ཀླུ་མཁར་བྱམས་ལཊ་ཀྱི་གསར་འགོད་གསལ་བསྒྲཊ།

དེ་རིང་ཕྱི་དྲོར་རང་དབང་གི་རྩོམ་པ་པོ་དང་རྒྱ་ནག་ཉམས་ཞིབ་པ་ཨ་ཚོགས་ཀླུ་མཁར་བྱམས་ལགས་ཀྱིས། མདོ་སྨད་སྤྱི་འཐུས་ཀིརྟི་སྒྲོལ་དཀར་ལྷ་མོ་ལགས་ཀྱིས་དགོངས་པ་ཞུས་ཤུལ་དུ་དབུས་བོད་བསྡུ་ལྷན་ཁང་གིས་མདོ་སྨད་མི་མང་ལ་བར་མའི་འོས་བསྡུ་བྱ་རྒྱུ་ཡིན་སྐོར་གསལ་བསྒྲགས་སྤེལ་དང་། ཀླུ་མཁར་བྱམས་ཁོང་རང་འོས་གྲངས་བརྒྱ་ཆ་དང་རྩེ་བཏོག་གི་བར་དུ་ལྷག་ཡོད་པ་བཅས་ཀྱི་སྐོར་ལ་གསར་འགོད་གསལ་བསྒྲགས་ཤིག་སྤེལ་པ་གཤམ་དུ་བཀོད་ཡོད།

དེ་ཡང་གང་ན་བརྩེ་བའི་ཉེ་བར་འཛིན་པའི་བསིལ་ལྡན་སཱ་ལའི་ལྗོངས་ཀྱི་སྐྱེ་འགྲོ་ཡོངས་ལ་ཕྲན་ཨ་ཚོགས་ཀླུ་མཁར་བྱམས་འབོད་མིང་བས། གནམ་ལོ་གསར་བའི་ནང་དུས་བདེ་གནས་འཇམ་ཡོང་བའི་སྨོན་པས་མཚམས་སྦྱར་ཏེ། སྐབས་དོན་གྱི་ཞུ་སྙིང་ནི། ཐེངས་འདིར་མདོ་སྨད་སྤྱི་འཐུས་སྒྲོལ་དཀར་ལྷ་མོ་རྩ་དགོངས་ཞུས་རྗེས། དབུས་འོས་བསྡུ་ལས་ཁང་ངོས་ནས་[ སྤྱི་འཐུས་དུས་ཡུན་ནང་ས་མིག་སྟོང་པ་ཐོན་ཚེ། བར་མའི་འོས་བསྡུ་མ་དགོས་པར་སྒུག་ཐོའི་གྲལ་མཚམས་གར་འཁེལ་ནས་ཚབ་གསར་འཇུག་རྒྱུའི་ཆེད། འོས་ཐོབ་མང་རིམ་བཞིན་ཐོར་བཀོད་དེ་འོས་བསྡུའི་འགན་འཛིན་དང་། ཟུར་དཔང་རྣམས་ཀྱིས་མཚན་རྟགས་བཀོད་པ་འོས་བསྡུ་ལས་ཁང་དུ་ཉར་དགོས་] ཞེས་སྒྲིག་གཞི་ལག་བསྟར་མ་ཐུབ་པར། བར་མའི་འོས་བསྡུ་བྱ་འཆར་གྱི་བརྡ་ཁྱབ་སྤེལ་འདུག་ལ།  དེ་ནི་སྟབས་མ་ལེགས་པར་སྒུག་ཐོའི་ཁ་མཚམས་ལ་ང་འཁེལ་ཡོད་པས་ཡིན་སྐོར་གླེང་ཕྱོགས་སམ་མཐོང་ཚུལ་ཞིག་སྤྱི་ཚོགས་ནང་རྒྱ་ཁྱབ་ཀྱིས་འགྲོ་མུས་རེད།  

            དེར་བརྟེན་ཕྱི་ཟླ་ ༡༢ ཚེས་ ༢༠ ཉིན་ང་རང་དབུས་འོས་བསྡུ་ལས་ཁང་ལ་དངོས་སུ་བཅར་ནས། གལ་སྲིད་ངའི་ཤུགས་རྐྱེན་དབང་གིས་ལྷན་རྒྱས་ཀྱིས་ཁྲིམས་སྒྲིག་ལག་བསྟར་ཐུབ་ཀྱི་མེད་པ་དངོས་བདེན་ཡིན་ཚེ། ད་ཡོད་ཀྱི་སྒུག་ཐོའི་ནང་ངས་རྩ་དགོངས་ཞུས་ཆོག་ལ། ངའི་རྗེས་ན་ཡོད་པའི་མི་དེ་ཡར་བསྐོ་རོགས་ཞེས་ཡིག་ཐོག་ནས་ཕུལ་ཡོད་ཁར། ངག་ཐོག་ནས་ལོ་འདི་འགའི་ནང་བོད་ཕྱི་ནང་གཉིས་ནས་རང་ལུས་མེར་སྲེག་གནང་མཁན་གྱི་ཞལ་གྲངས་བརྒྱ་དང་སུམ་ཅུའི་ཁར་བུད་ནས་མི་སྲིད་པའི་ཛ་དྲག་གི་སྐབས་ཤིག་ལ། འདི་གར་ང་ཚོ་བློ་རྒྱ་ཁབ་མིག་ལས་དོག་པའི་མི་རེ་གཉིས་ཤིག་སྒེར་དོན་གྱིས་མ་འགྲིག་པར། ཉིན་མཚན་དུས་དྲུག་ཏུ་ནང་འཁྲུག་རྐྱང་བརྒྱབ་ནས་ཉི་མ་གཏོང་དགོས་བྱུང་ན། དེ་ལས་ཐབས་སྐྱོ་བ་ཞིག་གང་ན་ཡོད། དེར་བརྟེན། ཁོར་ཡུག་འདི་ལྟ་བུ་ཞིག་གི་ནང་ཁོ་བོར་མཚོན་ན་སྤྱི་འཐུས་ཤིག་ཕར་ཞོགས། ཐ་ན་སྲིད་སྐྱོང་གི་མིང་གནས་བཏགས་པར་ཆ་བཞག་ཀྱང། ང་ལ་སྤུ་མདོག་གསར་བ་ཞིག་རྒྱས་ནས་འཇོན་ཐེངས་ཆེན་པོ་ཞིག་ངོམ་རྒྱུ་མེད་པ་གསལ་པོ་ཡིན་ཞེས་ཞུས་པར། དབུས་འོས་བསྡུའི་འགན་འཛིན་གྱིས་ཁྱེད་ཀྱི་ཐུགས་བསམ་བཞེས་སྟངས་ཡག་པོ་ཞེ་དྲག་རེད་ཟེར་ནས། དེར་བསམ་བློ་ཏན་ཏན་གཏོང་གི་ཡིན་གསུངས་གནང་སོང།     

