དེ་རིང་བོད་ཀྱི་གསོ་བ་རིག་པའི་ཆེས་མཐོའི་སྨན་པའི་ལྷན་ཚོཊ་ཀྱི་མཛད་སྒོའི་སྟེང་ཚོགས་གཙོས་འབྲེལ་ཡོད་འཛིན་སྐྱོང་གིས་ལྷན་ཚོགས་ཀྱི་རྒྱུན་གྲོན་ཐོག་དགོངས་པ་བཞེས་དགོས་ཚུལ་དང་། བཀའ་སྤྱི་གཉིས་ཀྱིས་ལྷན་ཚོགས་ཀྱི་སྒྲིག་གཞིར་བསྐྱར་བཅོས་གནང་དགོས་སྐོར་སོགས་བརྗོད་སོང་།
དེ་རིང་སྔ་དྲོའི་ཆུ་ཚོད་ ༡༠།༠༠ བའི་སྟེང་། བོད་ཀྱི་གསོ་བ་རིག་པའི་ཆེས་མཐོའི་སྨན་པའི་ལྷན་ཚོགས་ཀྱི་ཡིག་ཚང་དུ། ལྷན་ཚོགས་གསར་འཛུཊ་གནང་སྟེ་ལོ་ ༡༠ འཁོར་བའི་མཛད་སྒོ་ཞིག་ཚོགས་ཡོད་ཅིང་། དེར་སྨན་པའི་ལྷན་ཚོགས་ཀྱི་ཚོགས་གཙོ་གཞོན་གཉིས་དང་། དྲུང་ཆེ། སྐུ་བཅར་སྨན་པའི་སྐུ་ཚབ། ཚོགས་ཟུར་དང་སྐབས་བཞིའི་རྒྱུན་ལས་བཅས་ལྷན་འཛོམས་ཐོག ཚོགས་གཙོ་སྨན་རམས་པ་བཟོད་པ་ལགས་ཀྱིས་ ༢༠༡༣ ལོའི་ལས་བསྡོམས་སྙན་སྒྲོན་གནང་སོང་།
ལས་བསྡོམས་ནང་གསལ་བ་ལྟར་ན། ལྷན་ཚོཊ་ཐེངས་ཉི་ཤུ་བའི་ཐོག་བོད་ཀྱི་གསོ་བ་རིག་པའི་སྨན་དང་སྨན་སྦྱོར་ཚད་ལྡན་རྩ་འཛིན་སྒྲིག་གཞིར་བསྐྱར་བཅོས་གནང་ཡོད་པ་དང་། སྨན་རྩིས་ཁང་གི་སྨན་སྦྱོར་ཁང་ ༢༠༡༣ ལོའི་ཟླ་ ༧ ཚེས་ ༡ ནས་ ༢༠༡༦ ལོའི་ཟླ་ ༦ ཚེས་ ༣༠ བར་གྱི་ལོ་གསུམ་རིང་སྨན་སྦྱོར་ཁང་ཚད་ལྡན་ཞིག་ཏུ་འཕྲལ་སེལ་དེབ་སྐྱེལ། བོད་དང་ཧི་མ་ལ་ཡའི་སྔོ་སྦྱོར་ཁང་ ༢༠༡༣ ལོའི་ཟླ་ ༧ ཚེས་ ༡༨ ནས་ ༢༠༡༦ ལོའི་ཟླ་ ༧ ཚེས་ ༧ བར་དེབ་སྐྱེལ་ངོས་ལེན། ལ་དྭགས་དབུས་གཞུང་ནང་པའི་མཐོ་རིམ་སློབ་གཉེར་ཁང་ ༢༠༡༣ ལོའི་ཟླ་ ༩ ཚེས་ ༢༦ ནས་བོད་ཀྱི་གསོ་བ་རིག་པའི་སྨན་པ་དཀའ་བཅུ་བའི་སློབ་གཉེར་ཁང་དུ་གཏན་འཇགས་ངོས་ལེན་གནང་ཡོད་འདུག
