རྡོར་གདན་སྔ་འགྱུར་རྙིང་མའི་སྨོན་ལམ་ཆེན་མོ་བགྲང་བྱ་ཉེར་ལྔ་འཁོར་བའི་དུས་དྲན་སྲུང་བརྩི་ཞུ་ཕྱོགས་གསལ་བསྒྲགས།
ད་ལན་བསྐལ་བཟང་སངས་རྒྱས་སྟོང་རྩ་མངོན་པར་འཚང་རྒྱ་བའི་གནས་མཆོག་འཕགས་ཡུལ་རྡོ་རྗེ་གདན་དུ་༸གོང་ས་༸སྐྱབས་མགོན་ཆེན་པོ་མཆོག་གི་དབུས་སྔ་འགྱུར་བའི་བླ་ཆེན་རྣམ་པས་ཐུགས་བསྐྱེད་དང་། སྔ་འགྱུར་རྙིང་མའི་དགོན་སྡེ་ཁག་གིས་བསྟན་པ་སྤྱི་བྱེ་ལ་ལྷག་བསམ་དང་འགན་ཁུར་ཆེ་བཞེས་གནང་བའི་དྲིན་དང་། དད་ལྡན་སྦྱིན་པའི་བདག་པོ་རྣམས་ཀྱི་མཐུན་འགྱུར་བླ་མེད་ཀྱིས་བསྐྲུན་པར་མཛད་པའི་རྡོར་གདན་རྒྱལ་ཡོངས་སྔ་འགྱུར་རྙིང་མའི་སྨོན་ལམ་ཆེན་མོ་དབུ་ཚུགས་ནས་དེང་གི་སྲོལ་ལྟར་བགྲང་བྱ་ཉེར་ལྔ་འཁོར་བའི་དུས་དྲན་སྲུང་བརྩི་ཞུ་རྒྱུ་ཕྱི་ལོ་ ༢༠༡༤ ཟླ་ ༡ ཚེས་ ༣༡ ནས་ཟླ་ ༢ ཚེས་ ༡༠ བར་དང་། བོད་ཟླ་ ༡༢ ཚེས་ ༡ ནས་ ༡༡ བར་འདི་ལོར་ཉིན་གྲངས་ ༡༡ རིང་སྨོན་ལམ་ཚོགས་རྒྱུ་དང་། དུས་དྲན་སྲུང་བརྩི་ཞུ་རྒྱུ། སྐབས་དེར་ནང་རྟེན་རྩ་ཆེན་རིགས་མཇལ་ཁ་གནང་རྒྱུ། བོད་ཚེས་ ༧ ཉིན་སྔ་འགྱུར་རྙིང་མའི་དབུ་འཛིན་༸སྐྱབས་རྗེ་སྟག་ལུང་རྩེ་སྤྲུལ་རིན་པོ་ཆེ་མཆོག་གིས་སེར་སྐྱ་ཡོངས་ལ་ཚེ་དབང་བཀའ་དྲིན་ཆེ་རྒྱུ་བཅས་ཀྱི་ལས་རིམ་རགས་ཟིན་སྒྲིག་ཟིན་ན། སྔ་འགྱུར་བའི་བླ་ཆེན་༸སྐྱབས་རྗེ་རིན་པོ་ཆེ་མཆོག་རྣམ་ཚོགས་མགོན་ཕེབས་བཞུགས་བཀའ་དྲིན་སྐྱབས་འཇུག་ཞུ་རྒྱུ་དང་། དགེ་འདུན་སྡེ་གཉིས་སོགས་མང་ཚོགས་དད་གཉེར་ཅན་རྣམས་ཕེབས་འདུན་ཡོད་རིགས་ཀུན་གྱིས་དེ་དོན་དགོངས་འཇགས་གནང་སྐྱོང་ཡོང་བ་འཚལ།
རྡོར་གདན་སྔ་འགྱུར་རྙིང་མའི་སྨོན་ལམ་གོ་སྒྲིག་ཚོགས་པས་ཕྱི་ལོ་ ༢༠༡༣ ཟླ་ ༡༢ ཚེས་ ༡༧ ལ།།
