ཟླ་རྗེས་མར་བོད་ཀྱི་གཞོན་ནུ་ལྷན་ཚོགས་ཀྱིས་མི་གྲངས་ ༥༥ ཡིས་ངྷ་རམ་ས་ལ་ནས་ལྡི་ལིའི་བར་ཞི་བའི་གོམ་བགྲོད་ལས་འགུལ་ཞིག་སྤེལ་རྒྱུ་ཡིན་པའི་གསལ་བསྒྲགས་སྤེལ་སོང༌།
དེ་རིང་སྔ་དྲོའི་ཆུ་ཚོད་ ༡༡།༡༥ སྟེང༌། ངྷ་རམ་ས་ལའི་དབུས་བོད་ཀྱི་གཞོན་ནུའི་སྤྱི་ཁྱབ་རྒྱུན་ལས་ཁང་ནས་གསར་འགོད་གསལ་བསྒྲགས་ཤིག་སྤེལ་ཏེ། ཟླ་རྗེས་མའི་ཚེས་ ༨ ཉིན་ནས་བོད་མིའི་སྒེར་ལངས་ཉིན་མོ་སྟེ་ཕྱི་ཟླ་ ༣ ཚེས་ ༡༠ ཉིན་བར། བོད་མི་ ༥༥ ཡིས་ངྷ་རམ་ས་ལ་ནས་མགོ་བཙུགས་ཏེ་སྤྱི་ལེ་ ༦༠༠ ལྷག་གི་སར་ཡོད་པའི་རྒྱ་གར་རྒྱལ་ས་ལྡི་ལི་གསར་བའི་བར། བོད་མིའི་སྒེར་ལངས་གོམ་བགྲོད་ཅེས་པའི་ལས་འགུལ་ཞིག་སྤེལ་རྒྱུ་ཡིན་སྐོར་བསྒྲགས་སོང༌།
དེའི་སྐོར་ལ་གཞོན་ནུའི་ཚོགས་གཙོ་བསྟན་འཛིན་འཇིགས་མེད་ལགས་ཀྱིས། ང་ཚོ་རྒྱུན་ལས་གསར་པ་ཚོ་འོས་འདེམས་བྱས་ཏེ་ཟླ་ ༦ འགྲོ་བཞིན་ཡོད་ཅིང༌། དུས་ཡུན་དེའི་ནང་ང་ཚོས་ཆབ་སྲིད་ཀྱི་ལས་འགུལ་གཙོས་སྐད་ཡིག་དང་རིག་གཞུང་སྲུང་སྐྱོབ། སྤྱི་ཚོགས་ཞབས་ཞུ་སོགས་ཀྱི་ལས་འགུལ་གང་འཚམ་ཞིག་སྤེལ་ཡོད། འོན་ཀྱང་ང་ཚོ་རང་དབང་ལུང་པར་སྡོད་མཁན་ཚོར་འགན་ཆེན་པོ་ཞིག་ཡོད་པ་དང༌། ལྷག་པར་དུ་བོད་ཀྱི་གཞོན་ནུ་ལྷན་ཚོགས་ལྟ་བུ་མཚོན་ན་བོད་ཕྱི་ནང་གཉིས་ཀྱི་བོད་མི་ཚོས་ཡིད་ཆེས་དང་རེ་བ་བྱེད་ཡུལ་ཞིག་ཆགས་ཡོད་སྟབས། ང་ཚོས་ངོས་ནས་བོད་ནང་གི་སྤུན་ཟླ་ཚོར་གདུང་སེམས་མཉམ་སྐྱེད། ལྷག་དོན་དུ་སྐུ་ལུས་མེར་བསྲེགས་གནང་མཁན་ཚོའི་འབོད་སྒྲ་ལ་གུས་བཀུར། བོད་ནང་གི་གནས་སྟངས་རྒྱལ་སྤྱིའི་སྡིངས་ཆར་ཁྱབ་བསྒྲགས་བཅས་ཀྱི་ཆེད་དུ། ད་རེབ་ལས་འགུལ་འདི་གོ་སྒྲིག་བྱས་པ་ཡིན་ཞེས་སོགས་བརྗོད་སོང༌།
གསར་འགོད་གསལ་བསྒྲགས་ནང་ “བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཇེ་ཞན་ཇེ་སྡུག་ཏུ་འགྲོ་བཞིན་ཡོད་པ་དང༌། རྒྱ་ནག་གི་དཔལ་འབྱོར་ཡར་རྒྱས་འཛམ་གླིང་གི་ཡང་རྩེར་སྙེག་བཞིན་པའི་སྐབས་འདིར་རྒྱ་གཞུང་གིས་གདེང་སྤོབས་ཆེན་པོས་བོད་ནང་གི་བོད་མི་ ༡༢༥ ལྷག་གི་གཅེས་པའི་ལུས་སྲོག་མེ་རུ་བསྒྲོན་ནས་ “༧གོང་ས་མཆོག་བོད་ལ་གདན་འདྲེན་ཞུ་དགོས། བོད་ལ་རང་དབང་དགོས། བོད་ལ་རང་བཙན་དགོས།” སོགས་ཀྱི་དགོས་འདུན་དང་ཞུ་འབོད་ཁག་ལ་བཟང་ཕྱོགས་ཀྱི་ཡ་ལན་སྤྲོད་རྒྱུ་ལས་ལྡོག་སྟེ། བོད་ནང་བོད་མི་ཚོར་བཟོད་པར་དཀའ་བའི་དམ་དྲག་དང་བཙན་གནོན་ཇེ་ཆེར་གཏོང་བཞིན་པ་མ་ཟད། ༧གོང་ས་མཆོག་ལ་གཞི་མེད་མཚན་སྨོད་བྱེད་པ། འཛམ་གླིང་ནང་དྲང་བདེན་མིན་པའི་འཁྱོག་བཤད་སྣ་མང་བྱེད་པ་སོགས་རྒྱ་གཞུང་གིས་བོད་ཐོག་འཛིན་པའི་སྲིད་ཇུས་ཇེ་ཞན་ཇེ་སྡུག་ཏུ་འགྲོ་བཞིན་པ་ནི་རང་ཅག་བོད་མི་རྣམས་ཀྱི་སེམས་ལ་བཟོད་ཐབས་མེད་པའི་ན་ཟུག་ཞིག་ཆགས་ཡོད”ཅེས་སོགས་བཀོད་འདུག
གོམ་བགྲོད་ནང་མི་ ༥༥ འདེམས་དགོས་པའི་རྒྱུ་མཚན་སྐོར་གསལ་བསྒྲགས་ནང༌། ༢༠༡༤ ཟླ་ ༣ ཚེས་ ༡༠ ཉིན་ནི། ༡༩༥༩ ལོར་བོད་མི་ཚོས་རྒྱ་དམར་གྱི་དབང་བསྒྱུར་ལ་ངོ་རྒོལ་སྒེར་ལངས་བྱས་ཏེ་ལོ་ངོ་ ༥༥ ཧྲིལ་པོ་འཁོར་བའི་དུས་ཚིགས་ཤིག་ཆགས་ཡོད་སྟབས། གོམ་བགྲོད་པ་བོད་མི་ ༥༥ ནི་རྒྱ་དམར་གྱི་དབང་བསྒྱུར་དང་བཙན་གནོན་འོག་གི་བོད་མི་རྣམས་ཀྱིས་ཡ་ང་བའི་མུན་ནག་གི་ལོ་ངོ་ ༥༥ བཟོད་པར་དཀའ་བའི་སྡུག་བསྔལ་གྱི་ནང་སྐྱེལ་བའི་ལོ་གྲངས་མཚོན་བྱེད་ཅིག་ཡིན་ཞེས་བཀོད་འདུག
ཐེངས་འདིའི་ལས་འགུལ་དང་བསྟུན་ཏེ་ལྡི་ལིའི་རྒྱ་ནག་གཞུང་ཚབ་ཏུ་དགོས་འདུན་དོན་ཚན་ ༥ ཅན་གྱི་ཡིག་ཆ་ཞིག་འབུལ་རྒྱུ་ཡིན་འདུག་ལ། དེ་དང་མཉམ་དུ་མཉམ་འབྲེལ་རྒྱལ་ཚོགས་ལས་ཁུངས་དང༌། ལྡི་ལིའི་རྒྱལ་ཁབ་ཁག་གི་གཞུང་ཚབ་བཅས་སུ་ཡང་གཞོན་ནུའི་དགོས་འདུན་དེར་རྒྱབ་སྐྱོར་གྱིས་རྒྱ་གཞུང་ལ་གནོན་ཤུགས་སྤྲོད་དགོས་པའི་འབོད་སྐུལ་ཞུས་འདུག
གསལ་བསྒྲགས་ནང༌། གལ་སྲིད་རྒྱ་གཞུང་གིས་བོད་ཀྱི་གཞོན་ནུ་ལྷན་ཚོགས་ཀྱི་དགོས་འདུན་ཁག་ལ་དོན་ཕན་ལྡན་པའི་ཡ་ལན་མ་བྱུང་ཚེ། བོད་ཀྱི་གཞོན་ནུ་ལྷན་ཚོགས་ཀྱིས་ལས་འགུལ་ནམ་ཡང་མཚམས་འཇོག་བྱ་རྒྱུ་མིན་སྐོར་དང༌། དེ་བཞིན། རྒྱལ་ཚོགས་དང་རྒྱལ་ཁབ་ཁག་གིས་གཞོན་ནུའི་དགོས་འདུན་ལ་རྒྱབ་སྐྱོར་མ་བྱས་ཚེ། བོད་ཀྱི་གཞོན་ནུ་ལྷན་ཚོགས་ཀྱིས་འབོད་སྐུལ་ལས་འགུལ་སྔར་ལས་ཚད་ཇེ་མཐོ་དང་ཤུགས་ཇེ་ཆར་གཏོང་རྒྱུ་ཡིན་ཞེས་སོགས་བཀོད་འདུག