དེ་བཞིན། གསོ་བ་རིག་པ་རྒྱ་གར་གཞུང་གིས་ཁྲིམས་མཐུན་ངོས་ལེན་གནང་རྗེས་ལྷན་ཚོགས་ཐེངས་ཉི་ཤུ་བའི་གྲོས་ཆོད་ལྟར། ཧི་མ་ཅཱལ་མངའ་སྡེའི་འཕྲོད་བསྟེན་ལས་ཁུངས་སུ་ལྷན་ཚོགས་ཀྱི་ངོ་སྤྲོད་དང་སྦྲགས་གསོ་རིག་སྨན་པའི་མཚན་ཐོ་ཕུལ་བ་དང་། ༢༠༡༣ དང་ ༢༠༡༤ སྨན་པའི་ཤེས་ཡོན་གོང་སྤེལ་གྱི་ཟབ་འཁྲིད་དང་གསོ་བ་རིག་པའི་རྒྱལ་ཡོངས་ཚོགས་ཆེན་གོ་སྒྲིག་ཆེད་རྒྱ་གར་སྲོལ་རྒྱུན་ཨྰ་ཡུ་ཤའི་འབྲེལ་ཡོད་ལས་ཁུངས་ལ་དཔལ་འབྱོར་གྱི་རོགས་རམ་གནང་རྒྱུའི་ལས་འཆར་ཕུལ་བ། བོད་མིའི་སྒྲིག་འཛུགས་རྩིས་ཞིབ་ལས་ཁུངས་ཀྱིས་འདས་པའི་ལོ་དགུའི་རིང་གི་རྩིས་ཞིབ་གནང་གི་ཡོད་ཅིང་། ༢༠༡༣ ཟླ་ ༤ ཚེས་ ༡ ནས་ཟླ་ ༡༢ ཚེས་ ༣༡ བར་སྨན་པ་ ༩ དེབ་སྐྱེལ་གནང་སྟེ་ད་བར་ཁྱོན་སྨན་པ་ ༤༣༢ ལྷན་ཚོགས་འོག་དེབ་སྐྱེལ་ཞུས་ཡོད་འདུག ད་དུང་། ༢༠༡༣ ལོར་བོད་དང་ཧི་མ་ལ་ཡའི་སྔོ་སྦྱོར་ཁང་བོད་ཀྱི་གསོ་རིག་སྨན་སྦྱོར་སྡེ་ཚན་ཚད་ལྡན་ཞིག་ཏུ་ལོ་གསུམ་རིང་འཕྲལ་སེལ་དེབ་སྐྱེལ་དང་། ད་ལྟའི་འཆར་སྨན་སྦྱོར་ཁང་ཚད་ལྡན་གཏན་འཇགས་དེབ་སྐྱེལ་ཞུས་ཟིན་པ་གཅིག་དང་། འཕྲལ་སེལ་དེབ་སྐྱེལ་ཞུས་ཟིན་པ་གསུམ་བཅས་ཡོད་འདུག
མཇུག་ཏུ་ཚོགས་གཙོ་ལགས་ཀྱིས། བོད་ཀྱི་གསོ་བ་རིག་པའི་ཆེས་མཐོའི་སྨན་པའི་ལྷན་ཚོགས་འདི་ཐོག་མར་རང་གཞུང་ནས་དགོངས་པ་ཆེ་བཞེས་ཀྱིས་བོད་ཀྱི་གསོ་བ་རིག་པའི་སྨན་དང་སྨན་སྦྱོར། གསོ་རིག་སྨན་པ་དང་སྨན་གྱི་སློབ་གཉེར་བ་བཅས་ཚད་ལྡན་སྟངས་འཛིན་ཡོང་ཆེད་གསར་འཛུགས་གནང་བ་རེད། ཚོང་དང་ཁེ་ཡོད་ཀྱི་ཚོགས་པ་གཞན་དང་མི་འདྲ་བར་གསོ་བ་རིག་པའི་ཁྲིམས་སྒྲིག་སྟངས་འཛིན་གྱི་སྒྲིག་འཛུཊ་གལ་ཆེན་ཞིག་