གསར་འགྱུར་བརྒྱུད་ལམ་འཚེ་བ་མེད་པའི་འཐབ་རྩོད་ཀྱི་ལག་ཆ་གལ་ཆེན་ཞིག་རེད།

དེ་རིང་བོད་མིའི་སྒྲིག་འཛུགས་སྲིད་བྱུས་ཉམས་ཞིབ་ཁང་གི་གོ་སྒྲིག་འོག་བོད་པའི་གསར་ཁང་ཁག་གི་རྩོམ་སྒྲིག་པ་ཚོས་བོད་དོན་འཐབ་རྩོད་དང་གསར་འགྱུར་བརྒྱུད་ལམ་ཁག་གི་ལས་འགན་དང་གསར་འགྱུར་ཁྱབ་སྤེལ་བྱེད་ཕྱོགས་སྐོར་ལ་བགྲོ་གླེང་གནང་སོང་།

དེ་རིང་སྔ་དྲོའི་ཆུ་ཚོད་ ༩།༠༠ པའི་སྟེང་གངས་སྐྱིད་ཕྱི་དྲིལ་ལྷག་པ་ཚེ་རིང་ཚོགས་ཁང་དུ། བོད་ཀྱི་སྲིད་བྱུས་ཉམས་ཞིབ་ཁང་གི་གོ་སྒྲིག་འོག ངྷ་རམ་ས་ལའི་གསར་ཁང་ཁག་གི་རྩོམ་སྒྲིག་པ་དང་ཉམས་ཞིབ་སྡེ་ཚན་ཁག་གི་ཉམས་ཞིབ་པ་བཅས་ཀྱིས། བོད་མིའི་འཐབ་རྩོད་དང་གསར་འགྱུར་བརྒྱུད་ལམ་ཞེས་པའི་བརྗོད་གཞིའི་ཐོག་བགྲོ་གླེང་ཞིག་ཚོགས་ཡོད་ཅིང་། ཚོགས་འདུའི་ཐོག་གཏམ་བཤད་པ་རྣམ་པ་དང་ཟུར་ཉན་ཚོགས་ཞུགས་པ་བཅས་ཀྱི་བར། བོད་པའི་གསར་འགོད་པ་ཞིག་ལ་མཚོན་ན་དྲང་བདེན་ཅི་ཙམ་གལ་ཆེན་ཡིན་མིན་དང་། བོད་དོན་འཐབ་རྩོད་དང་། དྲང་བདེན་གཉིས་ལས་གང་ཞིག་འདེམས་དགོས་པ། བོད་པའི་གསར་ལམ་ཁག་དང་བོད་མིའི་སྒྲིག་འཛུགས་བར་གྱི་འབྲེལ་འདྲིས་དང་ཕན་ཚུན་ལ་ཞོག་འདེགས་བྱེད་ཕྱོགས། བཙན་བྱོལ་ནང་གི་གསར་ལམ་ཁག་གིས་བོད་ནང་ལ་འགན་འཁུར་ལེན་དགོས་པ་བཅས་ཀྱི་ཐོག་དྲི་བ་དྲིས་ལེན་གྱི་རྣམ་པའི་རྩོད་པ་མང་ཙམ་བྱུང་སོང་།  

