གཟའ་ཟླ་བའི་ཉིན་ནས་བཟུང་བོད་མི་མང་སྤྱི་འཐུས་རྒྱན་ལས་རྣམ་པ་རྒྱ་གར་གྲོས་ཚོགས་ནང་གཟིགས་ཞིབ་དང་བོད་དོན་རྒྱབ་སྐྱོར་བ་ཚོར་ཐུག་འཕྲད་དུ་ཕེབས་ཡོད་འདུག
ཟླ་འདིའི་ཚེས་ ༡༠ ཉིན་བཞུགས་སྒར་དུ་༧གོང་ས་མཆོག་གིས་ནོར་སྤེལ་ཞི་བདེ་གཟེངས་རྟགས་བཞེས་ནས་མི་ལོ་ ༢༤ འཁོར་བའི་དུས་དྲན་སྲུང་གཙིའི་མཛད་སྒོ་མཇུག་སྒྲིལ་རྗེས། ལྡི་ལིར་རྟེན་གཞི་བྱས་ པའི་བོད་ཀྱི་གྲོས་ཚོགས་དང་སྲིད་བྱུས་ཉམས་ཞིབ་ཁང་གི་གོ་སྒྲིག་འོག བོད་ མི་མང་སྤྱི་འཐུས་རྒྱུན་ལས་རྣམ་པ་ལྡི་ལིར་ཕེབས་ཏེ་རྒྱ་གར་གྲོས་ ཚོགས་འོག་མའི་ནང་ཟུར་ཉན་དུ་བཅར་ཡོད་པ་དང༌། ཞོར་དུ་ལྡི་ལི་གྲོང་ཁྱེར་སྤྱི་ཁྱབ་ བློན་ཆེན་དང་གྲོས་ཚོགས་འཐུས་མི། བོད་དོན་རྒྱབ་སྐྱོར་བ་ཚོར་མཇལ་འཕྲད་གནང་ སྟེ་བོད་མིའི་ལུས་མེར་བསྲེགས་གཙོས་བོད་ནང་གི་དངོས་ཡོད་ཛ་དྲག་གནས་སྟངས་ སྐོར་ལ་རྒྱབ་སྐྱོར་ཡོང་བའི་འབོད་སྐུལ་གནང་ཡོད་འདུག
གོང་གསལ་གནས་ཚུལ་སྐོར་གསར་འགོད་པས་སྤྱི་འཐུས་ཚོགས་དྲུང་སྟོབས་རྒྱལ་ལགས་སུ་བཅར་འདྲི་ཞུས་པར་ཁོང་གིས། དེང་སྐབས་རྒྱ་གར་གྱི་གྲོས་ཚོགས་འཚོགས་བཞིན་ཡོད་སྟབས། སྤྱི་འཐུས་རྒྱུན་ལས་རྣམ་པ་ཚོས་རྒྱ་གར་གྲོས་ཚོགས་ཀྱི་ལས་རིམ་ལ་ཐུགས་ཞིབ་གནང་རྒྱུ་གཙོ་བོ་རེད། སྤྱིར་བཏང་གསར་འགྱུར་བརྒྱུད་ལམ་ཁག་ནས་རྒྱ་གར་གྲོས་ཚོགས་ཀྱི་ལས་རིམ་དང་རྣམ་པ་སོགས་མཐོང་བསྡད་ཡོད་ཀྱང༌། ད་རེབ་སྤྱི་འཐུས་རྒྱུན་ལས་རྣམ་པ་དངོས་སུ་རྒྱ་གར་གྲོས་ཚོགས་ནང་ཕེབས་ཏེ། གྲོས་ཚོགས་ཀྱི་ལས་རིམ་ཆ་ཚང་ལ་གཟིགས་ཞིབ་གནང་བ་ཡིན་ན། གནད་འགག་མ་འདྲ་བ་མང་པོ་ཞིག་རྟོགས་ཡོང་གི་ཡོད་སྟབས། ཐེངས་འདིར་ཆེད་དུ་བསྐྱོད་པ་རེད། ཞོར་དུ་གྲོས་ཚོགས་འཐུས་མི་རྣམ་པ་དང་ལྡི་ལི་གྲོང་ཁྱེར་གྱི་སྤྱི་ཁྱབ་བློན་ཆེན། དེ་བཞིན་བློན་ཆེན་གཞན་དག བོད་དོན་རྒྱབ་སྐྱོར་མི་སྣ་སོགས་ལ་ཐུགས་འཕྲད་གནང་སྟེ། བོད་ནང་གི་ཛ་དྲག་གནས་སྟངས་དང་ལྷག་པར་ད་ལྟའི་ཆར་བོད་མིས་རང་ལུས་མེར་བསྲེགས་བྱེད་བཞིན་པའི་གནས་སྟངས་ངོ་སྤྲོད། དེ་བཞིན། བོད་དོན་རྒྱབ་སྐྱོར་ཡོང་བར་འབོད་སྐུལ་ཞུ་བཞིན་ཡོད་པ་རེད་ཅེས་སོགས་བརྗོད་སོང༌།
