའི་རྩོམ་ཡིག་ལ་དམིགས་བསལ་བྲོ་བ་ཆེན་པོ་དང་རྩོམ་ཡིག་གི་སྒྲོམ་གཞི་བསླངས་སྟངས་ལའང་ཁྱད་ཆོས་མི་འདྲ་བ་ཞིག་འདུག

    Reply
  2. དཔའ་ཆེན་དོན་གྲུབ། says:
    ལོ་ 12 སྔོན།

    ཀྲུག་ཡོང་ཁང་སོགས་ཀྱི་མཐའ་མའི་དམིགས་ཡུལ་དེ་བོད་ལ་དགོས་མཁོ་མེད་ཀྱང་། ཐོག་མའི་བྱ་བ་ལམ་དུ་མ་སོང་བ་འདི་བོད་ལ་བསོད་ནམས་དམན་པས་རེད།

    Reply
  3. ཕུན་ཚོགས། says:
    ལོ་ 12 སྔོན།

    ཐཻངས་འདིའི་རྒྱ་ནག་དབུས་གཞུང་གི་རྙོག་གླེང་འདི་བརྒྱུད་དེ་ད་ལྟའི་སྲིད་འཛིན་ཞི་ཅིན་ཕིང་གི་ཆབ་སྲིད་དང་སྲིད་བྱུས་འཛིན་སྟངས་ཐོག་ཁྱད་པར་འགྲོ་སྲིད་དམ། ཀྲུག་ཡོང་ཁང་དེ་བོད་མི་ཚོར་ཉེས་རྡུང་མནར་གཅོད་གཏོང་མཁན་ཞིག་དང་སྤྲུལ་སྐུ་བདེན་འཛིན་བདེ་ལེགས་འཛྀན་བཟུང་དང་བློ་བཟང་དོན་གྲུབ་སྲོག་ཐོག་ལ་གཏོང་མཁན་བྱེད་གཏེ་དེ་ཡིན་རབས་འདུག་པ་དེ་དག་བདེན་པ་ཡིན་ནམ།

    Reply
  4. དུག་མདུང་རྩེ་དགུ། says:
    ལོ་ 12 སྔོན།

    བཙན་བྱོལ་ནང་དུ་རྒྱ་ནག་གི་ཆབ་སྲིད་དང་མཐོ་རིམ་དཔོན་རིགས་བར་གྱི་འགལ་ཟླ་ལག་མཐིལ་དུ་ལེན་ཐུབ་མཁན་ཁྱེད་གཅིག་བུ་རེད་ཅེས་བརྗོད་ཀྱང་རྫུན་དུ་མི་འགྲོ་སྙམ། བཀའ་དྲིན་ཆེ་མྱི་སྐམ་པོ།