            འོན་ཀྱང་། ཕྱི་ཟླ་ ༡༢ ཚེས་ ༢༤ ཉིན་འོས་བསྡུའི་འགན་འཛིན་ལས་རོགས་གཉིས་བསྐོས་འདུག་པ་སོགས་ལ་གཞིག་ན།  བོད་གཞུང་གིས་བར་མའི་འོས་བསྡུ་དེ་མིག་བཙུམ་ནས་བྱ་འཆར་ཡིན་པ་འདྲ།  དེར་བརྟེན། འོས་བསྡུ་འཕར་མ་དེར་ཧིན་སྒོར་འབུམ་ཉི་ཤུ་ལྷག་གི་གཞུང་གྲོན་ཆུད་ཟོས་སུ་བཏང་བ་ཙམ་མ་ཡིན་པར། རང་ཁྲིམས་རང་གིས་བཤིག་སྟེ་གཞུང་དམངས་བར་ཡིད་ཆེས་བརླག་གཞིའི་འོས་བསྡུའི་གླེང་རྙོག་ནང་། གཅིག་ནས་ཁོ་བོས་སྒྲུབ་ཐུབ་པའི་ལས་ཀ་གཅིག་རང་གཅིག་ཡོད་པ་ནི་རང་ཉིད་སྒུག་ཐོའི་ཁ་མཚམས་འདི་ནས་ཕྱིར་ཐོན་པ་དང་འབྲེལ། འདེམས་དམངས་རྣམས་ལ་བཟང་སྤྱོད་ཀྱི་འགན་ལེན་ཞིག་ཅིས་ཀྱང་འཁུར་དགོས་སྟབས། གནད་དོན་འདི་གསལ་པོ་བཟོ་ཆེད་འབྲེལ་ཡོད་ཁག་ལ་ངོ་བཅར་གྱིས་བརྡ་འདེད་གཏོང་རྒྱུ་ཙམ་དང་། གཉིས་ནས་གནད་དོན་འདི་གསལ་ཁ་བཟོ་དགོས་པ་ནི་ཆོལ་ཁ་དང་ཆོས་བརྒྱུད་བྱེ་བྲག་པ་ཞིག་གི་སྤྱི་འཐུས་མི་འགྲོ་གཅིག་གི་གནད་དོན་ཙམ་མ་ཡིན་པར། བཙན་བྱོལ་བོད་མིའི་ཁྲིམས་སྒྲིག་གིས་ཁྱབ་པའི་སྤྱི་འབངས་ཡོངས་ལ་འཁྲི་བའི་ལས་དོན་ཞིག་ཡིན་སྟབས། ད་ཐེངས་སྤྱི་འཐུས་ཚོགས་གཙོ་གཞོན་གཉིས་ཀྱི་ཁ་བཀོད་ཡིན་ནའང་འདྲ། དབུས་འོས་བསྡུ་ལས་ཁང་གི་ལས་དོན་བྱེད་ཕྱོགས་དེ་ཚོར་འབྲེལ་ཡོད་ཚན་པར་དོགས་འདྲི་ཞུ་རྒྱུ་དང་ཆབས་ཅིག རང་གི་དགོས་འདུན་དོན་ཚན་འགའ་མཉམ་སྦྱར་གྱིས་ཕུལ་ཡོད་པ་གཤམ་གསལ།