དགོས་འདུན་ཁག་ནི། དང་པོ། ༢༠༠༩ ཟླ་བ་ ༢ ནས་བཟུང་བོད་ནང་བོད་མི་ ༡༢༥ ཡིས་རྒྱ་ནག་གཞུང་ལ་ངོ་རྒོལ་གྱིས་རང་ལུས་མེར་བསྲེགས་བཏང་ནས་༧གོང་ས་མཆོག་བོད་ལ་གདན་ཞུ་དགོས་པ་སོགས་ཀྱི་དགོས་འདུན་ལ་རྒྱ་གཞུང་གིས་དྲང་བདེན་གྱི་ཡ་ལན་སྤྲོད་དགོས། གཉིས་པ། རྒྱ་ནག་གི་བཙོན་ཁང་འདྲ་མིན་ནང་སྡུག་སྦྱོང་མྱོང་བཞིན་པའི་ ༧ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་དང་སྤྲུལ་སྐུ་བསྟན་འཛིན་བདེ་ལེགས། རོང་རྒྱས་ཨ་གྲགས་སོགས་ཀྱིས་གཙོས་པའི་ཆབ་སྲིད་བཙོན་པ་རྣམས་མྱུར་དུ་ཀློད་གྲོལ་དགོས། གསུམ་པ། རྒྱལ་སྤྱིའི་རང་དབང་ཅན་གྱི་གསར་འགོད་པ་དང༌། གཟུར་གནས་ཀྱི་རྒྱལ་སྤྱིའི་གཞོན་ནུའི་སྒྲིག་འཛུགས་ཤིག་གི་སྐུ་ཚབ་བོད་ནང་གི་དངོས་ཡོད་གནས་སྟངས་རྟོག་ཞིབ་ཆེད་གཏོང་དགོས། བཞི་པ། རྒྱ་ནག་གཞུང་ནས་བོད་ནང་བོད་མིའི་ངོ་བོ་སྲུང་སྐྱོབ་ལ་ཉེན་ཚབས་ཆེ་བའི་རྒྱའི་མི་སེར་སྤེལ་བའི་སྲིད་ཇུས་ལག་བསྟར་དང༌། བཙན་དབང་གིས་རྒྱལ་གཅེས་ཆོས་གཅེས་སློབ་གསོ་སྤེལ་བཞིན་པ་འཕྲལ་དུ་མཚམས་འཇོག་དགོས། ལྔ་པ། ཨེ་ཤ་ཡའི་སྣོད་བཅུད་དང་ཞི་བདེ། དེ་བཞིན་གོ་ལ་ཧྲིལ་པོ་འགྱུར་ལྡོག་ལ་འབྲེལ་བ་ངེས་ཅན་ཡོད་པའི་འཛམ་གླིང་ཡང་རྩེའི་བོད་ཀྱི་ཕུན་སུམ་ཚོགས་པའི་རང་བྱུང་ཁོར་ཡུག་ལ་རྡུལ་ཚོན་ཚོད་ལྟ་དང༌། ཤིང་ནགས་གཅོད་བྲེག གཏེར་ཁ་སྔོག་འདོན་སོགས་ཀྱིས་མཚོན་པའི་ཁོར་ཡུག་ལ་གཏོར་སྐྱོན་ཚབས་ཆེན་བཟོ་བཞིན་པ་འཕྲལ་དུ་མཚམས་འཇོག་དགོས་ཞེས་བཀོད་འདུག
མཇུག་ཏུ་གསར་འགོད་པ་ཚོས་ཐེངས་འདིའི་ལས་འགུལ་ནང་ཞུགས་མཁན་འདེམས་སྒྲུག་བྱས་ཡོད་མེད་དྲི་བ་བཏོན་པའི་ལན་དུ། ཚོགས་གཙོ་ལགས་ཀྱིས། ད་སྔ་མི་གཏན་འཁེལ་བྱེད་ཐུབ་མ་སོང༌། ང་ཚོས་ས་གནས་ཁག་ལ་གསལ་བསྒྲགས་བཏང་ཡོད། ལས་འགུལ་འདིའི་ནང་གཞོན་ནུའི་ཚོགས་མི་ཡིན་མིན་ལ་མ་ལྟོས་པར་མི་ ༥༥ ཏག་ཏག་མཉམ་ཞུགས་བྱེད་ཆོག་གི་ཡོད་པ་རེད། ལས་འགུལ་འདིར་ཞུགས་འདོད་ཡོད་མཁན་ཚོས་ན་གཞོན་ནུའི་དབུས་ས་གང་ལ་འབྲེལ་བ་བྱས་ཀྱང་འགྲིག་གི་རེད་ཅེས་སོགས་བརྗོད་སོང༌།