བགྲོ་གླེང་དབུ་འཛུགས་སྐབས་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཐུབ་བསྟན་བསམ་འཕེལ་ལགས་ཀྱིས་བགྲོ་གླེང་ངོ་སྤྲོད་གནང་བར། ང་ཚོས་བགྲོ་གླེང་འདི་གོ་སྒྲིག་བྱེད་དོན་ནི། བཙན་བྱོལ་བོད་པའི་གསར་འགྱུར་བརྒྱུད་ལམ་གྱི་ལས་དོན་འཕེལ་རྒྱས་དང་འཕོ་འགྱུར་འགྲོ་བཞིན་ཡོད་པ་དང་། ལྷག་པར་དུ་བོད་པའི་གསར་ལམ་ཁག་གི་སྐད་སྒྲའི་ནུས་ཤུགས་ཆེ་རུ་ཇི་ལྟར་གཏོང་དགོས་མིན་སྐོར་ལ་རྩོམ་སྒྲིག་པ་རྣམ་པས་དཔྱད་བསྡུར་གནང་སའི་སྡིངས་ཆ་ཞིག་བསྐྲུན་ཆེད་ཡིན་པ་དང་། བཙན་བྱོལ་ནང་ཡོད་པའི་བོད་པའི་གསར་ལམ་ཁག་གིས་བོད་པའི་རྩ་དོན་ཐོག་གྲུབ་འབྲས་ཆེན་པོ་བླངས་ཡོད། དེའི་ལོ་རྒྱུས་དང་འཕེལ་རྒྱས་བྱུང་སྟངས་སྐོར་ལ་བགྲོ་གླེང་ཚོགས་ཏེ་ཡིག་ཐོག་ནས་བསྐྱར་ཞིབ་བྱེད་ས་ཡོད་པ་ཞིག་བྱེད་རྒྱུ་དང་། དེང་སང་རླུང་འཕྲིན་དང་བརྙན་འཕྲིན། གསར་ཤོག དྲ་རྒྱ་སོགས་བརྒྱུ་ལམ་རྒྱ་ཆེན་པོ་དང་སྣ་མང་པོ་ཡོད་པ་དེ་དག་གིས་གནས་ཚུལ་མང་པོ་སྤུངས་བཞིན་ཡོད་ཅིང་། དཔེར་ན། བོད་མི་མང་སྤྱི་འཐུས་གྲོས་ཚོགས་ཀྱིས་བགྲོ་གླེང་གང་གནང་བ་བརྙན་འཕྲིན་ནང་ཐད་ཀར་རྒྱང་སྲིང་བྱེད་བཞིན་ཡོད། དེའི་དབང་གིས་བོད་མིའི་སྤྱི་ཚོགས་ཀྱི་བར་ཐག་ཇེ་ཉེར་འགྲོ་བཞིན་ཡོད། ང་རང་གི་ངོས་ནས་བོད་པའི་གསར་འགྱུར་བརྒྱུད་ལམ་ཁག་ནི་འཚེ་བ་མེད་པའི་སྒོ་ནས་བོད་ཀྱི་བདེན་དོན་འཐབ་རྩོད་བྱེད་པའི་ལག་ཆ་གལ་ཆེན་ཞིག་ཏུ་རྩི་བཞིན་ཡོད། དེང་སང་དྲང་བདེན་དང་སྟོབས་ཤུགས། རལ་གྲི་དང་སྨྱུག་གུའི་བར་གྱི་འཐབ་རྩོད་འགྲན་བསྡུར་བྱེད་པའི་དུས་སྐབས་འདིར། སྨྱུག་གུར་སྟོབས་ཤུགས་ཆེན་པོ་ཡོད་པ་ངེས་པར་གསལ་སྟོན་ཐུབ་པ་ལ་ང་ཚོས་འབད་བརྩོན་བྱེད་དགོས་ཞེས་བརྗོད་སོང་།

དེའི་རྗེས་སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག་གིས། རྒྱ་ནག་ནང་ལྟ་བུར་མཚོན་ན་གསར་འགྱུར་བརྒྱུད་ལམ་ཁག་ཚང་མ་གཞུང་འབྲེལ་ཤ་སྟག་ཆགས་ཡོད་ལ། དེ་དག་གིས་གཞུང་གི་ལྟ་བ་ལངས་ཕྱོགས་ཁྱབ་བསྒྲགས་བྱེད་ཀྱིན་ཡོད། གསར་འགོད་པ་དང་རྩོམ་པ་པོ་སུ་ཞིག་ཡིན་ཡང་རང་དབང་ལྡན་པའི་ཐོག་ནས་དཔེ་དེབ་དཔར་སྐྲུན་དང་གསར་འགྱུར་ཁྱབ་སྤེལ་བྱེད་ཆོག་གི་ཡོད་པ་མ་རེད། དེར་མ་ཟད་རྒྱལ་སྤྱིའི་ཐོག་སྐད་དྲག་ཡོད་པའི་ཚགས་པར་དང་དུས་དེབ། བརྙན་འཕྲིན་དང་རླུང་འཕྲིན་སོགས་གཅིག་ཀྱང་རྒྱ་ནག་ནང་ཡོང་འཇུག་གི་ཡོད་པ་མ་རེད། ང་ཚོ་བཙན་བྱོལ་བོད་པའི་སྤྱི་ཚོགས་ལ་མཚོན་ན། བཅའ་ཁྲིམས་ནང་གཏམ་བརྗོད་དང་བགྲོ་གླེང་། ཚགས་ཤོག་དུས་དེབ་སོགས་རང་དབང་གིས་འདོན་སྤེལ་ཆོག་གི་ཡོད་ཅེས་བཀོད་ཡོད་པ་རེད། འོན་ཀྱང་དེ་དང་མཉམ་དུ་འགན་འཁུར་ཡང་ཆེན་པོ་ཡོད་པ་རེད་དྲན་གྱི་འདུག་ཅེས་གསུངས་སོང་།

བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱལ་ལྟེ་གནས་ཁང་གི་འགན་འཛིན་ཚེ་རིང་མཚོ་མོ་ལགས་ཀྱིས། གྲང་དམག་གི་དུས་ཡུན་རྫོགས་རྗེས། འགྲོ་བ་མིའི་ཐོབ་ཐང་གི་གནད་དོན་སྐོར་རྒྱལ་སྤྱིའི་ཁྲིམས་ནང་གསར་བ་ཆགས་པ་རེད། དེང་སང་རྒྱལ་སྤྱིའི་ནང་འགྲོ་བ་མིའི་ཐོབ་ཐང་གི་གཞི་རྩའི་རྩ་ཁྲིམས་ཤུགས་ཆེན་པོ་འགྲོ་བཞིན་ཡོད་སྟབས། རྒྱལ་སྤྱིའི་ནང་གི་གསར་འགོད་པ་ཚོས་འགྲོ་བ་མིའི་ཐོབ་ཐང་གི་གནད་དོན་སྐོར་ལ་དོ་སྣང་ཤུགས་ཆེ་རུ་འགྲོ་རྒྱུ་རེད། དེའི་སྐོར་འགྲོ་བ་མིའི་ཐོབ་ཐང་ཉམས་ཞིབ་པ་དང་གསར་འགོད་པ་མཉམ་རུབ་གྱིས་བཏོན་པའི་སྙན་ཐོ་ཡག་པོ་དེ་འདྲའི་ནང་མཐོང་སོང་། རྒྱལ་ཁབ་མང་པོ་ཞིག་གིས་སོ་སོའི་རྩ་ཁྲིམས་ནང་འགྲོ་བ་མིའི་ཐོབ་ཐང་སྐོར་སྐོར་མ་བཞག་རང་བཞག་ཆགས་ཡོད་པ་རེད། སྔོན་མ་གནས་ཚུལ་ཞིག་ཐོན་པ་ཡིན་ན། འགྲོ་བ་མིའི་ཐོབ་ཐང་ཚོགས་པས་ལམ་སང་གསར་འགྱུར་བརྒྱུད་ལམ་ཁག་ལ་མཁོ་སྤྲོད་བྱེད་ཀྱི་ཡོད་པ་རེད། ཕྱིས་སུ་རྒྱལ་སྤྱིའི་ནང་འགྲོ་བ་མིའི་ཐོབ་ཐང་སྐོར་གྱི་ལས་ཀ་བྱེད་སྟངས་ལ་འགྱུར་བ་ཕྱིན་འདུག དེང་སང་གསར་འགོད་པ་ཚོས་འགྲོ་བ་མིའི་ཐོབ་ཐང་སྐོར་ལ་དོ་སྣང་ཆེན་པོ་བྱེད་དུས་གནས་ཚུལ་དང་པོ་གསར་འགོད་པས་འདོན་གྱི་ཡོད་པ་རེད། བཙན་བྱོལ་ནང་ཆ་བཞག་ན་གསར་འགོད་པས་གནས་ཚུལ་མང་པོ་ཞིག་བཏོན་ཐུབ་ཀྱི་ཡོད་པ་དེ་འདྲ་ཡིན་སྟབས། ད་ལྟའི་ཆར་དྲ་རྒྱ་དང་ངོ་དེབ་སོགས་ཀྱི་ནང་གནས་ཚུལ་གཅིག་ལ་གནས་ཚུལ་མང་པོ་ཆགས་དུས་གནས་ཚུལ་མང་དྲགས་པས་དཀའ་ངལ་མ་གཏོགས་ཉུང་དྲགས་པའི་དཀའ་ངལ་མི་འདུག དེ་འདྲ་ཡིན་དུས་གནས་ཚུལ་མང་པོ་ནང་ནས་གནས་ཚུལ་གང་ཞིག་བདེན་པ་ཡིན་མིན་གྱི་ཁུངས་འཚོལ་བར་དཀའ་ངལ་ཞིག་ཆགས་འདུག་ཅེས་བརྗོད་སོང་།

