ཁ་སང་ཨི་ཇིབ་ཀྱི་མངའ་སྡེ་ཌ་ཁཱ་ལ་ཡཱའི་རྒྱལ་སའི་གྲོང་ཁྱེར་ཉེན་རྟོག་ཁང་དུ་འབར་གས་དོན་རྐྱེན་བྱུང་སྟེ་མི་ ༡༤ རྐྱེན་ལམ་དུ་ཕྱིན་ཡོད་པ་དང་མི་ ༡༣༠ ཙམ་ལ་རྨས་སྐྱོན་ཚབས་ཆེན་ཕོག་ཡོད་འདུག
ཁ་སང་དགོང་དྲོའི་ཆུ་ཚོད་ ༡༡།༡༠ ཐོག་ཨི་ཇིབ་ཀྱི་མངའ་སྡེ་ཌ་ཁཱ་ལ་ཡཱ་ (Dakahliya )ཡི་རྒྱལ་ས་མན་སུ་ར་ ( Mansoura) ནང་གི་གྲོང་ཁྱེར་ཉེན་རྟོག་སྤྱི་ཁྱབ་ལས་ཁུངས་ཀྱི་ཁང་བརྩེགས་སྒོ་ཁར་རླངས་འཁོར་ཞིག་ལ་འབར་གས་དོན་རྐྱེན་བྱུང་སྟེ་མི་ ༡༤ རྐྱེན་ལམ་དུ་ཕྱིན་ཡོད་པ་དང༌། གཞན། མི་ ༡༣༠ ལྷག་ལ་རྨས་སྐྱོན་ཚབས་ཆེན་ཕོག་ཡོད་འདུག འབར་གས་དེའི་ཤུགས་ཚད་ཧ་ཅང་ཆེ་སྟབས་ཉེ་འགྲམ་གྱི་ཁང་པ་དང་ཚོང་ཁང་སོགས་ཀྱི་སྒོ་དང་སྒེའུ་ཁུང་ལ་གཡོ་འགུལ་ཆེན་པོ་ཐེབས་ཡོད་པ་མ་ཟད། སྤྱི་ལེ་ ༢༠ ཙམ་གྱི་སར་གཡོ་འཁྱོམ་ཆེན་པོ་ཐེབས་ཡོད་འདུག
གནས་ཚུལ་དེའི་བྱུང་རྐྱེན། མོ་བྷ་རག་གིས་སྣེ་ཁྲིད་པའི་ཨི་ཇིབ་གཞུང་དེ་སྔའི་རྒྱལ་ཡོངས་འོས་བསྡུ་ཆེན་མོའི་ནང་ཕམ་ཉེས་ཆེན་པོ་བྱུང་སྟེ། མོར་སེ་ (Morsi)ཡིས་མགོ་ཁྲིད་པའི་ཁ་ཆེའི་སྤུན་ཟླ་མཐུན་ཚོགས་ལ་རྒྱལ་ཁ་ཐོབ་ཅིང་ ༢༠༡༢ ལོའི་ཕྱི་ཟླ་ ༦ པའི་ཚེས་ ༣༠ ཉིན། མོར་སེ་ཨི་ཇིབ་ཀྱི་དམངས་གཙོའི་ལམ་ནས་བདམས་ཐོན་བྱུང་བའི་སྲིད་འཛིན་ཐོག་མར་བསྐོ་བཞག་བྱས་ཡོད་ཀྱང༌། ཨི་ཇིབ་ཀྱི་སྲིད་འཛིན་ཟུར་པ་མོ་བྷ་རག་ཕྱོགས་གཏོགས་ཀྱི་ཁ་ཆེ་ཤོག་ཁག་དང་དྲག་པོའི་དམག་དཔུང་གིས་ངོ་རྒོལ་བྱས་ཏེ། འདི་ལོའི་ཕྱི་ཟླ་ ༧ ཚེས་ ༣ ཉིན་བཙན་དབང་གིས་གཞུང་སྒོ་རྒྱག་བཅུག་ཡོད་པ་མ་ཟད། མོར་སེ་ལ་རྒྱལ་ཁབ་ཀྱི་གསང་བ་ཕྱི་གྱར་བྱེད་མཁན་དང༌འཇིགས་སྐུལ་རིང་ལུགས་པར་ལག་འབྲེལ་བྱས་པ། དམག་མི་དང་ཉེན་རྟོག་པ་གང་བྱུང་འཛིན་བཟུང་བྱས་པ་སོགས་ཀྱི་ནག་ཉེས་བཙུགས་ཏེ་བཙོན་བཅུག་བྱས་ཡོད།
ཉེ་ཆར་ཨེ་ཇིབ་ཀྱི་ས་གནས་གང་སར་མོར་སེ་ཀློད་གྲོལ་གཏོང་དགོས་པའི་ངོ་རྒོལ་དང༌། འབར་གས་དོན་རྐྱེན་རྒྱུན་ཆད་མེད་པར་བྱུང་ཡོད་སྟབས། བར་བརྒལ་གཞུང་གིས་མོར་སེ་ལ་རྒྱབ་སྐྱོར་བྱེད་མཁན་ཁ་ཆེ་མཐུན་ཚོགས་ཀྱི་ཚོགས་མི་ ༢༠༠༠ ཙམ་འཛིན་བཟུང་བྱས་ཡོད་སྟབས། ཁ་སང་ཁ་ཆེ་སྤུན་ཟླ་མཐུན་ཚོགས་ཀྱི་མཐོ་རིམ་དཔོན་རིགས་ ༤༥༠ ལྷག་གིས་མོར་སེ་དང་ཁ་ཆེ་མཐུན་ཚོགས་ཀྱི་ཚོགས་མི་ཚོ་ཀློད་གྲོལ་དགོས་པའི་ཟས་བཅད་ངོ་རྒོལ་བྱས་ཡོད་འདུག