གསར་འགོད་པ། ལྷ་སྐྱབས་རྒྱལ།
གཞོན་ནུ་ཚོགས་པར་སྒྲིགས་ཆས་བོད་ལྭ་སྔོ་སྐྱ་ཞིག་གོན་རྒྱུ་ཡོད་པ་དེ། ད་མེད་པའམ་གྱོན་མི་དགོས་པ་བཟོས་ཡོད་ས་རེད།
ཤར་ཙི་ནའི་ཡུལ་གྱིས་རྒྱ་བྱ་ཁུག་རྟ་འདི་ཤར་གྱི་རྒྱལ་སྲས་ལ་རྫུས་ནས་ཐན་སྐད་གཅིག་གཞོན་ནུའི་རྩ་དོན་ལས་འགུལ་སྤེལ་འཆར་གྱི་སྟེང་དུ་བསྒྲགས་འདུག་ག།
བོད་ནང་རེ་བ་སྟོང་པ་མ་སྤྲོད་ཟེར། ད་དུང་མེར་སྲེག་གི་ལས་འགུལ་ཚང་མ་དབུ་མའི་ལམ་གྱི་༧གོང་ས་མཆོག་བོད་དུ་གདན་འདྲེན་ཞུ་རྒྱུའི་ཆེད་ཡིན་རབས་ཟེར།
འོ་ན་མེར་སྲེག་གནང་མཁན་མང་པོའི་ཞལ་ནས་དང་ཡིག་ཐོག་ད་དུང་ལག་སྟེང་དུ་བྲིས་ཡོད་པའི་རང་དབང་དང་རང་བཙན་ཞེས་པའི་ཚིག་འབྲུ་དེ་གཉིས་ཁྱོད་དབུ་ལམ་པ་ཚོས་ཁྱུར་མིད་བཏང་དགོས་དོན་ཅི་ཡིན་ནམ། ལར་ནས་བོད་དང་བོད་མི་རིགས་ཀྱི་རྩ་དོན་ཆེད་རང་བསྲེག་གནང་མཁན་ཚང་མས་ཡིག་ངག་གཉིས་ཀའི་སྟེང་དབུ་མའི་རང་སྐྱོང་དགོས་ཞེས་བཤད་པ་སུ་གཅིག་གིས་ཀྱང་གོ་ཐོས་བྱུང་མི་འདུག་ན། ཁྱོད་ཐན་བྱས་ཇི་ལྟར་ཤེས་པ་རེད། ༧རྒྱལ་བ་རིན་པོ་ཆེ་བོད་ལ་གདན་དྲངས་དགོས་ཞེས་པ་ནི་མགྲིན་དབྱངས་གཅིག་རེད། དེ་ནི་༧རྒྱལ་བ་རིན་པོ་ཆེ་བོད་ལ་ཞབས་སོར་འཁོད་ཐུབ་ན་རང་དབང་དང་བདེ་སྐྱིད་ཐམས་ཅད་འབྱུང་ངེས་པའི་རེ་བ་འབུམ་གྱིས་ཁེངས་ཡོད་པ་རེད། འོན་ཀྱང་༧རྒྱལ་བ་རིན་པོ་ཆེ་བོད་ལ་ཞབས་སོར་འཁོད་ཐུབ་པ་ཙམ་གྱིས་ཏང་ཀྲུང་དབྱང་སྲིད་གཞུང་གིས་བོད་མི་རིགས་ལ་རང་དབང་དང་བདེ་སྐྱིད་ཡང་དག་པ་ཞིག་བསྟེར་རྒྱུའི་ངེས་པ་གཏན་ནས་མེད་པ་རེད། རྒྱུ་མཚན་ཧུའུ་ཡའོ་པང་གི་དོན་མཚན་ལྔའི་ཆ་རྐྱེན་ངོས་ལེན་གནང་ཡོད་ན་བོད་ལ་ཕེབས་ཐུབ་ཡོད་ངེས་པ་རེད། ད་ལྟའི་ཀྲུང་ནན་ཧེའེ་སྲིད་གཞུང་གིས་ཧུའུ་ཡོའོ་པང་གིས་དོན་མཚན་ལྔའི་ཆ་རྐྱེན་ལས་ཞན་པ་ཞིག་མ་གཏོག་དེ་ལས་བཟང་བ་ཞིག་ནམ་ཡང་འདོན་མི་སྲིད་པ་རེད་ལ། དེ་ནི་འདས་པའི་ཉམས་མྱོང་ལས་གསལ་གསལ་དག་དག་ཆགས་ཚར་བ་རེད། ༧རྒྱལ་བ་རིན་པོ་ཆེས་ཀྱང་དུས་ནས་དུས་སུ་ཁོང་སྐུ་སྒེར་གྱི་གནད་དོན་མིན་གཞིས་བྱེས་མི་དམངས་ཀྱི་བདེ་སྡུག་གི་གནད་དོན་ཡིན་ཞེས་གསུང་གི་ཡོད་པ་རེད།
