ཀིརྟིའི་དགེ་རྩ་ཚོགས་པས་དྷ་ས་ཁུལ་གྱི་བོད་རིགས་ཉམ་ཐག་དང་མེག་གྷན་ཁྲོམ་གཞུང་གི་རྒྱ་གར་སྤྲང་པོ་ཚོར་ཉལ་ཆས་ཀྱི་སྦྱིན་པ་གཏོང་གི་འདུག
ཀིརྟིའི་དགེ་རྩ་ཚོགས་པའི་ངོས་ནས་འཆར་ཅན་ལྟར་ལོ་རེར་བོད་མིའི་ཤེས་ཡོན་ཡར་སྐུལ་ཆེད་སློབ་ཡོན་རོགས་རམ་དང་ཉམ་ཐག་རྒས་གཅོང་ལ་རོགས་སྐྱོབ་ཀྱི་ལས་གཞི་འདྲ་མིན་སྒྲུབ་བཞིན་ཡོད་པ་ལྟར། རེས་གཟའ་ཟླ་བའི་ཉིན་གྱི་ཕྱི་དྲོའི་ཆུ་ཚོད་ ༢ ནས་ ༤ བར་དྷ་ས་ཁུལ་གྱི་བོད་རིགས་ཉམ་ཐག་དང་དྷ་སའི་ཁྲོམ་གཞུང་གི་རྒྱ་གར་སྤྲང་པོ་ཚོར་ཉལ་ཆས་ཀྱི་སྦྱིན་པ་བཏང་བའི་སྐོར་ལ་གསར་འགོད་པས་རྒྱུས་ལོན་བྱས་ཡོད།
ཀིརྟིའི་དགེ་རྩ་ཚོགས་པའི་ཚོགས་གཙོ་རྒན་བློ་བཟང་ཤེས་རབ་ལགས་སུ་སྦྱིན་གཏོང་གི་དགོས་དམིགས་སྐོར་དྲིས་པར་ཁོང་གིས། “༧སྐྱབས་རྗེ་ཀིརྟི་རིན་པོ་ཆེའི་དགོངས་གཞི་ལྟར་བླ་མའི་བླ་བྲང་དེ་དམངས་གཙོ་ཅན་གྱི་ཚོགས་པའི་ངོ་བོར་བསྒྱུར་ཏེ་ཀིརྟིའི་དགེ་རྩ་ཚོགས་པ་ཞེས་དགེ་རྩ་ཚོགས་པ་ཞིག་གི་ངོ་བོར་བསྒྱུར་ཡོད་པ་དང་། ཚོགས་པ་འདིའི་ངོས་ནས་རྒས་གཅོང་ལ་རོགས་སྐྱོར་དང་སློབ་ཡོན་རོགས་རམ། ནད་པ་ཉམ་ཐག་ལ་རོགས་སྐྱོབ་བཅས་སྡེ་ཚན་གསུམ་ཡོད་པ་ལས། ད་རེབ་ཉལ་ཆས་(ཀམ་པྰ་ལེ)སྦྱིན་གཏོང་འདི་རྒན་འཁོགས་དང་ནད་གཅོང་ལ་རོགས་སྐྱོར་བྱེད་པའི་ལས་གཞིའི་འོག་ནས་འགྲོ་བཞིན་ཡོད་པ་རེད། ནམ་རྒྱུན་ནས་སྤྲང་པོ་ཚོ་སྤྲང་པོ་རང་བྱས་ནས་གྲལ་རིམ་ཞིག་གི་ངོ་བོའི་ཐོག་ནས་གནས་བསྡད་པ་མ་གཏོགས་སྤྱི་ཚོགས་ཐོག་སོ་སོའི་རྐང་པའི་སྒང་ལངས་མ་ཐུབ་པའི་དཀའ་ངལ་ཞིག་ག་ས་གང་དུ་ཡོད་སྟབས། ང་ཚོས་ཉིན་བདུན་གྱི་ཆུ་ཚོད་གཏན་འབེབས་བྱས་ཏེ་དྷ་རམ་ས་ལའི་ས་ཆ་ཁུག་ཀྱོག་དག་ཏུ་གསལ་བསྒྲགས་བྱས་ཡོད་ལ། དམིགས་ཡུལ་གཙོ་བོ་ཉམ་ཐག་དང་ལྷག་པར་དུ་རྒན་འཁོགས་ལ་གྱོན་གོས་ཀྱི་དཀའ་ངལ་ཡོད་སྟབས། དགུན་འཁྱག་གི་དུས་འདིར་ཁོ་ཚོར་ཕན་ཞིག་ཐོགས་ན་བསམ་པ་ཡིན། ”བརྗོད་བྱུང་།
