བླ་བྲང་དུ་གྲྭ་ཡན་གཙང་དག་བཟོ་རྒྱུ་ཡིན་ཟེར།

འདས་ལོའི་ཕྱི་ཟླ་ ༡༢ ཚེས་ ༡༣ ཉིན་བླ་བྲང་དགོན་པའི་དོ་དམ་ཁང་གིས་གྲྭ་ཡན་རྣམས་གཙང་དག་བྱེད་དགོས་ལུགས་ཀྱི་བཀའ་ཁྱབ་ཅིག་བཏང་འདུག

འདི་གར་བསོད་ནམས་ལགས་ཀྱིས་གནས་ཚུལ་བཏང་བ་ལྟར་ན། ༢༠༡༣ ཟླ་ ༡༢ ཚེས་ ༡༣ ཉིན་བླ་བླང་དགོན་པའི་དོ་དམ་ཁང་གིས་བཀའ་ཁྱབ་བཏང་སྟེ། དགོན་པའི་གྲྭ་བ་དོ་དམ་ཁང་གིས་གཙོ་འགན་འཁུར་ནས་བླ་བྲང་དགོན་གྱི་ཁོངས་གཏོགས་མིན་པའི་གྲྭ་བ་དང་བླ་བྲང་གླིང་དུ་རྒྱུན་སྡོད་ཀྱི་ཆོག་མཆན་ཐོབ་མེད་པའི་གྲྭ་ཡན་ཚང་མ་གཙང་དག་བྱ་རྒྱུ་ཡིན་ལ། དགོན་པའི་འཐུས་མི་ ༥༠ དང་གྲྭ་མང་གིས་བྱ་བ་དེར་རྒྱབ་སྐྱོར་གང་ལེགས་བྱེད་དགོས་ལུགས་བརྗོད་ཡོད་ཡོད་པ་དང་། དེར་རིམ་པ་ཁ་ཤས་ཡོད་པ་ལས་རིམ་པ་དང་པོ་དེ་ ༢༠༡༣ ལོའི་ཟླ་ ༡༢ ཚེས་ ༡ ནས་ ༢༠༡༤ ལོའི་ཟླ་ ༣ ཚེས་ ༡ ཉིན་བར་ལག་བསྟར་དོན་འཁྱོལ་བྱེད་དགོས་སྐོར་བསྒྲགས་འདུག

བཀའ་ཁྱབ་ནང་གི་དོན་ཚན་ཁག་ནི། གཅིག  བླ་བྲང་དགོན་པ་རང་གི་གྲྭ་རྒྱུན་གྱི་ཁོངས་སུ་མི་གཏོགས་ཤིང་གླིང་འདིར་རྒྱུན་སྡོད་ཆོག་མཆན་ཐོབ་མེད་པའི་གྲྭ་བ་རྣམ་གཙང་དག་བྱེད་དགོས།

གཉིས།  སྐོར་དང་པོ་གྲྭ་ཚང་ཕན་ཚུན་ལྔ་དང་། ནང་ཆེན་སོ་སོ་ན་ཡོད་པའི་གྲྭ་ཡན་ཡིན། གྲྭ་ཡན་གཙང་དག་སྐོར་རྗེས་མའི་མཚན་ཐོ་དང་གོ་རིམ་སོགས་དོ་དམ་ཁང་གིས་ཟུར་དུ་ཐག་གཅོད་བྱེད་རྒྱུ་ཡིན། གཙང་དག་བྱེད་ཡུལ་སྐོར་དང་པོ་ནི་ ༢༠༡༣ ལོའི་ཧོར་ཟླ་ ༡༢ པའི་ཚེས་ ༡ ནས་ཕྱི་ལོའི་ཟླ་བ་གསུམ་པའི་ཚེས་ ༡ བར་སོང་ཚར་དགོས་ལ། དེ་ཡང་གྲྭ་ཡན་གཙང་དག་གི་གོ་རིམ་དང་དུས་ཚོད་གཏན་ཁེལ་ལྟར་རིམ་པ་བཞིན་དུ་སོང་ཚར་བའི་བྱ་བ་ལེགས་པར་འགྲུབ་དགོས།