དོགས་འདྲི་ཁག     

༡༽  ཁ་ཉིན་དུས་བབ་གསར་ཁང་གིས་འོས་བསྡུའི་འགན་འཛིན་ལ་གནད་དོན་དེའི་ཐད་བཅར་འདྲི་བྱས་པའི་ནང་། འགན་འཛིན་གྱིས་“སྐབས་བཅོ་ལྔ་པའི་སྤྱི་འཐུས་བདམས་ཚར་རྗེས་བརྒྱ་ཆ་དེ་མེད་པ་བཟོས་པ་རེད། སྤྱི་འཐུས་ལ་ཐོབ་མེད་ནའང་སྒུག་ཐོ་དེ་འདྲ་ཡོད་ན་བསྐོ་བཞག་བྱས་ན་འགྲིག་གི་མེད་འགྲོ་བསམ་ནས་བཀའ་འདྲི་ཞུས་དུས་༼སྐབས་དེར་སྤྱི་འཐུས་ཚོགས་གཙོ་བཞུགས་མེད་སྟབས་ངས་ཚོགས་གཞོན་ལ་བཀའ་འདྲི་ཞུས་ཡིན་༽དེ་འགྲིག་གི་མི་འདུག དེ་འགྲིག་གི་མེད་པར་བརྟེན་བར་མའི་འོས་བསྡུ་བྱ་དགོས་བྱུང་བ་རེད་” ཅེས་(2)དང་། ཡང་འགན་འཛིན་གྱིས་“ཐེངས་འདིའི་བར་མའི་འོས་བསྡུ་ལ་བརྒྱ་ཆ་ལོངས་དགོས་པའི་ཆ་རྐྱེན་གང་ཡང་ཡོད་པ་མ་རེད། གང་ཡིན་ཟེར་ན་སྐབས་བཅོ་ལྔ་པའི་སྤྱི་འཐུས་ལྷན་ཚོགས་ཀྱིས་ཐག་བཅད་ཚར་བ་རེད”ཅེས་པ་སོགས་བཀལ་མོལ་དེ་དག་གིས་གནད་དོན་གསལ་བོ་ཆགས་རྒྱུའི་ཚབ་ལ་དོགས་གཞི་ཆེ་རུ་ཕྱིན་འདུག་པ་དང་། གལ་སྲིད་དེ་འདྲ་ཡིན་ན་བཅའ་ཁྲིམས་ནང་འོས་བསྡུ་ལས་ཁང་ནི་རང་དབང་ཅན་གྱི་ལས་ཁང་ཞིག་ཡིན་ཟེར་གྱི་ཡོད་པ་དང་། ཡིན་ཡང་དགོས་པ་གཞིར་བྱས། སྐབས་འདིའི་རང་དབང་ཅན་ཞེས་པའི་གོ་དོན་ནི། ཁྲིམས་བཟོ་ལྷན་ཚོགས་སམ་སྤྱི་འཐུས་ཀྱིས་ཁྲིམས་སྒྲིག་གང་ཞིག་གཏན་འབེབས་བྱས་པ་རྣམས་ལག་བསྟར་སྐབས་བཀའ་སྤྱི་གཉིས་ཀྱི་ཇུས་གཏོགས་ཡོང་མི་ཆོག་པར་འོས་བསྡུ་ལས་ཁང་རང་ལ་དབང་ཚད་ཡོད་པར་བརྟེན། རང་དབང་ལྡན་པའི་ལས་ཁང་ཞེས་མིང་གནས་སྤྲད་པ་རེད་ལ། འོས་བསྡུའི་ལས་དོན་དང་འབྲེལ་བའི་རྩོད་གླེང་བྱུང་བ་དང་། ཁྲིམས་སྒྲིག་སོགས་ལ་གསལ་ཁ་མེད་པ་བྱུང་ཚེ་ཁྲིམས་ཀྱི་གོ་དོན་འགྲེལ་བརྗོད་གནང་མཁན་ཁྲིམས་ཞིབ་ཁང་ཡིན་པ་སྒྲིག་གཞིའི་ནང་འཁོད་ཡོད་སྟབས། འོས་བསྡུ་འགན་འཛིན་གྱི་གསོལ་ཅོག་ཐོག་ཏུ་(སྐབས་བཅོ་ལྔའི་ཚོགས་དུས་གཉིས་པར་) སྤྱི་འཐུས་ཀྱི་འོས་གྲངས་བརྒྱ་ཆའི་ཚད་གཞི་མི་དགོས་པ་སྤྱི་མོས་གཏན་འབེབས་བྱས་ཟིན་པ་དང་། སྲིད་སྐྱོང་ངམ་༼བཀའ་ཁྲིས༽མཚན་རྟགས་བཀོད་ནས་ཁྲིམས་སུ་བཅས་གྲུབ་པའི་ཡིག་ཆ་དེ་ཚོ་འབྱོར་ཡོད་ཤག་ཡིན་ན། ད་དུང་དེ་ལག་བསྟར་རུང་མིན་དོགས་གཞི་དངོས་གནས་བྱུང་ཚེ། ཡར་ཁྲིམས་ཞིབ་ཁང་ལ་གཏུག་ནས་གསལ་ཁ་བཟོ་རྒྱུ་ལས། འགན་འཛིན་ཉིད་ཕར་སྤྱི་འཐུས་ཚོགས་གཙོ་གཞོན་སར་ནང་མོལ་ཞུ་སར་ཕྱིན་པ་ནི་གཅིག་ནས་འོས་བསྡུ་ལས་ཁང་རང་ཉིད་ལ་ཁྲིམས་ཀྱིས་སྐུལ་བའི་དབང་ཚད་ལག་བསྟར་མ་བྱས་པར་འགལ་འཛོལ་བྱུང་བ་དང་། གཉིས་ནས་སྐབས་འདིར་སྤྱི་འཐུས་ཚོགས་གཙོ་གཞོན་གྱིས་འོས་བསྡུའི་ལས་དོན་ནང་གན་དང་འདི་བྱེད་དགོས་ཟེར་ནས་བཀོད་རྒྱ་བཏང་བ་དངོས་བདེན་ཡིན་ན། འདི་ནི་གང་ཟག་གི་དབང་བསྒྱུར་རང་ཆགས་མི་འདུག་གམ། 