ཐེངས་འདིའི་སྦྱིན་གཏོང་ལ་དངུལ་ཅི་ཙམ་བཏང་ཡོད་པ་དང་། ཉམ་ཐག་ག་ཚོད་ཅིག་ལ་སྤྲད་ཡོད་པའི་སྐོར་ཁོང་གིས། “དགེ་རྩ་ཚོགས་པ་བཙུགས་པ་ནས་བཟུང་རོགས་སྐྱོར་སྡེ་ཚན་གསུམ་དེ་ཡོད་པ་རེད། ད་ལྟ་རྒྱུན་ལས་སྐབས་གཉིས་པ་ཡིན་ལ། རྒྱུན་ལས་ལོ་གསུམ་གྱི་ནང་ལོ་རེར་རོགས་སྐྱོར་སྡེ་ཚན་རེ་རེར་ཧིན་སྒོར་འབུམ་ ༣ རེ་འཇོག་དགོས་སྟབས། ད་ལྟའི་ཆར་རོགས་སྐྱོར་སྡེ་ཚན་གཅིག་ལ་ཧིན་སྒོར་འབུམ་ ༡༦ ཡས་མས་ཡོད་པ་དང་། དེ་ལ་ལོ་རེར་སྐྱེད་ཀ་ཅི་ཙམ་ཡོད་ན་དེས་རོགས་སྐྱོར་བྱེད་ཀྱི་ཡོད་པ་རེད། ད་ལོ་ཡིན་ན་ཉལ་ཆས་ ༥༠ ཐམ་པ་ཉོས་ཤིང་། ཉལ་ཆས་རེ་རེར་ཧིན་སྒོར་ ༡༨༠༠ ཡས་མས་སྤྲད་པ་རེད། ཟླ་འདིའི་ཕྱི་ཚེས་ ༢༠ ཉིན་གྱི་ཕྱི་དྲོར་ཆུ་ཚོད་ ༢ རིང་རྒྱ་གར་དང་བོད་པ་སོགས་མི་རིགས་དབྱེར་མེད་ཀྱི་ཐོག་ནས་ཉལ་ཆས་ ༢༠ མ་ཟིན་ཙམ་སྤྲད་ཚར། ང་ཚོས་རྒན་གསོ་ཁང་ལ་འབྲེལ་བ་བྱེད་སྐབས། འབུམ་སྡེ་ལ་ནས་ཡོང་བའི་རྒན་འཁོགས་སྐྱོ་བོ་ ༡༥ ཙམ་ཡོད་ལབ་སོང་བས་ཁོ་ཚོར་སྤྲོད་འཆར་ཡོད། དེ་མིན་གྱི་ལྷག་མ་རྣམས་ཀྱང་མུ་མཐུད་དུ་སྤྲོད་རྒྱུ་ཡིན། སྤྱིར་བཏང་དོ་བདག་རང་ཉིད་ལེན་དུ་ཡོང་དགོས་ཀྱང་། ནད་པ་ཡོང་མི་ཐུབ་མཁན་དང་དྷ་སའི་ཁྲོམ་གཞུང་དུ་རྒྱུན་འདུག་བྱས་པའི་རྒྱ་གར་གྱི་སྤྲང་པོ་ཚོར་ང་ཚོ་ཕར་སོང་ནས་སྤྲོད་ཀྱི་ཡོད། ”ཅེས་བརྗོད་སོང་།
གསར་འགོད་པ། པདྨ་མཚོ།
“བླ་མའི་བླ་བྲང་དེ་དམངས་གཙོ་ཅན་གྱི་ཚོགས་པའི་ངོ་བོར་བསྒྱུར་ཏེ་ཀིརྟིའི་དགེ་རྩ་ཚོགས་པ་ཞེས་དགེ་རྩ་ཚོགས་པ་ཞིག་གི་ངོ་བོར་བསྒྱུར་ཡོད།”
འདི་ལ་དགེ་སྐྱོན་གང་ཆེ་བཤད་མི་ཤེས། དགོན་སྡེ་ཡིན་ཕྱིར། དགེ་བའི་བགྱི་བ་དག་ལ་སྙིང་ནས་ཡི་རང་ཞུ།
ད་ཐང་ཀིརྟིའི་དགེ་རྩ་ཚོགས་པའི་ཉམ་ཐག་ཚོ་ལ་རོགས་སྐྱོར་གནང་གི་ཡོད་པ་འདི་ནི་རླབས་ཆེན་གྱི་བྱ་བ་ཞིག་སྒྲུབ་པ་མཐོང་སོང་གང་ཡིན་ཟེར་ན་དེང་སང་བླ་མ་ཡིན་ན་རང་ཉིད་རྒྱུ་ཆེན་པོ་ཡིན་དགོས་པ་བསམ་མཁན་ལས་རང་ཉིད་ལ་ཡོད་པ་ཉམ་ཐག་ཚོ་ལ་སྤྲད་དགོས་བསམ་མཁན་མེད་པ་ལྟ་བུ་རེད་དེ་འདྲ་ཡིན་དུས་ཧ་ཀྱང་ཕན་ཆེན་་པོ་མ་ཐོག་རུང་མིག་ལྟོས་ཡག་པོ་ཞིག་འཇོག་ཐུབ་པས་ན་སྙིང་ནས་ཀིརྟིའི་དགེ་རྩ་ཚོགས་བའི་དབུ་འཛིན་གྱི་གཙོས་རྒྱུན་ལས་རྣམ་པ་ལས་ཡོངས་ལ་ཐུགས་རྗེ་ཆེ་ཞུ།
བཙན་བྱོལ་ནང་དུ་ཀིརྟིའི་དགེ་རྩ་ཚོགས་པ་དང་འདྲ་པ་དཀོན་པོ་རེད་ཅེས་བཤད་ཆོག
བོད་པ་སྤྲང་པོ་འདི་ཚོའི་བཞིན་མདྭངས་ཧ་ཅང་ལེགས་པོ་དངུལ་མི་ལ་བཅོལ་ནས་མ་རག་པས་ཉིན་ང་དགའ་བསུ་ཞུ་ཆོག།།།