འབར་གས་དོན་རྐྱེན་སྐོར་ལ། ཨི་ཇིབ་བར་བརྒལ་གཞུང་གི་སྲིད་བློན་ཨཱ་ཛམ་བྷེབ་ལཱ་ཝུ་ (Hazem Beblawi )ལགས་ཀྱིས་དྲ་ཐོག་བརྙན་འཕྲིན་( ONTV)ཞེས་པ་བརྒྱུད། ཐེངས་འདིའི་དོན་རྐྱེན་དེ་དྲག་སྤྱོད་རིང་ལུགས་པའི་བྱ་སྤྱོད་ཅིག་ཡིན་སྟབས། གཞུང་ངོས་ནས་འཇིགས་སྐུལ་རིང་ལུགས་པར་འཆར་འགོད་བྱེད་མཁན་དང་སྐུལ་སློང་བྱེད་མཁན་ཡོངས་གང་མགྱོགས་འཛིན་བཟུང་གིས་ཉེས་ཆད་ལྕི་མོ་གཅོད་རྒྱུ་ཡིན་སྐོར་བརྗོད་འདུག
ཨ་རིའི་བདེ་སྲུང་དྲུང་ཆེ་ཆོག་ཧེ་ཇཱལ་ ( Chuck Hagel)ལགས་ཀྱིས། ཨི་ཇིབ་སྲིད་འཛིན་མོར་སེ་གནས་དབྱུང་གཏོང་མཁན་གྱི་དྲག་ཤུགས་དམག་དཔོན་ ( Abdel Fatah al-Sisi)ལ་ཁ་པར་བརྒྱུད། ཨི་ཇིབ་བར་བརྒལ་གཞུང་གིས་མོར་སེ་དང་ཁ་ཆེ་མཐུན་ཚོགས་ཀྱི་ཚོགས་མི་མང་པོ་འཛིན་བཟུང་བྱས་པ་དེར་བློ་ཕམ་དང་གནས་ཚུལ་དེ་ཐག་གཅོད་ཡག་པོ་བྱེད་དགོས་སྐོར་བརྗོད་འདུག
ཆབ་སྲིད་དབྱེ་ཞིབ་བ་ཚོས། ཨི་ཇིབ་ནང་གི་འཇིགས་སྐུལ་རིང་ལུགས་པའི་བྱ་སྤྱོད་དེ་དག་ནི། བར་བརྒལ་སྲིད་གཞུང་དང་མོར་སེ་ཤོག་ཁག་གི་འཐབ་རྩོད་ཞིག་ཡིན་པ་མ་ཟད། ཤེ་ཨ་དང་སོ་ཎེ་སེ་ ( Shia and Sunni) ཁྲོད་ཀྱི་དྲག་པོའི་ལམ་ལུགས་ཀྱི་རྒོལ་འཛིང་ཞིག་ཀྱང་ཡིན་སྟབས། དེ་དག་འཕྲལ་མར་མཚམས་འཇོག་བྱ་ཁག་པོ་ཡིན་སྐོར་བརྗོད་འདུག
རྒྱལ་སྤྱིའི་ཐབས་ཇུས་ཐོག་གི་ཆེད་མཁས་པ་ཨབ་དྷུལ་ཧྥི་ཡིང་ལགས་ཀྱིས། གལ་ཏེ། བར་བརྒལ་སྲིད་གཞུང་གིས་གནས་ཚུལ་དེ་ཐག་གཅོད་ལེགས་པོ་བྱེད་མ་ཐུབ་ཚེ། མ་འོངས་པར་རྒྱལ་ཁབ་དང་མང་ཚོགས་ལ་དཀའ་ངལ་ཆེན་པོ་འཕྲད་རྒྱུ་ཡིན་སྐོར་བརྗོད་འདུག
བྷོག་ཀིང་ཤེས་ཡོན་ལྟེ་གནས་ཁང་གི་ཞིབ་འཇུག་པ་ཧི་ཤམ་ཨལ་ཡར་ ( Hisham Hellyer) ལགས་ཀྱིས། ཨེ་ཇིབ་ནང་བྱུང་བཞིན་པའི་འཇིགས་སྐུལ་རིང་ལུགས་པའི་དོན་རྐྱེན་དེ་དག ཉེ་བའི་ལོ་ཤས་ནང་ཨི་ཇིབ་བར་བརྒལ་གཞུང་དང་ཁ་ཆེ་མཐུན་ཚོགས་བར་ལྟ་བ་མ་མཐུན་པའི་དབང་གིས་བྱུང་བ་ཞིག་ཡིན་སྐོར་དང༌། གལ་ཏེ། ཨི་ཇིབ་ནང་གི་ངོ་རྒོལ་དེ་དག་འོས་བསྡུའི་ལམ་ནས་གཞུང་གསར་པ་འོས་འདེམས་མ་བྱས་སྔོན་ལ་ལྷིང་འཇགས་བཟོ་མ་ཐུབ་པ་ཡིན་ན། ཨི་ཇིབ་ནང་བསྐྱར་དུ་གསར་བརྗེ་ཞིག་འབྱུང་སྲིད་སྐོར་བརྗོད་འདུག