འོན་ཀྱང་ཡ་མཚན་སྐྱེས་གཞི་ཞིག་ལ་བཙན་བྱོལ་སྲིད་གཞུང་གིས་ལམ་དབུ་མའི་བཞེངས་ཕྱོགས་བརྩལ་དུ་བཏོན་པ་ནས་བཟུངས་བོད་ནང་རང་བསྲེག་གི་གནས་དོན་ཛ་དྲག་ཏུ་ཇི་ལྟར་གྱུར་བ་རེད། ཕྱི་ཕྱོགས་ནས་གཞུང་འབྲེལ་མ་ཡིན་པའི་ཚོགས་པ་ག་གེ་མོས་སྐད་རྫིག་པོ་ཞིག་བརྒྱབས་ནས་བོད་ནང་རེ་བ་སྟོང་པ་ཞིག་སྤྲད་པ་རེད་ཡང་ན། བཙན་བྱོལ་སྒྲིག་འཛུགས་གཞུང་དང་བཅས་པས་པེ་ཅིང་སྲིད་གཞུང་དང་ལག་པ་བཏང་ནས་ལམ་དབུ་མའི་རང་སྐྱོང་འོག་༧རྒྱལ་བ་རིན་པོ་ཆེ་བོད་དུ་གདན་འདྲེན་ཞུ་རྒྱུ་ཡོད་མདོག་གིས་སྟོང་སྐད་ལུང་པ་གང་བསྒྲགས་པ་དེས་ཨེ་རེད།
དོན་གྱི་བདག་པོ་ཚོར་ཕོག་ཐུག་འགྲོ་གཞི་དང་དཔའ་བོ་དཔའ་མོ་ཚོའི་བླ་བཙོང་མཁན་ནི་པེ་ཅིང་སྲིད་གཞུང་དང་རྐུབ་གྲལ་བཏང་ནས། བོད་དང་བོད་མི་རིགས་ས་ཡ་བརྒལ་བ་དམར་གསོད་བཏང་བའི་རོ་ཐོག་ཏུ་ཏང་དར་དམར་ལིང་ལིང་འཕྱར་ནས་རྟ་རྒྱུགས་གཏོང་མཁན་གྱི་སྐབས་འཚོལ་རིང་ལུགས་པའི་སྲིད་དོན་ཚོང་པའི་ཤོག་ཁག་ཁྱོད་ཚོ་ལས། སྒོར་རྡོག་ཁ་ཤས་ཀྱི་ཞལ་འདེབས་བསྡུས་ནས་རང་དོན་རྒྱབ་ཏུ་བསྐྱུར་ངལ་བ་ཁྱད་དུ་བསད་དེས་གཞུང་ལམ་དུ་ཐོན་ནས་ལས་འགུལ་སྤེལ་མཁན་གྱི་གཞུང་འབྲེལ་མ་ཡིན་པའི་ཚོགས་པ་དེ་ཚོ་ཁྱོན་ནས་མ་རེད།
ཅི་སྟེ་བོད་ནང་བརྡབ་གསིག་གཏོང་རྒྱུ་ཞིག་ཡོད་ན་ནི་བཙན་བྱོལ་སྲིད་དོན་ཚོང་པའི་ཤོག་ཁག་གིས་རང་སྐྱོང་གི་དགེ་མཚན་ཡོད་རབས། རྒྱལ་སྤྱི་དང་ལྷག་པར་རྒྱ་རིགས་ཀྱིས་བརྒྱབ་སྐྱོར་ཡོད་རབས། གལ་ཏེ་རང་སྐྱོང་གང་མགྱོགས་མ་ལོན་ན་བོད་ཀྱི་ཆོས་དང་རིག་གཞུང་མི་རིགས་བཅས་པ་རྩ་མེད་འགྲོ་རབས་ཀྱིས་དབུ་མའི་རང་སྐྱོང་གི་རྨི་ལམ་ལུང་པ་གང་བཤད་པ་དེས་ཡིན་རྒྱུ་རེད།