གསུམ།  དོ་དམ་ཁང་གི་ནང་ཁུལ་གྱི་འགན་འཁུར་བ་གཙོ་བོ་གྲྭ་བ་བདག་དོམ་ཁང་ཡིན་ལ། སློབ་སྦྱོང་ཨུ་ཡོན་ལྷན་ཁང་དང་། སྤྲུལ་སྐུ་གཞུང་སྒྲུབ་ཁང་གཉིས་ཀྱིས་གཞོགས་འདེགས་བྱ་དགོས། ལག་བསྟར་བྱེད་མཁན་ཚོགས་ཆེན་ཚོགས་འདུའི་རྒན་པ་དང་། གྲྭ་ཚང་དྲུག་གི་ཚོགས་འདུའི་རྒན་པ། ཐོས་བསམ་གླིང་གི་འཛིན་གྲྭ་གསུམ་པའི་སྐྱོར་དཔོན་རྣམ་པ་བཅས་ཡིན། ནང་ཆེན་སོ་སོར་ཚོགས་ཆེན་ཚོགས་འདུའི་རྒན་པ་ནས་བརྡ་སྤྲད་དེ་ལག་བསྟར་བྱ་དགོས། ཀྲུའུ་རིན་ཚོགས་འདུའི་གཙོས་དོ་དམ་ཁང་གི་མགོ་ཁྲིད་འོག་བདེ་འཇགས་ཚན་པ་དང་། གླིང་དཔོན་སོགས་འབྲེལ་ཡོད་སྡེ་ཁག་གི་མི་སྣ་སོགས་ཀྱིས་རང་རང་གི་སྐབས་སུ་བབས་པའི་བྱ་བ་གང་བཞག་ཐམས་ཅད་ལེགས་པར་བསྒྲུབ་དགོས། ཚོགས་ཆེན་གཙོས་གྲྭ་ཚང་སོ་སོའི་བླ་མ་ལས་སྣེ་རྣམ་པས་བསླབ་བྱ་དང་ཚོགས་གཏན་གནང་བ་སོགས་ཕྱོགས་གང་ཐད་ནས་གྲྭ་ཡན་གཙང་དག་གི་ཕྱོགས་ལ་རྒྱབ་སྐྱོར་གང་ལེགས་བྱེད་དགོས། དོ་དམ་ཁང་གི་ངོས་ནས་གྲྭ་ཡན་གཙང་དག་གི་འགན་ཁུར་བ་རྣམས་ལ་རྒྱབ་སྐྱོར་དང་རྟིང་གནོན་བྱེད་རྒྱུ། འཐུས་མི་ལྔ་བཅུ་དང་གྲྭ་མང་གི་ངོས་ནས་ཀྱང་གྲྭ་ཡན་གཙང་དག་ཕྱོགས་ལ་རྒྱབ་སྐྱོར་དང་དགའ་བསུ་གང་ལེགས་བྱེད་དགོས།

བཞི། ཚོགས་ཆོས་གྲྭའི་གྲས་སུ་གྲྭ་ཡན་ཕེབས་མི་ཆོག་པ་སྔོན་སྲོལ་ལྟར་དང་། གཞན་གསོ་སྦྱོང་དང་། གདུང་མདུན། ལྷ་ཚེས། སྨོན་ལམ། གསུང་ཆོས། གྲྭ་རྒྱུན་རྩོད་གྲྭ་ཟབ་སྦྱོང་འཛིན་གྲྭ་སོགས་སུའང་ཕེབས་མི་ཆོག འདི་ལ་སྨོན་ལམ་གསུང་ཆོས་སོགས་ཚོགས་ཆེན་གྱི་བྱ་བའི་སྐོར་གྱི་གྲྭ་ཡན་ཕེབས་མི་ཆོག་སར་ཚོགས་ཆེན་ཚོགས་འདུའི་རྒན་པས་ལྟ་རྟོག་དང་། གྲྭ་རྒྱུན་རྩོད་གྲྭར་ཐོས་བསམ་གླིང་གི་ཚོགས་འདུའི་རྒན་པས་ལྟ་རྟོག་དང་། ཟབ་སྦྱོང་འཛིན་གྲྭར་སློབ་སྦྱོང་གཞུང་སྒྲུབ་ཁང་ནས་ལྟ་རྟོག་བྱེད་དགོས།

ལྔ། ལོ་རྗེས་མའི་ནང་གྲྭ་ཡན་གཙང་དག་གི་བྱ་བ་ཐམས་ཅད་ལེགས་པར་བསྒྲུབ་ཐུབ་པ་བྱེད་དགོས་ལ། རྗེས་སོར་གྲྭ་ཤག་དང་། ནང་ཆེན། གཞུང་ཁང་སོ་སོ་ནས་གྲྭ་ཡན་སོགས་ལ་གནས་ཚང་གཏོང་མི་ཆོག་པ་བཅས་དོ་དམ་ཁང་ནས་ཡིག་ཆ་འདི་ཐག་གཅོད་བྱས་པ་ཡིན། ཞེས་བཀོད་འདུག