ཁོང་མོས་མུ་མཐུད་དུ། གསར་འགོད་པའི་རང་དབང་དེ་འགྲོ་བ་མིའི་ཐོབ་ཐང་ཞིག་ཆགས་ཀྱི་ཡོད། དཔེར་ན། འགྲོ་བ་མིའི་ཐོབ་ཐང་གི་ཡིག་ཆ་གང་ལ་བལྟས་ཀྱང་དེའི་ནང་གསར་འགོད་པའི་རང་དབང་དེ་ཧ་ཅང་གལ་ཆེན་པོ་ཞིག་དང་གཞི་རྩའི་ཐོབ་ཐང་ཞིག་ཏུ་རྩི་བཞིན་ཡོད་པ་མ་ཟད། རང་དབང་ཅན་གྱི་རྒྱལ་ཁབ་མང་པོ་ཞིག་གི་རྩ་ཁྲིམས་ནང་གསར་འགོད་པ་དང་གསར་ཤོག་གི་རང་དབང་གཉིས་གཞི་རྩའི་ཐོབ་ཐང་ལ་ངོས་འཛིན་གནང་ཡོད་པ་རེད། ང་ཚོ་གསར་འགོད་པས་གནས་ཚུལ་གཅིག་རང་བཀོད་ནས་སྡོད་པ་ཙམ་མ་ཡིན་པར་རྒྱལ་སྤྱིའི་ནང་གི་གསར་འགོད་པའི་རང་དབང་ལ་ལས་ཀ་བྱེད་མཁན་ཚོགས་པ་ཆེན་པོ་དེ་འདྲ་ཡོད། དཔེར་ན། རྒྱལ་མཚམས་མེད་པའི་གསར་འགོད་མཐུན་ཚོགས་དང་རྒྱལ་སྤྱིའི་གསར་འགོད་མཐུན་ཚོགས་སོགས་ལ་འབྲེལ་ལམ་བྱས་ཏེ་ལས་ཁུངས་ཟུར་འཛུགས་བྱ་རྒྱུ་གལ་ཆེན་པོ་བསམ་གྱི་ ཡོད་ཅེས་བརྗོད་སོང་།

དེའི་རྗེས་སུ་བོད་ཀྱི་གསར་འགོད་པའི་མཐུན་ཚོགས་ཀྱི་ཚོགས་གཙོ་ལྷག་པ་སྐྱིད་འཛོམས་ལགས་ཀྱིས་བཙན་བྱོལ་སྤྱི་ཚོགས་ནང་ཡོད་པའི་གསར་འགོད་མཐུན་ཚོགས་ཀྱི་ལས་ཀའི་ངོ་བོ་དང་དེའི་ནང་གསར་ཁང་གང་དག་ཡོད་མེད་སྐོར་ལ་འགྲེལ་བརྗོད་གནང་རྗེས། གསར་འགྱུར་གྱི་ཕྱག་ལས་གནང་སྟངས་དང་ཕྱི་རྒྱལ་ཁག་གི་གསར་འགོད་པས་བོད་ཀྱི་གནད་དོན་སྐོར་ལ་གནས་ཚུལ་འབྲི་སྐབས་ཁོང་ཚོར་མཉམ་དུ་འབྲེལ་ལམ་ཉར་རྒྱུ་གལ་ཆེན་ཡིན་པའི་སྐོར་བརྗོད་སོང་། དེ་ནས་རིམ་པ་བཞིན་བོད་ཀྱི་དུས་བབ་དང་བོད་ཀྱི་བང་ཆེན། ནོར་ཝེ་རླུང་འཕྲིན། ཕ་ཡུལ་དྲ་རྒྱ། བོད་ཀྱི་ཆ་འཕྲིན། བོད་མིའི་སྒྲིག་འཛུགས་ཀྱི་དབྱིན་ཡིག་དྲ་རྒྱ་བཅས་ཀྱི་རྩོམ་སྒྲིག་པ་རྣམ་པས་རིམ་པ་བཞིན་གཏམ་བཤད་སྤེལ་ཡོད།

གསར་འགོད་པ། ལྷ་སྐྱབས་རྒྱལ།