སྟོབས་རྒྱལ་ལགས་ཀྱིས་ངོ་སྤྲོད་གནང་བ་ལྟར་ན། ཐེངས་འདིར་སྤྱི་འཐུས་རྒྱུན་ལས་རྣམ་པ་ལྡི་ལི་མཐོ་སློབ་ནང་སློབ་གཉེར་བྱེད་པའི་བོད་པའི་སློབ་ཕྲུག་ཚོར་ཐུག་འཕྲད་བགྲོ་གླེང་གནང་ཡོད་འདུག སྤྱི་འཐུས་རྒྱུན་ལས་རྣམ་པའི་ལྡི་ལི་ཁུལ་གྱི་ལས་རིམ་གྲུབ་རྗེས་དེ་རིང་ཕྱིར་བཞུགས་སྒར་དུ་ལོག་ཡོད་འདུག
རེད་ཡ། བོད་པའི་ཆོས་དང་རིག་གཞུང་ཕལ་ཆེར་གྱི་མིག་དཔེ་བལྟ་ས་དང་། ནང་འདྲེན་བྱེད་གཞི་གཙོ་བོ་དེ་རྒྱ་གར་གྱི་གདོད་མའི་རིག་གནས་དག་ཆགས་ཡོད། དེང་སྐབས་འཛམ་གླིང་མིའི་རིགས་ཀྱི་ཆབ་སྲིད་ཐོག་རེ་འདུན་དང་དགའ་མོས་ཆེ་ཤོས་བྱ་ཡུལ་ནི། ནུབ་ཕྱོགས་མི་རིགས་ཀྱིས་གསར་གཏོད་བགྱིས་པའི་མང་གཙོའི་རིང་ལུགས་རེད།
མང་གཙོའི་རིང་ལུགས་ཚད་ལྡན་ཚ་ཤོས་སམ་མི་དམངས་ལ་ཐོབ་ཐང་མང་ཤོས་ཡོད་པའི་རྒྱལ་ཁབ་ཀྱང་ད་ལྟའི་ཆར་རྒྱ་གར་བ་ཡིན་པར་གྲགས། དེ་ཕྱིར་བོད་མི་དམངས་སྤྱི་འཐུས་རྣམ་པས་རྒྱ་གར་གྲོས་ཚོགས་སུ་གཟིགས་ཞིབ་བམ་ཉམས་མྱོང་ལེན་པར་ཕེབས་པ་ནི་འོས་ཤིང་འཚམས་པ་ཞིག་རེད་སྙམ། ཡིན་ནའང་ད་ཆ་རྒྱ་གར་བས་མིག་དཔེ་བལྟ་ས་དང་ཆ་འཇོགས་བྱ་ཡུལ་གཙོ་བོ་ནི། ཤེས་ཡོན་གྱི་རྩ་བ་བརྟན་པོར་ཚུགས་ཤིང་གསར་གཏོད་གྱི་ཡལ་འདབ་རབ་ཏུ་རྒྱས་ལ་དཔལ་འབྱོར་གྱི་མེ་ཏོག་རྣམ་པར་བཀྲ་བའི་ཨ་རི་དང་དབྱིན་ཡུལ་གྱི་མཚོན་པའི་ནུབ་ཕྱོགས་རྒྱལ་ཁབ་དག་རེད། དེས་ན་ང་ཚོས་མིག་དཔེ་བལྟ་ས་དང་གུས་བཀུར་ཞུ་ཡུལ་རྒྱལ་ཁབ་ཆེན་པོ་དེ་ནི་འཛམ་གླིང་ཁྲོད་གོམས་གང་རྗེས་ལུས་ཆགས་པའི་རྒྱལ་ཁབ་ཞིག་རེད། རྒྱུ་མཚན་དེ་ལ་བལྟོས་ན་ང་ཚོ་བོད་རིགས་ཀྱང་དེ་བས་རྗེས་ལུས་ཆགས་རྒྱུ་མ་ཟད། ལྐོག་ཟ་རུལ་སྲུང་ལ་དགའ་བའི་མི་རིགས་དང་རྒྱལ་ཁབ་ཞིག་ཏུ་འགྱུར་མི་སྲིད་པ་ག་ལ་ཡིན། ད་དུང་དེ་བས་ཡིད་སྐྱོ་བ་ཞིག་ལ་རང་གི་ཕ་སྐད་ཐོག་དེང་རབས་ཀྱི་རིག་གསར་སྟེ། ཚན་རིག་དང་མཐུན་པའི་ཤེས་ཡོན་དང་དཔལ་འབྱོར་འཕེལ་རྒྱས་གཏོང་མ་ཐུབ་པར་རྐང་པ་ཆག་པའི་མི་དང་འདྲ་བར་དབྱིན་སྐད་དང་དབྱིན་ཡིག་གི་གཞན་དབང་འོག་འཚོ་གནས་བྱེད་པའི་གནས་སྟངས་ནི་ངོ་མ་ངོ་གནོངས་དགོས་པ་ཞིག་རེད། འདི་ལྟར་བསམས་ན་བདེན་པ་ཉིད་རྒྱལ་བའི་མིག་དཔེ་དང་དཔུང་གྲོགས་སུ་འགྱུར་མི་སྲིད་པ་མ་ཟད། རང་གི་ཕ་སྐད་ལའང་མཐོང་ཆུང་བྱེད་མཁན་གྱི་རྒྱལ་འབངས་ཐབས་སྡུག་ཤོས་གྲས་སུ་འགྱུར་ཡང་སྲིད་པས། ངེས་པར་དུ་བསམ་བློ་གཟབ་གཟབ་གཏོང་དགོས་པར་མཐོང་།།