    Reply
  5. རྣམ་རྒྱལ་ཚེ་རིང་། says:
    ལོ་ 12 སྔོན།

    ངས་གནས་ཚུལ་འདིའི་སྐོར་ལ་སྔོན་མ་ནས་དོ་སྣང་བྱས་བསྡད་ཡིན། འོན་ཀྱང་ད་དུང་གསལ་བོ་ཞིག་ཆགས་ཐུབ་མ་སོང་། རབ་བྱུང་ན་རྩོམ་ཡིག་འདི་འདྲི་མཁན་དང་རྒྱ་ནག་གི་སྐོར་ལ་རྒྱུས་མངའ་ཆེན་པོ་ཡོད་མཁན་ཞིག་གིས་གསལ་བཤད་ཅིག་གནང་རོགས། པའོ་ཞི་ལེ་དང་ཀྲུག་ཡོང་ཁང་ཅིང་ཙེ་མིན་སོགས་ཤོག་ཁག་ཅིག་ཡིན་པ་འདྲ། ཧུའུ་ཅིན་ཐའོ་དང་ཞི་ཅིན་ཕིན། ཝུན་ཅ་པོ་སོགས་ཤོག་ཁག་ཅིག་ཡིན་པ་འདྲ། ལྐོག་ཟ་རུལ་སུངས་དང་དབང་ཆ་སྒེར་སྤྱོད། ཁྲིམས་འགལ་ཉེས་བསགས་ཕུད། ཆབ་སྲིད་ལྟ་གྲུབ་ཀྱི་ཐད་ནས་ཁོང་ཅག་གི་བར་དུ་ཁྱད་པར་གང་དག་ཡོད་པ་རེད། དེ་སྔོན་པའོ་ཞི་ལེ་ཡིས་རྒྱ་ནག་དམར་ཤོག་གི་རླབས་ཆེན་དབུ་ཁྲིད་མའོ་ཙི་ཏུང་གི་ལྟ་གྲུབ་ཁྱབ་སྤེལ་བྱས་པ་རེད་ཟེར་བ་ཞིག་གསར་འགྱུར་ནང་སླེབས་སོང་། དེའི་རྒྱུ་མཚན་དང་ཤུགས་རྐྱེན་སོགས་ག་རེ་ཡོད་པ་རེད། རྒྱ་ནག་གཞུང་གི་ཆབ་སྲིད་སྒྲོལ་གཞིའི་ཐོག་ཤོག་ཁག་འདི་གཉིས་ལ་མ་འདྲ་བ་ཆ་དང་གུ་ཡངས་ལུགས་ཁྱད་པར་གང་དག་ཡོད་པ་རེད། གོང་གསལ་མི་སྣ་དེ་དག་མ་ཡིན་པའི་རྒྱ་ནག་གི་དབུ་ཁྲིད་ཟུར་པ་ཁག་དང་། ད་ལྟའི་ཆབ་སྲིད་སྡེ་ཚན་ནང་གི་རྒྱུན་ལས་མི་སྣ་བདུན་གྱི་ལངས་ཕྱོགས་གང་འདྲ་ཡིན་པ་དང་ཤོག་ཁག་དེ་གཉིས་གང་དག་ལ་འབྲེལ་བ་དང་རྗེས་འབྲང་བྱེད་ཀྱི་ཡོད་དམ། ངའི་དྲི་བ་དང་དོགས་གནས་འདི་དག་ལ་གསལ་བཤད་ལན་འདེབས་གསལ་བོ་ཞིག་ཡོང་བ་ཞུ།།།

    Reply
  6. ཐང་སྐོར་བསོད་ནམས། says:
    ལོ་ 12 སྔོན།

    རྩོམ་ཡིག་འདི་མར་ཀློག་ཡོང་སྐབས་བྲོ་བ་ཆེན་པོ་འདུག མཇུག་ཏུ་མུ་འགོད་ཅེས་བྲིས་ཡོད་པ་དེ་མཐོང་སྟེ་ལྷག་ཏུ་དགའ་སོང་། རྒྱ་ནག་དབུས་གཞུང་གི་མགོ་ཁྲིད་ཚོའི་གསང་པའི་སྐོར་མང་ཙམ་སྤེལ་ཐུབ་ན་ང་དང་ང་འདྲ་བ་ཚོར་ཕན་ཐོགས་ཆེན་པོ་འདུག མ་གཞི་དེང་སྐབས་བོད་ཀྱི་དུས་བབ་ཀྱི་ཁ་ཕྱོགས་གཞི་རྒྱ་ཆེ་རུ་ཕྱིན་སོང་། བོད་སྐད་བོད་ཡིག་ལས་མི་ཤེས་མཁན་ཚོར་རྒྱལ་སྤྱིའི་ཐོག་གི་གནས་ཚུལ་གལ་ཆེན་ཁག་ཕལ་ཆེར་ཆད་ལུས་མེད་པར་གསལ་བོར་ལྟ་ཀློག་ཐུབ་པ་ཆགས་སོང་། རྩོམ་སྒྲིག་པ་དང་གསར་འགོད་པ་ལྷན་རྒྱས་ལ་ཐུགས་རྗེ་ཆེ་ཞུ་བཞིན་ཡོད།

