ན་ནིང་སི་པན་རྒྱལ་ཡོངས་ཁྲིམས་ཁང་གིས་རྒྱ་ནག་གི་སྲིད་འཛིན་ཟུར་བ་དམར་ཤོག་ཚོགས་པའི་མགོ་ཁྲིད་ལྔ་བོད་ནང་གི་འགྲོ་བ་མིའི་ཐོབ་ཐང་ལ་རྡོག་རོལ་དང་མི་རིགས་རྩ་མེད་བཏང་བའི་ནག་ཉེས་འོག་འཛིན་བཟུང་བྱེད་དགོས་པའི་བཅད་ཁྲ་བཏང་ཡོད་པ་དང་། རྒྱ་གཞུང་གིས་སི་པན་གཞུང་ལ་གནོན་ཤུགས་སྤྲད་དེ་བཅད་ཁྲ་དེ་ཕྱིར་འཐེན་བྱེད་དགོས་སྐོར་བརྗོད་ཡོད་འདུག འདི་གའི་གསར་འགོད་པས་སི་པན་རྒྱལ་ཡོངས་ཁྲིམས་ཁང་ལ་དཔང་མི་བྱེད་མཁན་ཆབ་སྲིད་བཙོན་ཟུར་དགའ་ལྡན་གྲྭ་བག་གྲོ་ལགས་སུ། སི་པན་གྱི་རྒྱལ་ཡོངས་ཁྲིམས་ཁང་ལ་ཐོག་མའི་ཞུ་གཏུག་གི་བྱུང་རིམ་དང་།
སི་པན་གཞུང་གིས་བཅད་ཁྲ་ཕྱིར་འཐེན་བྱེད་སྲིད་མིན་སྐོར་ལ་བཅར་འདྲི་ཞུས་ཏེ་ཁོང་གིས་ངོ་སྤྲོད་གནང་བ་ལྟར་ན། ༢༠༠༨ ལོའི་ཟླ་ ༥ ཚེས་ ༡༩ ཉིན། ད་ལྟའི་སི་པན་ནང་ཡོད་པའི་བོད་ཁང་གི་འགན་འཛིན་དང་ཡུ་རོབ་སྤྱི་འཐུས་དགེ་བཤེས་ཐུབ་བསྟན་དབང་ཆེན་ལགས། སི་པན་བོད་དོན་རྒྱབ་སྐྱོར་ཚོགས་པ་བཅས་ཀྱིས་སི་པན་ཁྲིམས་ཁང་ལ་རྒྱ་ནག་གི་མགོ་ཁྲིད་ལྔ་མིང་འདོན་གྱིས་ཞུ་གཏུག་ཡི་གེ་དང་དཔང་རྟགས་ཡིག་ཆ་སོགས་སྤྲད་པ་ཁྲིམས་ཁང་གིས་ངོས་ལེན་བྱས་ཡོད་པ་དང་། དེར་དཔང་མི་བྱེད་མཁན་ཆབ་སྲིད་བཙོན་ཟུར་རྟ་ནག་འཇིགས་མེད་བཟང་པོ་ལགས་དང་དཔལ་ལྡན་རྒྱ་མཚོ་ལགས། ངག་དབང་གསང་གྲོལ་ལགས འཇམ་དཔལ་སྨོན་ལམ་ལགས། གྲྭ་བག་གྲོ་ཁོ་རང་བཅས་ཡིན་འདུག
སྐབས་དེར་རྒྱ་གཞུང་གིས་སི་པན་གཞུང་ལ་གནོན་ཤུགས་སྤྲད་དེ་ཞུ་གཏུག་དེ་གནས་སྐབས་རིང་ཕྱིར་འགྱངས་བྱས་ཡོད་ཀྱང་། སྔ་ལོར་བསྐྱར་དུ་ཞུ་གཏུག་བྱེད་སྐབས་ཁྲིམས་ཁང་དེའི་ཁྲིམས་དཔོན་བཞི་ཙམ་གྱིས་དམིགས་འགན་བཞེས་ཏེ། རྒྱ་ནག་གི་མགོ་ཁྲིད་ལྔས་བོད་ནང་གི་བོད་མི་ཚོར་སྡུག་སྦྱོང་མནར་གཅོད་དང་དམར་གསོད་བཏང་པ། བོད་མིའི་འགྲོ་བ་མིའི་ཐོབ་ཐང་རྡོག་རོལ་བཏང་བ། བོད་མི་རིགས་རྩ་མེད་གཏོང་བའི་སྲིད་བྱུས་སྤེལ་བ་བཅས་ཀྱི་དཔང་རྟགས་ཁུངས་བཙན་བྱུང་བའི་ངོས་འཛིན་ཐོག ༢༠༡༣ ལོའི་ཟླ་ ༡༡ ཚེས་ ༡༨ ཉིན་ཁྲིམས་ཁང་གིས་རྒྱ་ནག་གི་དཔོན་རིགས་ལྔ་སྟེ་སྲིད་འཛིན་ཟུར་པ་ཅང་ཙེ་མིན་དང་། ལི་ཕིན་(li peng)། ཆོད་ཧྲི་ (Qiao shi)། ཁྲིན་ཁོས་ཡོན་་(chen kuiyuan) ཕིན་པེ་ཡུན (Peng peiyun)་སོགས་འཛིན་བཟུང་བྱེད་དགོས་པའི་བཅད་ཁྲ་བཏང་ཡོད་པ་མ་ཟད། གལ་སྲིད། ཁོང་ཅག་སི་པན་རྒྱལ་ཡོངས་ཁྲིམས་ཁང་ངོས་ལེན་ཡོད་པའི་ཡུ་རོབ་རྒྱལ་ཁབ་གང་རུང་ནང་འབྱོར་ཚེ་འཛིན་བཟུང་བྱེད་དགོས་པའི་གསལ་བསྒྲགས་བྱས་ཡོད་འདུག དེ་བཞིན་སྲིད་འཛིན་ཟུར་བ་ཧོའི་ཅིན་ཐའོ་ལ་ཁྲིམས་བཤེར་བྱ་རྒྱུ་ཡིན་སྐོར་བརྗོད་ཡོད་འདུག
ཐེངས་འདིར་བོད་མི་ཚོས་སི་པན་ཁྲིམས་ཁང་ལ་ཞུ་གཏུག་བྱས་པའི་གྱོད་དོན་དེར་དམིགས་བསལ་ཐུགས་འགན་བཞེས་མཁན་ནི། སི་པན་ཁྲིམས་ཁང་གི་ཁྲིམས་དཔོན་གྲགས་ཆེན་སྐུ་ཞབས་གྷར་ཛོན་ (Baltasar Garzon)ཞུ་བ་དང་། ཁྲིམས་རྩོད་པ་སྐུ་ཞབས་མོ་རེ་ནོལ་ (Ismeal Moreno) དང་། སྐུ་ཞབས་པེ་ཌི་རའ་ཛི་ (Santiago Pedraz) སོགས་ཡིན་འདུག
ཉེ་ལམ་རྒྱ་ནག་གིས་སི་པན་གཞུང་ལ་གནོན་ཤུགས་སྤྲད་དེ་བཅད་ཁྲ་དེ་ཕྱིར་འཐེན་བྱེད་དགོས་སྐོར་སོགས་བརྗོད་པར་བརྟེན། སི་པན་རྒྱལ་ཡོངས་ཁྲིམས་ཁང་ལ་ནག་ཉེས་ཞུ་གཏུག་བྱེད་པར་སི་པན་གྱི་མི་སེར་ལག་འཁྱེར་ཡོད་པ་ཙམ་མ་ཡིན་པར། སི་པན་ནང་ས་སྐྱེས་རྡོ་སྐྱེས་ཤིག་ཡིན་དགོས་པའི་གླེང་སློང་འབྱུང་བཞིན་ཡོད་པའི་ཐད། གྲྭ་བག་གྲོ་ལཊ་ཀྱིས། “རྒྱ་ནག་གི་མགོ་ཁྲིད་ལྔར་བཅད་ཁྲ་བཏང་རྗེས་རྒྱ་གཞུང་གིས་སི་པན་གཞུང་ལ་གནོན་ཤུཊ་ཆེན་པོ་སྤྲོད་བཞིན་ཡོད་སྟབས། སི་པན་སྲིད་བློན་གྱིས་ཁྲིམས་ཀྱི་གནད་དོན་དེ་འགྱུར་བ་གཏོང་དགོས་པའི་བསམ་ཚུལ་བརྗོད་ཡོད་ཀྱང་། སི་པན་ཕྱི་སྲིད་ལྷན་ཁང་གིས་དེ་ནི་ཁྲིམས་ཀྱི་གནད་དོན་ཞིག་ཡིན་སྟབས། ང་ཚོས་ཁྲིམས་ཁང་གི་ཐག་གཅོད་ལ་ཐེ་གཏོགས་བྱེད་ཐབས་མེད་ཅེས་གསལ་བཤད་གནང་འདུག