༢༽  སྤྱི་འཐུས་ཀྱི་འོས་བསྡུ་ལ་བརྒྱ་ཆ་ལོངས་མི་དགོས་པའི་ཁྲིམས་སྒྲིག་དེ་བཟོ་རྒྱུའི་རྒྱབ་ལྗོངས་ནི། འདས་པའི་ཉམས་མྱོང་གཞིར་བཞག “གཞུང་གྲོན་འཕར་མ་བཏང་ནས་འོས་བསྡུའི་ལས་རིམ་མང་པོ་ཕྱིན་པ་ཡིན་ན་མི་མང་སེམས་ཤུགས་ཆག་རྒྱུ་མ་གཏོགས། དོན་དངོས་ལ་ཕན་རྒྱུ་མེད་པ་སོགས་རྒྱུ་མཚན་དུ་བྱས་”ནས་གཏན་འབེབས་བྱས་པ་ཡིན་སྐོར་སྐབས་དེར་ཚོགས་གཙོ་སྤེན་པ་ཚེ་རིང་གིས་ཀྱང་འགྲེལ་བརྗོད་བྱས་ཡོད། དེས་ན་གོང་གསལ་གནད་དོན་སྣང་མེད་དུ་བཞག་སྟེ། ཐེངས་འདིར་སྒུག་ཐོའི་མང་རིམ་རྩེ་བཏོག་གིས་མ་ཕྱིན་པར་གཞུང་གྲོན་འབུམ་ཉེར་གཅིག་ལྷག་མིག་བཙུམ་ནས་གཏོང་རྒྱུ་ནི་རྒྱུ་མཚན་མེད་པ་ཞིག་དང་། མ་གཞི་ཁྲིམས་ལ་འགྲེལ་བརྗོད་གནང་སྐབས་གཞི་རྩའི་ཡིག་ཐོག་ན་གང་ཡོད་པ་ཇི་བཞིན་འགྲེལ་བརྗོད་དགོས་པ་དང་།  དེ་ནས་ཁྲིམས་དེ་གཏན་འབེབས་སྐབས་ཀྱི་རྒྱབ་ལྗོངས་དམིགས་ཡུལ་གཞིར་འཛིན་དགོས་པ། ཐ་མར་ཁྲིམས་གང་དེ་ལག་བསྟར་བྱས་པ་ཡིན་ན་མཇུག་འབྲས་གང་ཡོང་བཅས་ཀྱི་རྩ་དོན་གསུམ་གཞིར་འཇོག་དགོས་སྟབས། ཐེངས་འདིར་འོས་བསྡུ་ལས་ཁང་གི་བྱེད་བབས་ནི་ཐོག་མར་ཁྲིམས་བཟོ་སྐབས་ཀྱི་ཡིག་ཐོག་ན་གསལ་གྱི་ལེར་ཡོད་པའི་ཚིག་རྩ་དང་མི་མཐུན་ཁར། ཁྲིམས་སྒྲིག་དེ་བཟོ་དགོས་པའི་རྒྱབ་ལྗོངས་དམིགས་ཡུལ་དང་རྩ་འགལ་ཆགས་པ། མཇུག་འབྲས་ཀྱི་ཆ་ནས་གཞུང་གྲོན་ཆུད་ཟོས་དང་། མི་མང་སེམས་ཤུགས་ཆག་རྒྱུ་མ་གཏོགས་དགེ་མཚན་གང་ཡང་མེད་པ་ཞིག་ཆགས་མི་འདུག་གམ། 

