ཁམས་ཡུལ་ཤུལ་ནང་ཆེན་ཇ་པ་དགོན་པའི་དགེ་འདུན་པ་ཚོས་དགེ་རྒན་དཀར་ཚེ་ཀློད་གྲོལ་གཏོང་དགོས་པའི་རེ་སྐུལ་འོག་འཕྲེད་དར་སྣ་ཚོགས་འཕྱར་ཏེ་གཞུང་ལ་ཞུ་འབོད་བྱེད་བཞིན་ཡོད་འདུག
རྒྱ་ནག་གཞུང་གིས་ཟླ་སྔོན་མའི་ཕྱི་ཚེས་ ༢༩ ཉིན་འཛིན་བཟུང་བྱས་པའི་ཡུལ་ཤུལ་ནང་ཆེན་སྟག་སྣ་དགོན་པའི་མཁན་པོ་འགྱུར་མེད་དང་། ཟླ་འདིའི་ཚེས་ ༦ ཉིན་འཛིན་བཟུང་བྱས་པའི་ཇ་པ་དགོན་པའི་མཁན་པོ་དཀར་ཚེ་གཉིས་ཀློད་གྲོལ་ཡོང་བར་དགོན་པ་དགེ་འདུན་པ་དང་མང་ཚོགས་ཚོས་སྔ་ཕྱི་ཐེངས་མང་པོར་རྒྱ་ནག་གཞུང་ལ་ཞུ་འབོད་བྱེད་ཀྱི་ཡོད་འདུག
ཁོང་གཉིས་འཛིན་བཟུང་བྱེད་དོན་ནུ། མཁན་འགྱུར་མེད་ལགས་ཀྱིས་ཉེ་ལམ་བཀའ་བརྒྱུད་སྨོན་ལམ་ཆེན་མོའི་སྟེང་མང་ཚོགས་ལ། བོད་ཀྱི་ཆོས་དང་རིག་གཞུང་སྲུང་སྐྱོབ་དང་། མི་རིགས་ཀྱི་ལ་ཞེན་གོང་མཐོར་གཏོང་དགོས་པའི་སྐོར་གྱི་བཀའ་སློབ་གནང་བ་དེ་ཆབ་སྲིད་ཀྱི་ནག་ཉེས་སུ་བརྩིས་པ་ཞིག་ཡིན་པ་དང་། མཁན་པོ་དཀར་ཚེ་ལགས་ཀྱིས་ཆབ་མདོའི་ཀ་མ་དགོན་པའི་དོན་རྐྱེན་དང་འབྲེལ་བ་ཡོད་པར་དོགས་གཞི་བྱས་པ་ཞིག་ལ་མང་ཚོགས་ཀྱིས་ཚོད་དཔག་བྱེད་ཀྱིན་ཡོད་འདུག
