ཆབ་སྲིད་བཙོན་པ་རིན་ཆེན་ཚེ་རིང་ལགས་བཙོན་གྲོལ་ཐོབ་པར་ས་གནས་མང་ཚོགས་ཚོས་ཕེབས་བསུ་གཟབ་རྒྱས་བྱས་ཡོད་འདུག
ཁ་སང་ཕྱི་ཚེས་ ༢༥ ཉིན་གྱི་སྔ་དྲོའི་ཆུ་ཚོད་ ༨།༣༠ སྟེང་། ས་བྱི་ཞི་རྒོལ་ཆེན་མོའི་ནང་འཛིན་བཟུང་བྱས་པའི་ཀན་ལྷོ་ཅོ་ནེ་མ་རྩ་སྡེ་བའི་རིན་ཆེན་ཚེ་རིང་ལགས་ལན་ཀྲུག་གྲོང་ཁྱེར་གྱི་ཏཱ་ཧྲ་པཱེ་ཞེས་པའི་བཙོན་ཁང་ཞིག་ནས་ཀློད་གྲོལ་གྱིས་ཕྱིར་རང་ཁྱིམ་དུ་ལག་ཡོད་ཅིང་། སྐབས་དེར་ས་གནས་མི་མང་གིས་ཁ་བཏགས་དང་གོས་བཏགས་ཀྱིས་གཡོགས་ཏེ་ཕེབས་བསུ་རྒྱ་ཆེན་པོ་བྱས་ཡོད་འདུག
༢༠༠༠༨ ལོར་བོད་ནང་གི་ས་བྱི་ཞི་རྒོལ་ཆེན་མོའི་ཁྲོད། ཀན་ལྷོ་ཅོ་ནེ་རྫོང་མདོད་ཁོག་ཞང་གི་ནགས་སྲུང་ལས་ཁུངས་མེར་བསྲེཊ་བཏང་བའི་ཉེས་མིང་འོག ཆོས་དཔལ་ཞིང་བཀྲ་ཤིས་ཆོས་འཁོར་དགོན་པའི་མཚན་ཉིད་གྲྭ་ཚང་གི་རང་ལོ་ ༤༠ ཡིན་པའི་གྲྭ་བསྟན་འཛིན་རྒྱ་མཚོ་ལགས་སུ་ལོ་ ༡༥ ཡི་དུས་བཀག་བཙོན་འཇུག་གི་ཁྲིམས་ཐག་བཅད་དེ་ལན་གྲུའུ་གྲོང་ཁྱེར་ཏ་ཧྲ་པེ་ཞེས་པའི་བཙོན་ཁང་དུ་བཙོན་འཇུག་དང་། རྒྱུད་པ་གྲྭ་ཚང་གི་རང་ལོ་ ༢༨ ཡིན་པའི་གྲྭ་བསྟན་འཛིན་རྒྱ་མཚོ་ལགས་སུ་ལོ་ ༡༣ གྱི་ཁྲིམས་ཐག་བཅད་དེ་ཀན་སུའུ་ཏེན་ཞི་གྲོང་ཁྱེར་གྱི་བཙོན་ཁང་ཞིག་ཏུ་བཙོན་འཇུག གཞན། སྐབས་དེའི་ངོ་རྒོལ་སྐབས་མི་མང་གི་སྣེ་ཁྲིད་མཁན་ཡིན་པའི་ཉེས་མིང་འོག མདོ་ཁོག་ཞང་མར་ཙ་སྡེ་བའི་རང་ལོ་ ༣༨ ཡིན་པའི་རིན་ཆེན་ཚེ་རིང་དང་རང་ལོ་ ༢༥ ཡིན་པའི་བསྟན་འཛིན་བཀྲ་ཤིས། ཉིན་པ་ཞང་ཉིན་པ་སྡེ་བའི་རང་ལོ་ ༣༠ ཡིན་པའི་བློ་བཟང་རྡོ་རྗེ་གསུམ་ལ་ལོ་ ༨ རེ་ཁྲིམས་ཐག་བཅད་དེ། བློ་བཟང་རྡོ་རྗེ་ཀན་སུའུ་པེ་ཡི་གྲོང་ཁྱེར་གྱི་བཙོན་ཁང་ཞིག་ཏུ་བཙོན་འཇུག་བྱས་ཡོད་པ་དང་། གཞན་གཉིས་ཏ་ཧྲ་བཙོན་ཁང་དང་ཏེན་ཞི་གྲོང་ཁྱེར་གྱི་བཙོན་ཁང་བཅས་སུ་བཙོན་འཇུག་བྱས་ཏེ། ཁོང་ཚོའི་ནང་མི་གཉེན་འབྲེལ་ཚོར་ཟླ་རེར་ཐེངས་རེར་ཐུག་འཕྲད་དང་རྒྱ་སྒོར་ ༡༠༠ ཡན་སྤྲད་མི་ཆོག་པའི་སྒྲིག་གཞི་བཟོས་ཡོད་འདུག
རིན་ཆེན་ཚེ་རིང་ལགས་གློད་གྲོལ་བཏང་ནས་ཕྱིར་རང་ཡུལ་དུ་ལོག་སྐབས་ནང་མི་གཉེན་ཉེ་དང་། ས་གནས་ཡུལ་མི་ཚོས་ཁ་བཏགས་གོས་བཏགས་སོགས་བསྒྲོན་ཏེ་ཕེབས་བསུ་གཟབ་རྒྱས་བྱས་ཡོད་འདུག
