ངྷ་སའི་གནམ་གཤིས་ཇེ་འཁྱག་ཏུ་ཕྱིན།

མདང་ནུབ་མཚན་གང་བོར་བཞུགས་སྒར་ངྷ་རམ་ས་ལར་ཁ་ཆར་འདྲེས་མ་བབ་སྟེ་ད་ནང་ཞོགས་པར་ངྷ་སའི་སྟོད་ཕྱོགས་སུ་ཁ་བ་སྲབ་པོ་ཞིག་ཆགས་འདུག

ད་ལོའི་དགུན་ཁར་རྒྱ་གར་བྱང་ཕྱོགས་ངྷ་རམ་ས་ལ་ཁུལ་གྱི་གནམ་གཤིས་དེ་ཙམ་འཁྱག་རྒྱུ་མེད་པར་ཕྱི་ཟླ་ ༡༢ པའི་ཚེས་ ༢༠ ཙམ་བར་དྲོད་གྲང་སྙོམས་པོར་གནས་ཡོད་ཀྱང་། ཉིན་འགའི་སྔོན་ནས་གནམ་གཤིས་ལ་འགྱུར་བ་ཐེབས་ཏེ། ཁ་སང་ཉིན་གང་བོར་གནམ་རུབ་ཅིང་ཕྱི་དྲོའི་ཆུ་ཚོད་ ༥།༣༠ ཙམ་ནས་ཆར་བ་འབབ་མགོ་ཚུགས་སོང་ལ། མདང་ནུབ་མཚན་གང་བོར་ཁ་ཆར་འདྲེས་མ་བབ་ཡོད་པ་དང་། ལྷགས་རླུང་ཤུགས་ཆེན་གཡུགས་ཏེ་ད་ནང་ཞོགས་པར། ངྷ་རམ་ས་ལའི་རྒྱབ་རི་རྡོ་ལྰ་རྡར་རི་རྒྱུད་ཡོངས་ཁ་བས་གཡོགས་ཏེ་དཀར་སིང་ངེར་གྱུར་ཡོད་པ་མ་ཟད། ངྷ་རམ་ས་ལའི་ཟློས་གར་ལམ་དང་བྷག་སོའུ་ལམ། དེ་བཞིན་སྟོད་པ་དང་སྐྱིད་རོང་གྲོང་བཅས་སུ་ཡང་ཁ་བ་སྲབ་པོ་ཞིག་སར་ཆགས་འདུག

དེ་རིང་གནམ་གཤིས་ཧ་ཅང་འཁྱག་ཅིང་། མཚམས་རེར་ཆར་སིམ་འབབ་བཞིན་འདུག་ལ། ད་ནང་ཞོགས་པའི་ཆུ་ཚོད་ ༡༠།༠༠ སྟེང་ངྷ་རམ་ས་ལའི་དྲོད་ཚད་ 10°C ལ་མར་བབ་ཡོད་པ་དང་། གནམ་གཤིས་སྔོན་བརྡ་ལྟར་ན། དོ་ནུབ་ངྷ་ས་ཁུལ་གྱི་དྲོད་ཚད་ 5°C ལ་ཟེགས་ཏེ་དོ་ནུབ་དང་སང་ཉིན་བར་ཁ་བ་མཐུག་ཙམ་འབབ་སྲིད་པའི་ཚོད་དཔག་བྱས་འདུག