    Reply
  7. བདེ་རྒྱལ། says:
    ལོ་ 12 སྔོན།

    རྩོམ་ཡིག་བཟང་། རང་རེའི་ཁྲོད་རྩོམ་ཡིག་སྣ་ཚོགས་སྤེལ་མཁན་དགོས། ཚང་མ་ནས་བློ་སྐྱེད་དང་གོ་རྒྱ་སྐྱེད་རྒྱུ་ཡོད། ཀྲུག་ཡཱང་ཁང་ནི་རྒྱ་ནག་གི་དམར་ཤོག་དཔོན་རིགས་ཁྲོད་གཡོན་ཐལ་ཆེ་བའི་ཕྱོགས་ཁག་གི་དཔོན་རིགས་གྲས་རེད། མི་འདིས་སི་ཁྲོན་དམར་ཤོག་དྲུང་ཆེའི་སྐབས། མཁན་པོ་འཇིགས་མེད་ཕུན་ཚོགས་དང་། སྤྲུལ་སྐུ་བསྟན་འཛིན་བདེ་ལེགས། དགེ་བཤེས་བསོད་ནམས་ཕུན་ཚོགས་བཅས་ལ་ནག་མེད་ཉེས་འགལ་བྱས་ཤིང་། བོད་རྩ་མེད་བཟོ་རྒྱུའི་འདུན་པ་ཡོད་པ་རེད། ད་དངོས་ནས་ལས་འབྲས་འཁོར་འདུག

    Reply
  8. ཕུན་ཚོགས་རྣམ་རྒྱལ། says:
    ལོ་ 12 སྔོན།

    དངོས་གནས་དྲང་གནས་དབྱེ་ཞིབ་རྩོམ་ཡིག་ཡག་པོ་བྲིས་གནང་འདུག ང་ཚོ་བོད་པའི་སྤྱི་ཚོགས་ནང་རྩོམ་ཡིག་འདི་འདྲ་བོ་དགོས་ཀྱི་འདུག ནམ་རྒྱུན་སོ་སོའི་ཚོར་བ་དང་སྒྲུང་རིང་པོ་ཤོད་སྡོད་པ་ལས་སྐད་ཡིག་གཞན་པའི་ནང་གི་རྩོམ་ཡིག་དང་གནས་ཚུལ་ཁག་ལ་དབྱེ་ཞིབ་རང་བཞིན་གྱི་རྩོམ་ཡིག་འབྲི་འགོད་བྱ་རྒྱུ་ཧ་ཅང་གལ་ཆེན་པོ་རེད།

    Reply

དཔྱད་མཆན་སྤེལ། Cancel reply

Your email address will not be published. Required fields are marked *

སྤྱི་ཚོགས་དྲ་གནས།

ཁྱབ་བསྒྲགས།

དྲ་ངོས་ཀྱི་གནས་ཚུལ་ཚང་མའི་པར་དབང་བོད་ཀྱི་དུས་བབ་ལ་ཡོད།

གློག་འཕྲིན།

editor@tibettimes.net | office@tibettimes.net

ཁ་པར།

+91-98823-47075 | +91-92189-38041 | +91-81972-44372

Welcome Back!

OR

Login to your account below

Forgotten Password?

Retrieve your password

Please enter your username or email address to reset your password.

Log In

Add New Playlist

No Result
ཆ་ཚང་གཟིགས།
  • གསར་འགྱུར།
    • ༸གོང་ས་མཆོག གསར་འགྱུར།
    • བཙན་བྱོལ།
    • བོད་ནང་།
    • རྒྱལ་སྤྱི།
    • རྒྱ་ནག
    • ༧གོང་ས་མཆོག གསུང་འཕྲིན།
  • རྩོམ་ཡིག།
    • བསམ་ཚུལ།
    • སྒྱུར་རྩོམ།
  • བརྙན་མཛོད།
    • གླེང་མོལ།
    • མེ་ལོང་།
    • ང་ཡི་བཙན་བྱོལ་བ།
    • གངས་ཕྲུག
    • དྲ་བརྙན་གསར་འགྱུར།
  • ཁྱབ་བསྒྲགས།
    • གླ་ཡོད་ཁྱབ་བསྒྲགས།
    • དུས་བབ་ཀྱི་གསལ་བསྒྲགས།
    • གླ་ཡོད་རིན་གོང་།
  • པར་མཛོད།
    • ང་ཚོའི་པར།
    • གསང་འགྱུར་པར་རིས།
  • དཔེ་དེབ།
  • རྩོམ་སྒྲིག་པའི་གཏམ།
  • ང་ཚོའི་སྐོར།
    • བོད་ཀྱི་དུས་བབ་ཀྱི་བྱུང་རིམ།
    • རྩ་ཆེའི་གསུང་འཕྲིན་ཁག
    • English
    • Chinese