རེས་གཟའ་ཟླ་བ་ཉིན་ཝེ་ཊི་ནམ་ཀང་ལིན་ཞིང་ཆེན་ཁྲིམས་ཁང་གིས་དུག་རྫས་ནག་ཚོང་བ་ ༣༠ ལ་སྲོག་ཁྲིམས་དང་ ༡༣ ལ་ཚེ་བཙོན་ཁྲིམས་ཐག་བཅད་འདུག
ཟླ་འདིའི་ཕྱི་ཚེས་ ༢༠ ཉིན་ཝེ་ཊི་ནམ་ཀང་ལིན་ཞིང་ཆེན་ཁྲིམས་ཁང་གིས་དུག་རྫས་ནག་ཚོང་བ་ ༣༠ ལ་སྲོག་ཁྲིམས་དང་། མི་ ༡༣ ཚེ་བཙོན། མི་ ༤༦ ལ་ཁྲིམས་ཆད་ལྕི་ཤོས་ལོ་ངོ་ ༢༠ དང་ཡང་ཤོས་ཉེན་བརྡ་བཅས་ཀྱི་ཐག་གཅོད་བྱས་པ་ཕྱིར་བསྒྲགས་བྱས་འདུག
ཟླ་འདིའི་ཕྱི་ཚེས་ ༣ ཉིན་ནས་བཟུང་ཁྲིམས་བཤེར་བྱས་པ་བརྒྱུད་ནག་ཚོང་ཉེས་དོན་དེ་རྒྱལ་སྤྱིའི་དུག་ཚོང་རུ་ཁག་ ༤ ནས་ཡིན་པ་དང་། ༢༠༠༦ ནས་ ༢༠༡༢ བར་ཝེ་ཊི་ནམ་དང་རྒྱ་ནག་ཏུ་དུག་རྫས་ཏུན་ ༢ མ་ཟིན་ཙམ་ནག་ཚོང་བྱས་ཡོད་སྟབས། ཝེ་ཊི་ནམ་ལོ་རྒྱུས་ཁྲོད་ཀྱི་དུག་རྫས་ནག་ཚོང་གི་ཉེས་དོན་ཚབས་ཆེ་ཤོས་དང་གཞི་རྒྱ་ཆེ་ཤོས་ཡིན་ལ། ཐེངས་འདིའི་ཉེས་དོན་དང་འབྲེལ་བའི་མི་ ༨༩ ལ་ཁྲིམས་བཤེར་བྱས་པའི་ནང་བུད་མེད་ ༩ ཡོད་པ་དང་། ནག་ཚོང་བ་ཚང་མ་ཝེ་ཊི་ནམ་ནས་ཡིན་འདུག
གསར་འགོད་པ། པདྨ་མཚོ།