གཞི་རྩའི་དོན་གྱི་བདག་པོ་གཞིས་ལུས་མི་དམངས་ཀྱིས་ཆེས་འཇིགས་སྣང་ཅན་གྱི་མེར་བསྲེག་ལས་འགུལ་དེ་ཏང་གི་སྔ་ཕྱི་བར་གསུམ་དུ་བོད་ཐོག་འཛིན་པའི་གདུག་རྩུབ་རང་བཞིན་ཅན་དང་། འཆར་གཞི་དང་ལག་བསྟར་རང་བཞིན་ལྡན་པའི་སྲིད་ཇུས་རབ་དང་རིམ་པ་དེས་ནད་མི་ཐེག་པར་འ་ཆད་འུ་ཐུག་གི་ལས་འགུལ་མཐའ་མ་དེ་རེད། འོན་ཀྱང་བཙན་བྱོལ་གྱི་སྐབས་འཚོལ་རིང་ལུགས་པའི་སྲིད་དོན་ཚོང་པའི་ཤོག་ཁག་གིས་ཏང་དང་ཁ་མཐུན་རྐུབ་མཐུན་གྱིས་ཕྱི་ཕྱོགས་ནས་ཏཱ་ལའི་ཁ་བྲལ་ཤོག་ཁག་གིས་ངན་སྐུལ་དང་བརྡབ་གསིག་བཏང་བར་བཤད་ཀྱིན་པ་རེད། དེ་ནི་ཏང་དང་དམིགས་ཡུལ་གཅིག་དང་ཁ་གཏད་གཅིག། དགྲར་འཛིན་གྱི་འདུ་ཤེས་གཅིག་གི་འོག་ནས་བྱུང་བ་ཞིག་རེད།
ཡག་པོ་འདུག ད་གཞོན་ལྷན་ཡང་འགུལ་སྐྱོད་རྒྱག་པའི་དུས་ལ་བསླེབས་ཡོད་ལ་བྱེས་གྱར་བོད་མི་ཚོ་ཡང་མར་དོན་དགོས་པའི་དུས་ལ་བསླེབས་པ་ཕྱིས་དྲག་པ་ལས་སྔ་དྲག་མེད། བོད་ནང་གི་བོད་མི་རྣམས་ནས་བློས་གཏོང་ཇི་ལྟར་བྱས་ཀྱང་ང་ཚོས་འདི་ནང་གྲགས་འགུལ་ཅི་ཡང་མེད་པར་བསྡོད་པ་དེ་ལས་རྒྱུ་འབྲས་དང་ཏག་ཏག་གཅིག་རྩ་བ་ནས་བསྡོད་ཀྱི་མེད། བསྟན་པ་ལགས་ནས་བོད་ལ་གྱོན་དགོས་པར་བཤད་པ་དེ་དོན་དངོས་ཀྱི་སྐད་ཆ་ཞིག་རེད་འདུག འོན་ཀྱང་གསར་གཏོད་ཀྱིི་བསམ་བློ་མེད་པ་ཞེས་པ་དང་། ཕན་ནུས་མེད་པ་ཞེས་པ་དེ་དག་ནི་བོད་དོན་འཐབ་རྩོད་ལ་ཁ་རྐྱང་རྐྱང་ལས་ལག་ལེན་ཀྱི་ཆ་ཤས་མི་ལེན་མཁན་གྱི་བོད་མི་རྣམས་པའི་ཁ་རྒྱུན་ལྟར་དོན་དངོས་ཐོག་གསར་གཏོད་ཀྱི་ལས་འགུལ་ཞིག་རྣམ་སྤྱོད་ལྡན་པའི་བསྟན་པས་ཀྱང་བསྟན་རྒྱུ་མེད་པ་དེ་རེད། ལར་ནས་རྒྱ་གར་ཡུལ་མི་བོད་པའི་གོམ་བགྲོད་ལ་གསུན་གཙེར་སྐྱེ་ངེས་ཞེས་པ་དེ་དོན་དངོས་ཐོག་གསུན་གཙེར་སྐྱེ་མཁན་དེ་རྒྱ་གར་བ་མ་ཡིན་པར་བསྟན་པ་ལྟ་བུའི་ཁ་ཕོ་ཅན་གྱི་བོད་པའི་འགན་འཁུར་མེད་པའི་བོད་རིགས་དག་རེད། བཞུགས་སྒར་རྡ་སར་མཚོན་ན་བོད་ནང་རང་ལུས་མེར་བསྲེགས་ཀྱི་ཡིད་སྐྱོའི་གནས་ཚུལ་ནམ་བྱུང་སྐབས་གཞུང་འབྲེལ་གྱི་མཆོད་འབུལ་དང་། གཞུང་འབྲེལ་མ་ཡིན་པ་རྡ་ས་ས་གནས་གཞོན་ནུ་དང་ས་གནས་བེུད་སོགས་ནས་མར་མེའི་ཁྲོམ་སྐོར་དང་སྐབས་རེར་མཆོད་འབུལ་བྱེད་པ་དེ་ལས་འགལ་མེད། འོན་ཀྱང་ང་ལྟ་བུས་ཁོང་ཚོས་གོ་བསྒྲིགས་བྱས་པའི་མྱང་ངན་དང་གདུང་སེམས་མཉམ་སྐྱེད་ཀྱི་ལས་འགུལ་དེ་ལ་མཉམ་བཞུགས་བྱེད་མ་ཐུབ་ཀྱང་དེ་དག་ལ་གསར་གཏོད་ཀྱི་བསམ་བློ་མེད་པ་དང་ནུས་པ་མེད་པའི་སྐྱོན་བརྗོད་བྱེད་པའི་སྤོབས་པ་ཡེ་ནས་མེད།
