གཟའ་ལྷག་པའི་ཉིན་ཡུལ་ཤུལ་ནང་ཆེན་རྫོང་གི་སྐྱ་སེར་གཉིས་ཀྱིས། མཁན་པོ་ཀརྨ་ཚེ་དབང་ཀློད་གྲོལ་ཆེད་རྫོང་བཙོན་ཁང་གི་མདུན་དུ་ངག་བཅད་ཀྱི་ལས་འགུལ་ཞིག་སྤེལ་ཡོད་འདུག
ཟླ་འདིའི་ཚེས་ ༡༤ ཉིན་ཡུལ་ཤུལ་ནང་ཆེན་རྫོང་ཁོངས་ཀྱི་བོད་མི་མང་པོ་ཞིག་ཇ་པ་དགོན་པར་བཅར་ཡོད་པ་དང་། ཚེས་ ༡༥ ཉིན་གྱི་སྔ་དྲོའི་ཆུ་ཚོད་ ༡༡ ཙམ་ལ་ཇ་པ་དགོན་པའི་དགེ་འདུན་པ་ ༦༠ ཙམ་དང་། ས་གནས་ཀྱི་མང་ཚོགས་ ༤༠༠ ཙམ་ནང་ཆེན་རྫོང་ཐོག་ཏུ་ཡོད་པའི་བཙོན་ཁང་མདུན་དུ་འཛོམས་ཏེ། ཉེ་ཆར་རྒྱ་ནག་གཞུང་གིས་འཛིན་བཟུང་བཙོན་འཇུག་བྱས་ཡོད་པའི་མཁན་པོ་ཀརྨ་ཚེ་དབང་ལགས་ཀློད་གྲོལ་ཆེད་ངག་བཅད་ཀྱི་ལས་འགུལ་ཞིག་སྤེལ་ཡོད་པ་མ་ཟད། ངག་བཅད་སྐབས་སྐྱ་སེར་གཉིས་ཀྱིས། རྒྱ་ནག་གཞུང་གིས་ ༢༠༡༣ ལོའི་ཟླ་ ༡༢ ཚེས་ ༦ ཉིན་དགོན་པའི་མཁན་པོ་འཛིན་བཟུང་བྱས་རྗེས་བོད་རང་སྐྱོང་ལྗོངས་ཆབ་མདོ་ཁུལ་ཆབ་མདོ་རྫོང་དུ་བཀག་ཉར་བྱས་ཏེ་ཉིན་གྲངས་ ༤༤ འགྲོ་བཞིན་ཡོད་པ་དང་། མི་མང་གིས་གུས་བཀུར་དང་མཚན་མཐོང་ཡོད་པའི་མཁན་པོ་ཁོང་འཛིན་བཟུང་བཀག་ཉར་བྱས་པ་ལུགས་མཐུན་མིན་སྟབས། ཁོང་ཀློད་གྲོལ་མ་ཐོབ་བར་སྐྱ་སེར་གཉིས་ཀྱིས་ངག་བཅད་གནང་སྟེ་སྡོད་རྒྱུ་ཡིན་ཞེས་བརྗོད་ཡོད་འདུག
ཕྱིས་སུ་ནང་ཆེན་རྫོང་སྤྱི་བདེ་ལས་ཁུངས་ཀྱི་མགོ་ཁྲིད་ཡོང་སྟེ། སྐྱ་སེར་གཉིས་ཀྱིས་ངག་བཅད་ལས་འགུལ་མཚམས་འཇོག་གནང་ཚེ། ཉིན་ ༥ ནང་ཚུད་མི་མང་ལ་མཁན་པོ་ཀརྨ་ཚེ་དབང་གི་གནས་ཚུལ་གསལ་བོ་བརྗོད་རྒྱུ་དང་། ཉེ་ཆར་འཛིན་བཟུང་བཀག་ཉར་བྱས་ཡོད་པའི་དགེ་འདུན་པ་ ༩ ཀློད་གྲོལ་གཏོང་རྒྱུའི་ཁས་ལེན་བྱས་སྟབས། ཆུ་ཚོད་ ༤ ཙམ་གྱི་རིང་ངག་བཅད་གནང་རྗེས་སྐྱ་སེར་གཉིས་ཀ་ཕྱིར་ལོག་ཡོད་འདུག
གསར་འགོད་པ། དོན་གོ