༣༽ (སྐབས་བཅོ་ལྔའི་ཚོགས་དུས་གཉིས་པར་) འོས་བསྡུའི་སྒྲིག་གཞིར་བཟོ་བཅོས་ཀྱིས་བརྒྱ་ཆ་མི་དགོས་པ་བཟོ་སྐབས། ཚོགས་གཙོ་སྤེན་པ་ཚེ་རིང་གིས་ལས་རིམ་དེ་དང་འབྲེལ་ནས་ཁྲིམས་ཀྱི་གོ་དོན་དང་། ལག་བསྟར་དུས་ཡུན་སོགས་ཀྱི་ཐད་འགྲེལ་བརྗོད་འགའ་ཞིག་བརྒྱབས་འདུག་ལ། ཁོ་པས་ཐོག་མར་“བཀའ་བློན་ཁྲི་པས་མཚན་རྟགས་བསྐྱོན་པའི་ཉིན་མོ་ནས་འོས་བསྡུའི་ལས་རིམ་ག་འདྲ་ཞིག་བྱས་པ་ཡིན་ན། སྒྲིག་གཞི་འདི་གཞིར་བཟུང་ནས་འགྲོ་དགོས་པ་ཞིག་ཆགས་རྒྱུ་རེད་”ཟེར་ཞོར་དུ། (4)དེའི་འོག་ནས་ཨུ་ཚུགས་ངང་འགྲེལ་བརྗོད་འཕར་མ་ཞིག་རྒྱག་ཁུལ་བྱས་པ་ནི། འདི་ལྟར་“དཔེར་ན། ད་ལྟ་འགྲོ་བཞིན་པའི་ནང་ལ་མདོ་སྨད་ཀྱི་སྤྱི་འཐུས་གཉིས་དགོངས་པ་ཞུས་པ་འདྲ་ཞིག་ཡིན་ནའང་། ད་ལྟ་སྒུག་ཐོའི་ནང་གཅིག་མ་གཏོགས་ཡོད་མ་རེད། དེ་འདྲ་སོང་ཙང་། འོས་བསྡུའི་ལས་རིམ་ཡང་བསྐྱར་བྱེད་དགོས་རྒྱུ་ཡོད་རེད། འོས་བསྡུའི་ལས་རིམ་ཡང་བསྐྱར་བྱས་པའི་རྗེས་ལ་བརྒྱ་ཆ་མང་ཉུང་ག་ཚོད་ཐོབ་པ་ལ་མ་ལྟོས་པར། མང་རིམ་རྩེ་བཏོག་གིས་འགྲོ་དགོས་པ་རེད། གང་ལྟར་མང་ཆེ་བ་ཞིག་སྐབས་བཅུ་དྲུག་ལ་མ་གཏོགས་དམིགས་བསལ་གྱི་འབྲེལ་བ་ཆགས་ཀྱི་ཡོད་མ་རེད་”ཟེར་ནས་སྔ་ཚིག་ཕྱི་བཤད་མི་མཚུངས་པ་ཞིག་བཤད་འདུག་ལ། རྒྱུ་མཚན་འདི་ཙམ་ནི་ད་རེབ་འོས་བསྡུ་ལས་ཁང་གིས་མང་རིམ་སྒུག་ཐོ་ལྟར་བསྐོ་བཞག་མ་བྱས་པར། བརྒྱ་ཆ་ལོངས་ཡོད་མེད་བཤད་ནས་བར་མིའི་འོས་བསྡུ་བྱ་རྒྱུ་ཡིན་སྐོར་བརྗོད་པའི་གཞི་འཛིན་ས་ཡིན་ངེས་ན། ཚོགས་གཙོར་སྤྱི་འཐུས་ལྷན་ཚོགས་ཀྱིས་ཁྲིམས་སུ་བཅས་ཚར་བ་ཞིག་ལ་ལག་བསྟར་དུས་ཡུན་ཚད་བཀག་བཟོ་ཆོག་པའི་དམིགས་བསལ་དབང་ཆ་ཞིག་བཙན་བྱོལ་བོད་མིའི་ཁྲིམས་སྒྲིག་ཁང་གི་ནང་མཐོང་རྒྱུ་མེད་ཁར། མ་གཞི་ནས་ཁྲིམས་བཟོ་མཁན་ལ་རང་གིས་བཟོས་པའི་ཁྲིམས་ཀྱི་གོ་དོན་འགྲེལ་བརྗོད་དང་ལག་བསྟར་ནང་ཐེ་བྱུས་ཀྱི་དབང་ཆ་ཡོད་ན། དེ་ནི་སྒེར་གཅོད་ལམ་ལུགས་ཀྱི་འགྲོ་སྟངས་མངོན་གསལ་དོད་པོ་ཞིག་ཡིན།  སོང་ཙང་སྐབས་དེ་རང་ལ་གྲོས་ཚོགས་ནང་སྤྱི་འཐུས་རྒྱ་རི་བུ་ཕྲུག་གིས། གཅིག་ནས་ཚོགས་གཙོས་ཁྲིམས་ལག་བསྟར་དབང་ཚད་ལ་ཐེ་བྱུས་ཀྱི་འགྲེལ་བརྗོད་བྱས་པ་དང་། གཉིས་ནས་བརྒྱ་ཆ་མི་དགོས་པ་བཟོས་ཚར་ཉིན་ནས་མང་རིམ་རྩེ་བཏོག་གིས་འགྲོ་དགོས་པ་ནི་རྒྱ་གར་གཙོས་འཛམ་བུ་གླིང་གི་འགྲོ་ལུགས་ཡིན་པ་སོགས་ཀྱི་ཐད་གསལ་བཤད་ཁུངས་འཕེར་ཞིག་གནང་འདུག་ལ། རྒྱ་རི་བུ་ཕྲུག་གིས་“ཕལ་ཆེར་ངས་གོ་སྟངས་ནོར་མེད་ན་དཔལ་ལྡན་ཚོགས་གཙོས་ཁྲིམས་ཀྱི་གོ་དོན་འགྲེལ་བཤད་བསྐྱོན་སོང་བསམ་སོང་། འགྲེལ་བཤད་དེའི་དཔེ་མཚོན་ལའང་ག་རེ་བྱུང་ཞུས་པ་ཡིན་ན། མདོ་སྨད་ཀྱི་སྒུག་ཐོའི་ནང་ཡོད་བསྡད་པ་གཅིག་ཡོད་རེད་ཟེར། འདིར་འགྱུར་བ་ཕྱིན་པ་ཡིན་ན་ད་ལྟ་འདི་ལ་འབྲེལ་བ་ཆགས་རྒྱུ་མ་རེད་ཟེར། འདི་ཏག་ཏག་ཅིག་བསྡད་ཡོད་དམ་ཞུ་རྒྱུ་དང་། མ་གཞི་ནས་གྲོས་ཚོགས་ནང་ལ་ཁྲིམས་ལ་འགྲེལ་བརྗོད་བསྐྱོན་རྒྱུ་ནི་ག་ཚོད་ཅིག་ཡིན་ཡང་ཏག་ཏག་བསྡད་ཀྱི་མ་རེད་བསམ་གྱི་འདུག དེ་འདྲ་ཡིན་ཙང་དེ་ཚོ་གསལ་པོ་མ་བྱུང་ན་ཡག་པོ་མི་འདུག རྒྱ་གར་ནང་རྣམ་པ་ཚོས་མཁྱེན་གསལ་རེད། date permit དེ་འདྲའི་འགྱུར་བ་ཕྱིན་པ་ཡིན་ན་ད་དུང་སྒུག་ཐོའི་ནང་ཡོད་མཁན་ཚོ་ཚང་མར་ཆག་ཡང་ཡོང་གི་རེད་མ་གཏོགས། ཁྱེད་རང་ཚོ་སྔོན་མ་ཐག་བཅད་ཚར་བ་རེད། ད་ཁྱེད་རང་ཚོ་ཡར་འགྲོ་རྒྱུ་མ་རེད་ཅེས་རྒྱ་གར་ནང་དེ་ངོས་འཛིན་བྱེད་སྲོལ་མི་འདུག་ལ། འཛམ་གླིང་ནང་དུའང་དེ་འདྲ་ངོས་འཛིན་བྱེད་སྲོལ་མི་འདུག་”ཅེས་བརྗོད་འདུག སྤྱི་འཐུས་རྒྱ་རི་བུ་ཕྲུག་ནི་ད་ལྟའི་ཆར་གྲོས་ཚོགས་ནང་ཁྲིམས་ཀྱི་ཐོག་ཆེད་སྤྱོང་ཡོད་མཁན་ཞིག་ཡིན་པ་མ་ཟད། སྤྱི་འཐུས་རྒྱུན་རིང་གནང་བའི་ཉམས་མྱོང་ཅན་ཞིག་ཀྱང་ཡིན་སྟབས། ཁོང་གི་འགྲེལ་བརྗོད་འདིས་གནད་དོན་མང་པོ་ཞིག་ངང་གིས་གསལ་པོ་ཆགས་འདུག་སྙམ། 