” བོད་ཀྱི་གཞོན་ནུ་ལྷན་ཚོགས་ལྟ་བུ་མཚོན་ན་བོད་ཕྱི་ནང་གཉིས་ཀྱི་བོད་མི་ཚོས་ཡིད་ཆེས་དང་རེ་བ་བྱེད་ཡུལ་ཞིག་ཆགས་ཡོད་སྟབས།” ‘ད་བཀའ་མོལ་འདི་འདྲ་ཏག་ཏག་བསྡད་ཀྱི་ཡོད་པ་མ་རེད་ལ། ཡིད་ཆེས་བྱེད་མཁན་ཡོད་མེད་བོད་མི་ཚོས་ཧ་གོ་ཡི་རེད། མེད་ན་ཡོད་ལབ་པས་ཅི་ཕན།
”རྒྱ་ནག་གི་དཔལ་འབྱོར་ཡར་རྒྱས་འཛམ་གླིང་གི་ཡང་རྩེར་སྙེག་བཞིན་པའི་སྐབས་འདིར་རྒྱ་གཞུང་གིས་གདེང་སྤོབས་ཆེན་པོས་བོད་ནང་གི་བོད་མི་ ༡༢༥ ལྷག་གི་གཅེས་པའི་ལུས་སྲོག་མེ་རུ་བསྒྲོན་ནས” ཟེར་པ་འདི་རིགས་ལ་གཟབ་གཟབ་བྱེད་རོགས། ཁྱེད་ཚོ་མི་ཁ་ཤས་ཤིག་གིས་བོད་སྤྱིའི་རྩ་དོན་ལ་ཡང་བསྐྱར་གནོད་འགལ་བཟོས། རང་སྲེག་ཡོང་རྒྱུར་འབོད་སྐུལ་བྱས་ན་འགན་ཁྱེད་ཚོས་ཁུར་མི་ཐུབ་ཅིང། གྱོང་ཚང་མ་ད་ལྟའི་སྒྲིག་འཛུགས་དང་ལྷག་པར་༸གོང་ས་མཆོག་ལ་འགེལ་གྱི་འདུག་པ་མཁྱེན་པ་གནང་རོགས།
གལ་སྲིད་ཁྱེད་ཚོས་འདྲ་མི་འདྲ་ལབ། བོད་ནང་རེ་བ་སྟོང་པ་སྤྲད་པ་སོགས་དངོས་ཤུགས་རྒྱུད་གསུམ་ནས་བྱས་ཚེ། དེར་མཐའ་གཅིག་ཏུ་ངོ་རྒོལ་ཡོད་ལ། ངོ་རྒོལ་བྱེད་ཀྱི་ཡིན། ༸གོང་ས་མཆོག་གིས་བོད་ནང་རེ་བ་སྟོང་པ་མ་སྤྲོད། ཕྱི་ལོག་ནས་སྐད་རྫིག་པོ་འདྲ་རྒྱབ་པ་དེས་དོན་ངོ་ཐོག་བོད་ནང་གི་བོད་མི་ཚོར་བརྡབ་གསིག་གཏོང་གི་འདུག་ཅེས་ཕེབས་པ་དེ་བརྩི་བཀུར་གནང་རོགས།
མ་གཞི་ནས་རང་སྲེག་གནང་མཁན་ཚང་མ་དབུ་མའི་ལམ་ནས་༸གོང་ས་མཆོག་བོད་དུ་གདན་འདྲེན་ཞུ་རྒྱུའི་ཆེད་ཡིན་སྟབས། གཞོན་ནུའི་དམིགས་ཡུལ་དང་ལས་འགུལ་ལ་འབྲེལ་བ་སྤུ་ཙམ་ཡང་ཡོད་པ་མ་རེད། རང་སྲེག་སྐོར་ལ་ལས་འགུལ་སྤེལ་བ་དང་སྐད་ཆ་བཤད་དུས་གཟབ་གཟབ་གཞན་ཞིག་བྱེད་དགོས་པ་དེ། སྟབས་མ་ལེགས་ན་ཆོལ་ཁའི་བར་འགལ་བ་སློང་གཞི་ཆགས་འགྲོ་གི་རེད། དོན་གྱི་བདག་པོ་ཚོར་ཕོག་ཐུག་བྱུང་ན་ཁྱེད་ཚོ་སྐབས་འཚོལ་པ་དང་ཚོང་ལས་པ། ཞལ་འདེབས་བསྡུ་མཁན། དཔའ་བོ་དཔའ་མོ་ཚོའི་བླ་བཙོང་པ་ཞེ་ཅིག་ལ་ངོས་འཛིན་བྱེད་ཀྱི་རེད་བསམས།