ཟླ་སྔོན་མར་བོད་རང་སྐྱོང་ལྗོངས་ཀྱི་གོ་སྒྲིག་འོག་སྐུ་ཚབ་ཚོཊ་ཆུང་ཞིག་ཡུ་རོབ་ནང་གཟིཊ་སྐོར་གནང་སྐབས་ཀྱང་། བཅད་ཁྲ་དེ་ངེས་པར་དུ་ཕྱིར་འཐེན་བྱེད་དགོས་པ་དང་། གལ་སྲིད་ཕྱིར་འཐེན་མ་བྱས་ཚེ་རྒྱ་ནག་གིས་སི་པན་དང་ཚོང་འབྲེལ་ཁག་མཚམས་འཇོག་བྱེད་རྒྱུ་ཡིན་སྐོར་བརྗོད་འདུག་ཟེར།
གསར་འགོད་པས་རྒྱ་ནག་གི་གནོན་ཤུགས་ལ་བརྟེན་ཏེ་སི་པན་ཁྲིམས་ཁང་གི་བཅད་ཁྲ་དེ་ཕྱིར་འཐེན་བྱེད་སྲིད་མིན་དགོངས་ཚུལ་དྲིས་པར། ཁོང་གིས། ཁྲིམས་ཁང་གིས་ཐག་གཅོད་བྱས་ནས་བཅད་ཁྲ་ཡོངས་བསྒྲགས་བྱས་ཚར་བ་རེད། དེ་ཕྱིར་འཐེན་བྱེད་རྒྱུ་ཁག་པོ་རེད། གཞིར་རྩའི་སི་པན་རྒྱལ་ཡོངས་ཁྲིམས་ཁང་གི་རྩ་འཛིན་ལ་འགྱུར་བ་གཏོང་དགོས་པ་ཡིན་ན། སི་པན་གྲོས་ཚོགས་ནང་མང་མོས་སྤྱི་མོས་གང་རུང་འཐོབ་དགོས་སྟབས། སི་པན་དམངས་གཙོའི་གཞུང་རེད། དེ་ལས་སླ་བོའི་ཐོག་ནས་འགྱུར་བ་གཏོང་ཐུབ་ཡོད་པ་མ་རེད། དངོས་གནས་བྱས་ན་རྒྱ་ནག་གི་བྱེད་སྟངས་དེ་སི་པན་གྱི་ནང་སྲིད་ལ་ཐེ་བྱུས་བྱས་པ་ཞིག་ཆགས་ཡོད། རྒྱ་གཞུང་གིས་བོད་ནང་ལ་འཇིགས་སྐུལ་བྱེད་པ་ནང་བཞིན་སི་པན་ནང་འཇིགས་སྐུལ་བྱ་རྒྱུ་དཀའ་ལས་ཁག་པོ་རེད། ཅེས་བརྗོད་སོང་།
གྲྭ་བག་གྲོ་ལགས་ཀྱིས་གནད་དོན་དེའི་ཐད་ཁོ་རང་སྒེར་ངོས་ནས་ལས་འགུལ་ཞིག་སྤེལ་འཆར་ཡོད་པའི་སྐོར་ངོ་སྤྲོད་གནང་དོན། ངས་ད་ལྟ་༼གདུག་རྩུབ་ཅན་གྱི་སྲིད་འཛིན།༽ཞེས་པའི་དེབ་ཅིག་འདོན་བཞིན་ཡོད། དེའི་ནང་སྲིད་འཛིན་ཟུར་བ་ཧུའུ་ཅིན་ཐའོ་དང་བོད་རང་ལྗོངས་ཀྱི་མགོ་ཁྲིད་ཟུར་བ་ཀྲང་ཆི་ལེ། ད་ལྟའི་མགོ་ཁྲིད་ཁྲིན་ཆོན་ཀོ་སོགས་ཀྱིས་བོད་ནང་གདུག་རྩུབ་ཅན་གྱི་སྲིད་བྱུས་ལག་བསྟར་བྱས་པའི་གནས་ཚུལ་ཕྱོགས་བསྒྲིགས་བྱས་ཡོད། ལྷག་པར་དུ་ ༡༩༨༨ དང་ ༡༩༨༩ ལོར་ཧུའུ་ཅིན་ཐའོ་ཡིས་ལྷ་སར་དྲག་གནོན་བྱས་པ་དང་ཀུན་གཟིགས་པཎ་ཆེན་རིན་པོ་ཆེ་སྐུ་བཀྲོངས་པ་སོགས་བཀོད་ཡོད། དེབ་འདི་སི་པན་སྲིད་བློན་དང་གྲོས་ཚོགས་འཐུས་མི་རྣམ་པ། དེ་བཞིན་གཞུང་དང་གཞུང་འབྲེལ་མ་ཡིན་པའི་ཚོགས་སྡེ་མི་མང་ཡོངས་ལ་ཕུལ་ནས་རྒྱབ་སྐྱོར་ཡོང་བ་དང་། རྒྱ་ནག་གི་མགོ་ཁྲིད་ཚོའི་ནག་ཉེས་བསྐྱར་དུ་ཐེར་འདོན་དང་སྦྲགས་ཁྲིམས་ཁང་གི་ཐག་གཅོད་དེ་འགྱུར་བ་མི་གཏོང་རྒྱུར་འབོད་སྐུལ་ཞུ་རྒྱུ་ཡིན” ཞེས་བརྗོད་བྱུང་། སི་པན་ཁྲིམས་བཟོ་ལྷན་ཚོགས་ཀྱིས་ ༡༩༨༥ ལོའི་ཟླ་ ༧ ཚེས་ ༡ ཉིན་སི་པན་རྒྱལ་ཡོངས་ཁྲིམས་ཁང་གིས་སི་པན་རྒྱལ་ཁོངས་དང་རྒྱལ་ཁོངས་མ་ཡིན་པའི་གང་ཟག་སུ་ཞིག་གིས་མི་རིཊ་རྩ་མེད་དང་འཇིཊ་སྐུལ། འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བ་སོགས་ཀྱི་གནས་ཚུལ་རིགས་ཐག་གཅོད་བྱེད་པའི་དབང་ཚད་སྤྲད་ཡོད་འདུག རྒྱལ་སྤྱིའི་ཡོངས་ཁྱབ་ཁྲིམས་གཞི་ངོས་ལེན་ཡོད་པའི་རྒྱལ་ཁབ་ཁག་ནི། ཁེ་ཎ་ཌ་དང་ཨོ་སི་ཊི་ལི་ཡ། བྷེལ་ཇམ། དབྱིན་ཡུལ། ཧྥ་རན་སི། འཇར་མན། ཨི་ཛི་རེལ། ཨར་ལན་ཌི། མ་ལི་ཤི་ཡ། ཧྥིན་ལན་ཌི་བཅས་ཡིན་འདུག
གསར་འགོད་པ། ལྷ་སྐྱབས་རྒྱལ།
བོད་ནང་སྐུ་ཞོག་དེ་ཚོ་མདུན་ལ་ཐོན་ཏེ་བོད་དོན་ཐོག་རླབས་ཆེན་གྱི་བྱས་རྗེ་འཇོག་དང་བཞག་གནང་ཡོད། བཙན་བྱོལ་ནང་དུའང་སྐུ་ཞོག་དེ་ཚོས་བོད་དོན་ལ་འབུར་དུ་ཐོན་པའི་ཕྱག་ལས་རླབས་ཆེན་གནང་ཡོད། ངོ་མ་གཟན་གཤམ་དམར་པོ་དེ་རྒྱ་དར་དམར་པོའི་ཁ་གཏད་རེད།
བདེན་པ་བདེན་པ།
ད་རྒྱ་གཞུང་གིས་བཙན་ཤུགས་ཆེ་ཙམ་འདུག ཡིན་ན་ཡང་ནམ་ཞིག་བདེན་པ་རྒྱལ་ངེས་ཡིན་
ད་དྲང་བདེན་གྱི་ཚད་གཞི་དང་ཁེ་ཕན་གྱི་ཚད་གཞི་སྡུར་རྒྱུ་རེད། གང་ལྟར་བཅད་ཁྲ་དེ་ཙམ་ཞིག་བཏང་བ་ཙམ་གྱིས་ཡག་བྱུང་ཞུ་རྒྱུ་ལས་ཅང་མེད་དོ།
གལ་སྲིད་གཏན་དགྲ་རྒྱ་ནག་ཚང་གིས་སི་པན་དང་ཚོང་གི་འབྲེལ་བ་མཚམས་འཇོག་བྱས་པ་ཡིན་ན། སི་པན་གཞུང་གིས་སི་པན་ཁྲིམས་ཁང་གི་བཅད་ཁྲ་དེ་ཕྱིར་འཐེན་བྱེད་སྲིད་པ་རེད། དེ་གཙོ་བོ་སི་པན་གྱི་དཔལ་འབྱོར་ཁེ་ཕན་ལ་རེག་ལས་པ་རེད་བསམ།