༤༽ འོས་བསྡུའི་སྒྲིག་གཞི་བསྐྱར་བཅོས་སྐབས།  སྤྱི་བསྡོམས་གྲངས་འབོར་གྱི་བརྒྱ་ཆ་ ༣༣ ལོན་དགོས་པ་གྲོས་ཚོགས་ནས་ཕྱིར་འཐེན་གནང་འདུག གལ་སྲིད་ཁྲིམས་སུ་བཅས་པ་གང་ཞིག་ལ་འགྲེལ་བརྗོད་འཕར་མ་དགོས་ཚེ་ཟུར་བརྗོད་ཅེས་འབྲི་སྲོལ་ཞིག་ཡོད་པ་དེའི་ནང་དུས་ཡུན་ཚད་བཀག་གིས་འབྲི་ཆོག་མོད། བསྐྱར་བཅོས་འདིའི་ནང་དེ་འདྲ་གང་ཡང་བཀོད་མི་འདུག གཞན་ཡང་གོང་ནས་འགྲེལ་བརྗོད་བྱས་པ་ལྟར། ཚོགས་གཙོར་ཁྲིམས་ལ་འགྲེལ་བརྗོད་རྒྱག་རྒྱུའི་དབང་ཚད་དང་།  ཁྲིམས་སུ་བཅས་ཚར་བ་ཞིག་ལ་ལག་བསྟར་གྱི་དུས་ཚོད་འཕར་འགྱངས་གཏོང་ཆོག་པའི་དབང་ཆ་ལྷག་མ་ཞིག་ཁྲིམས་སྒྲིག་གང་དུའང་གསལ་མེད་སྟབས། དབུས་འོས་བསྡུ་ལས་ཁང་གིས་ཁྲིམས་ཡིག་འདི་གཏན་འབེབས་བྱེད་སྐབས་ཀྱི་གོ་རིམ་ཚང་མ་སྣང་མེད་དུ་བཏང་སྟེ། ཚད་གང་ལ་བཞག་ནས་སྤྱི་འཐུས་ཀྱི་ཚོགས་གཙོ་གཞོན་གཉིས་ལ་ཁྲིམས་ལུགས་ལག་བསྟར་ཐད་བཀའ་མོལ་ཞུས་པ་དང་། གལ་སྲིད་བཀའ་འདྲི་ཞུས་པ་བརྒྱུད་ཁོ་ཚོས་ཁ་བཀོད་འཐེན་ཡོད་དབང་བྱས་ཀྱང་། དེ་ཚད་མར་འཛིན་ཆོག་པའི་ཁུངས་སྐྱེལ་ཁྲིམས་སྲོལ་གང་དག་ཡོད།

