རྒྱ་གཞུང་གིས་བྲག་མགོར་དམག་མི་མང་པོ་འགྲེམས་འཇོག་བྱས་ཏེ་མི་མང་ལ་གང་བྱུང་སྔོག་བཤེར་བྱས་པ་དང་མི་མང་གི་འགྲོ་སྡོད་ལ་དམ་དྲག་སྟངས་འཛིན་བྱེད་ཀྱི་ཡོད་འདུག
གྲྭ་འཇམ་དབྱངས་དཔལ་ལྡན་ལགས་ཀྱིས་འདི་གར་གནས་ཚུལ་བཏང་འབྱོར་ལྟར་ན། ཟླ་འདིའི་ཕྱི་ཚེས་ ༢༧ ཉིན་ནས་བཟུང་རྒྱ་ནག་གཞུང་གིས་དཀར་མཛེས་ཁུལ་བྲག་མགོ་རྫོང་ཐོག་ཏུ་དམག་མིའི་རླངས་འཁོར་དང་ལྕགས་ཁྲབ་འཁོར་ལོ་མང་པོ་འགྲེམས་འཇོག་བྱས་པ་དང་། རྫོང་གི་སྲང་ལམ་དུ་དམག་མི་ཚོས་རུ་སྒྲིག་བྱས་ཏེ་དམག་རྩེད་བྱས་པ་སོགས་མི་མང་ལ་སུན་གཙེར་རབས་དང་རིམ་པ་བཟོ་བཞིན་པ་མ་ཟད། བོད་མི་ཚོའི་ཐོབ་ཐང་ལག་ཁྱེར་བསྔོག་བཤེར་བྱེད་པ་དང་། ཟ་ཁང་དང་ཇ་ཁང་སོགས་སུ་འདུ་འཛོམས་ལ་བཀག་འགོག ས་གནས་མི་མང་གི་འགྲུལ་བཞུད་ལ་བཀག་སྡོམ་སོགས་བྱས་ཏེ་དམ་དྲག་ལྟ་རྟོག་བྱེད་ཀྱི་ཡོད་འདུག
ཕྱི་ལོ་ ༢༠༡༢ ལོའི་ཕྱི་ཟླ་ ༡ ཚེས་ ༢༣ ཉིན་བྲག་མགོ་རྫོང་ཐོག་ཏུ་སྐྱ་སེར་གཉིས་ཀྱིས་རྒྱ་གཞུང་གི་དྲག་གནོན་དབང་བསྒྱུར་སྲིད་ཇུས་ལ་ངོ་རྒོལ་བྱས་ཡོད་པ་དང་། སྐབས་དེར་རྒྱ་གཞུང་གི་དམག་མི་དང་ཉེན་རྟོག་པས་མི་མང་ཁྲོད་གང་བྱུང་མེ་མདའ་བརྒྱབ་ཏེ་བོད་མི་ཁག་ཅིག་དམར་གསོད་བཏང་ཡོད་པ་མ་ཟད། བོད་མི་མང་པོ་ཞིག་སྔ་རྗེས་འཛིན་བཟུང་བྱས་ཏེ་བཙོན་འཇུག་ཁྲིམས་ཐག་བཅད་ཡོད།
གསར་འགོད་པ། དོན་གོ