ཆགས་ཡོད་སྟབས། འབྲེལ་ཡོད་འཛིན་སྐྱོང་ནས་ཞུ་ཧམ་རྣར་གཟོན་དུ་མ་དགོངས་པར་ལྷན་ཚོགས་ཀྱི་རྒྱུན་གྲོན་ཐོག་ཇི་དགེའི་དགོངས་བཞེས་རྒྱུ་དང་། ལྷན་ཚོགས་ཀྱིས་བཀའ་སྤྱི་གཉིས་ལ་ལྷན་ཚོགས་ཀྱི་ཁྲིམས་སྒྲིག་ལ་བསྐྱར་ཞིབ་གནང་རྒྱུ་གལ་ཆེན་ཡིན་ཚུལ་ཞུས་ཡོད་ཅེས་སོགས་བརྗོད་བྱུང་།
ཚོགས་གཙོས་མུ་མཐུད་དོན། “ ད་ལྟའི་ཆར་སྨན་པའི་ལྷན་ཚོགས་ཀྱི་དཀའ་ངལ་གཙོ་བོ། ཁྲིམས་སྒྲིག་ནང་གསལ་བ་ལྟར་ཚོགས་མི་ཏག་ཏག་དགོས་པ་དང་། མ་འོངས་ལས་དོན་བྱེད་ཕྱོགས་ཐོག་སྔོན་མའི་ཁྲིམས་སྒྲིག་རན་མ་རན་དང་། ཁ་སྣོན་ག་རེ་རྒྱག་དགོས་མིན་ཆགས་ཡོད་པ་རེད། དེའི་སྐོར་གྲོས་ཚོགས་ལ་ཕུལ་ཡོད་ཀྱང་བསྐྱར་ཞིབ་སོང་ཡོད་པ་མ་རེད། དེ་དག་བྱུང་བ་ཡིན་ན་སྨན་པའི་ལྷན་ཚོགས་ཀྱི་དམིགས་ཡུལ་དང་དགོས་པ་ལ་དཔག་པའི་ལས་དོན་འགྲུབ་ཐུབ་མིན་དང་། ཚོགས་མིའི་ཆ་ཤས་ལེན་མཁན་ཚོར་དཀའ་ངལ་འཕྲད་ཀི་མ་རེད། ང་ཚོའི་སྐབས་འདིར་མཚོན་ན་སྨན་རྩིས་ཁང་ལ་སྐུ་ཚབ་བཞི་ཡོད་ཀྱང་། ད་ལྟ་སྐུ་ཚབ་གསུམ་ལས་ཡོད་པ་མ་རེད། འཕྲོད་བསྟེན་གྱི་སྐུ་ཚབ་ཡང་ཏག་ཏག་ཚང་ཡོད་པ་མ་རེད། མ་འོངས་པར་དེ་དག་གི་ཐོག་ཡག་པོ་དང་གསལ་བོ་ཆགས་པ་ཡིན་ན་ཡག་པོ་ཡོང་གི་རེད།”ཅེས་སོགས་བརྗོད་བྱུང་།
གསར་འགོད་པ། དོན་གོ
ལོ་འཁོར་མཛད་སྒོའི་སྟེང་བོད་གཞུང་འཕྲོད་བསྟེན་ལས་ཁུངས་དང་དབུས་བོད་ཀྱི་སྨན་རྩིས་ཁང་གི་གཞུང་འབྲེལ་སྐུ་མགྲོན་མེད་དོན་ག་རེ་ཡིན་ནམ། ཆེས་མཐོའི་སྨན་པའི་ལྷན་ཚོགས་འདི་ལ་བོད་མི་མང་སྤྱི་འཐུས་ལྷན་ཚོགས་ཀྱིས་ཐག་གཅོད་གཙང་མ་ཞིག་བྱས་ན་མ་གཏོགས་འདི་ལྟར་བཞག་ན་དངོས་ནས་དྲང་གནས་ཆོ་མེད་པ་ཞིག་ཆགས་འདུག