༥༽ ང་ལ་རྒྱབ་སྐྱོར་གནང་མཁན་རྣམས་ཀྱིས་རེ་སྐུལ་གནང་བ་ལྟར། ཕྱི་ཚེས་ ༢༥ ཉིན་ཁོ་བོ་འོས་བསྡུ་ལས་ཁང་དུ་སྒྲིག་གཞི་གསར་བ་དེ་ང་ལ་གཅིག་གནང་རོགས་ཞེས་ལེན་དུ་ཕྱིན་པ་ཡིན། འོས་བསྡུ་ལས་ཁང་གིས་ང་ཚོས་འོས་བསྡུའི་སྒྲིག་གཞི་གསར་བ་ད་དུང་དེབ་གཟུགས་སུ་དཔར་འགྲེམས་ཐུབ་མེད་ལ། ནང་དོན་སོགས་ཀྱི་ཐད་ནས་དཔར་ལོག་རྒྱག་རྒྱུ་དཀའ་ངལ་འཕྲད་བསྡད་ཡོད་སྟབས། ཚོགས་གཙོ་སྤེན་པ་ཚེ་རིང་ཚུར་མ་འབྱོར་བར་དུ་སྒུག་གི་ཡིན། ཁྱེད་རང་ཚོགས་དྲུང་སར་སོང་ནས་སློངས་དང་ཁོ་ཚོར་འདུག ཁ་ཉིན་འགན་འཛིན་ལས་འཕར་གཉིས་གསར་བསྐོ་སྐབས་ཀྱང་ཚོགས་དྲུང་ས་ནས་སྐྱ་དཔར་ཞིག་ཞུས་པ་ཡིན་ཞེས། འགན་འཛིན་རྣམ་པ་གསུམ་ཀྱིས་ཞལ་གཅིག་མཚུངས་ཀྱིས་འགྲེལ་བརྗོད་གནང་སོང་། སྤྱིར་བོད་གཞུང་ལ་ལས་ཆོད་མེད་པ་བདེན་ཡང་། ལོ་ངོ་གསུམ་མ་ཟིན་ཙམ་གྱི་རིང་འོས་བསྡུའི་སྒྲིག་གཞི་གསར་བ་དཔར་སྐྲུན་མ་ཐུབ་པར་ལྷག་པ་ནི་རྒྱུ་མཚན་གང་ལ་ཐུག་པ་དང་། ད་དུང་ནང་དོན་སོགས་ཀྱི་ཐད་གསལ་ཁ་མ་བྱུང་བ་ཡིན་ན། ཚོགས་གཙོ་སྤེན་པ་ཚེ་རིང་ལ་ནང་མོལ་ཞུས་པ་ཙམ་ཀྱིས་འགྲིག་འགྲོ་བ་ཞིག་རེད་དམ། 

༦༽ གཞན་ཡང་ཚོགས་གཙོ་སྤེན་པ་ཚེ་རིང་གིས་ཇ་ཁ་ཆང་ཁའི་ཉོག་བཤད་ཙམ་མ་ཡིན་པར། སྤྱི་འཐུས་གྲོས་ཚོགས་ཀྱི་གཞུང་འབྲེལ་ལས་རིམ་ཁག་གཙོ་སྐྱོང་བྱེད་སྐབས་ཀྱང་། ཁོ་བོ་༸རྒྱལ་རིན་པོ་ཆེར་མཚན་སྨད་ཞུ་མཁན་ཡིན་སྐོར་མིང་བཟུང་དོན་བཟུང་གིས་ནག་པོ་བཟོ་གང་ཐུབ་བྱེད་ཀྱིན་པ་ཀུན་གྱིས་མཁྱེན་གསལ་ཡིན་ན། ང་ནི་བཟང་ཡང་ངན་ཡང་མི་མང་གིས་འོས་བླུགས་ནས་སྤྱི་འཐུས་ཀྱི་སྒུག་ཐོའི་མཚམས་ལ་ཡོད་པ་སྤེན་པ་ཚེ་རིང་གིས་ཤེས་གསལ་ལྟར་རེད། དེར་བརྟེན། འོས་བསྡུའི་སྒྲིག་གཞིའི་ནང་འོས་བསྡུ་འགྲོ་བཞིན་པའི་སྐབས། ཁ་གཏད་འོས་མིར་རྐང་བཙུགས་ནས་གཞི་མེད་སྐྱོན་འཛུགས་མི་ཆོག་པ་དང་། དེ་ལྟར་བྱས་པ་ཡིན་ན་དོ་བདག་རང་ཉིད་ཀྱི་འདམས་བྱ་འདེམས་བྱེད་ཀྱི་ཐོབ་ཐང་ཕྱིར་བསྡུ་བྱ་ཆོག་སྐོར་འཁོད་ཡོད་སྟབས། དབུས་འོས་བསྡུ་ལས་ཁང་ངོས་ནས་སྒྲིག་གཞི་དེ་ཚོ་གཞིར་བཞག་སྤེན་པ་ཚེ་རིང་གི་སྐད་ཆར་བརྡ་འདེད་གཏོང་མྱོང་ཡོད་དམ་མེད།

དགོས་འདུན་ཁག 

༡༽   དབུས་འོས་བསྡུ་ལས་ཁང་ངོས་ནས་ཐོག་མར་བར་མའི་འོས་བསྡུ་བྱེད་ཆོག་པའི་ཁྲིམས་སྒྲིག་གི་དབང་ཚད་དམ། ཆ་རྐྱེན་ཡོད་མེད་གསལ་ཁ་འབྱེད་དགོས་ན། ཕྲན་གྱིས་གོང་དུ་དབུས་འོས་བསྡུ་ལས་ཁང་དང་། སྤྱི་འཐུས་རྒྱུན་ལས་བཅས་ལ་དོགས་འདྲི་ཁག་དྲུག་ཕུལ་ཡོད་པ་དེ་ཚོར་བར་མའི་འོས་བསྡུའི་སྔོན་དུ་ལན་འདེབས་ཁ་གསལ་ཞིག་གནང་ནས། མང་ཚོགས་ཀྱི་དོགས་གཞི་གཙང་མ་བཟོ་དགོས།