དེའི་ཆ་ནས་རང་སྲེག་སྐོར་ལས་འགུལ་སྤེལ་འཆར་ཡོད་ན། དང་པོར་དབུས་སྒྲིག་འཛུགས་ལ་བཀའ་མོལ་ཞུས། དེའི་རྗེས་སྐྱབས་རྗེ་ཀིརྟི་རིན་པོ་ཆེ་སོགས་ལའང་བཀའ་སློབ་ལམ་སྟོན་ཞུས་ན་མ་གཏོགས། བོད་ནང་ཡང་བསྐྱར་བརྡབ་གསིག་བཏང་བ་ཡིན་ན་ང་ཚོ་ནང་ཁུལ་འཆམ་གི་མ་རེད་ལ། ཁྱེད་ཚོ་རྒྱུན་ལས་མིང་ཐོག་པ་ཚོས་ཅི་ཙམ་མགོ་འཚོས་ཀྱི་ཡོད་མེད་ང་ཚོས་ཤེས་གསལ་རེད། དེའི་ཆ་ནས་བསམ་བློ་གཟབ་ནན་ཐོངས།
ལས་འགུལ་སྤེལ་བ་དེས་ཕན་དགོས་པ་རེད། བོད་ཀྱི་རྩ་དོན་ལ་ཕན་དགོས་པ་རེད། རང་སྲེག་གནང་མཁན་ཚོའི་ཞལ་ཆེམས་སྒྲུབ་རྒྱུར་ཕན་དགོས་པ་རེད། དེ་མིན་གང་དྲན་དྲན་བྱས་ན་བརྡབ་གསིག་བོད་རང་གི་སྤྱི་ཚོགས་ནང་ཡོང་གི་རེད། དེ་ཉམས་མྱོང་ཡོད་ཡོད་པ་རེད།
དང་ཐོག་གཞོན་ལྷན་གྱི་མགོ་གཙོ་རྣམས་བོད་ལ་གྱོན་མ་ཐུབ་པ་ག་རེ་ཡིན་ནམ། ལྷག་པར་གསར་འགོད་གསལ་བསྒྲགས་སྤེལ་སྐབས་བརྙན་རིགས་རྒྱ་ཁྱབ་ཆེ་བས་བོད་ལ་གྱོན་གལ་ཆེ་བར་མཐོང་། མིག་དཔེ་དགོས་ན་སྲིད་སྐྱོང་དང་ཚོགས་གཙོ་ལ་གཟིགས་དང་།
དེ་ནས་གཞན་ལྷན་གྱི་ད་ལྟའི་ལས་འགུལ་དེ་ནི་གསར་གཏོད་ཀྱི་བསམ་བློ་མེད་པར་ལས་འགུལ་ཁ་སྐོང་ཆེད་དུ་སྤེལ་བ་འདྲ་ཞིག་འདུག དངོས་གནས་བསམ་བློ་ནན་མོ་བཏང་ནས་ལས་འགུལ་ཕན་ནུས་ལྡན་པ་དེ་འདྲ་སྤེལ་རྒྱུའི་བློ་གྲོས་མེད་པ་འདྲ། རྡ་ས་དང་ལྡི་ལི་བར་གྱི་རྒྱ་གར་ཡུལ་མི་རྣམས་ད་གཟོད་བོད་པའི་གོམ་བགྲོད་ལ་གསུན་གཙེར་སྐྱེས་ངེས་ཡིན། མར་མེ་ཁྲོམ་སྐོར་དང་གོམ་བགྲོད་ལས་བརྒལ་བའི་ལས་འགུལ་ཞིག་ལ་ངེས་པར་བློ་རིག་སྒྲིམ་རན་པར་མཐོང་།
གཞོན་ནུ་ཚང་གི་ལས་འགུལ་དེ་ལམ་ལྷུང་ལྡན་པ་ཞིག་ཡོང་བའི་སྨོན་འདུན་ཞུ། གང་ཡིན་ཟེར་ན་གཞོན་ལྷན་གྱིས་དུས་ཡུན་རིང་པོ་ཞིག་ལ་ལས་འགུལ་སོགས་གང་ཡང་མ་སྤེལ་བར་གྲགས་འགུལ་མེད་པར་བསྡད་སོང་། ད་རེས་ལས་འགུལ་ཤུགས་ཆེན་ཙམ་སྤེལ་གནང་རོགས། ལས་འགུལ་དེ་དང་འབྲེལ་ནས་རྒྱ་ནག་གཞུང་ལ་གནོན་ཤུགས་དང་རྒྱལ་སྤྱིའི་ཐོག་ཏུ་སྒུལ་ཤུགས་ཐེབས་པའི་ཡིད་ཆེས་ཡོད།