༢༽  (སྐབས་བཅོ་ལྔའི་ཚོགས་དུས་གཉིས་པར་) འོས་བསྡུའི་སྒྲིག་གཞིར་བཟོ་བཅོས་བརྒྱབ་སྟེ། སྤྱི་འཐུས་ཀྱི་འོས་མིར་བརྒྱ་ཆ་མི་དགོས་པ་བཟོས་པའི་ཁྲིམས་སྒྲིག་འདི་ལག་བསྟར་ཐད་གླེང་རྙོག་བྱུང་ཡོད་སྟབས། ཟླ་གཉིས་ལྷག་ལས་མེད་པའི་འཆར་ལོའི་ཕྱི་ཟླ་གསུམ་པའི་གྲོས་ཚོགས་ནང་། གྲོས་ཚོགས་སུ་སྤྱི་མོས་ཀྱིས་ཁྲིམས་སུ་བཅས་ཟིན་པ་དེ་རྩ་འཛིན་བྱེད་དགོས་པ་རེད་དམ། ཡང་ན་ཚོགས་གཙོས་ངག་ཐོག་གི་འགྲེལ་བཤད་དེ་རྩ་འཛིན་བྱེད་དགོས་ཀྱི་རེད། དེའི་གལ་གནད་ཐད་དོགས་གཅོད་བགྲོ་གླེང་མཐིལ་ཕྱིན་པ་གནང་ནས་གསལ་པོ་མ་བྱུང་བར་དུ་བར་མའི་འོས་བསྡུ་ཕྱིར་འགྱངས་བྱ་དགོས།

༣༽དབུས་འོས་བསྡུ་ལས་ཁང་གི་ངོས་ནས་ངའི་ཤུགས་རྐྱེན་གྱི་དབང་གིས་ཁྲིམས་ཀྱིས་སྐུལ་བའི་དབང་ཚད་ལག་བསྟར་མ་ཐུབ་པར། བར་མའི་འོས་བསྡུ་བྱ་དགོས་ཆགས་པའི་ར་སྤྲོད་གསལ་པོ་གནོངས་དང་། ཉི་མ་དེར་ཁོ་བོས་སྒུག་ཐོའི་ནང་དགོངས་པ་ཞུས་ཏེ་ངའི་རྗེས་ན་སུ་ཡོད་པ་དེ་རང་ཡར་བསྐོས་ནས་སྒྲིག་གཞི་ཚུལ་བཞིན་ལག་བསྟར་གནང་ན། ཁོ་བོར་རྩོད་གཞི་གང་ཡང་མེད་པ་ཡིག་ཐོག་ནས་ཕུལ་ཟིན་ལ་བསླར་ཡང་བསྐྱར་ནན་ཞུས་པ་ཡིན། 

༤༽ ཕྲན་གྱིས་འདེམས་དམངས་ཡོངས་ཀྱི་རེ་བཅོལ་གཞིར་བཞག་གིས།  ཡིན་ལུགས་ཚུལ་མཐུན་ངང་གང་ཞུས་པ་དེ་དག་སྣང་མེད་བཏང་སྟེ། དབུས་འོས་བསྡུ་ལས་ཁང་གི་ངོས་ནས་བར་མའི་འོས་བསྡུ་བྱས་པ་ཡིན་ན། ལས་རིམ་དེའི་ནང་ང་དང་ངའི་རྒྱབ་སྐྱོར་བ་རྣམས་ཀྱིས་གདམས་བྱ་འདེམས་བྱེད་ཀྱི་ཆ་ཤས་ལེན་དགོས་མིན་བསམ་གཞིགས་བྱ་རྒྱུ་མ་ཟད། དེ་འབྲེལ་གྱི་གླེང་རྙོག་ལྷག་འཕྲོས་བྱུང་ཚེ་འབྲེལ་ཡོད་ཚན་པའི་འགན་ཆ་ཚང་འཁུར་དགོས་ཡོད།།

                                                                           ཨ་ཚོགས་ཀླུ་མཁར་བྱམས་ཀྱིས། ཕྱི་ལོ་ ༢༠༡༢ ཟླ་ ༡༢ ཚེས་ ༢༨ ཉིན་ ༼དྷ་ས་ནས༽ གུས་ཕུལ།

དཔྱད་གཞི་རྒྱུ་ཆ:

·       ཚོགས་དྲུང་ལས་ཁུངས་ཀྱི་སྐྱ་དཔར།  (ལེའུ་བཞི་པ/ བོད་མི་མང་སྤྱི་འཐུས་ཀྱི་འོས་བསྡུ/ དོན་ཚན་ང་གཅིག་པ། འོས་ཤོག་གྲངས་བཤེར་དང་ཕྱོགས་བསྡོམས།ནང་གསེས་གཉིས)

·       <<བོད་ཀྱི་དུས་བབ>> https://tibettimes.net/news.php?showfooter=1&id=8340

·       གྲོས་ཚོགས་སྐབས་བཅོ་ལྔ་པ་ཚོགས་དུས་གཉིས་པ། (གྲོས་ཚོགས་ལས་རིམ་གསར་ཤོག)

·       སྒྲིག་གཞི་བསྐྱར་བཅོས་ཀྱི་ཁྲིམས་འཆར། (ཡིག་ཆ་ཨང་༡༡༩ པ།)

·       སྐབས་དེའི་ལས་རིམ་འོད་སྡེར་བཅས་ཡིན། 

ངོ་བཤུས་འབུལ་ཡུལ།

༡ དབུས་འོས་བསྡུ་ལྷན་ཁང་།

༢ ཚོགས་དྲུང་ལས་ཁུངས།

༣ བླ་བྲང་དགའ་ལྡན་ཕོ་བྲང་།

༤ ཆེས་མཐོ་ཁྲིམས་ཞིབ་ཁང་།

༥  བཀའ་ཤག་ལྷན་རྒྱས།